సాక్షి, హైదరాబాద్‌: జాతీయ రోలర్‌ స్పీడ్‌ స్కేటింగ్‌ చాంపియన్‌షిప్‌కు సన్నాహకంగా ఏర్పాటు చేసిన స్కేటింగ్‌ క్యాంప్‌ శనివారంతో ముగిసింది. ఇందిరాపార్క్‌లోని అంతర్జాతీయ స్కేటింగ్‌ రింక్‌లో, ఉప్పల్‌ హెచ్‌ఎండీఏ లే అవుట్‌లోని రింక్‌లో ఈ శిక్షణా శిబిరాలను నిర్వహించారు. 15 రోజుల పాటు నిర్వహించిన ఈ క్యాంపులో మొత్తం 42 మంది స్కేటర్లతో కూడిన రాష్ట్ర బృందం పాల్గొంది. తెలంగాణ రోలర్‌ స్కేటింగ్‌ సంఘం ఆధ్వర్యంలో కోచ్‌లు నూర్‌ మొహమ్మద్, ఇక్బాల్‌ లాసానియా, విట్టల, అబ్బాస్, సి. రతన్‌సింగ్, యాదయ్య, జయచంద్ర, మాజిద్, గిరి క్రీడాకారులకు మెళకువలు నేర్పించారు. చెన్నైలో ఈనెల 27నుంచి 31వరకు జాతీయ రోలర్‌ స్పీడ్‌ స్కేటింగ్‌ చాంపియన్‌షిప్‌ జరుగుతుంది.  


 ఎల్బీ స్టేడియం, న్యూస్‌లైన్: జాతీయ రోలర్ స్కేటింగ్ చాంపియన్‌షిప్‌లో నగరానికి చెందిన కుర్రాడు భ్రమేష్ పటేల్ సత్తా చాటాడు. ముంబైలో ఇటీవల జరిగిన ఈ పోటీల్లో ఆర్టిస్టిక్ స్కేటింగ్ ఈవెంట్ అండర్-11 విభాగంలో భ్రమేష్ అత్యుత్తమ నైపుణ్యాన్ని కనబర్చి స్వర్ణ పతకాన్ని కైవసం చేసుకున్నాడు.
  
    సికింద్రాబాద్‌లోని యమ స్కేటింగ్ అకాడమీలో అంతర్జాతీయ స్కేటర్లు అనూప్ యమ, వీరేష్ యమ, అమర్ యమ వద్ద ఈ చిన్నారి ప్రత్యేకంగా శిక్షణ పొందుతున్నాడు. ఢిల్లీ పబ్లిక్ స్కూల్ విద్యార్థి అయిన భ్రమేష్ జనవరి 2 నుంచి 4 వరకు సిమ్లాలో జరిగే జాతీయ ఐస్ స్కేటింగ్ చాంపియన్‌షిప్‌లో సత్తా చూపేందుకు సిద్ధమవుతున్నాడు.