హైటెన్షన్

తెలంగాణ ప్రత్యేక రాష్ట్రం ఏర్పాటుకు కేంద్ర మంత్రివర్గం ఆమోదముద్ర వేయటంతో జిల్లా వ్యాప్తంగా హైటెన్షన్ నెలకొంది. పరిస్థితిని ముందుగానే అంచనా వేసిన ప్రభుత్వం.. కీలక ప్రాంతాలు, మంత్రులు, ఎమ్మెల్యేల నివాసాల వద్ద కేంద్ర బలగాలతోపాటు స్థానిక పోలీసులను మోహరించింది. కేంద్ర మంత్రివర్గ నిర్ణయం గురించి గురువారం రాత్రి టీవీ చానెళ్లలో వార్తలు ప్రసారమవగానే జిల్లా వ్యాప్తంగా ప్రజలు తీవ్ర ఉద్వేగానికి లోనయ్యారు. సమైక్యాంధ్ర ఉద్యమకారులు మళ్లీ పోరుబాట పట్టేందుకు సిద్ధమయ్యారు. వైఎస్‌ఆర్ కాంగ్రెస్ పార్టీ అధినేత వై.ఎస్.జగన్‌మోహన్‌రెడ్డి ఇచ్చిన పిలుపు మేరకు శుక్రవారం జిల్లాలో బంద్‌ను విజయవంతం చేయాలని పార్టీ జిల్లా కన్వీనర్ ధర్మాన కృష్ణదాస్ విజ్ఞప్తి చేశారు. జిల్లా వ్యాప్తంగా బంద్ పాటించాలని సమైక్యాంధ్ర పరిరక్షణ వేదిక, జిల్లాలోని విద్యా సంస్థలను శుక్రవారం మూసివేయాలని విద్యార్థి జేఏసీ పిలుపునిచ్చాయి. కేంద్ర ప్రభుత్వ నిర్ణయంపై ఎమ్మెల్యేలు, వివిధ పార్టీల నేతలు, ఉద్యోగుల జేఏసీ నాయకులు, వివిధ వర్గాల ప్రతినిధులు తీవ్ర నిరసన వ్యక్తం చేశారు.