తాడిపత్రి టౌన్‌ : యాడికి మండలం బోగాలగట్ట గ్రామానికి చెందిన రామచంద్రారెడ్డి, చంద్రావతి పెద్ద కుమారుడు జగదీశ్వరరెడ్డి సివిల్స్‌-16 ఫలితాల్లో 249వ ర్యాంకు సాధించాడు. ఈయన ఒకటి నుంచి 5వ తరగతి వరకు  బోగాలగట్ట గ్రామంలో చదివాడు. 6వ తరగతి నుంచి ఇంటర్‌ వరకు లేపాక్షిలోని నవోదయ కళాశాలలో చదవి ఉత్తమశ్రేణిలో ఉత్తీర్ణత సాధించాడు. తిరుపతిలోని ఓ ప్రైవేటు కళాశాలలో డిగ్రీ చదివాడు. అనంతరం ఎంబీఏ  పూర్తి చేశాడు. హైదరాబాదు, ఢిల్లీలోని ప్రైవేటు కళాశాలలో పార్ట్‌ టైం అధ్యాపకుడిగా పనిచేస్తూ సివిల్స్‌కు సిద్ధమయ్యాడు. ఈ సందర్భంగా జగదీశ్వరరెడ్డి మాట్లాడుతూ చిన్నతనం నుంచి సివిల్స్‌ సాధించాలన్న బలమైన కోరికతో కష్టపడి చదివానన్నాడు. అమ్మ,నాన్న, తమ్ముడు స్నేహితుల సహకారంతో సివిల్‌ సాధించాను. లక్ష్యాన్ని సాధించడంతో చాలా ఆనందంగా ఉంది. రైతు సంక్షేమం కోసం నా వంతు కృషి చేస్తానన్నాడు.