బ్యాంకులు, కోర్టులు, చట్టాలు.. విజయ్‌ మాల్యాను వెంటాడి, వేటాడుతున్న ఈ కష్టకాలంలో ఆయనకు ఆర్థికంగా, మానసికంగా, భద్రతపరంగా ముగ్గురు మహిళలు ఆలంబనగా నిలిచారు. విజయ్‌ మారు తల్లి రీతూమాల్యా ఆయన్ని కోట్ల చెల్లింపుల నుంచి కొంతైనా గట్టెక్కించేందుకు ప్రయత్నిస్తున్నారు. విజయ్‌ ప్రియసఖి పింకీ లాల్వాణీ ఆయన్ని ఏ క్షణానికాక్షణం చుట్టుముడుతున్న ఒత్తిళ్ల నుంచి కాపాడుకునేందుకు అనుక్షణం వెన్నంటే ఉంటు న్నారు. విజయ్‌ కేసులో తీర్పునిచ్చిన బ్రిటన్‌ న్యాయమూర్తి ఎమ్మా ఆర్బర్త్‌నాట్‌ ఆయన్ని ఉంచబోయే ముంబై జైలు గదిలోని సదుపాయాలను ఎప్పటికప్పడు సమీక్షించాలని తీర్పునిచ్చారు. ఆస్తుల్ని అమ్మి అప్పులు తీర్చే క్రమంలో మాల్యా కంపెనీలలో అతి ప్రధానమైనదైన ‘యునైటెడ్‌ బ్రూవరీస్‌ హోల్డింగ్స్‌’ (యు.బి.హెచ్‌.ఎల్‌)లో తన షేర్‌లను అమ్మడానికి లేదని కోర్టును ఆశ్రయించడం ద్వారా రీతూ తన కుమారుడికి మేలు చేశారు. మాల్యాను భారత్‌కు అప్పగించేందుకు తమకేం అభ్యంతరం లేదని బ్రిటన్‌ కోర్టు తీర్పు ఇస్తున్నప్పుడు మాల్యా పక్కనే ఉన్న పింకీ లాల్వాణీ ఆయన చెంతనే ఉండి సాంత్వన వచనాలు పలికారు. ఇక జడ్జి ఎమ్మా ఆర్బర్త్‌నాట్‌.. ముంబై ఆర్థర్‌ రోడ్‌ జైల్లోని 12వ బ్యారక్‌లో మాల్యాను విచారణ ఖైదీగా ఉంచబోయే గదిలో ఆయన ఆరోగ్యాన్ని దృష్టిలో ఉంచుకుని ప్రత్యేక వసతులు, సౌకర్యాలను కల్పించాలని ఆదేశాలు జారీ చేశారు. మాల్యా జీవితమంతా మహిళల చుట్టూనే తిరిగింది. ఇప్పుడా మహిళలే ఆయనకు ఆసరాగా ఉన్నారు.   


 – మిస్టరీ వీడిన చిన్నారి అనుమానాస్పద మృతి కేసు 
 – డిపాజిట్ల సొమ్ము కాజేసేందుకు కూతురినే చంపేసిన తండ్రి
 – తండ్రితో పాటు సవితి తల్లి అరెస్ట్‌  
 కర్నూలు: బ్యాంకులో డిపాజిట్‌ సొమ్ము రూ.5 లక్షలను కాజేసేందుకు కన్న బిడ్డనే కడతేర్చిన ఓ తండ్రి ఘాతుకం ఇది. కర్నూలు నగరం ఇందిరాగాంధీ నగర్‌కు చెందిన తమ్మినేని అశోక్‌ ఆటో నడుపుతూ జీవనం సాగించేవాడు. కొన్నేళ్ల క్రితం ఆళ్లగడ్డ ప్రాంతానికి చెందిన సుధారాణితో వివాహమైంది. అనంతరం మకాంను డోన్‌కు మార్చాడు. పాల ఆటో తోలుతూ జీవనం సాగించేవాడు. వీరికి కుమారుడు, ఒక కుమార్తె సంతానం. భార్య సుధారాణి చీరల వ్యాపారంతో పాటు పోస్టల్‌ ఆర్‌డీలు సేకరిస్తూ భర్త సంపాదనకు చేదోడుగా ఉండేది.
 ఈ క్రమంలో పక్కింట్లో నివాసం ఉంటున్న రఘురామ్‌ గుప్త కుటుంబంతో పరిచయం పెరిగి సుధారాణి కుమారుడిని దత్తత తీసుకున్నారు. కొంతకాలం తర్వాత చీరల వ్యాపారంలో నష్టం వచ్చి ఆర్థికంగా చితికిపోయారు. ఆర్థిక స్థితులు తట్టుకోలేక రెండేళ్ల క్రితం సుధారాణి ఆత్మహత్యకు పాల్పడింది. ఐదేళ్ల సునీక్షా(కుమార్తె) వివాహ ఖర్చుల నిమిత్తం రఘురామ్‌ గుప్త రూ.5 లక్షలు బ్యాంకులో డిపాజిట్‌ చేశారు. డోన్‌ శివారులో రెండు సెంట్ల స్థలాన్ని కూడా చిన్నారి పేరుతో రాసి బాండ్‌లను తండ్రి అశోక్‌కు అప్పగించారు.
 అయితే మద్దికెరకు చెందిన సమీప బంధువు లక్ష్మీని భర్తను వదిలేయడంతో ఆమెను అశోక్‌ రెండో వివాహం చేసుకున్నాడు. అప్పటికే ఆమెకు కుమారుడు ఉన్నాడు. కొన్నాళ్లుకు డోన్‌ నుంచి మళ్లీ కర్నూలుకు కాపురం మార్చాడు. బళ్లారి చౌరస్తాకు సమీపంలోని దుర్గా హోటల్‌ వెనుకనున్న గణేష్‌ నగర్‌ అమీనా కాంప్లెక్స్‌లో నివాసముంటూ చౌరస్తా సమీపంలోని ప్రసన్న మెస్‌ పక్కన బీడీ బంకు నడుపుతూ జీవనం సాగించేవాడు. కుమార్తె సునీక్షను కొంతకాలం ఇందిరాగాంధీనగర్‌లోని అశోక్‌ తన తల్లిదండ్రుల దగ్గర వదిలేశాడు.
 బాండులను తాకట్టు పెట్టి.. బిడ్డను చంపేసి..
 బీడీ బంకు నడుపుకునేందుకు డబ్బులు అవసరం కావడంతో కుమార్తె పేరుతో ఉన్న రూ.5 లక్షల డిపాజిట్‌ను వేరే చోట తాకట్టు పెట్టి రూ.4 లక్షలు అప్పు చేశాడు. వాటిని తిరిగి చెల్లించకపోగా మిగిలిన లక్ష కూడా కాజేసేందుకు రెండో భార్య లక్ష్మీతో కలసి పతకం పన్ని కుమార్తెను హత్య చేశాడు. ఈ నెల 15వ తేదీ తెల్లవారుజామున చిన్నారి సునీక్షాను చిత్రహింసలు పెట్టి గోడకేసి బాదడంతో చనిపోయింది. అనుమానాస్పదంగా మృతి చెందిందని నాల్గవ పట్టణ పోలీస్‌స్టేషన్‌లో తండ్రే ఫిర్యాదు చేశాడు. పోలీసులు సంఘటన స్థలాన్ని పరిశీలించారు. మొదట 174 సీఆర్‌పీ కింద కేసు నమోదు చేసుకున్నారు.  
  పోస్టుమార్టం నివేదికతో హత్యగా అనుమానం
 చిన్నారి మృతదేహంపై గాయాలు ఉండటంతో మృతదేహాన్ని పంచనామా నిర్వహించగా తలకు, శరీరంపై బలమైన గాయాలు ఉండటంతో మతిచెందినట్లు డాక్టర్లు పోస్టుమార్టం నివేదికలో పేర్కొన్నారు. దాని ఆధారంగా కేసును 304  ఐపీసీ సెక్షన్‌ కింద హత్య కేసుగా మార్పు చేశారు. దర్యాప్తులో భాగంగా తండ్రి అశోక్‌ సవితి తల్లి లక్ష్మిలను అదుపులోకి తీసుకుని విచారించగా ఆస్తి కోసం చిన్నారిని హత్య చేసినట్లు అంగీకరించారు. నిందితులిద్దరినీ కర్నూలు డీఎస్పీ రమణమూర్తి ఎదుట హాజరుపరిచారు. శనివారం మధ్యాహ్నం నాల్గవ పట్టణ పోలీస్‌స్టేషన్‌లో సీఐ జి.వి.నాగరాజరావుతో కలసి విలేకరుల సమావేశం నిర్వహించి డీఎస్పీ వివరాలు వెల్లడించారు. వారం రోజుల్లో కేసు మిస్టరీని ఛేదించి నిందితులను అరెస్టు చేసినందుకు నాల్గవ పట్టణ పోలీసులను డీఎస్పీ అభినందించారు.