ముంబై: జర్మనీ లగ్జరీ కార్ల కంపెనీ ఆడి సూపర్ స్పోర్ట్స్ ఆర్‌ఎస్ 7 స్పోర్ట్‌బ్యాక్ మోడల్‌లో తాజా వెర్షన్‌ను సోమవారం మార్కెట్లోకి ప్రవేశపెట్టింది. ఈ కారు ధర రూ.1.40 కోట్లు(ఎక్స్ షోరూమ్, ముంబై, ఢిల్లీ). గత ఏడాది మార్కెట్లోకి తెచ్చిన ఆడి ఆర్‌ఎస్ 7 స్పోర్ట్‌బ్యాక్‌కు మంచి స్పందన లభించిందని, ఈ తాజా వెర్షన్‌లో 4 లీటర్ల వీ8 ఇంజిన్(ట్విన్ టర్బో వీ8 4.0)ను అమర్చామని కంపెనీ తెలిపింది. హైబ్రిడ్ అల్యూమినియం డిజైన్‌తో ఈ కారును రూపొందించామని ఫలితంగా ఉక్కుతో తయారు చేసే కారు కంటే ఇది 15 శాతం బరువు తక్కువగా ఉంటుందని పేర్కొంది.  ఈ కారులో ఆడి మ్యాట్రిక్స్ ఎల్‌ఈడీ హెడ్‌ల్యాంప్స్ ప్రత్యేక ఆకర్షణ అని వివరించారు. 100 కిమీ.కు 9.8 లీటర్ల ఇంధనం ఖర్చవుతుందని వివరించింది.