సోషల్‌ మీడియా తెచ్చే తంటాలు అన్నీఇన్నీ కావు. జనన మరణవార్తలను వేగంగా అందరికీ చేరవేసే ఈ మాధ్యమం అసత్యపు ప్రచారాలను సైతం అంతే వేగంగా వ్యాపింపజేస్తుంది. తాజాగా ఓ సీనియర్‌ నటుడు బతికుండగానే చనిపోయాడంటూ కొందరు పుకారు లేపగా చాలామంది అది నిజమేననుకుని అతడి ఆత్మకు శాంతి చేకూరాలంటూ నివాళులు అర్పించారు. తనను బతికుండగానే సమాధి చేస్తున్నారేంటని ఆవేదన చెందిన ప్రేమ చోప్రా తను ప్రాణాలతోనే ఉన్నానంటూ స్పందించాడు. బాలీవుడ్‌ హిట్‌ సినిమాల్లో విలన్‌గా రాణించిన ఈ సీనియర్‌ నటుడు మీడియాతో మాట్లాడుతూ.. 'నన్ను బతికుండగానే చంపేస్తున్నారు. దీన్నే శాడిజం అంటారు. నేను ఇక లేనంటూ పుకారు లేపి ఎవరో రాక్షసానందం పొందుతున్నారు. కానీ నేను మీతో హృదయపూర్వకంగా మాట్లాడుతున్నాను. నాకు నిన్న ఉదయం నుంచి ఎన్నో ఫోన​్‌ కాల్స్‌ వస్తున్నాయి. సెలబ్రిటీ మిత్రులు ఫోన్లు చేసి అంతా బాగానే ఉంది కదా అని అడుగుతున్నారు. అసలు నేను చనిపోయానంటూ ఎవరు ప్రచారం చేస్తున్నారో కూడా అర్థం కావడం లేదు. గతంలో నా ఆప్తమిత్రుడు జీతేంద్ర కూడా మరణించాడంటూ అసత్య ప్రచారం చేశారు. ఇప్పుడు నన్ను టార్గెట్‌ చేశారు. ఇక ఈ చెత్త వాగుడు ఆపండి' అని చెప్పుకొచ్చాడు. కాగా ప్రేమ్‌ చోప్రా, అతడి భార్య ఉమ ఇద్దరూ ఈ ఏడాది ప్రారంభంలో కోవిడ్‌ బారిన పడటంతో ముంబై ఆస్పత్రిలో చేరారు. చికిత్స అనంతరం ఇద్దరూ డిశ్చార్జ్‌ అయ్యారు. ఇక ప్రేమ్‌ చోప్రా సినిమాల విషయానికి వస్తే అతడు దోస్తానా, క్రాంతి, జాన్వర్‌, షాహీద్‌, ఉపకార్‌, పురబ్‌ ఔర్‌ పశ్చిమ్‌, దో రాస్తే, కటి పతంగ్‌, దో అంజానే, జాదు తోనా, కల సోనా వంటి పలు సినిమాల్లో అలరించాడు. చదవండి: నాకు లైన్‌ వేయడం ఆపు అనన్య.. విజయ్‌ రిక్వెస్ట్‌  నా ప్రేమ గురించి ఆరోజే వెల్లడిస్తా: విజయ్‌ దేవరకొండ


 ఈరోజు మీతో పాటు పుట్టినరోజు జరుపుకుంటున్న ప్రముఖులు : ప్రేమ్ చోప్రా (నటుడు), తనూజా సమర్ధ్ (నటి)
  
 ఈరోజు పుట్టినరోజు జరుపుకుంటున్న వారి సంవత్సర సంఖ్య 4. ఇది రాహుసంఖ్య. రాహువు అభివృద్ధిని, విస్తరణని ప్రసాదిస్తాడు. అంటే ఈ సంవత్సరం ఉద్యోగంలో ప్రమోషన్, ఆస్తులలో వృద్ధి, కుటుంబ విస్తరణ ఉంటాయి. దీనివల్ల వివాహం కానివారికి వివాహం అవుతుంది. వివాహం కావలసిన పిల్లలు ఉంటే వారికి వివాహమవుతుంది లేదా వారికి సంతానం కలుగుతుంది. రాహుప్రభావం వల్ల దీర్ఘకాలిక కేసులలో అనుకూలంగా తీర్పులు వచ్చి, ఊరటనిస్తాయి. బర్త్ నంబర్ 23. ఇది చంద్రగురులతో కలసి రాజయోగం ఏర్పడి బుధుని సంఖ్యకావడం వల్ల దైవానుగ్రహంతో మంచి తెలివితేటలు, సంభాషణాచాతుర్యం కలిగి, అందివచ్చిన అవకాశాలను సద్వినియోగం చేసుకుంటారు.
 
 మంచిపదవులు, సంపదలు లభిస్తాయి. సెప్టెంబర్‌లో జన్మించినందువల్ల సున్నిత మనస్కులై, ఎవరినీ నొప్పించక, సత్ప్రర్తనతో ఉంటారు. అయితే జీర్ణసమస్యలు, హృదయ సంబంధ సమస్యలు వచ్చే అవకాశం ఉన్నందువల్ల ముందుగానే తగిన జాగ్రత్తలు, వైద్యసలహాలు తీసుకోవడం మంచిది. లక్కీ నంబర్స్: 1,4,5,6,8; లక్కీ కలర్స్: రోజ్, ఆరంజ్, క్రీమ్, గోల్డెన్, శాండల్, బ్లూ; లక్కీ డేస్: మంగళ, బుధ, శుక్ర, ఆదివారాలు.
  
 సూచనలు: అమ్మవారిని పూజించడం, సుబ్రహ్మణ్యేశ్వర స్వామివారికి అభిషేకం చేయడం, అత్తగారిని కాని తనతో సమానమైన అయిన వారిని కానీ ఆదరించడం మంచిది. ఇంటిలో ఖురాన్ పఠించడం, క్రిస్టియన్లయితే ప్రేయర్ పెట్టించడం, అనాథలకు అన్నదానం చేయడం మంచిది.
 - డాక్టర్ మహమ్మద్ దావూద్