లఖ్‌నవూ: కొద్ది గంటల్లో పెళ్లి పీటలు ఎక్కాల్సిన వరుడు ఆసుపత్రిలో కొన ఊపిరితో కొట్టుమిట్టాడుతున్నాడు. పెళ్లి కోసం అంతా సిద్ధం చేసుకుని వధువు ఇంటికి బయలుదేరిన వరుడు తరపు బంధువులను మార్గ మధ్యలోనే మృత్యువు కబళించింది. ట్రక్కు రూపంలో వారికి మృత్యువు ఎదురైంది. వారు వెళ్తున్న జీపు ట్రక్కును ఢీకొట్టడంతో నలుగురు అక్కడికక్కడే ప్రాణాలు కోల్పోయారు. మరో 9 మంది తీవ్ర గాయాలతో చికిత్స పొందుతున్నారు. ఈ సంఘటన ఉత్తర్‌ప్రదేశ్‌లోని ఫతెపుర్‌ సిక్రి సమీపంలో ఆగ్రా-జైపూర్‌ హైవేపై శనివారం తెల్లవారు జామున 5 గంటలకు జరిగింది. జీపు డ్రైవర్‌ నిద్ర మత్తులోకి జారుకోవటంతో కొరాయి టోల్‌ ప్లాజా వద్ద ఈ ప్రమాదం జరిగినట్లు పోలీసులు తెలిపారు. టోల్‌ ప్లాజా సిబ్బంది, స్థానికులు హుటాహుటిన స్పందించి క్షతగాత్రులను స్థానిక ఆసుపత్రులకు తరలించినట్లు చెప్పారు.  రాజస్థాన్‌లోని అజ్మెర్‌కు చెందిన వరుడి కుటుంబం పెళ్లి కోసం బిహార్‌లోని పట్నాకు వెళ్తున్న క్రమంలో ఈ ప్రమాదం జరిగింది. వరుడి కుటుంబంలోని ముగ్గురు చనిపోగా.. జీపు డ్రైవర్‌ చికిత్స పొందుతూ మృతి చెందాడు. క్షతగాత్రులు ఆగ్రాలోని సీహెచ్‌సీ, ఎస్‌ఎన్‌ మెడికల్‌ కళాశాలలో చికిత్స పొందుతున్నట్లు ఆగ్రా ఎస్పీ సత్యజీత్‌ గుప్తా తెలిపారు. కేసు నమోదు చేసుకుని దర్యాప్తు చేపట్టనున్నట్లు వెల్లడించారు. ఇదీ చదవండి: ఢిల్లీ అల్లర్ల కేసులో నిర్దోషిగా జేఎన్‌యూ స్టూడెంట్‌ లీడర్‌ ఉమర్‌ ఖలిద్‌!

చింతపల్లి: ఆగి ఉన్న లారీని జీపు అతివేగంగా ఢీకొట్టిన ప్రమాదంలో ముగ్గురు దుర్మరణం చెందారు. మరో ఏడుగురికి తీవ్ర గాయాలయ్యాయి. ఈ దుర్ఘటన నల్లగొండ జిల్లా చింతపల్లి మండలం వెంకటేశ్వరనగర్‌లో శుక్రవారం తెల్లవారుజామున చోటు చేసుకుంది. మర్రిగూడ మండలం వట్టిపల్లి గ్రామానికి చెందిన 12 మంది సమీప బంధువులు హైదరాబాద్‌లోని నాదర్‌గుల్‌లో గురువారం రాత్రి గృహప్రవేశం కార్యక్రమానికి వెళ్లారు. అది ముగిసిన తర్వాత తెల్లవారుజామున జీపులో స్వగ్రామానికి తిరుగు పయనమయ్యారు. చింతపల్లి మండల పరిధిలోని మాల్‌ వెంకటేశ్వరనగర్‌కు రాగానే వారి వాహనం రోడ్డు పక్కన ఆగి ఉన్న లారీని వేగంగా ఢీకొట్టింది. ఈ ప్రమాదంలో జీపులో ఉన్న పందుల రాములు (60), పందుల సత్తయ్య (58) అక్కడికక్కడే మృతిచెందారు. పందుల పాండు (50), పందుల కృష్ణ, పందుల మైసయ్య, జంపాల రామస్వామి, బోయపల్లి యాదమ్మ, బోయపల్లి విజయ, పందుల వెంకటయ్య, వాహన డ్రైవర్‌ పందుల యాదగిరికి తీవ్ర గాయాలయ్యాయి. క్షతగాత్రులను సమీపంలోని ఓ ప్రైవేట్‌ ఆస్పత్రికి తరలించగా పాండు చికిత్స పొందుతూ మృతిచెందారు. యాదయ్య, జంపాల రామస్వామి పరిస్థితి విషమంగా ఉంది. పోలీసులు ఘటనాస్థలిని పరిశీలించారు. అతివేగం, డ్రైవర్‌ తప్పిదమే ప్రమాదానికి కారణమని పోలీసులు భావిస్తున్నారు. పోస్టుమార్టం నిమిత్తం మృతదేహాలను దేవరకొండ ప్రభుత్వ ఆస్పత్రికి తరలించారు. కేసు నమోదు చేసుకుని దర్యాప్తు జరుపుతున్నట్లు ఎస్‌ఐ వెంకటేశ్వర్లు తెలిపారు.


 మహాబూబ్నగర్: మహబూబ్నగర్ జిల్లా కొడంగల్ మండలం రావులపల్లి వద్ద శుక్రవారం ఘోర రోడ్డు ప్రమాదం జరిగింది. ప్రయాణికులతో వెళ్తున్న జీపు బోల్తా పడింది. ఈ ప్రమాదంలో ఇద్దరు అక్కడికక్కడే మృతి చెందారు. మరో ఎనిమిది మంది తీవ్రంగా గాయపడ్డారు. అదే రహదారిపై వెళ్తున్న వాహనదారులు వెంటనే స్పందించి పోలీసులకు సమాచారం అందించారు.
 పోలీసులు ఘటన స్థలానికి చేరుకుని క్షతగాత్రులను సమీపంలో ఆస్పత్రికి తరలించారు. మృతదేహలను పోస్ట్ మార్టం నిమిత్తం మహబూబ్నగర్ జిల్లా అస్పత్రికి తరలించారు.  అతి వేగమే ఈ ప్రమాదానికి కారణమని స్థానికులు వెల్లడించారు. పోలీసులు కేసు నమోదు చేసి దర్యాప్తు చేస్తున్నారు.