బీసీసీఐ అవినీతి నిరోధక విభాగం చీఫ్ రవి సవానీ రాజీనామా చేశారు. వ్యక్తిగత కారణాల వల్ల ఐపీఎల్-8కు ముందే ఆయన తప్పుకుంటానని చెప్పినా బోర్డు కోరికపై ఇప్పటిదాకా కొనసాగారు. ప్రస్తుతం ఇదే విభాగంలో సలహాదారుగా ఉన్న నీరజ్‌కుమార్ చీఫ్‌గా బాధ్యతలు తీసుకునే అవకాశం ఉంది.


 న్యూఢిల్లీ:  గత మూడు సంవత్సరాల నుంచి భారత క్రికెట్ నియంత్రణ మండలి(బీసీసీఐ)లో అవినీతి నిరోధక విభాగానికి చీఫ్ గా పనిచేస్తున్న రవి సవానీ తాజాగా అతని పదవికి రాజీనామా చేశారు.  వ్యక్తిగత కారణాలతో తాను రాజీనామా చేస్తున్నట్లు సవానీ బీసీసీఐకి రాసిన లేఖలో పేర్కొన్నారు. 2012వ సంవత్సరంలో బీసీసీఐ అవినీతి నిరోధక విభాగంలో  చీఫ్ గా నియమితులైన రవి సవానీ.. గత ఏప్రిల్ నెలలోనే తన పదవికి రాజీనామా చేయాలని భావించారు.. అయితే ఐపీఎల్ ఉన్న దృష్ట్యా అతని రాజీనామా నిర్ణయాన్ని వాయిదా వేసుకోవాల్సి వచ్చింది. 
  
 రవి సవానీ రాజీనామాను బీసీసీఐ ఆమోదించింది. కాగా, రవి సవానీ నోటీస్ ముగింపు కాలం మరో నెల వరకూ ఉండటంతో అప్పటి వరకూ అతను పదవిలో కొనసాగుతారని బీసీసీఐ బోర్డు సెక్రటరీ అనురాగ్ ఠాకూర్ తెలిపారు. బీసీసీఐ అవినీతి నిరోధక శాఖ సలహాదారుగా ఇటీవలే పదవీ బాధ్యతలు చేపట్టిన నీరజ్ కుమార్.. సవానీ స్థానాన్ని భర్తీ చేసే అవకాశం ఉంది.