న్యూఢిల్లీ: ఇండస్‌ ఇండ్‌ బ్యాంక్‌ నికర లాభం గత ఆర్థిక సంవత్సరం (2018–19) నాలుగో త్రైమాసిక కాలంలో 62 శాతం తగ్గింది. అంతకు ముందటి ఆర్థిక సంవత్సరం (2017–18) క్యూ4లో రూ.953 కోట్లుగా ఉన్న నికర లాభం గత ఆర్థిక సంవత్సరం క్యూ4లో రూ.360 కోట్లకు తగ్గిందని ఇండస్‌ఇండ్‌ బ్యాంక్‌ తెలిపింది. ఐఎల్‌అండ్‌ఎఫ్‌ఎస్‌ గ్రూప్‌ కంపెనీలకు ఇచ్చిన రుణాలకు కేటాయింపులు పెంచడంతో నికర లాభం ఈ స్థాయిలో తగ్గిందని ఈ ప్రైవేట్‌ రంగ బ్యాంక్‌ ఎమ్‌డీ, సీఈఓ రమేశ్‌ సోబ్తి చెప్పారు. ఐఎల్‌ఎఫ్‌ఎస్‌ గ్రూప్‌ కంపెనీలకు రూ.3,004 కోట్ల రుణాలిచ్చామన్నారు. ఈ మొత్తం రుణాలను గత క్యూ4లో మొండి బకాయిలుగా గుర్తించామని, వీటికి గత ఆర్థిక సంవత్సరంలో మొత్తం రూ.1,800 కోట్ల మేర కేటాయింపులు జరిపామని తెలియజేశారు. కేటాయింపులను కూడా పరిగణనలోకి తీసుకుంటే, నికర లాభం 25 శాతం ఎగసి ఉండేదని అంచనా. ఇక మొత్తం ఆదాయం మాత్రం రూ.5,859 కోట్ల నుంచి రూ.7,550 కోట్లకు పెరిగింది. నికర వడ్డీ ఆదాయం రూ.2,008 కోట్ల నుంచి 11 శాతం వృద్ధితో రూ.2,232 కోట్లకు, ఫీజు ఆదాయం 27 శాతం పెరుగుదలతో రూ.1,419 కోట్లకు చేరాయి. నిర్వహణ లాభం రూ.1,769 కోట్ల నుంచి 17 శాతం వృద్ధితో రూ.2,068 కోట్లకు పెరిగింది. నికర వడ్డీ మార్జిన్‌ 3.97 శాతం నుంచి 3.59 శాతానికి తగ్గిందని తెలిపారు. ఒక్కో ఈక్విటీ షేర్‌కు రూ.7.50 డివిడెండ్‌ను ఇవ్వనున్నట్లు సోబ్తి తెలిపారు.   8 శాతం తగ్గిన ఏడాది లాభం...  ఇక పూర్తి ఆర్థిక సంవత్సరం పరంగా చూస్తే, 2017–18లో రూ.3,606 కోట్లుగా ఉన్న నికర లాభం గత ఆర్థిక సంవత్సరంలో 8% తగ్గి రూ.3,301 కోట్లకు పరిమితమయింది. మొత్తం ఆదాయం మాత్రం రూ.22,031 కోట్ల నుంచి రూ.27,908 కోట్లకు ఎగసింది. గత ఏడాది మార్చి నాటికి 1.17%గా ఉన్న స్థూల మొండి బకాయిలు ఈ ఏడాది మార్చి నాటికి 2.10%కి, అలాగే నికర మొండి బకాయిలు 0.51% నుంచి 1.21%కి పెరిగాయి. విలువ పరంగా చూస్తే, గత ఏడాది మార్చి నాటికి రూ.1,705 కోట్లుగా ఉన్న  స్థూల మొండి బకాయిలు ఈ ఏడాది మార్చి నాటికి రూ.3,947 కోట్లకు, నికర మొండి బకాయిలు రూ.746 కోట్ల నుంచి రూ.2,248 కోట్లకు పెరిగాయి.  రుణాలు 29% వృద్ధితో రూ.1,86,394 కోట్లకు, డిపాజిట్లు 29% వృద్ధితో రూ.1,94,868 కోట్లకు పెరిగాయి. ప్రస్తుత ఆర్థిక సంవత్సరంలో రుణ వృద్ధి 25%గా ఉండొచ్చని సోబ్తి చెప్పారు. ఐఎల్‌ఎఫ్‌ఎస్‌ గ్రూప్‌ కంపెనీలకు ఇచ్చిన రుణాలకు మూడో వంతుకుపైగా కేటాయింపులు జరపడం, షార్ట్‌ కవరింగ్‌ కొనుగోళ్లు కూడా జత కావడం షేరుపై సానుకూల ప్రభావాన్ని చూపించింది. బీఎస్‌ఈలో ఇండస్‌ఇండ్‌ బ్యాంక్‌ షేర్‌ 5% లాభంతో రూ.1,517 వద్ద ముగిసింది. సెన్సెక్స్‌లో బాగా పెరిగిన షేర్‌ ఇదే కావడం గమనార్హం. 


 సాక్షి ప్రతినిధి, కడప :తక్కువ వడ్డీకే రుణం ఇస్తామని చెప్పి.. రుణం ఇవ్వకుండా అకౌంట్‌లోంచి ప్రాసెస్ ఫీజు వసూలు చేసుకుని ఓ ఖాతాదారునికి నగరంలోని ఇండస్ ఇండ్ బ్యాంక్ అధికారులు చుక్కలు చూపిస్తున్న వైనమిది. బాధితుని కథనం మేరకు వివరాలు.. పరుశురాం అండ్ సన్స్ పేరిట మైన్ ఓనర్ వి పరుశురాముడుకు ఇండస్ ఇండ్ బ్యాంకులో 2006 నుంచి అకౌంట్ ఉంది. అకౌంట్ నెం. 200007471951 ద్వారా బ్యాంకు నిబంధనల మేరకు లావాదేవీలు నిర్వహిస్తున్నారు. ఈక్రమంలో బ్యాంకు సిబ్బంది మీకు రూ.కోటి రుణం ఇస్తామని ఖాతాదారుడిని కలిశారు.
 
 ఇప్పట్లో తనకు రుణం అవసరం లేదని ఆయన చెప్పాడు. అయినా వడ్డీ రేటు తక్కువ అంటూ పలు రకాలుగా వివరించి ఒప్పించారు. ఆ మేరకు డాక్యుమెంట్లు ఇవ్వడంతో రూ.70 లక్షలు రుణం మంజూరు చేయనున్నట్లు బ్యాంకు సిబ్బంది వివరించారు. ఆ మేరకు పరస్పరం అంగీకారంతో వ్యవహారం నడిచింది. అయితే పరుశురాముడికి రుణం అందక  మునుపే ప్రాసెసింగ్ ఫీజు కింద రూ.70 వేలు, రూ.8,652 సర్వీసు ట్యాక్స్ కింద అకౌంట్ నుంచి డ్రా చేశారు. 2014 జనవరి 1న ఇండస్ ఇండ్ బ్యాంకు డబ్బులు డ్రా చేసింది. బ్యాంకు అకౌంట్‌లో డబ్బులు తేడా రావడంతో ఖాతాదారుడు బ్యాంకు స్టేట్‌మెంట్ కోరారు. ఆ మేరకు రుణం ప్రాసెసింగ్ ఫీజు రూపేనా బ్యాంకు డ్రా చేసినట్లు రూఢీ అయ్యింది.రుణం ఇవ్వకుండానే ప్రాసెస్ ఫీజు ఎలా వసూలు చేస్తారంటూ ఖాతాదారుడు వాపోయారు. అనేక పర్యాయాలు బ్రాంచ్ మేనేజర్, రీజనల్ మేనేజర్‌లకు రాత పూర్వకంగా విన్నవించాడు.
  
 న్యాయవాదిని ఆశ్రయించడంతో....
 2014 జూలై నుంచి బ్రాంచ్ మేనేజర్, రీజనల్ మేనేజర్ దృష్టికి పలుమార్లు తీసుకెళ్లినా ఉపయోగం లేకపోవడంతో పరుశురాముడు న్యాయవాదిని ఆశ్రయించి బ్యాంకుకు లీగల్ నోటీసు జారీ చేశారు. అప్పటి వరకూ చూస్తాం, చేస్తాం అన్న బ్యాంకు అధికారులు.. విషయం లీగల్ వింగ్‌లోకి వెళ్లింది, మీరే తేల్చుకోండని చేతులు ఎత్తేశారు. రుణం తీసుకోండని, మీరే చెప్పారు, సరే అని ఒప్పుకుంటే రుణం ఇవ్వకుండానే ప్రాస్సెస్ ఫీజు రూపేనా రూ.78,652 డ్రా చేసుకున్నారు, అడిగితే చలనం లేదు, లీగల్ నోటీసు ఇస్తే మాకు సంబంధం లేదంటారా అని ఖాతాదారుడు వాపోయాడు.  
  
 వెనక్కు ఇచ్చే అధికారం లేకనే..
 ‘ఖాతాదారుడు పరుశురాముడు అకౌంట్ నుంచి రూ.78,652 డ్రా చేసిన మాట వాస్తవమే. వాస్తవానికి రూ.70 లక్షలు రుణం మంజూరైంది, బ్యాంకులో తాజాగా వచ్చిన నిబంధనల మేరకు ఖాతాదారుడికి అందలేదు. ఇదే విషయాన్ని బ్యాంకు తరుఫున పలుమార్లు హెడ్ ఆఫీసు దృష్టికి తీసుకెళ్లాం. హైలెవెల్లో ఆశించిన స్పందన లేదు. డబ్బులు వెనక్కు ఇచ్చే అధికారం మాకు లేదు. ఇప్పుడు ఖాతాదారుడు లీగల్‌గా వెళ్లడంతో ఆ అంశం మా చేతుల్లో లేదు. లీగల్‌గా పోరాటం చేయాల్సిందే’నని ఇండస్ ఇండ్ బ్యాంకు అధికారి రెహ్మన్ సాక్షి ప్రతినిధికి వివరించారు.