అమ్మ మనసు
 బాలీవుడ్ ‘బిగ్ బీ’ అమితాబ్ బచ్చన్‌కు తల్లి తేజీ బచ్చన్‌తో గాఢమైన అనుబంధం ఉంది. అమితాబ్ తండ్రి హరివంశరాయ్ బచ్చన్ కవి. ఆయన మొదటి భార్య చనిపోయిన తర్వాత తేజీ ఆయనను పెళ్లాడారు. సంపన్న కుటుంబానికి చెందిన తన తల్లి అన్నీ వదులుకుని తన తండ్రితో పెళ్లికి సిద్ధపడిందని, తనను తన తమ్ముడు అజితాబ్‌ను అనుక్షణం కంటికి రెప్పలా కాపాడేదని అమితాబ్ తన బ్లాగులో రాసుకున్నారు. సినీరంగంలో ప్రవేశించిన తొలినాళ్లలో విజయాల కోసం పరితపించిన రోజుల్లో తనకు ధైర్యం చెప్పేదని గుర్తు చేసుకున్నారు.
 
 ‘దీవార్’ సినిమా చూసిన తర్వాత తన తల్లి వెక్కివెక్కి ఏడ్చిందని గుర్తుచేసుకున్నారు. ఈ సినిమాలో అమితాబ్ పాత్ర మరణించిన దృశ్యం ఆమెను విపరీతంగా కదిలించింది.


 ‘‘మా జీవితాల్లోంచి ఆమె వెళ్లిపోయి దాదాపు ఏడేళ్లవుతున్నా మా మనసు పొరల్లో ఆవిడ జ్ఞాపకాలు చెరిగిపోలేదు.. ఊపిరి ఉన్నంతవరకూ చెరిగిపోవు కూడా’’ అని ఒకింత ఉద్వేగంగా అమితాబ్ బచ్చన్ తన ‘బ్లాగ్’లో పొందుపరిచారు. ఆయన తల్లి తేజీ బచ్చన్ చనిపోయి నిన్నటితో ఏడేళ్లవుతోంది. ఈ సందర్భంగా అమితాబ్ బచ్చన్ తన తల్లి గురించి ఇంకా మాట్లాడుతూ -‘‘లీలావతి ఆస్పత్రిలో మా అమ్మ జీవన్మరణ పోరాటం సాగించిన రోజులను ఎప్పటికీ మర్చిపోలేను., ఓ పులిలా ధైర్యంగా పోరాడింది. ‘ఏం ఫర్వాలేదు.. మీ అమ్మగారు కోలుకుంటారు’ అని డాక్టర్లు చెప్పేవారు. 
  
  అలా చెప్పిన కొన్ని నిమిషాలకే అమ్మ తీవ్రమైన అస్వస్థతకు గురయ్యేది. డాక్టర్లు ఆమె గుండె ఆగిపోతుందేమోనని ఆందోళనపడేవారు. ఇంజక్షన్లు ఇచ్చేవాళ్లు. చెస్ట్‌ని పంప్ చేసేవాళ్లు. అమ్మ ప్రత్యక్ష నరకం చవిచూసేది. మా అమ్మని ఆ స్థితిలో చూస్తానని ఏనాడూ ఊహించలేదు. ఆమె బాధ చూసి, మనసులోనే కుమిలిపోయేవాణ్ణి. ఏ బిడ్డ అయినా తల్లి బతికితే బాగుండు అని కోరుకుంటుంది. కానీ, అమ్మకు ఈ నరకం నుంచి విముక్తి లభిస్తే బాగుండు అని నేను కోరుకునేవాణ్ణి. అమ్మ బెడ్ చుట్టూ డాక్టర్లు గుమిగూడిపోయి బతికించడానికి విశ్వ ప్రయత్నాలు చేసేవారు.
  
   ఆ ప్రయత్నాలన్నీ ఆమెను ఇంకా బాధపెట్టేవి. అందుకే డాక్టర్ల దగ్గర మా అమ్మను ఇక బాధపెట్టొద్దు అని చెప్పాను. ఆమె తుది శ్వాస విడిచిన ఆ క్షణం అచేతనంగా అలా నిలబడి చూస్తుండిపోవడం మినహా ఏమీ చేయలేకపోయాను. మా అమ్మ రూపం మనసులో అలా మిలిగిపోయింది. నా దృష్టిలో ఈ ప్రపంచంలోనే అందగత్తె ఎవరంటే అది మా అమ్మే’’ అని పేర్కొన్నారు.