అద్భుతాలు జరిగేటప్పుడు చాలా సార్లు సాక్షాలు ఉండవు. అవి సంభవించిన తర్వాతే అందరూ వాటిని గమనిస్తారు. అద్భుతాలు సాధించే వ్యక్తుల విషయంలో కూడా ప్రపంచం ఇలాగే వ్యవహరిస్తుంటుంది. వారు ప్రపంచానికి పరిచయమై, పరిచయం కాని వ్యక్తుల్లా ఉంటారు. అలాంటి వ్యక్తులు... సందర్భాలు ఇవి..
  
 ఎగెనీ బుచార్డ్
 టెన్నిస్ కోర్టులో ఆటతీరుతోనే గాక తన అందంతో కూడా సరికొత్త సంచలనంగా మారిన ప్లేయర్ ఎగెనీ బుచార్డ్. ప్రస్తుతం డబ్ల్యూటీవో ర్యాంకింగ్స్‌లో ఎనిమిదో స్థానంలో ఉన్న బుచార్డ్ వెలుగులోకి వచ్చాక ఒక కొత్త సంగతి ప్రచారంలోకి వచ్చింది. కొన్నేళ్ల క్రితం ఈ కెనడియన్ టీనేజర్, రష్యన్ టెన్నిస్ స్టార్ షరపోవాతో కలిసి ఫోటోలు దిగిందట. అప్పటికి యువ  క్రీడాకారిణిగా షరపోవా అభిమానిగా ఎగెనీ ఆ పని చేసింది. అయితే ఇటీవలే ఆస్ట్రేలియన్ ఓపెన్‌లో షరపోవాతో కలిసి బరిలోకి దిగింది! ఒకప్పుడు అనామకురాలిగా షరపోవా పక్కన నిలబడి ఇప్పుడు ఆమెస్థాయి క్రీడాకిరిణి కావడం అద్భుతమే కదా!
  
 మెగాన్ ఫాక్స్
 యువత కలల రాణిగా ఇమేజ్‌ను కలిగిన మెగాన్‌ఫాక్స్ నటిగా పేరు తెచ్చుకోక ముందే మీడియా ద్వారా అనేక మందికి పరిచయం. మెగాన్‌ఫాక్స్ తన స్నేహితురాళ్లతో కలిసి తీయించుకొన్న ఫోటోలు ఒక మ్యాగజీన్ కవర్ పేజ్ పై పడ్డాయి. ఆ విషయం తెలుసుకొని ఆశ్చర్యపోయి అంతటితో వదిలేసిందామె. అయితే ఆ తర్వాత అనుకోకుండా మోడలింగ్ ఆమె కెరీర్ అయ్యింది. నటిగా ప్రపంచ ప్రసిద్ధి పొందింది!
  
 సచిన్ టెండూల్కర్
 ముంబయిలోని వాంఖేడ్ స్టేడియం ఎన్నో అద్భుతాలకు వేదిక. ప్రపంచకప్ మ్యాచ్‌లతో సహా ఎన్నో గొప్ప క్రికెట్ పోరాటాలకు ఇది కేంద్రంగా నిలిచింది. ఈ స్టేడియంకు సంబంధించిన మరో అద్భుతం ఏమిటంటే... ఇదే స్టేడియంలో సచిన్ ప్రస్థానం మొదలైంది. క్రికెటర్‌గా కాదు.. బాల్ బాయ్‌గా. సచిన్ పిల్లాడిగా ఉన్నప్పుడు ఈ స్టేడియంలో జరిగే అంతర్జాతీయ స్థాయి మ్యాచ్‌లకు బాల్‌బాయ్‌గా చేసేవాడు. బౌండరీ రోప్ ఆవలకు బంతి వచ్చినప్పుడు దాన్ని అందించేవాడు. పాత మ్యాచ్‌లకు సంబంధించిన కొన్ని వీడియో క్లిప్పింగ్స్‌లో కూడా బుల్లి సచిన్‌ను చూడవచ్చు!
  
 శాండ్రాబులాక్
 ఈ అమెరికన్ హాలీవుడ్ నటి, నిర్మాత కూడా ఒకనాటి ఉల్లాసినే. చీర్‌లీడర్‌గా బేస్‌బాల్, వాలీబాల్ ఆటగాళ్లను, వీక్షకులను ఉల్లాసపరిచిన వ్యక్తే. అలాంటి ఉత్సాహమే క్రమంగా ఈమె నటిగా మారడానికి కారణం అయ్యింది.
  
 మడోన్నా
 ఆమెను చూసినా, గొంతును విన్నా.. ఆమె తన వయసును తప్పుగా చెబుతున్నారనే అభిప్రాయం కలుగుతుంది. దాదాపు 35 యేళ్ల నుంచి ఒకే పాపులారిటీతో తన ప్రస్థానాన్ని కొనసాగిస్తోంది మడోన్నా.  అంతకు ముందు కూడా (పాప్‌స్టార్‌గా పేరు తెచ్చుకోక ముందు) మడోన్నా మీడియా గర్లే! మ్యూజిషియన్  అవడానికి మునుపు ఈ పాప్‌తరంగం స్టేడియంలో చీర్‌గర్ల్‌గా చేసేది. తన తోటి వారితో కలిసి క్రీడాకారులను ఉత్సాహపరిచే బాధ్యతలో ఉండేది!


 కథానాయికల కెరీర్ మన దేశంలో అయితే ఇప్పుడు పది నుంచి పదిహేనేళ్లు ఉంటుందేమో. అంటే.. పదహారు నుంచి ముప్ఫయ్ ఏళ్లు లోపు ఉన్న తారలే హీరోయిన్లుగా చలామణీ అవ్వగలుగుతారు. కానీ, హాలీవుడ్‌లో ఇందుకు పూర్తి భిన్నం. టీనేజ్ నుంచి ఓల్డేజ్ వరకు ప్రతిభ, ఓపిక ఉన్న ఎవరైనా కథానాయికలుగా రాణించవచ్చు. అందుకు ఓ ఉదాహరణ ఈ ఏడాది ‘ఉత్తమ నటి’ విభాగంలో నిలిచిన తారల జాబితా. నాలుగు పదుల వయసు నుంచి ఎనిమిది పదుల వయసున్నవారి దాకా ఈ విభాగంలో పోటీపడుతున్నారు. మరి.. ఈ పోటీలో బంగారు బొమ్మ భామకు దక్కుతుందా? బామ్మకా? అనేది మార్చి 2న జరగబోయే ఆస్కార్ వేడుకలో తెలుస్తుంది. ఇక, ఈ తారల్లో ఎవరెవరు ఎన్నిసార్లు నామినేషన్ దక్కించుకున్నారు? ప్రస్తుతం ఏయే సినిమా ద్వారా పోటీలో నిలిచారో చూద్దాం...
 
 సాండ్రాకు రెండోసారి... ఆస్కార్
 అందం, అభినయానికి చిరునామాగా సాండ్రా బుల్లక్‌ని హాలీవుడ్‌వారు అభివర్ణిస్తుంటారు. ఒక ఏడాది తక్కువ ఐదు పదుల వయసులో ఉన్న ఆమె అందం ఇసుమంత కూడా తగ్గలేదు. ఇప్పటివరకు రెండుసార్లు ఆస్కార్ అవార్డ్స్‌లో ఉత్తమ నటి విభాగంలో నామినేషన్ దక్కించుకున్నారు సాండ్రా. వాటిలో ‘ది బ్లైండ్ సైడ్’ ఒకటి కాగా, మరో సినిమా ‘గ్రావిటీ’. ‘ది బ్లైండ్‌సైడ్’కి ఉత్తమ నటిగా ఆమె ఆస్కార్ అవార్డ్ కూడా గెల్చుకున్నారు.
  
 ఇక, ‘గ్రావిటీ’ చిత్రంలో డా. ర్యాన్ స్టోన్ పాత్ర ఆమెకు ఈ ఏడాది నామినేషన్ దక్కేలా చేసింది. . ఓ కార్యసాధన నిమిత్తం ఒక వ్యోమగామితో అంతరిక్షంలోకి వెళ్లే ర్యాన్ స్టోన్ పాత్రలో సాండ్రా ఒదిగిపోయిన వైనానికి ప్రేక్షకులు శభాష్ అన్నారు. ఆస్కార్ కమిటీకి కూడా అదే అనిపిస్తే, సాండ్రా రెండోసారి ఈ ప్రతిమను గెల్చుకోవడం ఖాయం. ఇక, ఈ ఏడాది ఆస్కార్ అవార్డ్స్‌లో ఉత్తమ నటితో పాటు ఇతర విభాగాలతో కలిపి ‘గ్రావిటీ’ సినిమా పది నామినేషన్లు దక్కించుకోవడం చెప్పుకోదగ్గ విషయం.
 
 ఆస్కారం లేకపోలేదు!
 ఈ ఏడాది ‘అమెరికన్ హజిల్’ చిత్రంతో తొలిసారి ఉత్తమ నటిగా నామినేషన్ సంపాదించుకున్నారు అమీ ఆడమ్స్. అయితే గతంలో నాలుగు చిత్రాలకు సహాయనటిగా నామినేట్ అయ్యారు కానీ, చివరి ఫలితాల్లో చుక్కెదురు అయ్యింది. ఈసారైనా నామినేషన్‌తో సరిపెట్టుకోకుండా అవార్డ్‌ని ఇంటికి తీసుకెళతాననే నమ్మకంతో ఉన్నారు అమీ. ఇక ‘అమెరికన్ హజిల్’ చిత్రం విషయానికొస్తే... దాదాపు 30 ఏళ్ల క్రితం జరిగిన ఓ కుంభకోణం ఆధారంగా ఈ చిత్రం రూపొందింది.  
  
  ఓ లోన్ స్కామ్‌లో ఇరుక్కునే సిడ్ని ప్రొసెసర్ అనే యువతిగా నటించారు అమీ ఆడమ్స్. కొంతమంది నేరస్తులను పట్టుకోవడానికి ప్రభుత్వానికి ఆమె ఎలా సహాయపడుతుంది? అనే కథాంశంలో నెగటివ్ నుంచి పాజిటివ్ సైడ్‌కి మారే పాత్ర తనది. ఈ పాత్రను అమీ సమర్థవంతంగా పోషించారు. ఈ సినిమా బ్లాక్ బస్టర్ కావడానికి ఆమె నటన ప్రధాన కారణం. కాబట్టి ఆస్కార్ దక్కించుకునే ఆస్కారం ఆమెకు లేకపోలేదు.
 
 నమ్మకం నిజమవుతుందా? : కేట్ బ్లాంచెట్‌
 ఆస్కార్ అవార్డ్స్‌లో నామినేషన్ దక్కించుకోవడం కేట్ బ్లాంచెట్‌కి ఇది మొదటిసారి కాదు. 1998లో ‘ఎలిజబెత్’ చిత్రానిగాను ఆమె తొలిసారి నామినేట్ అయ్యారు కానీ, అవార్డ్ రాలేదు. ఆ తర్వాత ‘ఎలిజబెత్: ది గోల్డెన్ ఏజ్’, ‘ఐయామ్ నాట్ దేర్’, తాజాగా ‘బ్లూ జాస్మిన్’ చిత్రాలకు ఉత్తమనటి విభాగంలో నామినేట్ అయ్యారు. అలాగే, ఉత్తమ సహాయనటిగా రెండు సినిమాలకు నామినేషన్ దక్కించుకోగా, ఓ సినిమాకి అవార్డ్ పొందారు.
  
 ఉత్తమ నటిగా ఈసారైనా బంగారుప్రతిమ తనను వరిస్తుందనే నమ్మకంతో ఉన్నారు కేట్. ‘బ్లూ జాస్మిన్’ అనే చిత్రంలో ఓ మోసగాడితో జీవితం పంచుకునే జాస్మిన్ అనే మహిళ పాత్రద్వారా ఆమె ఆస్కార్‌కి పోటీపడుతున్నారు. భర్త మోసం తెలుసుకుని అతనికి దూరంగా ఒంటరిగా బతికే జాస్మిన్ జీవితం ఎలాంటి మలుపు తిరుగుతుంది? ఆమె పడిన కష్టాలేంటి? అనేది ఈ చిత్రం ప్రధానాంశం. మరి.. ఈసారి ఆస్కార్ ఖాయం అనే కేట్ నమ్మకం నిజం అవుతుందో లేదో వేచి చూడాల్సిందే.
 
 వంక పెట్టలేని అభినయం
 ఆస్కార్ బరిలో పోటీపడుతున్న తారల్లో జూడి డెంచ్ తర్వాత పెద్దావిడ మెరిల్ స్ట్రీప్. ఆమె వయసు 65. ఇప్పటివరకు ఉత్తమ సహాయ నటిగా రెండు ఆస్కార్‌లు, ఉత్తమ నటిగా ఓ ఆస్కార్‌ని తన అల్మారాలో భద్రంగా దాచుకున్నారు మెరిల్. అలాగే, 18 సార్లు నామినేషన్ దక్కించుకున్న రికార్డ్ ఆమె సొంతం. ‘ఆగస్ట్: ఒసేజ్ కంట్రీ’ చిత్రంలో చేసిన వయొలెట్ పాత్రకుగాను ఆమె పోటీపడుతున్నారు. ఈ చిత్రంలో నోటికేన్సర్‌తో బాధపడే మహిళ పాత్రను చేశారామె. రోమ్‌లో ఉన్నప్పుడు రోమన్‌లా ఉండాలంటారు. అలా, గ్లామరస్ రోల్స్ చేసినప్పుడు ఆ పాత్రల్లో అద్భుతంగా ఒదిగిపోయిన మెరిల్ ఈ వయొలెంట్ పాత్రలో జీవించారు. ఎక్కడా వంక పెట్టలేని విధంగా ఆమె నటించారని క్రిటిక్స్ సైతం మెరిల్‌ని అభినందించారు. ఈ పాత్రకు పలు చిత్రోత్సవాల్లో అవార్డ్ పొందారామె. మరి.. ఆస్కార్ కమిటీ ఏం నిర్ణయిస్తుందో?
  కంట తడి పెట్టించిన బామ్మగారు
  ఈ ఏడాది ఉత్తమ నటి విభాగంలో నిలిచినవారిలో జూడి డెంచ్ చాలా సీనియర్. ఆమె వయసు 80. ఈ ఏడాది ‘ఫిలోమెనా’ చిత్రంతో కలిపి ఇప్పటివరకు ఆస్కార్ అవార్డ్స్‌లో ఉత్తమ నటి విభాగంలో ఐదు నామినేషన్లు దక్కించుకున్నారు జూడి. 1998లో ‘షేక్స్‌పియర్ ఇన్ లవ్’ చిత్రానికి ఉత్తమ సహాయ నటిగా ఆస్కార్ అందుకున్నారు. ఇక ‘ఫిలోమెనా’ విషయానికొస్తే... ఈ చిత్రంలో ఆమె టైటిల్ రోల్ చేశారు. పెళ్లి కాకుండా తల్లయ్యే ఫిలోమెనా అనే యువతి సమాజానికి భయపడి తన కొడుకుని అనాథ శరణాలయంలో చేరుస్తుంది. ఆ తర్వాత 50 ఏళ్లకు తన కొడుకుని వెతకడం మొదలుపెడుతుంది. ఈ చిత్ర ప్రధాన ఇతివృత్తం ఇది. తొందరపాటుతో బిడ్డకు దూరమై, కుమిలిపోయే తల్లి పాత్రలో జూడి నటన ప్రేక్షకులను కంట తడిపెట్టించింది. కాబట్టి, ఆస్కార్ కమిటీవారి హృదయాన్ని తాకుతుందనే అంచనాలు ఉన్నాయి. సో... అందాల ఆస్కార్ బొమ్మ ఈ బామ్మగారిని వరించే అవకాశం మెండుగానే ఉంది.