న్యూఢిల్లీ: ఆన్‌లైన్‌లో నకిలీ రివ్యూల కట్టడి దిశగా భారతీయ ప్రమాణాల మండలి (బీఐఎస్‌) ‘ఇండియన్‌ స్టాండర్డ్‌ (ఐఎస్‌) 19000:2022’ను తీసుకొచ్చింది. ఆన్‌లైన్‌లో వినియోగదారుల నుంచి సేకరించే రివ్యూలు, ఆ రివ్యూల సేకరణకు అనుసరించే అవసరాలు, ప్రమాణాలు, వాటి ప్రచురణకు కచ్చితంగా బీఐఎస్‌ ప్రమాణాలను ఈ కామర్స్‌ సంస్థలు, ఇతర ఆన్‌లైన్‌ ప్లాట్‌ఫామ్‌లు అనుసరించాల్సి ఉంటుంది. ఈ మేరకు బీఐఎస్‌ ప్రకటన విడుదల చేసింది. ఆన్‌లైన్‌ వేదికగా కస్టమర్ల రివ్యూలు (అభిప్రాయాలు, సమీక్ష) సమీకరించే అన్ని సంస్థలు, ఉత్పత్తులు, సేవలను విక్రయించే, సరఫరాచేసే సంస్థలు, రివ్యూలను సమీకరించేందుకు మూడో పార్టీని ఏర్పాటు చేసుకునే సరఫరాదారులు, విక్రయదారులు వీటిని పాటించాల్సి ఉంటుందని బీఐఎస్‌ తెలిపింది. ముఖ్యంగా రివ్యూ తీసుకునే విషయంలో అనుసరించాల్సిన ప్రమాణాలు, సూత్రాలను ఇండియన్‌ స్టాండర్డ్‌ సూచిస్తుంది. రివ్యూని రాసే, రివ్యూని సమీక్షించే వారిపై ఉండే బాధ్యతలను కూడా తెలియజేస్తుంది. ‘‘ఆన్‌లైన్‌లో వస్తువులను కొనుగోలు చేసే వారిలో ఇది విశ్వాసాన్ని కలిగిస్తుంది. మెరుగైన నిర్ణయాన్ని తీసుకోవడానికి సాయపడుతుంది. ఈ కామర్స్‌ ఎకోసిస్టమ్, వినియోగదారులు, ఈ కామర్స్‌ వేదికలు, విక్రేతలు ఇలా భాగస్వాములు అందరికీ ఇండియన్‌ స్టాండర్డ్‌ 19000:2022 ప్రయోజనం కలిగిస్తుంది’’అని బీఐఎస్‌ తెలిపింది.

సాక్షి, నర్సీపట్నం: నర్సీపట్నం నియోజకవర్గం మారుమూలగా ఉన్నా జిల్లాలో ప్రత్యేకత సంతరించుకుంది. ఇక్కడ గెలుపొందిన ఎమ్మెల్యేలకు కేబినెట్‌ హోదాతో మంత్రి పదవులు లభించాయి. రాజుల కాలంలో కాంగ్రెస్‌ను ఆదరించిన ఓటర్లు, టీడీపీ ఆవిర్భావం తర్వాత అనేకసార్లు ఆ పార్టీకే పట్టం కట్టారు. ఆంగ్లేయులను ఎదురొడ్డి పోరాడి, వీరమరణం పొందిన అల్లూరి ఉద్యమానికి ఊపిరులూదిన ప్రాంతంగా నర్సీపట్నం ప్రాధాన్యత సంతరించుకుంది. ఏజెన్సీ ముఖద్వారంగా పేరుగాంచిన నర్సీపట్నం మారుమూలగా ఉన్నా.. రాష్ట్ర, జిల్లా స్థాయిలో గుర్తింపు పొందింది. ఇక్కణ్ణుంచి ఎన్నికైన సాగి సూర్యనారాయణరాజు మూడుసార్లు ఎమ్మెల్యేగా గెలిచి కాసు బ్రహ్మానందరెడ్డి, పీవీ నరసింహారావు, జలగం వెంగళరావు మంత్రివర్గాల్లో కేబినెట్‌ మంత్రి పదవులను అలంకరించారు. టీడీపీ ఆవిర్భావం తర్వాత చింతకాయల అయ్యన్నపాత్రుడు ఐదుసార్లు ఎమ్మెల్యేగా ఎన్నికై  ఎన్టీ రామారావు, చంద్రబాబునాయుడు మంత్రివర్గాల్లో కేబినెట్‌ మంత్రిగా పనిచేశారు. ఈ విధంగా ఉన్నత పదవులు పొందిన నియోజకవర్గ నాయకులు జిల్లా రాజకీయాలను శాసించే స్థాయిలో పనిచేశారు. తొలి ఎమ్మెల్యేగా సాగి సూర్యనారాయణరాజు చరిత్రలో నిలిచారు. ఇండిపెండెంట్‌గా రుత్తల లత్సాపాత్రుడు, రెడ్డి కాంగ్రెస్‌ తరపున బోళెం గోపాత్రుడు ఎన్నికయ్యారు. పదిహేనేళ్లు అప్రతిహతంగా ప్రాతినిథ్యం వహిస్తున్న టీడీపీని నిలువరిస్తూ 2009లో బోళెం ముత్యాలపాప కాంగ్రెస్‌ తరపున గెలుపొందారు. అప్పట్లో నాతవరం మండలంలోని 20 గ్రామాలు, నర్సీపట్నం మండలంలోని పది గ్రామాలు, మూడు గ్రామాలు మినహా మాకవరపాలెం మండలం,  పూర్తిస్థాయిలో కోటవురట్ల మండలం నర్సీపట్నం నియోజకవర్గంలో ఉండేవి. 2009 పునర్విభజన తరువాత చింతపల్లి నియోజకవర్గంలో ఉన్న గొలుగొండ మండలం, పూర్తిస్థాయిలో నర్సీపట్నం, నాతవరం, మాకవరపాలెం మండలాలు నర్సీపట్నం నియోజకవర్గంలో కలిశాయి. కోటవురట్ల మండలాన్ని విడదీసి పాయకరావుపేట నియోజకవర్గంలో కలిపారు.  నర్సీపట్నం అసెంబ్లీకి ఎన్నికైన నేతల వివరాలు కాలపరిమితి ఎమ్మెల్యే పార్టీ 1955 సాగి సూర్యనారాయణరాజు కాంగ్రెస్‌ 1962 రుత్తల లత్సాపాత్రుడు స్వతంత్ర 1967,1972 సాగి సూర్యనారాయణరాజు కాంగ్రెస్‌ 1978 బోళెం గోపాత్రుడు రెడ్డి కాంగ్రెస్‌ 1983,1985 చింతకాయల అయ్యన్నపాత్రుడు టీడీపీ 1989 సాగి కృష్ణమూర్తిరాజు కాంగ్రెస్‌ 1996 వేచలపు శ్రీరామ్మూర్తి టీడీపీ 1999,2004 చింతకాయల అయ్యన్నపాత్రుడు టీడీపీ 2009 బోళెం ముత్యాలపాప కాంగ్రెస్‌ 2014 చింతకాయల అయ్యన్నపాత్రుడు టీడీపీ వెనుకబడిన వర్గం ఓటర్లే ఎక్కువ! నియోజకవర్గంలో 80 శాతం వెనుకబడిన తరగతులకు చెందిన ఓటర్లే ఉన్నారు.  ఒకప్పుడు తంగేడు రాజుల ఆధిపత్యం ఉండగా, టీడీపీ అధికారంలోకి వచ్చాక వెలమ సామాజిక వర్గం ఆధిపత్యం కొనసాగుతోంది. జనాభాలో అత్యధికంగా వెలమలు ఉండగా, ద్వితీయ స్థానంలో కాపులున్నారు. ఎన్నికల ఫలితాలను ప్రభావితం చేసే స్థాయిలో కాపులున్నప్పటికీ ఇప్పటివరకు అత్యధిక పర్యాయాలు ప్రజాప్రతినిధులుగా వెలమల సామాజిక వర్గ నేతలే ఎన్నికయ్యారు. బీసీలతో పాటు ఇటీవల కాలంలో ఎస్సీ, ఎస్టీ జనాభా కూడా ఈ నియోజకవర్గంలో పెరుగుతూ వస్తోంది.  జనాభా 2,66,639 పురుషులు 1,31,538 స్త్రీలు 1,35,101 గ్రామీణులు  2,20,101 పట్టణవాసులు 46,538 విస్తీర్ణం 0.9 చదరపు కిలోమీటర్లు మండలాలు     నర్సీపట్నం, మాకవరపాలెం, నాతవరం, గొలుగొండ రెవెన్యూ గ్రామాలు  107 పంచాయతీలు  85 మొత్తం గ్రామాలు 283 మొత్తం ఓటర్లు 2,12,028 పురుషులు  98,191 మహిళలు 1,03,020 ఇతరులు 17 పోలింగ్‌ కేంద్రాలు 262 పంచాయతీ నుంచి మున్సిపాలిటీగా.. బ్రిటీష్‌ పాలనలో జిల్లా కేంద్రమైన విశాఖపట్నం తర్వాత ప్రముఖ పట్టణంగా గుర్తింపు పొందిన నర్సీపట్నం చాన్నాళ్లు గ్రామ పంచాయతీగానే కొనసాగింది. 2012లో మున్సిపాలిటీగా అప్‌గ్రేడ్‌ అయిన నర్సీపట్నం రాష్ట్రంలో అతి పురాతన  రెవెన్యూ డివిజన్లలో ఒక్కటిగా గుర్తింపు ఉంది. బ్రిటీష్‌ కాలం నుంచి ఎందరో ప్రముఖులు సబ్‌ కలెక్టర్లు, ఏఎస్పీలుగా ఇక్కడ పనిచేయడంతో నర్సీపట్నానికి ప్రత్యేక గుర్తింపు లభించింది. యువ ఐఏఎస్, ఐపీఎస్‌లు శిక్షణ అనంతరం తమ తొలి పోస్టింగ్‌ నర్సీపట్నంలో రావాలని కోరుకుంటూ ఉంటారు.  నర్సీపట్నం కేంద్రంగా.. 1922–24 మధ్యకాలంలో ఏజెన్సీలో విప్లవ వీరుడు అల్లూరి సీతారామరాజు కొనసాగించిన మన్యం పితూరీ పోరాటాన్ని అణచివేసేందుకు బ్రిటీష్‌ పాలకులు నర్సీపట్నం కేంద్రంగా పోలీస్, సైనిక చర్యలు చేపట్టారు. ప్రస్తుతమున్న ఏఎస్పీ, సబ్‌కలెక్టర్, రెవెన్యూ కార్యాలయ భవనాలు అప్పట్లో బ్రిటీష్‌ పాలకుల నివాస గృహాలు. అల్లూరి సీతారామరాజును కొద్దిరోజుల పాటు నర్సీపట్నంలో గృహ నిర్బంధం చేశారు. రాష్ట్రంలో నర్సీపట్నం పేరు చెప్పగానే నాడు అల్లూరి సాయుధ పోరాటానికి, నేడు మావోయిస్టు కార్యకలాపాలకు కేంద్రంగా గుర్తింపు పొందింది.  పట్టుతగ్గిన టీడీపీ.. నర్సీపట్నం నియోజకవర్గం రాజకీయ, సినీ, కళా, సాంస్కృతిక, విద్యా రంగాల్లో రాష్ట్రస్థాయిలో గుర్తింపు పొందింది. జిల్లా, రాష్ట్ర రాజకీయాల్లో దాదాపు అర్ధ శతాబ్దం పాటు అనేక పదవులు నిర్వహించిన తంగేడు రాజులు, సుమారు నాలుగు దశాబ్దాల పాటు రాజకీయ జీవితంలో కొనసాగుతున్న చింతకాయల అయ్యన్నపాత్రుడు ఆరుసార్లు ఎమ్మెల్యేగా, ఒకసారి ఎంపీగా ఐదుసార్లు రాష్ట్ర కేబినేట్‌ మంత్రి పదవులు పొందారు . దివంగత సీఎం వైఎస్‌ నియోజవకర్గంపై ప్రత్యేక దృష్టిసారించారు. దీనిలో భాగంగా 2004లో బోళెం ముత్యాలపాపను బరిలో దింపడంతో మంత్రి అయ్యన్నపాత్రుడు ఘోర పరాజయం పొందారు. 2014లో మంత్రి అయ్యన్నపాత్రుడు స్వల్ప ఓట్ల తేడాతో విజయం సాధించారు. 


 సమీక్షా వ్యాసం
  ♦ నామిని 
  మహాకవి పదవికి శ్రీశ్రీని వెనక్కి నెట్టి శిష్‌ట్లాను ముందుకు తోయాలని కుడా ఒక వర్గం అప్పట్లో విఫలయత్నం చేసిందంట. ఆ టైంలో కానీ నేను జీవించి వుంటే ఈ వర్గంలో నేను కూడా చేరిపోయి ఆ పనిని మరింత ముమ్మరం చేసుండేవాణ్ణి.
  
  
  ‘‘తెలుగులో మీ అభిమాన రచయిత ఎవరు? ’’ అని కొందరు నన్ను మాట సామెతగా అడుగుతుంటారు. నేను గమ్మనుంటే పాపం వాళ్లే, ‘‘రావిశాస్త్రా, కారా మాస్టారా, చాసోనా, మధురాంతకమా, ప్రతాప రవిశంకరా, ఎల్.ప్రఫుల్లచంద్ర ధర్మవరమా?’’ అని ఒక లిస్టు చదవతుంటారు. ఆ అడిగిన వాళ్లతో నేను ‘శిష్‌ట్లా ఉమామాహేశ్వరరావు’ అని చెప్తే ఈయనెవరో వాళ్లకి తెలవదు. ఇంకొక మాట ఏమంటే ఏ పుస్తకాన్ని గానీ నాకు దాచుకునే వాడిక లేదు. 1985లో కోడి బొమ్మతో వచ్చిన నా పచ్చనాకు సాక్షిగా... గూడా నా దగ్గిర లేదు. ఏదన్నా ఒక పుస్తకం భలేవుందనిపిస్తే దాన్ని చదివేసి వేరే ఎవురికైనా ఇచ్చి చదవమనే దాకా నాకు కాలే నిలవదు. నేను దాచుకున్న పుస్తకాలు రెండే రెండు. అవి: 1. సిపాయి కథలు.  2. విష్ణు ధనువు- నవమి చిలుక. రెంటినీ రాసింది శిష్‌ట్లా అనే ఈ మహన్నబావుడే. ఈ రెండూ కూడా సమ్మచ్చరంగా నా దగ్గిర లేవు. నాకు విశాలాంధ్ర జనరల్ మేనేజర్ హరినాథరెడ్డి బాగా తెలుసు.
 
 మంచి పుస్తకాలు ఏవన్నా వుంటే చెప్తూ వుండు నామినీ అని ఆయన అన్నప్పుడు నేనాయన చేతుల్లో ఈ రెండు పుస్తకాల్నీ పెట్టి ‘విశాలాంధ్ర తరఫున శిష్‌ట్లా సమగ్ర సాహిత్యాన్ని వెయ్యండి, మిమ్మల్ని దేముడు మెచ్చతాడు’ అని చెప్పి ఇచ్చినాను. నాగ్గూడా ఒక ప్రచురణ ‘సంస్థ’ వుండాది ‘టామ్‌సాయర్ బుక్స్’ అని నా కొడుకు పేరిట. శిష్‌ట్లా ఉమామాహేశం పుస్తకాన్ని మా టామ్‌సాయర్ బుక్స్ కింద వెయ్యాలనేది నా ఆశ. అయితే ఆ కాపీరైట్స్ ఏవో ‘నవోదయ’ దగ్గిర వుండాయని తెలిసి నేను నీళ్ల్లొదిలేసి హరినాథరెడ్డి గుండా పని జరిపించుకోవాలని చూసినాను. మా టామ్‌సాయర్ బుక్స్ సంస్థ శిష్‌ట్లావీ, అంతకుముందు నామినివీ అచ్చువేసిందనీ, మరో రచయితవి వేయలేదనీ క్రీ.శ.7018వ సంవత్సరంలో కూడా ఒక పరిశోధకుడన్నా  చెప్పుకోవాలనీ... ఈ లెక్కన అయన పక్కన చోటు సంపాదించాలనీ నా గొప్ప. అది కాపీరైట్ సమస్య వల్ల తీరలా. అందువల్ల ఉమ్మాయ్‌ని ‘నవచేతన’ వారికి వొదులుకున్నా.
 
  1986లో శిష్‌ట్లా సిపాయి కథలు చదివినాను. అప్పటినుంచీ 2001లో నా వుజ్జోగం పొయ్యేదాకా నా నెల జీతాన్ని తెచ్చి సిపాయి కథల 120 పేజీల చిన్న పుస్తకంలోనే పెట్టేవాణ్ణి. మా చిన్న అలమారాలో వుండే గాడ్రేజీ బీరవా నాకీ సిపాయి కథలు. అంత ఉమాదం నాకు శిష్‌ట్లా మింద. 1984లో బాగ్‌లింగంపల్లిలో అబ్బూరి వరద రాజేశ్వరరావు ఇంట్లో రావిశాస్త్రి దిగి సోఫాలో కూచ్చుని పేపరు చదువుకుంటుంటే అప్పుడనంగా నేను వాళ్లింటికి పోతే, ‘‘మంచి టయానికి వచ్చావ్. ఆయన రావిశాస్త్రి గారు! పాద నమస్కారం చేసి ఆశీర్వాదం తీసుకో,’’ అనన్నాడు అబ్బూరి. పైకి నమస్తే చెప్పి మూగెద్దు మాదిరిగా బైటికొచ్చేసినా. ఇట్లానే పతంజలి వాళ్లింట్లో చాసోని పరిచయం చేసినప్పుడు గూడా నేను లెక్కలో వేసుకోలా. వరదగానీ, పతంజలిగానీ నాకంత పొగురు పనికి రాదని హితవు చెప్పినారు. అట్టాంటోడికి ఈ ఉమా అంటే ఎందుకంత లెక్కాజమ!
 
  దేనికంటే శిష్‌ట్లా అచ్చరాల్లో ఎంత మహిమ వుండాదో, అయన పదాల పోహళింపులో ఎంత కరెంటు ఉండాదో శ్రీశ్రీకి తెలిసినంతగా నాకు తెలుసు. శిష్‌ట్లా మింద శ్రీశ్రీకైతే ఎంత యిది ఉందో  చెప్పలేమసలికి. శ్రీశ్రీకి ఈ ఉమ్మడంటే బిత్తరొక పక్కా, గౌరవం ఒక పక్కా. శిష్‌ట్లా కవిత్వం వెనుక శ్రీశ్రీ కవిత్వం మడిజేతులు కట్టుకుని నడిచింది. ఉమా మారో మారో మారో అని కై గట్టి ఏదో ప్రయోగం చేసి ఆ కవితను యెంటికతో సమానంగా పోగొట్టుకుంటే శ్రీశ్రీ ఇంకొకడుగు ముందుకేసి ‘మరో ప్రపంచం మరో ప్రపంచం’ అని అరిచి పారేసినాడు. ఈ మహేశం ఎంతటివాడో తల్లావఝుల శివశంకర శాస్త్రికీ, కురుగంటి సీతారామ భట్టాచార్యులకీ, ఇంకా పిల్లలమర్రి వెంకట హనుమంతరావుకీ, ఆరుద్రకీ తెలవదా! అందరికీ అన్నీ తెలుసు. శిష్‌ట్లా ‘అతి నవీనుల్లో కడు ప్రాచీనుడు’ అనీ, ‘నవ్యులలో అతి నవ్యుడు’ అనీ తెలిసినా ప్రతి ఒక్కరూ ‘ఉన్మత్త భావశాలి’ అని ఆడిపోసుకున్నారు. నిజం చెప్పాలంటే తూకాలేసేవాడు కవిగాడు, ఉన్మత్త భావశీలతే కవికి వుండాల్సింది. శిష్‌ట్లా మింద వచ్చిన వ్యాసాలు అన్నీ నేను చదివినాను. ‘కవిత్వంలో రౌడీ వేషం’ అని అబ్బూరి వరద రాజేశ్వరరావు రాస్తూ శిష్‌ట్లా శ్రీశ్రీకి ఎలా  మార్గదర్శకుడైనాడో, శిష్‌ట్లా కవిత్వాన్ని శ్రీశ్రీ ఎంతగా అనుకరించినాడో చెప్పకుండా, చెప్పినా పైపైన ఒక మాట అనేసి, ‘శిష్‌ట్లాకు నోరు మంచిది గాద’నీ, ‘ఎవరిని పడితే వారిని అరే తురే అనే పాడు అలవాటు వుంద’నీ... ఇట్లా చెప్పుకు పోయినాడు.
 
 ఉమాయ్ మింద రాసిన అందరూ కూడా ‘స్థిరమైన ఉద్యోగం లేదు, క్రమమైన జీవితం లేదు’ అని ఒకరూ! నిజానికి ఒక కవికి ఈ బూమండలం మింద అది మంచి లక్షణమే గదా. ఇంకా, కెవిఆర్ శిష్‌ట్లా కథలకి సంపాదకత్వం వహిస్తూనే ముందుమాటలో ఏమంటాడంటే, ‘శిష్‌ట్లా రాసిన కథల్లో ఏమాత్రం సాంఘిక ప్రాముఖ్యం వున్న వ్యక్తీ పాత్రగా కనిపించదు’ అని అన్నాడు. పాలూ కూడూ తినే నోటితో మీరు చెప్పండి, సాదా సీదా జనానికి సాంఘిక ప్రాముఖ్యం ఏముండి చస్తుంది? 1998లో ఏటుకూరి ప్రసాద్ శిష్‌ట్లా మింద ఒక వ్యాసం రాస్తూ ఏమన్నాడో చూడండి, ‘గుంటూరులో ఎస్‌విఎల్ నరసింహం ప్రముఖ అడ్వకేటు, శిష్‌ట్లాకు సోదర సమానుడు. ఉమా వ్యక్తిగత జీవితం గురించి ఎంత తక్కువ తెలుసుకుంటే అంత మంచిది అని నరసింహం అంటాడు’- ఇదీ వాటం. విమర్శకులు ఆయన  రాసిందాని గురించి మాట్లాడాలగానీ ఇవన్నీ దేనికో అర్తం గాదు. శివలెంక శంభుప్రసాద్, ఉమా మహేశ్వరరావు ఎమ్మేలో క్లాస్‌మేట్స్. ఉమా ఆంధ్రపత్రికలో కొంత కాలం చేసి కూడా మానేసినాడంటే, పోనీ... ఆయన చావుకు ఒక తేదీ అంటూ లేదంటే... యీ జర్నలిస్టులకీ కవులకీ ఎంత దూరంగా బతికినట్టు! ఇదెంత సుగుణం. పుట్టిన తేదీగానీ చచ్చిన తేదీగానీ లేకపోవడంతో జయంతి వ్యాసాలూ, వర్ధంతి వ్యాసాలూ రాసే పని కూడా పత్రికలకు తప్పింది. కవిత్వాన్నే ప్లాన్ చెయ్యలేదు శిష్‌ట్లా కవి, ఇంక జీవితాన్ని ఏం చేసుకుంటాడు? గెలిచిన కోళ్లకు లోకాన్ని విడిచి పెట్టేసి ఆయన మానాన ఆయన చచ్చిపోతే ఇట్లా ఏవేవో రాసి సాధించడం!
  
 శిష్‌ట్లా శ్రీశ్రీని ఏదో రైలుస్టేషన్‌లో చూసిన ఎమ్మటే, ‘‘ఒరే శ్రీనివాసరావూ నీకు కవిత్వంలో మంత్రం తంత్రం నేర్పిస్తాన్లేరా’’ అని అన్నాడంటే శిష్‌ట్లా వాయాడి అనుకోగూడదు. అదాయన నోటి దురుసనుకంటే ఎట్లా? కవిత్వ రహస్యం తెలిసిన వాడిగా గుండెకాయతో అ మాట అన్నాడేమో ఎవుడికి తెల్సు? ఇంకా ‘నువ్వేమి కవిరా’ అని శ్రీశ్రీని గడ్డివాములో విసిరేయబోయాడంటే- ఇట్లా ఏ నిమిసానికా నిమిసం బయట పడిపొయ్యే వాళ్లకు చేతులెత్తి దండం పెట్టాలి నిజానికి! ఇట్లాంటి వాటిని ముచ్చటగా చెప్పుకొని పోవాల్నే గానీ అవలక్షణాలుగా చాటింపు వేస్తే ఎట్లా? మహాకవి పదవికి శ్రీశ్రీని వెనక్కి నెట్టి శిష్‌ట్లాను ముందుకు తోయాలని కుడా ఒక వర్గం అప్పట్లో విఫలయత్నం చేసిందంట. ఆ టైంలో కానీ నేను జీవించి వుంటే ఈ వర్గంలో నేను కూడా చేరిపోయి ఆ పనిని మరింత ముమ్మరం చేసుండేవాణ్ణి. ఈయన్ని చదివిన కొత్తల్లో హైద్రాబాద్‌లో జర్నలిస్టుగా ‘ఉదయం’ పేపరులో పని చేసేటప్పుడు అక్కడి కవిగుంపులో ఒకరిద్దరితో, ‘‘శ్రీశ్రీ ‘మహాప్రస్థానంలో’ అనువాద కవితలు కూడా బాగానే వున్నాయి గదా. శిష్‌ట్లా అట్లాగాదే! అన్నీ ఒరిజినల్ పొయెమ్స్. నిక్కమైన తెలుగు కవి’’ అని చూసి నిండా దొబ్బులు తిన్నాను గూడా. ఈయనవి కథలు కవితలు అంటూ విడివిడిగా ఏం వుండవు. మొత్తం కవిత్వమే. తిరిగీ తిరగనీ నోరూ, పేరీ పేరని పెరుగూ ఎంత రుచో అంత రుచి శిష్‌ట్లా అచ్చిరం.
  ఒక్క ముక్కలో - శిష్‌ట్లాకి దీర్ఘమిస్తే శ్రీశ్రీ. అంతటి శిష్‌ట్లాను మనం శ్రీశ్రీతో పాటు నెత్తిన పెట్టుకోవాలి. కొత్తగా శిష్‌ట్లా పుస్తకం వచ్చింది. మనందరం నట్టింల్లో పీటేసి ఆ పుస్తకాన్ని పెట్టుకోవాలి. (శిష్‌ట్లా పుస్తకం వెలుగులోకి తెచ్చినందుకు నవచేతనకు పడిపడి దండాలు పెట్టాలిగానీ తప్పులు ఎంచకూడదు గదా- అచ్చు తప్పులు.)