వెనుకబడిన ప్రాంతాలు లండన్‌లో కూడా ఉంటాయి. తూర్పు లండన్‌లోని న్యూహామ్‌ అలాంటి ఒక ప్రాంతం. అక్కడి ఎన్‌.హెచ్‌.ఎస్‌ (నేషనల్‌ హెల్త్‌ సర్వీస్‌) శాఖ హాస్పిటల్‌లో పని చేసే డాక్టర్‌ ఫర్జానా హుసేన్‌ ఇప్పుడు అందరి దృష్టిని ఆకర్షిస్తోంది. దానికి కారణం బ్రిటన్‌లోని మూలమూలలా ఆమె నిలువెత్తు హోర్డింగ్‌లు ప్రదర్శితం కావడమే. బ్రిటన్‌లో పుట్టి పెరిగిన ఈ బంగ్లాదేశి అక్కడే 1995లో మెడిసిన్‌ పూర్తి చేసి జనరల్‌ ప్రాక్టీషనర్‌గా పని చేస్తోంది. కరోనా మహమ్మారి విజృంభించిన గత నాలుగు నెలలుగా తన క్లినిక్‌లో అలుపు లేకుండా పని చేస్తోంది. ఎన్‌.హెచ్‌.ఎస్‌ తన 72వ వార్షికోత్సవం సందర్భంగా దేశవ్యాప్తంగా తన బ్రాంచ్‌ హాస్పిటల్స్‌లో కరోనాపై యుద్ధం చేస్తున్న డాక్టర్లను గౌరవించదలచుకుంది. మొత్తం 12 మంది డాక్టర్లను ఎంపిక చేసి వారికి కృతజ్ఞతలు చెప్తూ హోర్డింగ్స్‌ ఏర్పాటు చేసింది. ఆ 12 మందిలో డాక్టర్‌ ఫర్జానా కూడా ఒకరుగా నిలిచి ప్రశంసలు పొందుతోంది. ‘నేను మెడిసిన్‌ చేస్తుండగా మా అమ్మకు హార్ట్‌ ఎటాక్‌ వచ్చింది. నేను కాలేజ్‌ నుంచి 250 మైళ్ల దూరంలో ఉన్న ఇంటికి వెళ్లి ఆమె దగ్గర ఉన్నాను. కాని మా అమ్మ– ‘వెళ్లు... చదువుకో... నువ్వు డాక్టర్‌ అయ్యి నలుగురికీ సాయం చెయ్యి’ అని చెప్పింది. ఆ తర్వాత ఐదు రోజులకు ఆమె చనిపోయింది. నా దగ్గరకు ఏ పేషెంట్‌ వచ్చినా వారు ఎవరికో ఒకరికి కుటుంబ సభ్యులు అయి ఉంటారని, వారి ప్రాణాలు ముఖ్యమని భావిస్తాను. వారికి శ్రద్ధగా వైద్యం చేస్తాను’ అని చెప్పిందామె. ‘నేను ఏ వసతులు లేని ప్రాంతంలో పని చేస్తున్నాను. పిల్లలకు టీకాలు వేయడం కూడా ఇక్కడ పెద్ద విషయం. కాని ప్రజలు నన్ను ఇష్టపడతారు. ఇరువురం కలిసి జబ్బులపై పోరాటం చేస్తున్నాం’ అంటుందామె. గృహిణిగా ఇల్లు, పిల్లలను చూసుకుంటూనే ఆమె తన విధులను నాగా లేకుండా నిర్వర్తిస్తోంది. లండన్‌ కూడలిలో ఏర్పాటైన తన భారీ హోర్డింగ్‌ ముందు ఫర్జానా నిలబడి చూసుకునే ఫోటో చాలామందికి నచ్చింది. మంచి పనులు చేసే వారికి గుర్తింపు వచ్చే తీరుతుందని ఈ ఉదంతం తెలియచేస్తోంది. 


 లండన్: మహిళపై కిరాతంగా దాడి చేసిన దొంగను పట్టుకునేందుకు లండన్ పోలీసులు తీవ్రంగా ప్రయత్నిస్తున్నారు. ఇందులో భాగంగా సీసీటీవీ ఫుటేజీని విడుదల చేశారు. దొంగను ఎవరైనా గుర్తిస్తే తమకు సమాచారం అందించాలని ప్రజలకు పోలీసులు విజ్ఞప్తి చేశారు.
 
 ఫిబ్రవరి 20న నార్విచ్ రోడ్ లోని ఫారెస్ట్ గేట్ వద్ద జరిగిన ఈ దారి దోపిడీ స్థానికంగా సంచలనం రేపింది. నైట్ బస్సు దిగి ఒంటరిగా నడుచుకుంటూ వెళుతున్న మహిళ(31)ను ఓ దుండగుడు ఆపాడు. ఏం చేస్తున్నావంటూ ఆమెను ప్రశ్నించాడు. పోలీసులకు సమాచారం అందించేందుకు ఆమె ప్రయత్నించగా తన చేతిలోని బాటిల్ తో దాడికి దిగాడు. ఆమె చేతిలోని సెల్ ఫోన్ లాక్కుని తల, చేతులపై విచక్షణారహితంగా దాడి చేశాడు. బాధితురాలు కిందపడిపోవడంతో ఆమెను అక్కడే వదిలేసి సెల్ ఫోన్ తో పారిపోయాడు.
 
 కొంతసేపటికి తేరుకున్న బాధితురాలు సమీపంలోని ఇంటికి వెళ్లి వారి సహాయంతో పోలీసులను ఆశ్రయించింది. ఆమెను వెంటనే ఆస్పత్రికి తరలించారు. దుండగుడు నలుపు రంగులో ఉన్నాడని, బ్లాక్ జాకెట్, ముదరు రంగు ప్యాంట్ ధరించివున్నాడని బాధితురాలు తెలిపింది. అతడి చేతిలో రెడ్ వైన్ బాటిల్ ఉందని వెల్లడించింది. నిందితుడిని గుర్తిస్తే తమకు తెలపాలని స్థానికులను పోలీసులు కోరారు.