చీమకుర్తి రూరల్‌ (ప్రకాశం): బావమరిది పెళ్లికి కుటుంబ సభ్యులంతా పిల్లలతో కలిసి ఆటోలో బయల్దేరారు. మృత్యువు రూపంలో ఎదురొచ్చిన మినీవ్యాన్‌ ఆటోను ఢీకొనడంతో తాతా మనవళ్లు మొత్తం ముగ్గురు ప్రాణాలు కోల్పోయారు. ప్రొద్దుటూరి మోక్షజ్ఞ (6) అక్కడికక్కడే ఆటోలో ఇరుక్కొని మృతి చెందాడు. ఆస్పత్రిలో చికిత్స పొందుతూ ప్రొద్దుటూరి బాబులు (50), బాలాజీ(3)  మృతి చెందారు.  మిగిలిన నలుగురూ తీవ్ర గాయాలతో రిమ్స్‌లో చికిత్స పొందుతున్నారు. ఈ ప్రమాదం సంతనూతలపాడు మండలం ఎస్‌ఎస్‌ఎన్‌ ఇంజినీరింగ్‌ కాలేజీ సమీపంలోని కర్నూల్‌ రోడ్డుపై బుధవారం ఉదయం జరిగింది.  ఈ ఘటనలో బాధితులంతా ఒంగోలు శర్మా కాలేజీకి సమీపంలోని సంజయ్‌గాంధీ కాలనీకి చెందిన వారుగా పోలీసులు గుర్తించారు. పోలీసుల కథనం ప్రకారం.. ఒంగోలు శర్మా కాలేజీకి సమీపంలో నివాసం ఉండే ప్రొద్దుటూరి శ్రీకాంత్‌ తన ఆటోలో తండ్రి బాబులు, ఇద్దరు కుమారులు, భార్య ఇతర బంధువులతో కలిసి ఉదయాన్నే దొనకొండలో బావమరిది పెళ్లికని బయల్దేరారు. సంతనూతలపాడు వద్ద మినీవ్యాన్‌ ఢీకొనడంతో ఆటో నడుపుతున్న శ్రీకాంత్‌కు రెండుకాళ్లు, చెయ్యి విరిగింది. శ్రీకాంత్‌ కుమారుడు మోక్షజ్ఞ అక్కడికక్కడే మృతి చెందాడు. గాయపడ్డవారిని రిమ్స్‌కు తరలించారు. శ్రీకాంత్‌ తండ్రి బాబులు తలకు తీవ్రమైన గాయాలు కావడంతో రిమ్స్‌లో చికిత్స పొందుతూ మృతి చెందాడు. శ్రీకాంత్‌ రెండో కుమారుడు మూడేళ్ల బాలాజీ తలకు బలమైన గాయాలు కాడవంతో పరిస్థితి ఆందోళనకరంగా మారింది. దీంతో బాలాజీని గుంటూరు తరలించగా చికిత్స పొందుతూ మృతిచెందాడు. గాయపడిన మిగిలిన వారిలో శ్రీకాంత్‌ తల్లి మీరమ్మ, భార్య మీరాబీ, అన్న కుమార్తె నిఖిలకు తీవ్ర గాయాలు కావడంతో రిమ్స్‌లో చికిత్స పొందుతున్నారు. ప్రమాదానికి కారణమైన మినీ వ్యాన్‌ డ్రైవర్‌ ప్రమాదం జరిగిన వెంటనే పరారయ్యాడు. ఒంగోలు రూరల్‌ సీఐ ఎం.మురళీకృష్ణ, స్థానిక ఎస్‌ఐ షేక్‌ ఖాసింబాషాతో కలిసి ఘటన స్థలాన్ని  పరిశీలించారు. శ్రీకాంత్‌ ఫిర్యాదు మేరకు ఎస్‌ఐ కేసు నమోదు చేసి దర్యాప్తు చేస్తున్నారు.


 చైనాలోని ఓ మార్కెట్ పరిధిలోని సీసీటీవీలో రికార్డయిన దృశ్యాలు ఒళ్లుగగుర్పొడిచేలా ఉన్నాయి. రెండేళ్లు కూడా నిండని పసిబాలుడు తల్లిదండ్రులతో సూపర్ మార్కెట్కు వచ్చాడు.  బాలుని పేరెంట్స్ పక్కనే ఉన్న మార్కెట్లో మాట్లాడుకుంటున్నారు. అదే సమయంలో బాలుడు ఒంటరిగా ఆడుకుంటుండగా ఓ మినీ వ్యాన్ ఢీకొట్టింది. పార్కింగ్లోంచి మినీ వ్యాన్ తీస్తుండగా బాలున్ని గమనించకుండా డ్రైవర్ ముందుకు పోనిచ్చాడు. ముందు రెండు టైర్ల మధ్యలో, కుడివైపు టైరుకు దాదాపు ఆనుకొని బాలుని పక్క నుంచి వ్యాను వెళ్లింది. గమనించిన డ్రైవర్ వెంటనే బ్రేక్ వేశాడు. అప్పటికే వెనక టైరు వరకు వచ్చిన బాలుడు వెనక టైరు కిందకు వచ్చాడు. అదృష్టం కొద్ది అక్కడ నీరు ఉండటంతో బ్రేక్ వేయడంతో ఆగిన టైర్లు బాలున్ని ముందుకు తోశాయి. లేక పోతే టైర్లు బాలుని పైకి వచ్చేవి. ఈ సంఘటన తూర్పు చైనాలో జియాంగ్సు ప్రావిన్స్లోని క్సుజోహులో ఉన్న ఓ సూపర్ మార్కెట్లో చోటు చేసుకుంది.  
 
 ప్రమాదాన్ని గమనించిన బాలుని తల్లిదండ్రులు వెంటనే అక్కడకు వచ్చి బాలున్ని బయటకు తీశారు. వ్యాన్ కింద పడి వెనక టైర్లు ముందుకు లాక్కు వచ్చినా బాలుడు స్పల్పగాయాలతో ప్రాణాపాయస్థితినుంచి తప్పించుకున్నాడు.