మైమానా: అప్ఘానిస్తాన్లో భార్యతో గొడవపడి ఆమె ముక్కు కోసేసిన భర్త కోసం పోలీసులే కాదు ఏకంగా తాలిబన్లు కూడా వెతుకుతున్నారు. అతడి కోసం తాము తీవ్రంగా గాలింపులు జరుపుతున్నామని, అతడు ఎక్కడ ఉన్నా పట్టుకొని అసలు ఇస్లాం మతానికి వ్యతిరేకంగా ఓ మహిళపై అలాంటి పని ఎందుకు చేయాలో ప్రశ్నించి వివరాలు తెలుసుకున్నాక తాము ఏం చేయాలో అదే చేస్తామని అఫ్ఘానిస్తాన్ తాలిబన్ల గ్రూపు అధికార ప్రతినిధి జబీనుల్లా ముజాహిద్ తెలిపాడు.
 
 అప్ఘానిస్తాన్ లోని ఘోర్మాక్ జిల్లాలో రెజాగుల్ (20) అనే మహిళ ముక్కును ఆమె భర్త ముహమ్మద్ ఖాన్(25)  చిన్న కత్తితో కోసి పరారైన విషయం తెలిసిందే. రెండో పెళ్లి ప్రయత్నంలో ఉన్న అతడిని ప్రశ్నించిన కారణంగానే ఆమెపై భౌతికంగా ముహమ్మద్ ఖాన్ దాడి చేసినట్లు తెలుస్తోంది. ఆ దాడికి సంబంధించిన ఫొటోలు ఇప్పుడు నెట్ లో హల్ చల్ చేస్తున్నాయి.
 
 ఈ నేపథ్యంలోనే తాలిబన్లు స్పందిస్తూ ఆన్ లైన్ లో తాము ఆ ఫొటోలు చూశామని, ఇస్లాంకు వ్యతిరేకంగా చేసిన ఆ పనిని తాము కూడా ఖండిస్తున్నామని, అతడి కోసం గాలిస్తున్నామని, దొరికితే తగిన శిక్ష విధించడం మాత్రం ఖాయమని హెచ్చరించారు. ఖాన్ తమతో చేతులు కలిపాడని మీడియాలో వస్తున్న వార్తలను తాలిబన్లు ఖండించారు.


 కాబూల్: భార్యతో గొడవపడి విచక్షణ కోల్పోయిన భర్త ఆమె ముక్కు కోసేసిన దారుణ ఘటన అప్ఘానిస్తాన్ లోని ఘోర్మాక్ జిల్లాలో చోటుచేసుకుంది. రెజాగుల్ (20), ముహమ్మద్ ఖాన్(25) ఆరేళ్ల క్రితం పెళ్లి చేసుకున్నారు.  వీరికి చిన్న పాప  ఉంది.  అయితే ఏడేళ్ల బాలికను ఈ ఏడాది రెండో పెళ్లి  చేసుకునే ప్రయత్నాల్లో ఉన్నాడు ఖాన్. ఈ నేపథ్యంలో ఆదివారం భార్యభర్తల ఇద్దరి మధ్య ఘర్షణ జరిగింది. కోపంతో ఖాన్, కత్తి తీసుకొని భార్య రెజా ముక్కు కోసేశాడు. అనంతరం ఖాన్ అతని  సోదరుడు కలిపి ఆమెను బైక్ పై తీసుకొని వెళుతుండగా, బాధితురాలు అరుపులు విన్న స్థానికులు వారిని పట్టుకునేందుకు ప్రయత్నించడంతో ఇద్దరూ అక్కడినుంచి ఉడాయించారు. గాయపడిన బాధితురాల్ని సమీపంలోని ఆసుపత్రికి తరలించారు.
 
 తీవ్ర రక్తస్రావంతో రెజా పరిస్థితి ఆందోళన కరంగా ఉందని వైద్యులు తెలిపారు. తెగిపడిన ముక్కును శస్త్రచికిత్స చేసే సదుపాయం తమ తగ్గర  లేదని తెలిపారు. దీనిపై స్పందించిన అప్ఘానిస్తాన్ ప్రభుత్వం  రెజాను ఆదుకునేందుకు ముందుకొచ్చింది. చికిత్స, ఆపరేషన్ నిమిత్తం ఆమెను టర్కీ తరలించేందుకు తగిన ఏర్పాటు చేస్తోంది.
 
 అయితే  ఉద్యోగం నిమిత్తం తరచూ ఇరాన్ వెళ్లే ఖాన్, తిరిగి వచ్చి భార్యను హింసించేవాడని రెజా తల్లి ఆరోపించింది. పెళైన దగ్గరినుంచీ తన కూతురికి నరకం చూపించాడని వాపోయింది. గొలుసులతో బంధించి, బూతులు తిడుతూ దారుణంగా ప్రవర్తించేవాడంది.  రెండో పెళ్లి చేసుకునే ఉద్దేశంతోనే తన బిడ్డను చంపేందుకు ప్రయత్నించాడని తెలిపింది. అతడు తనకు దొరికితే ముక్కలు ముక్కలు నరకుతానంటూ తీవ్ర ఆగ్రహం వ్యక్తం చేసింది.
  
 మరోవైపు అప్ఘాన్ ప్రభుత్వం కూడా ఈ విషయంపై తీవ్రంగా స్పందించడంతో భయపడిన భర్త.. తాలిబన్ల అధీనంలోనున్న ప్రాంతంలో తలదాచుకున్నట్టు సమాచారం.  దీనిపై స్పందించిన పోలీసులు దర్యాప్తు మొదలుపెట్టారు. తాలిబన్ల అదుపులో వున్న నిందితుడిని త్వరలోనే అరెస్ట్ చేస్తామన్నారు. అటు రక్తమోడుతున్న బాధితురాలి ఫొటోను స్థానికులు సోషల్ మీడియాలో పోస్టు చేయడంతో  నెటిజన్లు మండిపడుతున్నారు.