ముదిగుబ్బ: కదిరి యర్రదొడ్డి గంగమ్మ సమీపంలో మోరి వద్ద జరిగిన వివాహిత హత్య కేసులో ఆమె భర్త పి.గంగిరెడ్డిని అరెస్ట్‌ చేసినట్లు డీఎస్పీ వెంకటరమణ తెలిపారు. మంగళవారం పట్నం పోలీస్‌ స్టేషన్‌లో ఏర్పాటు చేసిన విలేకరుల సమావేశంలో ఆయన మాట్లాడారు. కదిరి మండలం వై. కొత్తపల్లికి చెందిన గంగిరెడ్డి తన భార్య పి.సరస్వతి మరొక వ్యక్తితో సంబంధం వుందని అనుమానించాడు. ఎలాగైనా భార్యను చంపాలని అనుకున్నాడు.
 
 ఈ క్రమంలో భార్యకు మాయ మాటలు చెప్పి యర్రదొడ్డి గంగమ్మ సమీపంలో వున్న మోరి వద్దకు తీసుకొచ్చాడు. అక్కడ రాళ్లతో తలపై గుద్ది చీర కొంగుతో గొంతు బిగించి  హత్య చేశాడు. అతడిని పట్టుకోవడంలో కదిరిలో ఏర్పాటు చేసిన సీసీ కెమేరాల ఫుటేజిలు సహకరించాయన్నారు. కేసును చేదించడంలో  కీలకంగా వ్యవహరించిన ఎస్‌ఐ రాఘవయ్య, సిబ్బంది నారాయణస్వామి, నాగరాజును ఈ సందర్భంగా డీఎస్పీ అభినందించారు. ఈ కార్యక్రమంలో సీఐ  శ్రీనివాసులు సిబ్బంది తదితరులు పాల్గొన్నారు.


 ఆత్మకూరు : మండలంలోని వై.కొత్తపల్లి వద్ద శనివారం 70 సంవత్సరాల వయసు కల్గిన వృద్ధురాలిపై గుర్తు తెలియని వ్యక్తులు అత్యాచారయత్నానికి పాల్పడ్డారు. ఆత్మకూరు ఎస్‌ఐ దిలీప్‌కుమార్‌ తెలిపిన వివరాల మేరకు .... కళ్యాణదుర్గం మండలం మద్దినాయనపల్లి గ్రామానికి చెందిన ఓ వృద్ధురాలు శనివారం ఆత్మకూరు మండలం వై. కొత్తపల్లి గ్రామానికి నడిచి వెళ్తుండగా గుర్తు తెలియని వ్యక్తులు కొందరు అటు వైపు వచ్చి తాము కొత్తపల్లి గ్రామానికే వెళ్తున్నామని కారులో ఎక్కించుకున్నారు.
 
 కొత్తపల్లి గ్రామం దాటాక వాహనం ఆపమని ఆ వృద్ధురాలు కోరగా వారు వినకపొగా  అత్యాచారానికి యత్నించారు.  ఆమె గట్టిగా కేకలు  వేయడంతో  అటుగా దారి వెంట వస్తున్న కొందరు కారును ఆపడానికి ప్రయత్నించారు. దీంతో వారు ఆ వృద్ధురాలిని వాహనంలో నుంచి కిందకి తోసి వెళ్లిపోయారు. ప్రమాదంలో ఆమెకు తీవ్ర గాయాలు కావడంతో  పొలాల్లో ఉన్న వారు 108 వాహనం ద్వారా అనంతపురం ప్రభుత్వ ఆసుపత్రికి తరలించారు.  కేసు నమోదు చేసినట్లు ఎస్‌ఐ తెలిపారు.