సాక్షి, హైదరాబాద్‌ : నగరంలోని హైటెక్‌ సిటీ వద్ద సోమవారం తెల్లవారుజామున ఘోర రోడ్డు ప్రమాదం చోటుచేసుకుంది. నోవాటెల్ వద్ద కారు- బైక్‌ ఢీకొన్నాయి. ఈ ప్రమాదంలో ఓ యువకుడు మృతి చెందగా.. మహిళకు తీవ్ర గాయాలయ్యాయి. వివరాలు..  మాదాపూర్‌ సమీపంలో అతివేగంగా దూసుకువస్తున్న బీఎండబ్ల్యూ కారు అదుపుతప్పి ఎదురుగా వస్తున్న బుల్లెట్‌ బైక్‌ను ఢీకొంది.. ఈ ఘటనలో అభిషేక్‌ ఆనంద్‌(26) అక్కడికక్కడే మృతి చెందగా మహిళకు తీవ్ర గాయాలయ్యాయి. అనంతరం సంఘటన స్థలానికి చేరుకున్న పోలీసులు మహిళను వైద్యం కోసం ఆసుపత్రికి తరలించి.. కారు డ్రైవర్‌ను అదుపులోకి తీసుకున్నారు. నిందితుడిని కె. అశ్విన్‌ గా గుర్తించిన పోలీసులు డ్రైవర్‌ మద్యం సేవించి, తప్పు మార్గంలో నడపుతుండటం వల్లే ప్రమాదం చోటు చేసుకుందని తెలిపారు. ప్రమాదంలో రెండు వాహనాలు సైతం పూర్తిగా దెబ్బతిన్నాయి. 


 హైదరాబాద్: నగరంలోని మాదాపూర్‌లో ఓ కార్ల గ్యారేజీలో భారీ అగ్నిప్రమాదం సంభవించింది. మాదాపూర్-హైటెక్ సిటీ రూట్‌లో ఉన్న కార్ల గ్యారేజీలో శుక్రవారం రాత్రి 10:30 గంటల ప్రాంతంలో మంటలు వ్యాపించాయి. స్థానికులు పోలీసులు, ఫైర్ సిబ్బందికి సమాచారం అందించారు.
 సమాచారం అందుకున్న వెంటనే రెండు ఫైర్ ఇంజన్ల సిబ్బంది ఘటనా స్థలానికి చేరుకుని మంటలను అదుపులోకి తెచ్చేందుకు యత్నిస్తున్నారు. దాదాపు పది వరకు కార్లు ఈ భారీ ప్రమాదం ఘటనలో అగ్నికి ఆహుతయ్యాయి. ప్రమాదానికి గల కారణాలు, ఆ సమయంలో గ్యారేజీలో ఎవరైనా ఉన్నారా.. ఆస్తి నష్టం పూర్తి వివరాలు తెలియాల్సి ఉంది.