ఛత్తీస్‌గఢ్‌లో మహిళపై దారుణం

రాయిపూర్‌(ఛత్తీస్‌గఢ్‌): స్నేహితుడితో కలిసి వెళ్తున్న ఓ మహిళపై పది మంది పశువాంఛ తీర్చుకున్నారు. నిందితుల్లో ఇద్దరు మైనర్లు కావటం గమనార్హం. ఛత్తీస్‌గఢ్‌ రాష్ట్రం జశ్‌పూర్‌ జిల్లాలో ఈ దారుణం చోటుచేసుకుంది. వివరాల్లోకి వెళితే.. హట్కాలా గ్రామానికి చెందిన మహిళ తన స్నేహితుడితో కలిసి కైకాచ్చార్‌ గ్రామం నుంచి అటవీ మార్గంలో వెళ్తుంది. వారిని అదే గ్రామానికే చెందిన పది మంది కామాంధులు అడ్డగించారు. దీంతో ఆ ఇద్దరూ భయంతో చెరో దిక్కుకు పరుగు తీశారు. వారు బాధితురాలిని వెంటాడి తీవ్రంగా కొట్టి హింసించి, అత్యాచారానికి పాల్పడ్డారు. స్పృహ లేని స్థితిలో ఉన్న ఆమెను వాగు వద్ద వదిలేసి పరారయ్యారు.

దాదాపు 15 గంటలపాటు బాధితురాలు అటవీ ప్రాంతంలోనే ఉంది. స్పృహలోకి వచ్చాక  నెమ్మదిగా మూడు కిలోమీటర్ల దూరంలో ఉన్న తన ఇంటికి నడుచుకుంటూ వచ్చింది. జరిగిన దురాగతాన్ని తల్లిదండ్రులకు చెప్పటంతో వారు ఆమెను తీసుకుని ఠాణాకు వెళ్లి పోలీసులకు ఫిర్యాదు చేశారు. దీనిపై స్పందించిన పోలీసులు.. నితేష్‌(22), లియాండర్‌ బెక్‌(25), రోస్టిన్‌(22), సచిన్‌(19), సంగీత్‌(26), అసిత్‌ బెక్‌(29), అమిత్‌ బెక్‌(25), అమ్రిత్‌ కుజూర్‌(23) అనే వారిని అదుపులోకి తీసుకున్నారు. నిందితుల్లో 8వ తరగతి చదువుకుంటున్న ఇద్దరు మైనర్లను అదుపులోకి తీసుకుని జువెనైల్‌ హోంకు తరలించారు. మిగతా 8 మందిని జ్యుడీషియల్‌ రిమాండ్‌కు తరలించారు.