న్యూఢిల్లీ: భారతదేశంలో మధువు తయారీ ప్రాచీన కాలం నుంచి కొనసాగుతోంది. పురాణాల్లోనూ సురాపానం ప్రస్తావన ఉంది. తాజాగా భారత విస్కీ ప్రపంచంలోనే ఉత్తమ మద్యంగా గుర్తింపు సాధించింది. 2023వ సంవత్సరానికి గాను విస్కీస్‌ ఆఫ్‌ ద వరల్డ్‌ అవార్డ్స్‌లో ‘ఇంద్రి సింగిల్‌ మాల్ట్‌ ఇండియన్‌ విస్కీ–లిమిటెడ్‌ దివాళీ కలెక్టర్స్‌ ఎడిషన్‌–2023’కి ప్రపంచంలో బెస్ట్‌ విస్కీగా ‘డబుల్‌ గోల్డ్, బెస్క్‌ ఇన్‌ షో’ అవార్డు లభించింది. ఈ అవార్డు కోసం ప్రపంచ వ్యాప్తంగా వివిధ దేశాల నుంచి ఎంతగానో పేరుప్రఖ్యాతులు పొందిన విస్కీలు పోటీపడ్డాయి. స్కాచ్, బార్బన్, కెనడియన్, ఆ్రస్టేలియన్, బ్రిటిష్‌ సింగిల్‌ మాల్ట్‌ విస్కీలను వెనక్కి నెట్టి భారతీయ సింగిల్‌ మాల్ట్‌ విస్కీ అరుదైన ఘనత దక్కించుకుంది. ఇంద్రి విస్కీని పికాడిల్లీ డిస్టిల్లరీస్‌ కంపెనీ ఉత్పత్తి చేస్తోంది. రాజస్తాన్‌లోని ప్రత్యేకంగా పండించే బార్లీ, యమునా నది నీటితో ఈ విస్కీని తయారు చేస్తున్నారు.  


 మధువు గ్రోలెడు వేళ మత్తిల్లు వేళ
  మనసు నిండు వేళ మరుల వేళ
  వైనుతేయ! వినుము విశ్వమంత
  ఆనంద నిలయమౌ అలతిగాను
  
  మంచి మద్యం, మంచి పద్యం రసిక జనులెల్లరకూ ఆస్వాదయోగ్యాలు. పాతబడే కొద్దీ వాటి విలువ కూడా పెరుగుతూ ఉంటుంది. శ్రేష్ఠమైన మద్యానికి ఎప్పటికీ కాలం చెల్లదు. అలాగే, మంచి పద్యానికి కూడా. కవన మాధుర్యానికీ, మధుసేవనానికీ అవినాభావ సంబంధముంది. మంచినీళ్లు మాత్రమే తాగి బతికేసే వాళ్లు మన్నికైన కవిత్వం రాయలేరని ‘మదిరా’ంతకుడైన ఒక కవివరేణ్యుడి ఉవాచ. అంటే, మధువు గ్రోలనిదే మేలిమి కవన రచన సాధ్యం కాదనేది ఆయన కవిహృదయం. ఆంగ్ల కవిపుంగవుడు రాబర్ట్ లూయీ స్టీవెన్‌సన్ అయితే ఈ విషయంలో అద్వైత సిద్ధాంతి.
  
  ‘మధు’రోక్తి
  నేనన్నీ పాత వాటినే ఇష్టపడతాను...
  పాత మిత్రులు, పాతకాలం, పాత
  మర్యాదలు, పాత పుస్తకాలు, పాత మధువులు
   - ఆస్కార్ వైల్డ్, ఆంగ్లో-ఐరిష్ కవి, రచయిత
  
  అందుకే, ఆయన మధువును సీసాలో బంధించిన కవిత్వంగా అభివర్ణించాడు. ప్రపంచంలోని మహా మహాకవులెందరో మధుపానాసక్తులే. మద్యంలోనైనా, పద్యంలోనైనా పస తేలాలంటే తన్మయత్వమే ప్రాతిపదికగా వాటిని అంచనా వేయాలి. తాగేటప్పుడు వెగటు పుట్టించేది మంచి మద్యమూ కాదు, చదివేటప్పుడు విసుగు పుట్టించేది మంచి పద్యమూ కాదు. ఈ సంగతి కళాత్మక కవిహృదయం గల ‘సురా’ర్చకులందరికీ అనుభవైకవేద్యమే! కళాత్మక ‘సురా’ర్చకుల కోసం ఈవారం...
  
  స్పిరిటెడ్ ఫాంటసీ
  స్పార్క్‌లింగ్ రెడ్‌వైన్:    100 మి.లీ.
  బ్రాందీ    :    30 మి.లీ.
  కోకాకోలా    :    100 మి.లీ.
  దాల్చిన సిరప్    :     10 మి.లీ.
  గార్నిష్    :    చిటికెడు                 
  జాజికాయ పొడి, నారింజ తొన
  -  వైన్‌తేయుడు