TV
చైన్నె పోర్టులో రూ.26 కోట్ల సరుకులు స్వాధీనం
అన్నానగర్: దుబాయ్ మీదుగా చైన్నెకి అక్రమంగా తరలిస్తున్న రూ.26.4 కోట్ల విలువైన వస్తువులను చైన్నె పోర్టులో 7 కంటైనర్లలో కస్టమ్స్ అధికారులు స్వాధీనం చేసుకున్నారు. చైన్నె పోర్టులోకి అక్రమంగా నిషేధిత వస్తువులు తరలిస్తున్నట్లు అందిన సమాచారం మేరకు కస్టమ్స్ శాఖ అధికారులు విదేశాల నుంచి వస్తున్న కంటైనర్లను ముమ్మరంగా తనిఖీలు చేస్తున్నారు. దీంతో బుధవారం దుబాయ్ నుంచి చైన్నె పోర్టుకు ఓడలో వచ్చిన కంటైనర్లను కస్టమ్స్ అధికారులు తనిఖీ చేశారు. అనుమానం వచ్చిన కస్టమ్స్ అధికారులు 5 కంటైనర్లను తెరిచి పరిశీలించగా అందులో వ్యక్తిగత వస్తువులు, ఆభరణాలు ఉన్నాయని తెలిసింది.వాటిలో నిషేధిత టాయ్ డ్రోన్లు, షూలు, పోర్టబుల్ ఫ్యాన్లు, కటింగ్ టూల్స్, రూ.7.5 కోట్ల విలువైన బొమ్మలు ఉన్నాయి. బ్యూరో ఆఫ్ ఇండియన్ స్టాండర్డ్స్ సర్టిఫికేషన్, ఇంటర్మీడియట్ రివ్యూ అవసరం అయినందున వాటిని స్వాధీనం చేసుకున్నారు. అలాగే కస్టమ్స్ అధికారులు ప్లాస్టిక్ వస్తువులు, ఫొటో ఫ్రేమ్ ఉన్న 2 కంటైనర్లను తనిఖీ చేశారు. నిర్దేశిత వస్తువులకు బదులుగా రూ.18.9 కోట్ల విలువైన కాస్మోటిక్ ఉత్పత్తులు, మందులు, బొమ్మలు ఉన్నాయి. వీటిని కాస్మోటిక్స్ చట్టం ప్రకారం, బొమ్మలను బ్యూరో ఆఫ్ ఇండియన్ స్టాండర్డ్స్ సర్టిఫికేషన్ ద్వారా నియంత్రించారు. సౌందర్య సాధనాలు పీర్ సమీక్షలో ఉన్నాయి. మొత్తం 7 కంటైనర్లలో రూ.26.4 కోట్ల విలువైన వస్తువులను కస్టమ్స్ అధికారులు స్వాధీనం చేసుకున్నారు. చైన్నెలో ఈ వస్తువులు ఎవరికి దిగుమతి అవుతాయి? దీనిపై విచారణ జరుగుతోంది. ఇందుకు సంబంధించి ఇద్దరిని అరెస్టు చేసినట్లు అధికారులు తెలిపారు.
మదురై వద్ద అర్ధరాత్రి ఎక్స్ప్రెస్ రైలులో పొగలు
● ప్రయాణికుల ఆందోళన
తిరువొత్తియూరు: మధురై వద్ద ఓ ఎక్స్ప్రెస్ రైలులో పొగలు రావడంతో ప్రయాణికులలో భీతి కలిగించింది. అడవి పంది పట్టాలపై చిక్కుకోవడమే ఇందుకు కారణమని తెలిసింది. వివరాలు.. తిరువనంతపురం నుంచి కాకినాడ వెళ్లే ఎక్స్ప్రెస్ రైలు మంగళవారం అర్ధరాత్రి మధురై రైల్వే స్టేషన్ వద్ద వస్తుంది. శివరకోట్టై సమీపంలోని రైలులోని 1 కంపార్ట్మెంట్ నుంచి అకస్మాత్తుగా పొగలు వచ్చాయి. రైలు తిరుమంగళం రైల్వే స్టేషన్లోకి ప్రవేశించగానే ప్రయాణికులు వెంటనే రైలు సేఫ్టీ చైన్ పట్టుకుని లాగారు. దీంతో తిరుమంగళం రైల్వే స్టేషనన్లో రైలు నిలిచిపోయింది. భయపడిన ప్రయాణికులు హడావుడిగా రైలు నుంచి కిందకు దిగారు. రైల్వే ఉద్యోగులు పరుగులు, అగ్నిమాపక పరికరాలతో మంటలను అదుపు చేశారు. పొగ వచ్చిన ప్రాంతాన్ని పరిశీలించగా రైలు పెట్టె కింద ఉన్న బ్రేక్ షూ నుంచి పొగలు వస్తున్నట్లు గుర్తించారు. ఈ ఘటనతో 40 నిమిషాలు ఆలస్యంగా తిరుమంగళం నుంచి 11.50కి మదురైకి రైలు బయలుదేరింది. రైలు మదురై జంక్షన్కు చేరుకోగా, పొగ వచ్చిన చోట అడవి పంది చిక్కుకుపోయి మృతి చెందినట్లు గుర్తించారు. అనంతరం అడవి పంది కళేబరాన్ని తొలగించడంతో రైలు బయలుదేరింది.
విమాన సేవల పెంపు
●చైన్నె నుంచి పలు నగరాలు, దేశాలకు అదనపు విమానాలు
సాక్షి, చైన్నె: వేసవి సెలవుల నేపథ్యంలో చైన్నె నుంచి దేశంలోని పలు నగరాలు, పలుదేశాలకు విమానాల సేవలను పెంచారు. ప్రస్తుతం రోజుకు 206 విమానాల సేవలకు చర్యలు తీసుకున్నారు. దీంతో చైన్నె విమానాశ్రయంలో రద్దీ పెరిగింది. చైన్నె మీనంబాక్కం విమానాశ్రయం నుంచి స్వదేశంతో పాటుగా అంతర్జాతీయ స్థాయిలో అన్ని ప్రధాన నగరాలకు , దేశాల రాజధానులకు విమానాల సేవలు జరుగుతున్న విషయం తెలిసిందే. సంవత్సరానికి 23 మిలియన్ మేరకు ప్రయాణికులు ఈ విమానాశ్రయం ద్వారా సేవల్ని పొందుతున్నారు. రోజుకు 50 వేల మంది సేవలు పొందుతుండగా ప్రస్తుతం వేసవి సెలవుల నేపథ్యంలో సంఖ్య 60 వేలకు చేరింది. ఈ సంఖ్య మరింతగా మున్ముందు రోజులలో పెరగనున్నది. దీంతో జనం రద్దీని దృష్టిలో ఉంచుకుని విమాన సేవలను పెంచేదిశగా పలు విమాన సంస్థలు చర్యలు తీసుకున్నాయి. స్వదేశీ, విదేశీ విమాన సేవలు 206గా పెంచారు. ఇందులో కొన్ని వేసవి స్పెషల్గా ప్రకటించారు. శ్రీలంక , కువైట్, థాయ్ లాండ్ , బ్యాంకాక్ వంటి దేశాలకు అదనపు విమాన సేవలు కల్పించారు. దేశంలోని పర్యాటక ప్రాంతాలను కలిపే విధంగా పలు నగరాలకు విమాన సేవలను విస్తరించారు. 206 విమాన సేవలలో 42 విదేశీ, 164 స్వదేశీ విమానాల సేవలు ఉన్నాయి. విమానాశ్రయంలో పెరిగిన రద్దీ నేపథ్యంలో అదనపు కౌంటర్ల ద్వారా ప్రయాణికులకు సేవలను మరింత సులభతరం చేసేందుకు అధికారులు చర్యలు తీసుకున్నారు.
