మదనపల్లె: ప్రేమజంట తెచ్చిన తంట అబ్బాయి తల్లిచెల్లెళ్లకు ప్రాణం మీదకు వచ్చింది. అమ్మాయి కుటుంబ సభ్యుల వేధింపులతో వారు ఉక్కిర బిక్కిరి అవుతున్నారు. ప్రేమ జంట ఎక్కడుందో చెప్పండని పోలీసులు, తమ బిడ్డ ఆచూకి తెలపండని అమ్మాయి బంధువులు తీవ్ర ఇబ్బందులు పెడుతున్నారు. ఆదివారం అబ్బాయి తల్లి, చెల్లి ఇంట్లో ఒంటరిగా ఉండడాన్ని గమనించిన అమ్మాయి బంధువులు చితకబాదారు. సమాచారం అందుకున్న పోలీసుల అక్కడికి చేరుకుని వారిని స్టేషన్‌కు తీసుకుపోయి రక్షణ కల్పించారు.
 
 పోలీసులు తెలిపిన వివరాల మేరకు... మండలంలోని కొత్తపల్లెకు చెందిన రెడ్డి బాబు, భాగ్యలక్ష్మి దంపతుల కుమార్తె లావణ్య(22) స్థానికంగా ఓ ప్రైవేట్‌ స్కూల్‌లో టీచర్‌గా పనిచేస్తోంది. అదే వీధిలో ఉంటున్న వెంటకటరమణ కుమారుడు అరుణ్‌ కుమార్‌(25) ప్రేమలో పడింది. ఇద్దరూ ఎనిమిదేళ్లుగా ప్రేమించుకున్నారు. అమ్మాయికి ఇష్టం లేని పెళ్లి చేస్తుండంతో ఇద్దరూ ఇంటి నుంచి పారిపోయి కురబలకోట మండలం అంగళ్లు సమీపంలో అంజనేయస్వామి గుడిలో పెళ్లి చేసుకున్నారు. గత నెల 20వ తేదీన రూరల్‌ పోలీస్‌స్టేషన్‌కు వచ్చి పెద్దల నుంచి రక్షణ కల్పించాలని కోరారు.
 
 స్పందించిన పోలీసులు ఇద్దరూ మేజర్లు కావడంతో పెద్దలను స్టేషన్‌కు పిలిపించి కౌన్సిలింగ్‌ ఇచ్చారు. అంతటితో వివాదం సద్దు మణిగింది. తర్వాత ఏమి జరిగిందో కానీ ఇరు వర్గాల వారు ఘర్షణ పడుతున్నారు. ప్రేమజంటకు పెళ్లి చేసిన యువకులను పోలీసులు విచారణ పేరుతో ప్రతిరోజూ స్టేషన్‌కు పిలిపిస్తున్నారు. అబ్బాయి తల్లిదండ్రులకు అదే సమస్య ఎదురవుతోంది. ఈ వివాదం వెనుక ఓ పార్టీకి చెందిన పెద్దల జోక్యం ఉందని, వారి ప్రోద్భలంతోనే యువకుడి తల్లి, చెల్లిపై దాడి చేసినట్లు తెలిసింది.
  


 మదనపల్లె: అప్పుగా తీసుకున్నరూ.వెయ్యి  సకాలంలో ఇవ్వలేదని ఆగ్రహించిన ఓ వ్యక్తి కత్తితో యువకుడి గొంతు కోశాడు. ఈ సంఘటన ఆదివారం చౌడేపల్లె మండలంలో చోటుచేసుకుంది. పోలీసుల కథనం మేరకు.. పందిళ్లపల్లె పంచాయతీ బాల సముద్రానికి చెందిన రాయల అంజప్ప కుమారుడు రమేష్‌(35) కొంత కాలంగా చౌడేపల్లెలో ఇళ్లు అద్దెకు తీసుకుని తన స్నేహితులతో కలిసి మార్బుల్‌ పనులు చేస్తున్నాడు. అతని గదిలోనే కర్ణాటకకు చెందిన అప్పి(35) అనే వ్యక్తి ఉంటున్నాడు. అతని వద్ద రమేష్‌ చేబదులుగా రూ.వెయ్యి  తీసుకున్నాడు. తిరిగి ఆ డబ్బులు అప్పికి ఇవ్వలేదు. దీనిపై ఇద్దరు ఆదివారం ఉదయం గొడవపడ్డారు.
 
 మాటామాటా పెరగడంతో అప్పి గదిలో ఉన్న కూరగాయలు తరిగే కత్తితో రమేష్‌పై దాడి చేసి గొంతుకోశాడు. తీవ్రంగా గాయపడిన అతన్ని సహచరులు హుటా హుటిన కారులో స్థానికంగా ఉన్న పీహెచ్‌సీకి తరలించారు. అక్కడి నుంచి పుంగనూరు ఏరియా ఆస్పత్రికి తరలించారు. పరిస్థితి విషమంగా ఉందని డాక్టర్లు తెలపడంతో మెరుగైన వైద్యం కోసం మదనపల్లె ప్రభుత్వానికి తీసుకెళ్లారు. అక్కడ కూడా డాక్టర్లు ప్రథమ చికిత్స చేసి తిరుపతికి రెఫర్‌ చేశారు. ప్రస్తుతం అతని పరిస్థితి విషమంగా ఉందని డాక్టర్లు తెలిపారు. పోలీసులు కేసు దర్యాప్తు చేస్తున్నట్లు తెలిపారు. నిందితుడిని పోలీసులు అదుపులోకి తీసుకున్నట్లు సమాచారం.