సాక్షి, ముంబై:   బడ్జెట్‌ ధరల ప్రముఖ విమానయాన సంస్థ  ఎయిర్ ఏషియా బంపర్‌ ఆఫర్‌ ప్రకటించింది.   కేవలం రూ.99లకే విమానటికెట్‌ను ఆఫర్‌ చేస్తోంది. దేశంలో 7 నగరాల మధ్య ప్రయాణానికి రూ .99 నుంచి ప్రమోషనల్ బేస్ ఛార్జీలను ప్రారంభించింది.   బెంగళూరు, హైదరాబాద్, కొచ్చి, కోల్‌కతా, న్యూ ఢిల్లీ, పూణే, రాంచీ వంటి నగరాలకు డైనమిక్ ధర రూ .99 నుంచి ప్రారంభమవుతాయని కంపెనీ ఒక ప్రకటనలో తెలిపింది. ఎయిర్‌  ఏషియా వెబ్‌సైట్‌, లేదా యాప్‌ ద్వారా బుక్‌ చేసుకున్న టికెట్లపై మాత్రమే  ఈ ఆఫర్‌ వర్తిస్తుంది.  అంతేకాదు  ఇంకో  ఆకర్షణీయమైన ఆఫర్‌ కూడా ఉంది. 10 ఆసియా-పసిఫిక్ ప్రాంతం (అపాక్‌) దేశాలు ఆక్లాండ్, బాలి, బ్యాంకాక్, కౌలాలంపూర్, మెల్‌బోర్న్, సింగపూర్  సిడ్నీలకు బేస్‌ ధర రూ.1499గా నిర్ణయించింది. కాగా ఇప్పటికే అనేక విమానయాన సంస్థలు ప్రయాణికులకు అత్యంత తక్కువ ధరలకే విమానయన సదుపాయం కల్పిస్తూ చౌక ధరల యుద్ధానికి తెరతీస్తున్న తరుణంలో ఎయిర్‌ ఏషియా మరోమారు  డిస్కౌంట్‌ ధరలను అందిస్తోంది.   దేశీయంగా,  ఇతర దేశాలను చుట్టి రావాలనుకునే విమాన ప్రయాణికులకు  మంచి అవకాశాన్ని కల్పిస్తోంది.  


 తొలి విమానం బెంగళూరు-గోవాకు
 ముంబై: ఎయిర్ ఏషియా ఇండియా విమాన సర్వీసులు నేటి నుంచి ప్రారంభం కానున్నాయి. దీంతో దేశీయ విమానయాన రంగంలో తీవ్రమైన పోటీకి తెర లేచిందని నిపుణులంటున్నారు. ఇండిగో, స్పైస్‌జెట్, గో ఎయిర్, జెట్‌లైట్‌ల  తరహాలో ఎయిర్ ఏషియా కూడా చౌక విమానయాన  సర్వీసులను అందిస్తుంది.  టోనీ ఫెర్నాండెస్ నేతృత్వంలోని మలేసియా విమానయాన సంస్థ,  ఎయిర్ ఏషియా, టాటా సన్స్, అరుణ్ భాటియాకు చెందిన టెలిస్ట్రా ట్రేడ్‌ప్లేస్‌లు కలసి 49:30:21 భాగస్వామ్యంతో ఎయిర్ ఏషియా ఇండియా సంస్థను ఏర్పాటు చేశాయి.
  
 టైర్ టూ నగరాలపై దృష్టి
  ఎయిర్ ఏషియా ఇండియా తొలి విమానం నేడు బెంగళూరు నుంచి గోవాకు 3.10 గంటలకు ప్రారంభం కానున్నది. అత్యంత చౌక ధరలకే విమానయానాన్ని అందిస్తామంటున్న ఎయిర్ ఏషియా ఇండియా సంస్థ టైర్ టూ నగరాలపై  దృష్టి కేంద్రీకరిస్తోంది.  బెంగళూరు-గోవా, బెంగళూరు-చెన్నైలకు విమాన చార్జీలను రూ.999కే అందించడం ద్వారా ఈ సంస్థ ఇప్పటికే ధరల పోరుకు తెర తీసింది. ఈ బుకింగ్స్ ప్రారంభమైన 10 నిమిషాలకే  టికెట్లన్నీ అమ్ముడయ్యాయి.