‘‘దర్శకులు శేఖర్‌ కమ్ములగారి ‘లైఫ్‌ ఈజ్‌ బ్యూటిఫుల్‌’ సినిమాలో నాగరాజు క్యారెక్టర్‌ చేశాను. ఆ క్యారెక్టర్‌కు మంచి ప్రశంసలు దక్కాయి. ఇప్పటికీ నన్ను కొందరు నాగరాజు అనే పిలుస్తున్నారు’’ అన్నారు సుధాకర్‌ కోమాకుల. హరినాథ్‌ బాబు. బి దర్శకత్వంలో సుధాకర్‌ కోమాకుల, నిత్యా శెట్టి జంటగా డి. శ్రీకాంత్‌ నిర్మించిన చిత్రం ‘నువ్వు తోపురా’. జేమ్స్‌ వాట్‌ సహ–నిర్మాత. ఈ చిత్రం రేపు విడుదల కానుంది. ఈ సందర్భంగా సుధాకర్‌ మాట్లాడుతూ– ‘‘మాది వైజాగ్‌. పీజీ పూర్తి చేశాను. ‘లైఫ్‌ ఈజ్‌ బ్యూటీఫుల్‌’ సినిమా తర్వాత ‘ఉందిలే మంచి కాలం, కుందనపు బొమ్మ’ సినిమాల్లో నటించాను. ఆశించిన స్థాయిలో ప్రేక్షకుల స్పందన లభించలేదు. ఇప్పుడు మంచి కంటెంట్‌ ఉన్న ‘నువ్వు తోపురా’ సినిమాతో ప్రేక్షకుల ముందుకు వస్తున్నాను. ఇందులో సరూర్‌నగర్‌ సూర్య అనే క్యారెక్టర్‌ చేశాను. మంచి పెయిన్‌ ఉన్న క్యారెక్టర్‌. గల్లీల్లో అల్లరి చిల్లరిగా తిరిగే కుర్రాడు అమెరికా వెళ్తాడు. అక్కడ ఎలాంటి అనుభవాలు, పరిస్థితులు ఎదుర్కొన్నాడు? వాటి వల్ల అతనిలో వచ్చిన మార్పు ఏంటి? అన్న అంశాలు సినిమాలో ఆసక్తికరంగా ఉంటాయి. అలాగే  హీరోకి, అతని తల్లికి మధ్య సన్నివేశాలు భావోద్వేగభరితంగా ఉంటాయి. ఈ సినిమా దర్శకుడు హరినాథ్‌తో నాకు ముందు నుంచే పరిచయం ఉంది. ఇంతకుముందు రెండు కథలు విన్నాను కానీ మా కాంబినేషన్‌లో సినిమా కుదర్లేదు. ఇప్పటికి కుదిరింది. అమెరికాలో దాదాపు రెండు నెలలు షూటింగ్‌ చేశాం. డి. శ్రీకాంత్, జేమ్స్‌వాట్‌ దగ్గరుండి అన్ని పనులు చూసుకున్నారు. ఈ సినిమాకు నేను క్రియేటివ్‌ ప్రొడ్యూసర్‌గా కూడా వర్క్‌ చేశాను. ‘లైఫ్‌ ఈజ్‌ బ్యూటీపుల్‌’ ఫిల్మ్‌ స్కూల్‌లా అనిపిస్తే.. ఈ సినిమా వర్క్‌షాప్‌లా అనిపించింది. ఆడియన్స్‌తో ‘నువ్వు తోపురా’ అనిపించుకోవాలన్నదే హీరో తపన. అలాగే ఈ సినిమాలో ఓ సర్‌ప్రైజ్‌ క్యారెక్టర్‌ ఉంది’’ అని అన్నారు. ఇంకా సుధాకర్‌ మాట్లాడుతూ– ‘‘మంగళగిరిలో మా టీమ్‌ రోడ్డు ప్రమాదానికి గురవడం నాకు చాలా బాధ కలిగించింది. కారు నడిపింది నేను కాదు. ఈ దురదృష్టకర సంఘటనలో మరణించిన లక్ష్మీ కుటుంబానికి ఐదులక్షల రూపాయలను ఆర్థిక సహాయంగా అందించాలని టీమ్‌ నిర్ణయించింది’’ అ ని చెప్పుకొచ్చారు.

మంగళగిరి: తెలుగు సినిమా పరిశ్రమ వర్ధమాన కథానాయకుడు సుధాకర్‌ కోమాకుల కారు ఢీ కొని ఓ మహిళ మృతి చెందింది. గుంటూరు జిల్లా మంగళగిరి మండలంలోని ఆత్మకూరు జాతీయ రహదారిపై శనివారం ఈ ఘటన జరిగింది. మంగళగిరి రూరల్‌ పోలీసులు తెలిపిన వివరాల మేరకు.. లైఫ్‌ ఈజ్‌ బ్యూటిఫుల్‌ ఫేం సుధాకర్‌ తన కొత్త సినిమా ‘‘నువ్వు తోపురా’’ ప్రమోషన్‌ కార్యక్రమంలో భాగంగా హీరోయిన్‌ నిత్యాషెట్టితో కలిసి గుంటూరులోని ఓ ప్రైవేటు కళాశాలకు కారులో వెళ్తున్నాడు. మరికొద్ది సేపట్లో గుంటూరు చేరుకుంటారనగా వేగంగా వెళ్తున్న కారు.. జాతీయ రహదారి డివైడర్లపై మొక్కల సంరక్షణ పనిచేసే చినకాకాని గ్రామానికి చెందిన మహిళ జలసూత్రం లక్ష్మి (36)ని ఢీ కొట్టింది. ఆ వేగానికి ఎగిరిపడ్డ లక్ష్మి సమీపంలో ఉన్న ట్రాక్టర్‌కు తగిలి అక్కడికక్కడే మృతి చెందింది. డివైడర్‌లో నాటేందుకు ట్రాక్టర్‌లో మొక్కలు తీసుకురాగా లక్ష్మి ఎర్ర జెండా పట్టుకుని అటుగా వచ్చే వాహనాలకు సిగ్నల్‌ ఇస్తోంది. ఆ సిగ్నల్‌ను గుర్తించకుండా వేగంగా కారు రావడంతో ఘోర ప్రమాదం జరిగింది. ట్రాక్టర్‌ను కూడా ఢీకొట్టడంతో కారు ముందు భాగం నుజ్జునుజ్జయింది. సీటు బెల్టు పెట్టుకోని డ్రైవర్‌ సుందరరావుకు తీవ్ర గాయాలవగా పక్క సీట్లో సీటు బెల్టు పెట్టుకుని కూర్చున్న హీరో సుధాకర్‌కు స్వల్ప గాయాలయ్యాయి. కారులో వెనుక ఉన్న హీరోయిన్‌ నిత్యాషెట్టి ప్రమాదం తర్వాత అక్కడి నుంచే తిరిగి వెళ్లిపోయింది. స్థానికులు లక్ష్మి మృతదేహంతో పాటు డ్రైవర్, హీరో సుధాకర్‌లను ఎన్‌ఆర్‌ఐ ఆసుపత్రికి తరలించారు. లక్ష్మి మృతి వార్త తెలుసుకున్న కుటుంబసభ్యులు, బంధువులు ఎన్‌ఆర్‌ఐ ఆసుపత్రికి చేరుకుని భోరున విలపించారు. ముఠా కూలి పని చేసే లక్ష్మి భర్త.. తమకు పుట్టిన కుమారుడితో పాటు మరో అనాథను లక్ష్మి పెంచుతోందని, వారికి దిక్కెవరంటూ విలపించడం అక్కడున్న వారిని కలిచివేసింది. పోలీసులు కేసు నమోదు చేసి విచారణ ప్రారంభించారు. మంగళగిరి రూరల్, పట్టణ సీఐలు శరత్‌బాబు, రవిబాబు ఘటనాస్థలానికి చేరుకుని వివరాలు సేకరించారు.

‘‘నువ్వు తోపురా’ సినిమా ట్రైలర్‌ చాలా బావుంది. సినిమా కూడా అందరికీ నచ్చేలా ఉంటుందని భావిస్తున్నాను. ఈ సినిమాతో సుధాకర్‌ కోమాకులతో పాటు యూనిట్‌ అందరికీ మంచి పేరు రావాలని కోరుకుంటున్నాను. ఆల్‌ ది బెస్ట్‌’’ అని హీరో ప్రభాస్‌ అన్నారు. సుధాకర్‌ కోమాకుల, నిత్యాశెట్టి జంటగా హరినాథ్‌ బాబు.బి దర్శకత్వంలో తెరకెక్కిన చిత్రం ‘నువ్వు తోపురా’. బేబి జాహ్నవి సమర్పణలో యునైటెడ్‌ ఫిలింస్, ఎస్‌.జె.కె. ప్రొడక్షన్స్‌ (యుఎస్‌ఎ) పతాకాలపై  డి.శ్రీకాంత్‌ నిర్మించిన ఈ సినిమా మే 3న విడుదలవుతోంది. రెండు తెలుగు రాష్ట్రాల్లో గీతా ఫిలిం డిస్ట్రిబ్యూటర్స్‌ ఈ సినిమాను రిలీజ్‌ చేస్తోంది. ఈ చిత్రం ట్రైలర్‌ను ప్రభాస్‌ విడుదల చేశారు. ఈ సందర్భంగా డి. శ్రీకాంత్‌ మాట్లాడుతూ – ‘‘సూరి అనే హైదరాబాద్‌ కుర్రాడి జీవితానికి సంబంధించిన కథ ఇది. ఎలాంటి బాధ్యతలు లేకుండా తిరిగే సూరి ఎలా మారాడు? అమెరికా ఎందుకు వెళ్లాడు? అన్నదే కథ. మా సినిమా ట్రైలర్‌ను విడుదల చేసి, యూనిట్‌ను అభినంధించిన ప్రభాస్‌గారికి థ్యాంక్స్‌. అల్లు అరవింద్, బన్నీ వాసుగార్లకు కృతజ్ఞతలు’’ అన్నారు. నిరోషా, రవివర్మ, శ్రీధరన్, దివ్యా రెడ్డి తదితరులు నటించిన ఈ చిత్రానికి సహ నిర్మాతలు: డా.జేమ్స్‌ వాట్‌ కొమ్ము (యు.ఎస్‌.ఎ), రితేష్‌ కుమార్, కెమెరా: పక్రాష్‌ వేలాయుధన్‌ (యు.ఎస్‌.ఎ), వెంకట్‌ సి.దిలీప్‌ (యు.ఎస్‌.ఎ), సంగీతం: సురేష్‌ బొబ్బిలి, యు.ఎస్‌. లైన్‌ ప్రొడ్యూసర్‌: స్టీఫెన్‌ ఓలెర్‌టెన్, ఎగ్జిక్యూటివ్‌ ప్రొడ్యూసర్స్‌: రవివర్మ దంతులూరి, రాజు ఆనందేశాయ్‌.  

శేఖర్‌ కమ్ముల దర్శకత్వంలో వచ్చిన ‘లైఫ్‌ ఈజ్‌ బ్యూటీఫుల్‌’లో నాగరాజు పాత్ర అందరికీ గుర్తుండే ఉంటుంది. ఆ పాత్రలో సుధాకర్‌ తెలంగాణ యాసలో మాట్లాడి నాచురల్‌గా యాక్ట్‌ చేశాడు. సుధాకర్‌ ప్రస్తుతం హీరోగా వస్తోన్న చిత్రం ‘నువ్వు తోపురా’. తాజాగా ఈ మూవీ టీజర్‌ను రిలీజ్‌ చేశారు. ‘ప్రతీ మగాడికి దురదుంటది..కానీ ఒక్క అమ్మాయిని చూసిన తరువాత ఆగిపోతుంది’, ‘మేకలు ఎక్కువగా ఉంటే.. శాకాహారికి కూడా మాంసం తినాలనిపిస్తది. ఈడ బతకాలంటే తోడేళ్ల లెక్కుండాలె’ వంటి డైలాగ్‌లు వైరల్‌ అవుతున్నాయి. యునైటెడ్‌ ఫిలిమ్స్‌పై శ్రీకాంత్‌ నిర్మిస్తోన్న ఈ చిత్రానికి హరినాథ్‌ బాబు దర్శకత్వం వహిస్తున్నాడు. ఈ సినిమాలో నిత్యా శెట్టి హీరోయిన్‌గా నటిస్తోంది. 

సోషల్‌ మీడియాలో యాక్టివ్‌గా ఉంటూ.. తన అభిమానులను రౌడీస్‌ అంటూ సంబోధిస్తుంటారు విజయ్‌ దేవరకొండ. అర్జున్‌ రెడ్డి సినిమాతో ఓవర్‌నైట్‌ స్టార్‌గా ఎదిగిన విజయ్‌.. చకచకా ప్రాజెక్ట్‌లను ఓకే చేస్తూ.. వరుస సినిమాలతో బిజీగా ఉన్నారు.  ‘నువ్వు తోపు రా’ మూవీ టీజర్‌ను విజయ్‌ చేతులమీదుగా రిలీజ్‌ చేయించనున్నట్లు నిర్మాతలు ప్రకటించారు. నాటి హీరోయిన్‌ నిరోష చాలాకాలం తరువాత నటిస్తోన్న ఈ మూవీ టీజర్‌ను జూలై 14న విడుదల చేయనున్నారు. సుధాకర్‌, నిత్యా శెట్టిలు ప్రధాన పాత్రలు పోషిస్తున్నారు. 

‘లైఫ్‌ ఈజ్‌ బ్యూటిఫుల్‌‘ ఫేమ్‌ సుధాకర్‌ హీరోగా హరనాథ్‌ బాబు.బి దర్శకత్వంలో యునైటెడ్‌ ఫిలింస్‌ బ్యానర్‌ పై డి.శ్రీకాంత్‌ నిర్మిస్తున్న చిత్రం ‘నువ్వు తోపురా’. షూటింగ్‌ కంప్లీట్‌ చేసుకున్న ఈ సినిమా ప్రస్తుతం పోస్ట్‌ ప్రొడక్షన్‌ పనులు జరుపుకుంటుంది. ఈ సందర్భంగా హీరో సుధాకర్‌ మాట్లాడుతూ ‘‘ఈ సినిమాలో నా క్యారెక్టర్‌ అన్ని ఎమోషన్స్‌తో కూడి ఉంటుంది. యూత్‌ తమని తాము చూసుకునే రోల్‌ ఇది. ఫస్ట్‌ సినిమా అయినా కూడా మంచి సినిమా అందించాలని నిర్మాణంలో ఎక్కడా రాజీ పడలేదు. ఈ సినిమా నాకు మంచి పేరు తీసుకు వస్తుందని ఆశిస్తున్నాను’’ అన్నారు.‘‘ఈ సినిమాను 70 శాతం అమెరికాలో, 30 శాతం ఇండియాలో షూట్‌ చేశాం. హాలీవుడ్‌ కాన్సెప్ట్‌తో దర్శకుడు హరినాథ్‌ రూపొందించాడు. పోస్ట్‌ ప్రొడక్షన్‌ వర్క్స్‌ జరుగుతున్నాయి. త్వరలోనే గ్రాండ్‌గా రిలీజ్‌ చేస్తాం’’ అన్నారు నిర్మాత శ్రీకాంత్‌.


 
 'లైఫ్ ఈజ్ బ్యూటిఫుల్' ఫేమ్ సుధాకర్ కొంత విరామం తరువాత మళ్లీ వెండితెరపై కనువిందు చేసేందుకు రెడీ అయ్యాడు. హరనాథ్ బాబు.బి దర్శకత్వంలో యునైటెడ్ ఫిలిమ్స్ పతాకంపై డి.శ్రీకాంత్ నిర్మిస్తున్న నువ్వు తోపురా సినిమాతో ప్రేక్షకుల ముందుకు రానున్నాడు.  ఇప్పటికే రిలీజ్ అయిన ఈ సినిమా ప్రీ లుక్ పోస్టర్స్ కు మంచి రెస్పాన్స్ వచ్చింది.  సుధాకర్ కోమాకుల  డిఫరెంట్ క్యారెక్టర్ లో కనిపిస్తున్న ఈ సినిమా ప్రస్తుతం నిర్మాణ దశలో ఉంది.
 
 సుధాకర్ కోమాకుల సరసన నిత్యా శెట్టి కథానాయికగా నటిస్తున్న ఈ చిత్రం ఫస్ట్ లుక్ పోస్టర్ను శుక్రవారం(జూన్ 2) విడుదల చేసారు. ఈ సందర్భంగా చిత్ర నిర్మాత డి.శ్రీకాంత్ మాట్లాడుతూ.. 'సుధాకర్ కోమాకుల, నిత్యాశెట్టిలు జంటగా రూపొందుతున్న 'నువ్వు తోపురా' సినిమాను 70% అమెరికాలో షూట్ చేసేందుకు ప్లాం చేస్తున్నాం. 30% ఇండియాలో షూట్ చేస్తాం. మొదటి షెడ్యూల్ మే 23న మొదలయింది. తర్వాతి షెడ్యుల్ అమెరికాలో ప్రారంభంకానుంది. హాలీవుడ్ కాన్సెప్ట్తో రూపొందుతున్న  ఈ సినిమా టీజర్ను జూన్ 9న విడుదల చేయనున్నాం'  అని తెలిపారు.