జక్రాన్‌పల్లి (నిజామాబాద్‌ రూరల్‌): మండలం లోని పెద్దవాగులో నిర్మించిన చెక్‌డ్యాం నుంచి నీ టి విడుదల గ్రామాల మధ్య జల జగడానికి దారి తీసింది. ఇరువైపుల నుంచి ప్రజలు పెద్ద సంఖ్య లో తరలి రావడంతో శనివారం తీవ్ర ఉత్కంఠ నెలకొంది. నీరు వదలాలని ఒకరు, వదలద్దని మరొకరు పట్టుబట్టడంతో పెద్ద వాగులో వాదులాట జరిగింది. అయితే, అధికారులు వేగంగా స్పందించడంతో ప్రస్తుతానికైతే జల వివాదం సద్దుమణిగింది. జక్రాన్‌పల్లి మండలంలోని కలిగోట్, చింతలూర్‌ గ్రామాల మధ్య గల పెద్దవాగులో ప్రభుత్వం రూ.3.50 కోట్లతో చెక్‌ డ్యాం నిర్మించింది. ఈ చెక్‌ డ్యాంకు కుడి వైపున మాటు కాలువ ద్వారా నడ్కుడ చెరువులోకి నీరు వెళ్లేలా ఆరు అడుగులతో కూడిన ఒక గే టు(షట్టర్‌)ను బిగించారు. అయితే, ఇటీవలి వర్షాలకు చెక్‌డ్యాం నిండడంతో బాల్కొండ ఎమ్మెల్యే ప్రశాంత్‌రెడ్డి చెక్‌ డ్యాంను ప్రారంభించి, షట్టర్‌ను తెరిచి నడ్కుడ చెరువులోకి నీటిని విడుదల చేశారు. గేటు మూసేయడంతో వివాదం..  అయితే, చెక్‌డ్యాంలో నిలువ ఉన్న నీరు వెళ్లిపోతుండడంతో కలిగోట్, చింతలూర్‌ గ్రామస్తులు శనివారం ఉదయం చెక్‌ డ్యాం వద్దకు వెళ్లి షట్టర్‌ను మూసివేశారు. ఈ విషయం తెలిసి నడ్కుడ గ్రామస్తులు పెద్ద సంఖ్యలో కలిగోట్‌ వద్దకు తరలి వచ్చారు. అప్పటికే అక్కడ కలిగోట్, చింతలూర్‌ గ్రామస్తులు ఉండడంతో ఏం జరుగుతుందోన్న ఆందోళన నెలకొంది. వాగులో గుమి గూడిన ఆయా గ్రామాల ప్రజలు వాగ్వాదానికి దిగారు. సమాచారమందుకున్న నీటిపారుదల శాఖ ఈఈ రాధాకిషన్‌రావు, డీఈలు నాగేశ్వర్‌రావు, గోపినాథ్, జక్రాన్‌పల్లి, వేల్పూర్‌ తహసీల్దార్లు సతీశ్‌రెడ్డి, అర్చన, ఆర్మూర్‌ రూరల్, ధర్పల్లి సీఐలు పాలగొల్లు రమణారెడ్డి,« చందర్‌రాథోడ్, జక్రాన్‌పల్లి, వేల్పూర్‌ ఎస్సైలు సురేశ్‌కుమార్, ప్రభాకర్‌ అక్కడకు చేరుకుని ఇరు వర్గాల వారికి సర్దిచెప్పారు. అనంతరం ఒక్కో గ్రామం నుంచి పది మంది చొప్పున ప్రజాప్రతినిధులు, వీడీసీ సభ్యులు, మంది రైతులతో అధికారులు రెండు గంటల పాటు చర్చలు జరిపారు.   నీళ్లు వదలాలి: నడ్కుడ వాసులు..  ఇరవై ఏళ్లుగా తాగు, సాగునీటికి ఎన్నో ఇబ్బందులను ఎదుర్కొన్నామని, చివరకు ప్రజాప్రతినిధుల సహకారంతో చెక్‌ డ్యాం నిర్మించుకుంటే ఇ ప్పుడు వచ్చి నీటిని అడ్డుకోవడం సరికాదని నడ్కుడ వాసులు తెలిపారు. 250 ఎకరాల విస్తీర్ణం లో ఉన్న చెరువులో ప్రస్తుతం ఒక్క నీటి బొట్టు లేదని, తాగునీరు కూడా దొరకడం లేదన్నారు. చె క్‌డ్యాం నిర్మాణ సమయంలోనే అడ్డు చెప్పకుండా కలిగోట్, చింతలూర్‌ గ్రామస్తులు ఇప్పుడు నీళ్లు వదలకుండా అడ్డుకోవడం సరికాదన్నారు. చెక్‌ డ్యాంకు నిర్మించిన గేటును తెరిచి నడ్కుడ చెరువులోకి నీటిని వదలి ఆదుకోవాలని కోరారు. ఒప్పుకోబోమన్న కలిగోట్, చింతలూరు గ్రామస్తులు..  అయితే, చెక్‌ డ్యాంలో నిల్వ ఉన్న నీటిని తరలించుకు పోతామంటే ఒప్పుకునేది లేదని కలిగోట్, చింతలూరు ప్రజలు స్పష్టం చేశారు. చెక్‌ డ్యాంలో నిల్వ ఉన్న నీరు కాకుండా అదనపు నీటిని వదిలితే తమకు అభ్యంతరం లేదని చెప్పారు. వాగు ప్రవ హించినప్పుడు, రామడుగు ప్రాజెక్టు సర్‌ప్లస్‌ వా టర్‌ వచ్చినపుడు మాత్రమే షట్టర్‌ ద్వారా నీళ్లు వదలాలని సూచించారు. వాగు పారకపోతే ఈ ప్రాంతం ఎడారిగా మారుతుందని, తాగు, సాగునీరుకు ఇబ్బందులు ఎదురవుతాయని తెలిపారు. అధికారులు పరిశీలించి ఇరు గ్రామాల రైతులకు న్యాయం జరిగేలా చూడాలన్నారు.   ఇరు వర్గాల వాదనలు విన్న అధికారులు ఉన్నతాధికారులకు ఫోన్‌లో పరిస్థితిని వివరించారు. అయితే, ఎలాంటి నిర్ణయం వస్తుందోనని ఇరు గ్రామాల ప్రజలు రెండు గంటల పాటు వేచి చూశారు. అనంతరం ఆర్మూర్‌ సీఐ రమణారెడ్డి మాట్లాడుతూ.. ఈ  విషయాన్ని ఉన్నతాధికారుల కు విన్నవించామని, వారి ఆదేశాల మేరకు నిర్ణయం చెబుతామన్నారు. ఉన్నతాధికారుల నిర్ణయం ప్రకారం ఇరు గ్రామాల ప్రజలు నడుచుకోవాలన్నారు. ఇరు గ్రామాల ప్రజలు సంయమ నం పాటించాలని, చట్టాన్ని ఎవరు చేతుల్లోకి తీసుకున్నా చర్యలు తప్పవని సూచించారు. ఎలాంటి నిర్ణయం వచ్చినా ప్రతి ఒక్కరు కట్టుబడి ఉండాలని పేర్కొన్నారు. దీంతో ఇరు గ్రామాల ప్రజలు వెనుదిరిగి వెళ్లిపోయారు. ఎలాంటి గొడవలు జరగకుండా పోలీసులు బందోబస్తు ఏర్పాటు చేశారు.


 సాక్షి ప్రతినిధి, కడప:జిల్లాలో ప్రజావిశ్వాసం కోల్పోయిన తెలుగుదేశం పార్టీ నేతలు శల్యసారధ్యం చేస్తున్నారు. అధికారులను అడ్డుపెట్టుకుని శిఖండి రాజకీయాలకు ప్రాధాన్యతనిస్తున్నారు. అభివృద్ధి పనులకు చెంది రూ.2.72 కోట్ల నిధుల అనుమతికి బ్రేకులు వేస్తున్నారు. మొత్తానికి  కార్పొరేషన్ పాలకపక్షంపై అధికార యంత్రాంగం నిరంకుశదోరణి ప్రదర్శిస్తోంది.
 
  2011-13,  2013-14 ఆర్థిక సంవత్సరాలకు చెందిన బీఆర్‌జీఎఫ్ నిధులకు సంబంధించి  పలు అభివృద్ధి పనులకు ప్రతిపాదనలు పంపారు. ఆమేరకు వివిధ పనులకు చెంది కడప కార్పొరేషన్ పరిధిలో 9పనులకుగాను రూ.2.72కోట్ల  నిధులు మంజూరు అయ్యాయి. అనుమతి మంజూరైన ఆ పనుల స్థానంలో కార్పొరేషన్ అధికారులు ప్రత్యామ్నాయ పనులను ప్రతిపాధించారు. ఆమేరకు అనుమతించాల్సింది గా జెడ్పీ సీఈఓ మాల్యాద్రికి సెప్టెంబర్ 8న లేఖ రాశారు.
  
  తెరవెనుక మంత్రాంగంలో దేశం నేతలు....
  జెడ్పీ సీఈఓను అడ్డుపెట్టుకుని అధికార తెలుగుదేశం పార్టీ నేతలు శిఖండి రాజకీయాలు  చేస్తోంది.  కడప కార్పొరేషన్ పరిధిలో మంజూరైన పనుల స్థానంలో ప్రత్యామ్నాయ పనులకు పాలక మండలి తీర్మానం చేసింది. నగర మేయర్ సురేష్‌బాబు ఆదేశాల మేరకు కమిషనర్ ఓబులేసు సెప్టెంబర్8న జెడ్పీ సీఈఓ మాల్యాద్రికి లేఖ రాశారు. రెండు నెలలు పూర్తి గడిచినా  ఇప్పటికీ అనుమతి ఇవ్వకుండా మాల్యాద్రి తాత్సారం చేస్తున్నారు.  
 
 ఇందులో అధికారపార్టీకి చెందిన ఓ నాయకుడి ప్రమేయం ఉన్నట్లు తెలుస్తోంది. జెడ్పీ సీఈఓ మాల్యాద్రి సైతం అందుకు వత్తాసుగా నిలుస్తుండటంతో అభివృద్ధి పనులకు బ్రేకులు పడ్డాయి. ఇప్పటికే బీఆర్‌జీఎఫ్ గ్రాంటులో పనులు చేపట్టినా, కార్పొరేషన్ పరిధిలో నోచుకోలేదు. పాలకపక్షం ఇప్పటికే అనేక అభివృద్ది కార్యక్రమాలను వేగవంతంగా చేస్తోంది.  ఈనేపధ్యంలో అభివృద్ధికి ఆటంకం కల్గిస్తూ దేశం నేతలు శల్యసారధ్యం చేస్తున్నారు.
  
  కాసుల కక్కుర్తితోనే..
  అధికారపార్టీ నుంచి తీవ్రమైన ఒత్తిడి ఉంది, అయినప్పటికీ అనుమతి ఇవ్వగలం.. అయితే మా వాటా అందిస్తే అనుమతి ఇస్తామని జెడ్పీలో పనిచేస్తున్న కీలక అధికారి ఒకరు కార్పొరేషన్ యంత్రాంగంతో పేర్కొన్నట్లు సమాచారం. ఆమేరకే పెండింగ్‌లో ఉంచినట్లు తెలుస్తోంది.
 
 అభివృద్ధి పనులను  ఉన్నతాధికారులు ప్రోత్సహించాల్సిందిపోయి, కమిషన్లకు కక్కుర్తిపడటం విడ్డూరంగా ఉందని పలువురు ఆరోపిస్తున్నారు. కాగా బీఆర్‌జీఎఫ్ నిధుల విషయంలో అనుమతి నిరాకరణపై జెడ్పీ సీఈఓ మాల్యాద్రి వివరణ కోరగా నగర కమిషనర్ పంపిన ప్రత్యామ్నాయ పనులు బీఆర్‌జీఎఫ్ నిబంధనలకు విరుద్ధంగా ఉండడంతో పెండింగ్‌లో ఉంచామన్నారు. అంతకు మించి  మరో కారణం లేదన్నారు.   రెండు నెలలు దాటినా  నిబంధనలకు విరుద్ధంగా ఉండడంతోనే అనుమతి ఇవ్వలేదని సీఈఓ మాల్యాద్రి తెలియజెప్పకపోవడం  మరీ విడ్డూరంగా ఉందని పలువురు పేర్కొంటున్నారు.