థానే: కదులుతున్న రైల్లోంచి దిగేందుకు ప్రయత్నించి రైలుకు ప్లాట్ ఫాంకు మధ్య ఇరుక్కుపోయిన యువతి ప్రాణాలతో బయటపడింది. ఈ సంఘటన థానేలో చోటుచేసుకుంది. రేష్మీ కరాందికర్ అనే యువతి (21) హైదరాబాద్ ఎక్స్ప్రెస్లో ప్రయాణిస్తోంది. ఆ రైలు థానే స్టేషన్లో ఆగదు. కానీ అక్కడికి రాగానే కొంచె నెమ్మదిగా వెళుతుంది. సరిగ్గా ఫ్లాట్ ఫామ్ నంబర్ 5 మీదుగా వెళుతున్న రైల్లోంచి దిగేందుకు ప్రయత్నించిన రేష్మి మధ్యలో ఇరుక్కుపోయింది. అక్కడ ఉన్న వారు కేకలు వేయడంతో రైలు చైన్ లాగారు.
 
 అప్పటికే ఆ అమ్మాయికి తీవ్రంగా గాయాలయ్యాయి. కానీ, చోద్యం ఏంటంటే అక్కడికి వచ్చినవారంతా తమ సెల్ ఫోన్లలో ఫొటోలు వీడియోలు తీసుకునేందుకు ప్రయత్నించారే తప్ప రైలు కింద ఇరుక్కుపోయి పట్టాలపై రక్తమోడుతున్న ఆమెకు ఎవరూ చేయందించలేదు. అదే సమయంలో ఆ రోజు సెలవుల కారణంగా విధులకు హాజరు కానీ రఘునాథ్ బాజిరావ్ కావ్లే (50) అనే కానిస్టేబుల్ ఈ విషయం తెలుసుకుని వేగంగా వచ్చాడు. వెంటనే అందరిని పక్కకు నెట్టేసి ఆమెను అతికష్టం మీద బయటకు తీసి స్వయంగా ఆస్పత్రికి తరలించి వైద్యం ఇప్పించాడు. దీంతో ఆ యువతి ప్రాణాలతో బయటపడింది. రెండు రోజుల కిందటే రఘునాథ్ ఓ చైన్ స్నాచర్ను బంధీగా పట్టుకున్నాడు. ఇలా అతడు ఎన్నో మంచి పనులు చేస్తూ వస్తున్నాడు.