సీఎల్పీ ఉపనేత జీవన్‌రెడ్డి
 
 సాక్షి, హైదరాబాద్‌:  రైతు రుణాలు, సహాయం చేయడానికి బ్యాంకర్లతో సమావేశం నిర్వహించని ముఖ్యమంత్రి.. కేసీఆర్‌ ఒక్కరేనని మాజీ మంత్రి, సీఎల్పీ ఉపనేత టి.జీవన్‌రెడ్డి విమర్శించారు. శనివారం హైదరాబాద్‌లో ఆయన విలేకరులతో మాట్లాడుతూ, రాష్ట్రంలో రైతులకు గిట్టుబాటు ధర ఇవ్వలేదని, అది కేంద్రం బాధ్యత అంటూ చేతులెత్తేసిందని ఆరోపించారు. ఎకరానికి రూ.4 వేలను ఈ ఖరీఫ్‌ నుంచే ఇవ్వాలని డిమాండ్‌ చేశారు.
 
 రైతు సమస్యలను దృష్టి మళ్లించడానికే సమగ్ర భూ సర్వే అంటూ కొత్త అంశాన్ని తెరపైకి తెచ్చారని విమర్శించారు. మండలానికి ఒక్క సర్వేయర్‌ కూడా దిక్కు లేరని, ఇక సర్వే ఎలా చేస్తారని ప్రశ్నించారు. ఖరీఫ్‌ సీజన్‌ ప్రారంభమై రెండు నెలలు కావస్తున్నా బ్యాంకర్లు రుణాలు ఇవ్వడంలేదని, కనీసం రాష్ట్రస్థాయి బ్యాంకర్లతో సమావేశం కూడా నిర్వహించడం లేదని విమర్శించారు. రైతులకు గిట్టుబాటు ధర కల్పించకుండా కేవలం మాటలతోనే కాలం గడుపుతున్నారని మండిపడ్డారు.


 సాక్షి, హైదరాబాద్‌: దేశ సమగ్రత కోసం ప్రాణాలను త్యాగం చేసిన కుటుంబానికి చెందిన రాహుల్‌ గాంధీతో మంత్రి కేటీఆర్‌ తనకు తాను పోల్చుకోవడం చూసి జనం నవ్వుకుంటున్నారని సీఎల్పీ ఉపనేత టి.జీవన్‌రెడ్డి ఎద్దేవా చేశారు. తెలంగాణ ఇచ్చిన ఘనత కాంగ్రెస్‌దేనని, తెలం గాణకు కాంగ్రెస్‌ వ్యతిరేకమని మాట్లాడటం సరికాదని హితవు పలికారు.
 తెలంగాణ కోసం కేసీఆర్‌లా కాంగ్రెస్‌ నేతలు దొంగ దీక్షలు చేయలేదన్నారు. నిజాయితీతో, చిత్తశుద్ధితో తెలంగాణ సాధించామని చెప్పారు. తెలంగాణకు అసలైన ద్రోహులు టీఆర్‌ఎస్‌ నేతలేనన్నారు. పార్లమెంటులో తెలంగాణ బిల్లు పాస్‌ చేయడంలో కీలకంగా వ్యవహరించిన మీరా కుమార్‌కు ద్రోహం చేసిన చరిత్ర టీఆర్‌ఎస్‌దని విమర్శించారు. మంత్రి పదవి ఇవ్వలేదని సీఎం పదవి ఇస్తానని మోసం చేసిన చరిత్ర కేసీఆర్‌ది అని ధ్వజమెత్తారు.