హైదరాబాద్, బిజినెస్‌ బ్యూరో: వర్చువల్‌ అసెట్స్‌పై ప్రతిపాదిత పన్ను.. పెద్ద ఇన్వెస్టర్ల కన్నా చిన్న ఇన్వెస్టర్లకే ఎక్కువ ప్రతికూలంగా ఉంటుందని క్రిప్టో ఎక్సే్చంజ్‌ జియోటస్‌ సహ వ్యవస్థాపకుడు, సీఈవో విక్రమ్‌ సుబ్బురాజ్‌ తెలిపారు. అలాగే లావాదేవీలపై టీడీఎస్‌ (ట్యాక్స్‌ డిడక్టెట్‌ ఎట్‌ సోర్స్‌) ప్రతిపాదన వల్ల ఇన్వెస్టర్ల పెట్టుబడులకు విఘాతం కలిగే అవకాశం ఉందని పేర్కొన్నారు. దీనిపై ప్రభుత్వంతో పరిశ్రమ చర్చలు జరపనున్నట్లు ఆయన వివరించారు. క్రిప్టో అసెట్స్‌లో లావాదేవీలు సురక్షితంగా జరిగేలా బ్యాంకులు, ఆర్థిక సంస్థల తరహాలోనే తాము కూడా కేవైసీ (కస్టమర్ల వివరాల ధ్రువీకరణ) నిబంధనలు అన్నింటినీ పాటిస్తున్నామని విక్రమ్‌ చెప్పారు. ప్రస్తుతం దేశీయంగా సుమారు 12 క్రిప్టో ఎక్సే్చంజీలు ఉన్నాయని, వీటి ద్వారా నెలకు రూ. 3,000 కోట్ల పైచిలుకు విలువ చేసే లావాదేవీలు జరుగుతున్నాయని బుధవారం ఇక్కడ విలేకరుల సమావేశంలో చెప్పారు. ఇందులో సింహభాగం వాటా టాప్‌ 5 సంస్థలదే ఉంటోందని ఆయన తెలిపారు. నెలకు దాదాపు రూ. 500 కోట్ల విలువ చేసే లావాదేవీలు తమ ప్లాట్‌ఫాంపై జరుగుతున్నాయని పేర్కొన్నారు.  క్రిప్టో కరెన్సీల బాస్కెట్‌లో అత్యంత తక్కువగా రూ. 100 నుంచి సిప్‌ పద్ధతిలో ఇన్వెస్ట్‌ చేసే సదుపాయం కూడా కల్పిస్తున్నామని విక్రమ్‌ తెలిపారు. రిస్కులు తగ్గించుకునే క్రమంలో ఇన్వెస్టర్లు తమ పోర్ట్‌ఫోలియోలో క్రిప్టో సాధనాలపై పెట్టుబడులను రెండు శాతానికి పరిమితం చేసుకోవడం శ్రేయస్కరమని ఆయన పేర్కొన్నారు.  


 ముందస్తు పన్ను కోత (టీడీఎస్) నుంచి తప్పించుకోవాలంటే మీ ఆదాయ వ్యయాలు, సేవింగ్స్ వంటి వివరాలను ఈ నెలాఖరులోగా మీమీ ఆఫీసుల్లో సమర్పించాల్సి ఉంటుంది. లేదంటే మీ ఆదాయానికి అనుగుణంగా పన్ను లెక్కించి వచ్చే మూడు నెలల జీతం నుంచి టీడీఎస్ రూపంతో కోతలు తప్పవు. వీటిని తప్పించుకోవడానికి ఇప్పటి వరకు చేసిన సేవింగ్స్, వచ్చే మూడు నెలల్లో చేయబోయే వాటి వివరాలను తప్పకుండా ఇవ్వాలి. వీటితో పాటు పన్ను భారం తగ్గించుకోవడంలో ఇంటద్దె అలవెన్స్‌ది (హెచ్‌ఆర్‌ఏ) కీలకపాత్ర. అయితే మనలో చాలా మంది ఇంటద్దెను ఎంత ఎక్కువ చూపిస్తే అంత పన్ను భారం తగ్గుతుందనుకుంటారు.
 కానీ హెచ్‌ఆర్‌ఏపై గరిష్టంగా ఎంత ప్రయోజనం లభిస్తుందనేదానికి మూడు సూత్రాలున్నాయి. ఈ మూడింట్లో ఏది తక్కువైతే ఆ మొత్తాన్ని గరిష్టంగా లభించే హెచ్‌ఆర్‌ఏగా భావించి ఆ మొత్తాన్ని మీ ఆదాయం లోంచి తగ్గిస్తారు. ఈ మినహాయింపు లెక్కించేటప్పుడు నాలుగంశాలను చూస్తారు. వాటిలో మొదటిది జీతం. ఇక్కడ జీతం అంటే గ్రాస్ పే కాకుండా బేసిక్ శాలరీ, డీఏ మాత్రమే. కంపెనీలిచ్చే ఇతర అలవెన్సులు, పెర్క్స్‌ను లెక్కలోకి తీసుకోరు. ఇక రెండవది కంపెనీ హెచ్‌ఆర్‌ఏ రూపంలో ఇస్తున్న అలవెన్స్ మొత్తం. మూడోది మీరు వాస్తవంగా చెల్లిస్తున్న అద్దె. చివరగా నాల్గోది.. ఎంతో కీలకమైనది.. మీరు నివసిస్తున్న నగరం. ఈ నాలుగు అంశాలను పరిగణనలోకి తీసుకొని గరిష్టంగా ఇంటద్దె అలవెన్స్ ఎంత లభిస్తుందన్నది లెక్కిస్తారు.
  ఇలా లెక్కిస్తారు
  ఎ. జీతంలో 40 శాతం (ముంబై, కోల్‌కతా, ఢిల్లీ, చెన్నై మెట్రో నగరాల్లో అయితే 50 శాతం)
  బి. కంపెనీ ఇంటద్దె అలవెన్స్‌గా (హెచ్‌ఆర్‌ఏ) ఇచ్చే మొత్తం.
  సి. చెల్లించిన అద్దెలోంచి జీతంలో పదవభాగాన్ని తీసివేయగా మిగిలిన మొత్తం
  ఇప్పుడో ఉదాహరణ చూద్దాం...
  హైదరాబాద్‌లో ఉద్యోగం చేస్తున్న నగేష్ వార్షిక జీతం(బేసిక్+డీఏ) రూ.3,00,000. ఇంటద్దె అలవెన్స్ రూ.50,000. అంటే నగేష్ మొత్తం వార్షిక జీతం రూ.3,50,000. నగేష్ నెలకు రూ.5,000 చొప్పున సంవత్సరానికి అద్దెకింద  రూ.60,000 చెల్లిస్తున్నాడు.
  ఇప్పుడు నగేష్‌కి హెచ్‌ఆర్‌ఏ క్లెయిమ్ ఎంత లభిస్తుందో చూద్దాం.
  ఎ. జీతంలో 40 శాతం అంటే రూ. 3,00,000లో 40 శాతం = రూ.1,20,000
  బి. ఇంటద్దె అలవెన్సు = రూ.50,000
  సి. చెల్లిస్తున్న అద్దెలోంచి జీతంలో 10 శాతం మినహాయించగా మిగిలిన మొత్తం రూ. 60,000 - 30,000 ( 3,00,000లో 10 శాతం) = రూ. 30,000
  ఈ మూడింటిలో తక్కువ మొత్తమైన రూ.30,000 మాత్రమే క్లెయిమ్ చేసుకోవడానికి ఉంటుంది. అంతే కాని అద్దెకింద చెల్లిస్తున్న రూ.60,000 కాదు కదా, కనీసం కంపెనీ హెచ్‌ఆర్‌ఏ కింద ఇస్తున్న రూ.50,000 కూడా క్లెయిమ్ చేసుకోలేం.
  కనీసం కంపెనీ ఇస్తున్న హెచ్‌ఆర్‌ఏ మొత్తమైనా పొందాలనుకుంటే అద్దె కింద కనీసం రూ.80,000 చూపించాల్సి ఉంటుంది. అప్పుడు హెచ్‌ఆర్‌ఏ అలవెన్స్ కింద లభిస్తున్న రూ.50,000 క్లెయిమ్ చేసుకోవచ్చు.
  అలా కాకుండా అద్దెను మరింత పెంచి చూపిస్తే ఏ మేరకు ప్రయోజనం లభిస్తుందో ఇప్పుడు చూద్దాం. నగేష్ నెలకు రూ.8,000 అద్దె చెల్లిస్తున్నట్లయితే సంవత్సరంలో రూ.96,000 చెల్లిస్తాడు.
  ఎ. జీతంలో 40 శాతం అంటే రూ. 3,00,000లో 40 శాతం  = రూ. 1,20,000
  బి. ఇంటద్దె అలవెన్సు = రూ. 50,000
  సి. చెల్లిస్తున్న అద్దెలోంచి జీతంలో 10 శాతం మినహాయించగా మిగిలిన మొత్తం రూ. 96,000 - 30,000 ( 3,00,000లో 10 శాతం) = రూ. 66,000
  ఈ మూడింటిలో కంపెనీ హెచ్‌ఆర్‌ఏగా ఇస్తున్న మొత్తమే తక్కువగా ఉండటంతో ఈ కేసులో కూడా గరిష్టంగా రూ.50,000 మాత్రమే క్లెయిమ్ చేసుకోవడానికి వీలుంటుంది.
  కాబట్టి ఇలా ఎక్కువ అద్దె చెల్లిస్తున్నట్లు చూపించినంత మాత్రాన ఎటువంటి ప్రయోజనం లేకపోగా మారిన నిబంధనలు ప్రకారం మరిన్ని చిక్కులు ఎదుర్కోవాల్సి ఉంటుంది.
  ఇవి కాకుండా..
  టీడీఎస్ కోత నుంచి తప్పించుకోవాలంటే సెక్షన్ 80సీ పరిధిలోకి వచ్చే అన్ని అంశాలు అంటే... ట్యూషన్ ఫీజులు, బీమా, పీఎఫ్, పీపీఎఫ్, ఎన్‌ఎస్‌సీ, హౌసింగ్ లోన్ వంటి అంశాలను, వాటికి చెల్లించిన రశీదులను ఇవ్వాల్సి ఉంటుంది. ఇవి కాకుండా ఇంకా ఏమైనా ఉంటే... విరాళాలు, వైద్య బీమా, క్యాపిటల్ గెయిన్ మినహాయింపులు వంటి వివరాలను కూడా ఇవ్వాల్సి ఉంటుంది. ఈ వివరాలన్నీ ఇవ్వడం ద్వారా అనవసర పన్ను కోత నుంచి తప్పించుకోవచ్చు. లేకపోతే మార్చి తర్వాత రిటర్నులు దాఖలు చేయడం ద్వారా అధికంగా చెల్లించిన పన్నులను రిటర్నుల రూపంలో పొందాలి.  ముందుగా మేలుకుంటే ఈ బాధల నుంచి తప్పించుకోవచ్చు.