వయోపరిమితి పెంచుతూ ఉత్తర్వులు జారీ
 ఎస్సై జనరల్ 28 ఏళ్లు, రిజర్వ్ కేటగిరీలో 33 ఏళ్లకు సడలింపు
 కానిస్టేబుల్‌కు జనరల్ 25 ఏళ్లు, రిజర్వు 33 ఏళ్ల వరకు అర్హత
  
 హైదరాబాద్: పోలీసు రిక్రూట్‌మెంట్ బోర్డు ద్వారా నేరుగా భర్తీ చేసే పోలీసు ఉద్యోగాలకు ప్రభుత్వం మూడేళ్ల వయసు సడలింపు ఇచ్చింది. ఈ మేరకు హోంశాఖ ముఖ్య కార్యదర్శి రాజీవ్ త్రివేది సోమవారం ఉత్తర్వులు జారీ చేశారు. రాజ్యాంగంలోని ఆర్టికల్ 309 కింద లభించిన అధికారాల మేరకు నిబంధనలను సవరించారు. సాధ్యమైనంత ఎక్కువ మందికి అవకాశం కల్పించడం కోసం ఈ నిర్ణయం తీసుకున్నట్లు వెల్లడించారు. రాష్ట్ర పబ్లిక్ సర్వీస్ కమిషన్ (టీఎస్‌పీఎస్సీ) ద్వారా భర్తీ చేసే ఉద్యోగాలకు గరిష్ట అర్హత వయసును పదేళ్లు సడలించిన విషయం తెలిసిందే. దానికి అనుగుణంగా పోలీసు నియామకాల్లోనూ వయసు సడలింపు ఇవ్వాలని ప్రభుత్వానికి పెద్ద ఎత్తున విజ్ఞప్తులు వచ్చాయి. దీనిపై మంత్రివర్గ ఉపసంఘం కూలంకషంగా చర్చించి, ప్రభుత్వానికి కొన్ని ప్రతిపాదనలు చేసింది. ఈ మేరకు రిక్రూట్‌మెంట్ బోర్డు ద్వారా నియామకాలు జరిపే పోస్టులకు మూడేళ్లు సడలింపు ఇవ్వాలని నిర్ణయించారు. దీనికి గత నెల 8న ముఖ్యమంత్రి కె.చంద్రశేఖర్‌రావు ఆమోదముద్ర వేశారు. ఈ లెక్కన ఎస్సై పోస్టులకుగాను జనరల్ కేటగిరీ అభ్యర్థులకు 25 ఏళ్లు, రిజర్వుడు కేటగిరీలో 30 ఏళ్ల వయో పరిమితి అమల్లో ఉంది. తాజా సడలింపుతో 28 ఏళ్ల వరకు ఉన్న జనరల్ అభ్యర్థులు, 33 ఏళ్ల వయసున్న రిజర్వుడు కేటగిరీ అభ్యర్థులు కూడా పోటీపడేందుకు అర్హులవుతారు. కానిస్టేబుల్ పోస్టులకు గరిష్ట వయో పరిమితి జనరల్ కేటగిరీలో 22 ఏళ్ల నుంచి 25 ఏళ్లకు, రిజర్వుడు కేటగిరీలో 27 ఏళ్ల నుంచి 30 ఏళ్లకు పెరగనుంది.
 
 ఫిబ్రవరిలో నోటిఫికేషన్!
 9,096 పోలీసు కొలువులకు వచ్చే ఫిబ్రవరిలో నోటిఫికేషన్ ఇచ్చే అవకాశముంది. వీటికి ఇప్పటికే ఆర్థిక, న్యాయ శాఖలు, టీఎస్‌పీఎస్సీ అనుమతి లభించింది. ప్రస్తుతం ఎమ్మెల్సీ ఎన్నికల కోడ్ అమల్లో ఉంది. వచ్చే నెలలో జీహెచ్‌ఎంసీ ఎన్నికలు జరిగే అవకాశముంది. ఈ నేపథ్యంలో పోలీసు కొలువుల భ ర్తీకి ఫిబ్రవరిలో నోటిఫికేషన్ జారీ చేసేందుకు అధికారులు కసరత్తు చేస్తున్నారు.
  


 ఇంజనీర్ పోస్టుల భర్తీకి ట్రాన్స్‌కో, జెన్‌కో, డిస్కంల నుంచి ప్రత్యేక నోటిఫికేషన్లు
  
 హైదరాబాద్: రాష్ట్రంలోని ట్రాన్స్‌కో, జెన్‌కో, డిస్కంల పరిధిలోని విద్యుత్ ఇంజనీర్ల పోస్టులను.. ఎవరికి వారే భర్తీ చేసుకోవాలని నిర్ణయించాయి. రాష్ట్ర ఇంధన శాఖ పరిధిలో ఖాళీగా ఉన్న 2,681 ఇంజనీర్ పోస్టుల భర్తీకి గత నెల 27న ప్రభుత్వం అనుమతించింది. ఈ పోస్టుల భర్తీ చేపట్టడంపై రాష్ట్ర పబ్లిక్ సర్వీస్ కమిషన్ (టీఎస్‌పీఎస్సీ) ఆసక్తి కనబరిచినా... విద్యుత్ సంస్థల యాజమాన్యాలు దానికి అంగీకరించలేదు. ఈ నేపథ్యంలో ప్రభుత్వం పాత విధానాన్నే అనుసరిస్తూ... ఈ పోస్టుల భర్తీని ఆయా విద్యుత్ సంస్థలకే కట్టబెట్టింది.
  విధివిధానాలపై తర్జనభర్జన: ‘విద్యుత్’ ఇంజనీర్ పోస్టుల భర్తీ విధివిధానాలపై స్పష్టత లేకపోవడంతో నోటిఫికేషన్ల జారీకి మరికొంత సమయం పట్టనుందని అధికారులు పేర్కొంటున్నారు. ప్రధానంగా జోనల్ విధానం కొనసాగింపుపై తర్జన భర్జన జరుగుతోంది. జోనల్ విధానం కొనసాగింపు వైపే విద్యుత్ సంస్థల యాజమాన్యాలు మొగ్గు చూపుతున్నాయి.
 
 ఇక ఆర్టికల్ 371డీ ఆధారంగా విద్యుత్ సంస్థల్లో లోకల్, నాన్‌లోకల్ రిజర్వేషన్లను అమలు చేస్తున్నారు. ఇప్పుడు దీనిని కొనసాగించడంపైనా సందిగ్ధత నెలకొంది. మరోవైపు 10 శాతం ఏఈ పోస్టులను ప్రస్తుతం సర్వీసులో ఉన్న సబ్ ఇంజనీర్లలో అర్హులైన వారికి పదోన్నతులు ఇవ్వాల్సి ఉంటుంది. కొత్త ఏఈల నియామకాలు, సబ్ ఇంజనీర్లకు ఏఈలుగా పదోన్నతులు ఒకేసారి ఇస్తే భవిష్యత్తులో సీనియారిటీ సమస్యలు ఉండవు. కానీ దీనిపైనా ఇంకా నిర్ణయం తీసుకోలేదని తెలిసింది. జెన్‌కో, ట్రాన్స్‌కో, డిస్కంల పనితీరుకు అనుగుణంగా వేర్వేరు సిలబస్‌ల ఆధారంగా నియామక పరీక్షలు నిర్వహించాలనే ప్రతిపాదన కూడా ఉంది. అయితే దీనిపై విద్యుత్ ఇంజనీర్ల సంఘాలు వ్యతిరేకత వ్యక్తం చేస్తున్నాయి.
 
  నిర్వహణ బయటి సంస్థలకు..
  ఇంజనీర్ పోస్టుల భర్తీ విధివిధానం ఖరారు, నోటిఫికేషన్ల జారీ వరకే విద్యుత్ సంస్థలు పరిమితం కానున్నాయి. నియామక పరీక్షల నిర్వహణ బాధ్యతలను ఎప్పటిలాగే మర్రిచెన్నారెడ్డి మానవ వనరుల అభివృద్ధి కేంద్రాని(ఎంసీహెచ్‌ఆర్డీ)కి అప్పగించనున్నారు. పరీక్షా పత్రాలను జేఎన్టీయూహెచ్ తయారు చేయనుంది. ఎంపికైన అభ్యర్థుల జాబితాను ఎంసీహెచ్‌ఆర్డీ... విద్యుత్ సంస్థలకు అందజేస్తే, వారికి నియామక పత్రాలు జారీ చేస్తామని అధికారవర్గాలు తెలిపాయి.