బెంగళూరు : ప్రముఖ కన్నడ సినీనటి రాగిణి ద్వివేదిపై మంగళవారం జేపీ నగర పోలీస్ స్టేషన్లో కేసు నమోదు అయింది. రాగిణి ద్వివేదితో పాటు ఆమె సోదరుడుపై నిర్మాత వెంకటేశ్ ఫిర్యాదు చేశాడు.  వివరాల్లోకి వెళితే....'నాటికోలి' సినిమాలో రాగిణి ద్వివేది నటించేందుకు ఆమె సోదరుడు రుద్రాక్షి దీక్షిత్‌కు రూ.16 నుంచి రూ.17 లక్షలు చెల్లించానని, సినిమా చిత్రీకరణ నిలిచిపోయిన  నేపథ్యంలో డబ్బు తిరిగి చెల్లించాలని పలుమార్లు కోరగా స్పందన లేదని నిర్మాత తన ఫిర్యాదులో పేర్కొన్నాడు.
  
 డబ్బు తిరిగి ఇచ్చేది లేదని, అవసరమైతే మరో సినిమాలో నటిస్తానని రాగిణి చెప్పడంతో పీఎస్లో ఫిర్యాదు చేసినట్లు నిర్మాత తెలిపాడు. వెంకటేశ్ ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. కాగా నాని హీరోగా వచ్చిన  'జెండాపై కపిరాజు' చిత్రంలో రాగిణి నటించిన విషయం తెలిసిందే.


 శ్రీకాంత్ ‘జల్సారాయుడు’గా ప్రేక్షకుల ముందుకు రానున్నారు. ఎస్తేర్ ఇందులో కథానాయిక. సీహెచ్ సుధీర్‌రాజ్ దర్శకుడు. కొలన్ వెంకటేశ్ నిర్మాత. ఇటీవలే హైదరాబాద్‌లో ఈ చిత్రం మొదలైంది. శ్రీకాంత్ మాట్లాడుతూ -‘‘టైటిల్‌కి తగ్గట్టుగా నా పాత్ర ఉంటుంది. కుటుంబ బంధాల నేపథ్యంలో సాగే కథ ఇది. దర్శకుడు మంచి కథను తయారు చేసుకున్నాడు. సినీ నిర్మాణంపై చక్కని అవగాహన కలిగిన నిర్మాత వెంకటేశ్’’ అని తెలిపారు.
  
  దర్శకుడు మాట్లాడుతూ -‘‘కథ వినగానే వెంటనే శ్రీకాంత్ పచ్చజెండా ఊపేశారు. చక్కని కుటుంబ కథ ఇది. భార్యాభర్తల నేపథ్యంలో కథ సాగుతుంది. కథ రీత్యా ఇందులో ఇద్దరు హీరోయిన్లు. మరో కథానాయిక ఎంపిక జరుగుతోంది. చక్రి శ్రావ్యమైన స్వరాలను సమకూర్చే పనిలో ఉన్నారు. ఈ నెల 27న రెగ్యులర్ షూటింగ్ ప్రారంభిస్తాం. డిసెంబర్ 6న సినిమాను విడుదల చేస్తాం’’ అని చెప్పారు. వినోద భరితంగా సాగే సినిమా ఇదని నిర్మాత చెప్పారు. శ్రీకాంత్‌కి జోడీగా నటిస్తుండటం పట్ల ఎస్తేర్ ఆనందం వెలిబుచ్చారు. ఈ చిత్రానికి మాటలు: విక్రమ్‌రాజ్, కెమెరా: కె.బుజ్జి, కూర్పు: ఉద్ధవ్ ఎస్.బి.