మా ఇంట్లో అత్త‌లు, అక్క‌ వీణ వాయిస్తూ ఉండేవారు. అది చిన్న‌ప్ప‌టి నుంచి గ‌మ‌నించేవాడిని. అలా ఆస‌క్తి పెరుగుతూ వ‌చ్చింది. అలా నిశితంగా గ‌మ‌నించ‌టంతోనే సంగీతాన్ని నేర్చుకుంటూ వ‌చ్చాను. ముందు గిటార్ నేర్చుకోవాల‌నుకున్నాను. అందుక‌ని శ‌ర‌త్‌ మాస్ట‌ర్ ద‌గ్గ‌ర రెండున్న‌ర నెలల పాటు బేసిక్స్ నేర్చుకున్నాను. త‌ర్వాత నాకు నేనుగా సొంతంగా ప్లే చేస్తూ నేర్చుకోవ‌టం స్టార్ట్ చేశాను. షార్ట్‌ ఫిల్మ్స్‌కి పనిచేయడం వల్లే నాకు సినిమా చాన్స్‌ లభించింది’ అన్నారు సంగీత దర్శకుడు అజయ్‌ అరసాడ. ఆయన సంగీతం అందించిన వెబ్‌ సిరీస్‌ వికటకవి. ప్రస్తుతం ఈ వెబ్‌ సిరీస్ట్‌ ప్రముఖ ఓటీటీ జీ5లో స్ట్రీమింగ్‌ అవుతోంది. ఈ నేపథ్యంలో తాజాగా సంగీత దర్శకుడు అజయ్‌ మీడియాతో ముచ్చటించారు. ఆ విశేషాలు..→ నేను పుట్టి పెరిగిదంతా వైజాగ్‌లోనే. గీతం యూనివ‌ర్సిటీలో ఇంజ‌నీరింగ్ చ‌దువుకున్నాను. టీసీఎస్‌లో సాఫ్ట్‌వేర్ ఇంజ‌నీర్‌గా 2011 నుంచి 2018వ‌ర‌కు జాబ్ చేశాను. ఉద్యోగం మానేసిన సినీ ఇండ‌స్ట్రీలోకి ఎంట్రీ ఇచ్చాను.→ సాఫ్ట్‌వేర్ ఇంజ‌నీర్‌గా ప‌నిచేస్తూన్న సమయంలో షార్ట్ ఫిల్మ్స్‌కు వ‌ర్క్ చేసేవాడిని. ఇలా చేయ‌టం వ‌ల్ల నాకు మంచి ప్రాక్టీస్ దొరికిన‌ట్ల‌య్యింది. ఈ క్ర‌మంలో ప్ర‌దీప్ అద్వైత్ నన్ను జ‌గ‌న్నాట‌కం డైరెక్ట‌ర్ ప్ర‌దీప్‌కు ప‌రిచ‌యం చేశారు. నేను అంత‌కు ముందు చేసిన ఓ ముప్పై సెక‌న్ల మ్యూజిక్ బిట్ విని నాకు జ‌గ‌న్నాట‌కం మూవీలో చాన్స్ ఇచ్చారు. అలా సినీ ఇండ‌స్ట్రీలోకి నా తొలి అడుగు ప‌డింది.→ నా చిన్న‌నాటి స్నేహితుడు.. మ్యూజిక్ డైరెక్ట‌ర్ శ్రీచ‌ర‌ణ్ పాకాల న‌న్ను గూఢ‌చారి సినిమాలో కీ బోర్డ్ ప్రోగ్రామింగ్ కోసం వ‌ర్క్ చేయ‌మ‌ని అడ‌గ‌టంతో వ‌ర్క్ చేశాను. ఆ త‌ర్వాత క్షీర సాగ‌ర మ‌థ‌నం, నేడే విడుద‌ల‌, మిస్సింగ్, శ్రీరంగ‌నీతులు సినిమాల‌కు వ‌ర్క్ చేశాను. సేవ్ ది టైగ‌ర్స్ సీజ‌న్1, సీజ‌న్‌2ల‌కు సంగీతాన్ని అందించాను. రీసెంట్‌గా విక‌ట‌క‌వి సిరీస్‌కు వ‌ర్క్ చేశాను.→ నేను సంగీతాన్నందించిన మిస్సింగ్ మూవీలో ఓ బీజీఎం బిట్ నిర్మాత బ‌న్నీవాస్‌కి బాగా నచ్చింది. అందుకే నాకు ఆయ్‌ మూవీకి వర్క్‌చేసే చాన్స్‌ ఇచ్చాడు. ముందుగా ఓ స్పెషల్‌ సాంగ్‌ కోసం పని చేయమని చెప్పారు. నేను కంపోజ్‌ చేసిన సాంగ్‌ బాగా నచ్చడంతో ఆ సినిమా మొత్తానికి మ్యూజిక్‌ అందించే అవకాశం ఇచ్చాడు. ఆయ్ వంటి కామెడీ మూవీకి బీజీఎం చేయ‌టం మామూలు విష‌యం కాదు. అయితే సినిమా హిట్ అయిన‌ప్పుడు ప‌డ్డ క‌ష్ట‌మంతా మ‌ర‌చిపోయాను.→ ఆయ్ సినిమాకు వ‌ర్క్ చేసేట‌ప్పుడే విక‌ట‌క‌వి సిరీస్‌లో మూడు ఎపిసోడ్స్‌కు మ్యూజిక్ చేశాను. ఆయ్ రిలీజ్ త‌ర్వాత మ‌రో మూడు ఎపిసోడ్స్‌ను కంప్లీట్ చేశాను. విక‌ట‌క‌వికి వ‌ర్క్ చేయ‌టం ఓ డిఫరెంట్ ఎక్స్‌పీరియెన్స్. నేను డైరెక్ట‌ర్స్ టెక్నిషియ‌న్.. వాళ్ల‌కి కావాల్సిన ఔట్‌పుట్ ఇవ్వ‌ట‌మే నా ప్ర‌యారిటీ.. అది ఏ జోన‌ర్ సినిమా అయినా, సిరీస్ అయినా మ్యూజిక్ చేయ‌టానికి సిద్ధ‌మే.→ ప్ర‌స్తుతం త్రీరోజెస్ సీజ‌న్ 2తో పాటు ఆహాలో మ‌రో రెండు వెబ్ సిరీస్‌ల‌కు వ‌ర్క్ చేస్తున్నాను. కొన్ని సినిమాల‌కు సంబంధించిన చ‌ర్చ‌లు జ‌రుగుతున్నాయి. త్వ‌ర‌లోనే వాటి వివ‌రాల‌ను తెలియ‌జేస్తాను.

విశ్వ కార్తికేయ, ఆయూషి పటేల్ హీరో, హీరోయిన్లుగా నటించిన చిత్రం ‘కలియుగం పట్టణంలో’. డిఫరెంట్ కాన్సెప్ట్‌తో రాబోతోన్న  ఈ చిత్రాన్ని నాని మూవీ వర్క్స్, రామా క్రియేషన్స్ బ్యానర్స్‌పై డాక్టర్ కందుల చంద్ర ఓబుల్ రెడ్డి నిర్మించారు. ఈ మూవీకి  రమాకాంత్ రెడ్డి దర్శకత్వం చూసుకున్నారు.  ప్రస్తుతం మూవీ విడుదల తేదీ దగ్గర పడుతుండటంతో ప్రమోషన్స్ ప్రారభించింంది చిత్రబృందం. ఈక్రమంలోనే ఈ చిత్రం నుంచి వరుసగా పాటలు రిలీజ్ చేస్తున్నారు. మదర్ సెంటిమెంట్, లవ్ సాంగ్స్ రిలీజ్ చేయగా మంచి రెస్పాన్స్ వచ్చింది. తాజాగా చంద్రబోస్ రాసిన గీతాన్ని మేకర్స్ రిలీజ్ చేశారు. కలియుగం పట్టణంలో టైటిల్ సాంగ్ ఇప్పుడు అందరినీ ఆకట్టుకుంటోంది. ఈ పాటను విజయ్ ప్రకాష్ ఆలపించారు. అజయ్ అరసాద అందించిన బాణీలు అందించారు. త్వరలోనే సినిమా రిలీజ్ డేట్‌ను ప్రకటించనున్నారు. 


 - అజయ్, యువ సంగీత దర్శకుడు
 లఘుచిత్రాల ప్రభంజనం సోషల్ మీడియాలో హల్‌చల్ చేస్తోంది. గీతరచయితలు, సంగీత దర్శకులు, లఘుచిత్ర దర్శకులు, హీరోహీరోయిన్‌లుగా... యువతీయువకులు అన్ని కళలలోనూ వారి ప్రతిభను ప్రదర్శిస్తున్నారు. ఈ కోవకు చెందిన యువకుడు అజయ్ అరసాడ. ఒకవైపు లఘుచిత్రాలకు సంగీతం అందిస్తూనే, మరోవైపు సినిమాలకూ సంగీతం సమకూరుస్తున్న హైదరాబాద్‌కు చెందిన అజయ్‌తో ఇంటర్వ్యూ...
  
  మీ గురించి...
  వైజాగ్ గీతమ్స్‌లో బిటెక్ (ఐటీ) చేసి, ప్రస్తుతం హైదరాబాద్‌లో ఒక సాఫ్ట్‌వేర్ కంపెనీలో పనిచేస్తున్నాను. నాన్నగారు నా చిన్నతనంలోనే పోయారు. అమ్మ వైజాగ్, ఐటిఐ కాలేజీలో ఆఫీస్ సబార్డినేట్‌గా పనిచేస్తున్నారు.
  
  సంగీతం మీద  ఆసక్తి ఎలా మొదలైంది?
  మా అక్కయ్య, మేనత్తలు వీణ వాయిస్తారు. మా తాతగారు హార్మోనియం వాయించేవారు. అలా నాకు తెలియకుండానే సంగీతం అంటే ఆసక్తి పెరిగింది.
  
  శాస్త్రీయ సంగీతం నేర్చుకున్నారా?
   ఎవరిదగ్గరా నేర్చుకోలేదు. కొన్నిరోజులు గిటార్ మీద వెస్ట్రన్ మ్యూజిక్ నేర్చుకున్నాను. కొన్ని బ్యాండ్స్‌లో వాయించేవాడిని.
  
  సంగీతం నేర్చుకోకుండా పాటలకు ట్యూన్స్ చేయడం సాధ్యమేనా?
  నాకు చిన్నప్పటి నుంచి కొంత స్వరజ్ఞానం ఉండటం వల్ల మ్యూజిక్ చేయగలుగుతున్నాను. అలాగే గిటార్ నేర్చుకోవడం కొంత ఉపయోగపడింది.
  
  లఘుచిత్రాలకు మీ సంగీతం గురించి చెప్పండి...
  ఈ విషయంలో నాకు ఫేస్‌బుక్ బాగా ఉపయోగపడింది. షార్ట్ ఫిల్మ్స్ తీసేవాళ్లు చాలామంది నన్ను ఆ విధంగానే కాంటాక్ట్ చేసి, వాళ్ల చిత్రాలకు నా చేత ట్యూన్ చేయించుకోవడం ప్రారంభించారు. ముందర ట్యూన్ ఇచ్చేయమంటారు. ఆ తరవాత వాళ్లు పాట రాసి ఇస్తుంటారు. ఇప్పటివరకు సుమారు పదిహేను లఘుచిత్రాలకు చేశాను. నాని అనే షార్ట్‌ఫిల్మ్ డెరైక్టర్ వల్ల నేను చాలామందికి పరిచయం అయ్యాను.
  
  మీరు చేసిన మొట్టమొదటి పాట, ఆ పాటకి లభించిన స్పందన...
  బాలభాస్కర్ రచించిన ‘నువ్వు పాడింది’ పాట నేను చేసిన మొట్టమొదటి గీతం. ‘లక్కీ’ షార్ట్‌ఫిల్మ్‌కి  చేసిన ‘కిన్నెరసాని’ పాటకి మంచి రెస్పాన్స్ వచ్చింది. ఆ పాట మెలడీలో చేశాను. ‘పవన్ కల్యాణ్ ప్రేమలో పడ్డాడు’ లఘుచిత్రానికి కూడా చేశాను.
  
  పాటలకు బాణీలు ఎలా కట్టుకుంటారు? ఎక్కువగా ఎటువంటి పాటలు చేస్తుంటారు?
  ముందుగా నా పాటలు గిటార్ మీద ట్యూన్ చేసుకుంటాను. ఆ తరవాత మిడీ కీ బోర్డ్, ప్లగిన్స్ జాయిన్ చేసి మొత్తం ట్యూన్ చేస్తుంటాను. ‘పవన్ కల్యాణ్ ప్రేమలో పడ్డాడు’ అనే లఘుచిత్రానికి ఒక మాస్ సాంగ్ చేశాను. అందులో కూడా సితార్ వంటి సంప్రదాయ సంగీతవాద్యాలు ఉపయోగించాను. నాకు ఎక్కువగా మెలడీ అంటే ఇష్టం.
  
  మీకు ఏయే సంగీత దర్శకులంటే ఇష్టం..?
  నాకు చిన్నప్పటి నుంచి మ్యూజిక్ అబ్జర్వేషన్ ఎక్కువ. దేవిశ్రీ పాటలు బాగా వినేవాడిని. ఆయన చిన్నవాడుగా అంటే 18 సంవత్సరాలకే సంగీత ప్రపంచంలోకి ప్రవేశించి, యూత్‌ఫుల్ మ్యూజిక్ ఇచ్చారు. ఆయన ట్యూన్స్ చాలా క్యాచీగా ఉంటాయి. దేవిశ్రీ చేసిన పాటలను విన్న ప్రతిపదిమందిలో ఏడుగురికి తప్పనిసరిగా ఆపాటలు నచ్చుతాయి.  ఆయన టాలెంట్ నన్ను బాగా ప్రభావితం చేసింది. దేవిశ్రీ మొదట్లో చేసిన 30 ఆల్బమ్స్ విని నేను సంగీత దర్శకుడిని అయ్యాను. ఇళయరాజా, ఎ.ఆర్.రెహమాన్ సంగీతం అంటే కూడా చాలా ఇష్టం.
  
  మీ లక్ష్యం...
   సస్పెన్స్, లవ్, కామెడీ... ఇలా  ఎన్నో చిత్రాల కు పాటలు చేశాను. నా దృష్టి అంతా రకరకాల పాటలు చేయడం మీదే ఉంది. మంచి సంగీత దర్శకుడిగా నిలబడాలన్నదే నా లక్ష్యం.
  
  - డా. వైజయంతి
  
  నాకు సంగీతం అంటే చిన్నప్పటి నుంచి ప్రాణం. నా చిన్నప్పుడు అంటే పదవ తరగతి చదువుతున్నప్పుడు ఒకసారి అనారోగ్యం కలిగింది. మా వాళ్లు నన్ను ‘‘నీకేం కావాలి?’’ అని అడిగితే నేను ‘నువ్వొస్తానంటే నేనొద్దంటానా’ చిత్రంలోని పాట కావాలని అడిగాను. నా మాటలకు అందరూ నవ్వుకున్నారు. ఆ తరవాత తెలిసింది... ఆ పాటకు సంగీతం చేసింది దేవిశ్రీప్రసాద్ అని. ఆ పాటకు ట్యూన్ చేసింది ఎవరో తెలియకుండానే నేను ఆయనకు ఏకలవ్య శిష్యుడిని అయ్యాను.
  - అజయ్