ప్రస్తుత క్రేజీ హీరోయిన్లలో సమంత ఒకరు. అలాంటిది ఎందుకో ఈ బ్యూటీకి సడన్‌గా అవకాశాలు తగ్గాయి. కావాలనే ఈ చెన్నై చిన్నది అవకాశాలు తగ్గించుకుంటోందనే వాదన లేకపోలేదు. నటుడు సిద్ధార్థ్‌తో ఈ అమ్మడిని కలుపుతూ బోలెడు ప్రచారం జరుగుతోంది. ఇద్దరూ ప్రేమించుకుంటున్నారని, ఆ ప్రేమ బ్రేక్ అప్ అయిందని ఇలా రకరకాల ప్రచారాలతో సమంత మీడియాకు మంచి పనే చెబుతోంది. ఏది నిజం అన్న విషయాన్ని పక్కన పెడితే తమిళంలో కత్తి లాంటి భారీ విజయాన్ని సమంత అందుకుంది. ఇప్పుడు విక్రమ్ సరసన నటిస్తున్న పత్తు ఎన్‌డ్రదుక్కుళ్ చిత్రం మినహా కొత్త అవకాశం ఏదీ లేదు. దీంతో ఖాళీగా కూర్చొని చేతికందిందల్లా తినేసి ఎక్కడ బరువు పెరిగి పోతుందోనన్న భయంతో ఈ చిత్ర దర్శకుడు విజయ్ మిల్టన్ ఆహార విషయాల్లో నియమాలు పాటించాల్సిందిగా సమంతకు సూచించారట.
  
  అయితే పత్తు ఎండ్రదుకుళ్ చిత్ర షూటింగ్‌లో కాస్త గ్యాప్ రావడంతో అమ్మడు చెన్నైకి చెక్కేసిందట. ఇక్కడ ఇడ్లీ, సాంబారు, పొంగళ్, దోశ, వడ అంటూ ఆహారపు కట్టుబాట్లను పక్కన పెట్టి సుష్టిగా లాగించేస్తుందట. పైగా ఈ అల్పాహారానికి తాను బానిసనని, అందుకే చెన్నై వస్తే ఆహార నియమాలను పక్కనపెట్టి ఫుల్‌గా లాగించేస్తానని అంటోంది. త్వరలో నటనకు స్వస్తి చెప్పి సిద్ధార్థ్‌తో పెళ్లికి సిద్ధం అవుతున్నందు వల్లే ఈ అమ్మడు ఇలా ఆహార నియమాలకు నీళ్లొదిలిందనే వారు లేకపోలేదు. అయితే త్వరలోనే సమంత సిద్ధార్థ్‌తో కలిసి     ఒక చిత్రంలో నటించడానికి సిద్ధమవుతోందన్న వార్త వినిపిస్తోంది.
  


 ఒక ప్రముఖ హీరో ఒక దర్శకుడితో వెంటవెంటనే చిత్రాలు చేయడం అరుదైన విషయమే. మొదటి చిత్రంలోనే చిన్న చిన్న విషయాలతో దర్శక, హీరోల మధ్య విభేదాలు ఏర్పడే ఈ రోజుల్లో ఒక చిత్రం నిర్మాణంలో ఉండగానే నటుడు విక్రమ్ దర్శకుడు విజయ్ మిల్టన్‌కు మరో అవకాశం ఇచ్చేశారన్నది తాజా సమాచారం. విజయ్ మిల్టన్ ఛాయాగ్రాహకుడిగా ప్రముఖ దర్శకుడిగా మాత్రం ఒక్క చిత్రం అనుభవమే. బాల తారలతో గోలీసోడా తీసి అనూహ్య విజయాన్ని అందుకున్న దర్శకుడీయన. మలి చిత్రంగా విక్రమ్ హీరోగా 10 ఎండ్రదు కుళ్ల అనే చిత్రాన్ని తెరకెక్కిస్తున్నారు. సమంత హీరోయిన్‌గా నటిస్తున్న ఈ చిత్రం నిర్మాణం తుది దశకు చేరుకుంది. కాగా ఈ చిత్రం విడుదల కాకుండానే రిజల్ట్ తెలియకుండానే విజయ్‌మిల్టన్‌కు వెంటనే తదుపరి అవకాశం కూడా ఇచ్చేశారట.. హీరో విక్రమ్.
 
 అందుకు కారణం విజయ్ మిల్టన్ పనితీరే ఆయన స్పీడు విక్రమ్‌కు తెగ నచ్చేశాయట. ఐ చిత్రం పూర్తి చేసిన తరువాత విక్రమ్ విజయ్‌మిల్టన్ దర్శకత్వంలో నటించడానికి రెడీ అయ్యారు. చాలా తక్కువ కాలంలోనే 10 ఎండ్రదు కుళ్ల చిత్రాన్ని దర్శకుడు పూర్తి చేశారు. అంతేకాకుండా తదుపరి చిత్రానికి సిద్ధం చేసిన స్క్రిఫ్టును కూడా విక్రమ్‌కు బాగా నచ్చిందట. దీంతో విజయ్ మిల్టన్ తదుపరి చిత్రానికి విక్రమ్ గ్రీన్‌సిగ్నల్ ఇచ్చేశారని సమాచారం. ఈ చిత్రం వచ్చే ఏడాది ఫిబ్రవరిలో సెట్‌కు వెళ్లనుందట.