ఇండియా ఓపెన్ టీటీ టోర్నమెంట్
  ఇండోర్: అంతర్జాతీయ టేబుల్ టెన్నిస్ సమాఖ్య (ఐటీటీఎఫ్) ఇండియా జూనియర్, క్యాడెట్ ఓపెన్ టోర్నమెంట్‌లో హైదరాబాద్ అమ్మాయి వరుణి జైస్వాల్ భారత్‌కు స్వర్ణ పతకాన్ని అందించింది. ఆదివారం ముగిసిన ఈ టోర్నీలో భారత్‌కు నాలుగు పసిడి పతకాలు లభించాయి. జూనియర్ బాలికల సింగిల్స్ ఫైనల్లో తెలంగాణ క్రీడాకారిణి వరుణి 5-11, 11-9, 8-11, 1-11, 14-12, 11-8, 11-9తో సు పీ లింగ్ (చైనీస్ తైపీ)పై అద్భుత విజయం సాధించింది. నిర్ణాయక ఏడో గేమ్‌లో వరుణి 3-7తో వెనుకబడినా... పట్టువదలకుండా పోరాడి స్కోరును సమం చేయడంతోపాటు విజయాన్ని దక్కించుకుంది. సెమీఫైనల్లో వరుణి  7-11, 6-11, 11-9, 11-9, 11-3, 13-15, 11-9తో హైదరాబాద్‌కే చెందిన ఆకుల శ్రీజను ఓడించింది.