న్యూఢిల్లీ: ఢిల్లీ డిప్యూటీ సీఎం మనిశ్‌ సిసోడియా కార్యాలయంలో దొంగలు పడ్డారు. ఆయన కార్యాలయంలోకి గుర్తు తెలియని దుండగులు చొరబడి రెండు కంప్యూటర్లు ఎత్తుకెళ్లడమే కాకుండా విలువైన పత్రాలు కూడా దోచుకెళ్లారు. వెళ్తూ వెళ్తూ ఆ కార్యాలయాన్ని ధ్వంసం చేశారు. ఢిల్లీలోని పత్పర్‌గంజ్‌లోని కార్యాలయంలో ఈ ఘటన చోటు చేసుకుంది.
 
 'పత్పర్‌గంజ్‌లోని డిప్యూటీ సీఎం మనీశ్‌ సిసోడియా కార్యాలయంలో దొంగతనం జరిగింది. అది ఏ సమయంలో అనేది కచ్చితంగా తెలియదు. తాళం తీసి లోపలికి ప్రవేశించి దోచుకోవడానికి ముందే దొంగలు సీసీటీవీని తొలుత ఆఫ్‌ చేయడమే కాకుండా వెళ్లే సమయంలో ఆ కెమెరాను, అందులోని నమోదైన రికార్డింగులను, సీపీయూను, విలువైన ఇతర వస్తువులను ఎత్తుకెళ్లారు. ఫొరెన్సిక్‌ బృందం ఇప్పటికే ఆధారాలు సేకరించింది. కేసు దర్యాప్తు వేగాన్ని పెంచాం' అని సీనియర్ పోలీసు అధికారి ఓమ్‌విర్‌ సింగ్‌ తెలిపాడు.