చాంద్రాయణగుట్ట: భవానీనగర్ పోలీస్‌స్టేషన్ పరిధిలో సంచలనం సృష్టించిన 12 ఏళ్ల బాలిక హత్య కేసు మిస్టరీ వీడింది. కోరిక తీర్చనందుకే మృతురాలి ఇంటి సమీపంలో ఉండే యువకుడు ఆమెను హత్య చేసినట్లు పోలీసులు నిర్ధారించారు.శుక్రవారం నిందితుడిని అరెస్ట్ చేసిన భవానీనగర్ పోలీసులు రిమాండ్‌కు తరలించారు. పురానీహవేళీలోని పాత కమిషనరేట్ కార్యాలయంలో సిటీ పోలీస్ కమిషనర్ ఎం.మహేందర్ రెడ్డి, దక్షిణ మండలం డీసీపీ వి.సత్యనారాయణ వివరాలు వెల్లడించారు. తలాబ్‌కట్టా ఆమన్‌నగర్-బి ప్రాంతానికి చెందిన నజ్మల్ హుస్సేన్, నసీం బేగం కుమార్తె హుదా బేగం(12) ఈ నెల 11వ తేదీన మాంసం తెచ్చేందుకు బయటికి వెళ్లి తిరిగి రాకపోవడంతో ఆందోళనకు గురైన కుటుంబ సభ్యులు 12వ తేదీ భవానీనగర్ పోలీస్‌స్టేషన్‌లో ఫిర్యాదు చేశారు.
 
 వారు కేసు నమోదు చేసుకుని బాలిక ఆచూకీ కనుగొనేందుకు ప్రత్యేక బృందాలను ఏర్పాటు చేశారు. ఇదిలా ఉండగా ఈ నెల 14వ తేదీ అదే ప్రాంతంలో నిర్మాణంలో ఉన్న ఓ ఇంటి సంప్‌లోని దుర్వాసన వస్తుండటాన్ని గుర్తించిన స్థానికులు పోలీసులకు సమాచారం అందించగా, వారు మృతదేహాన్ని వెలికి తీసి మృతురాలు హుదాబేగంగా గుర్తించి, హత్య కేసు నమోదు చేశారు. ఈ కేసును సవాల్‌గా తీసుకున్న డీసీపీ వి.సత్యనారాయణ వివిధ ప్రాంతాల్లోని సీసీ కెమెరాలను పరిశీలించగా 11వ తేదీ రాత్రి మాంసం తీసుకుని ఇంటికి తిరిగి వెళుతున్న హుదా బేగాన్ని ఓ యువకుడు అనుసరించడాన్ని గుర్తించారు. ఈ వీడియోను బస్తీ వాసులకు చూపగా వారు నిందితుడిని గుర్తించలేకపోయారు. అయితే అదేరోజు సాయంత్రం గౌలిపురా మార్కెట్‌లో ఉన్న ‘మాత వైన్స్’ వద్ద మద్యం కొనుగోలు చేస్తున్న వ్యక్తి వేసుకున్న చొక్కా... బాలికను వెంబడించిన యువకుడి చొక్కా ఒకేలా ఉన్నట్లు గుర్తించి ఆ వీడియోను బస్తీ వాసులకు చూపించగా అతను సయ్యద్ షౌకత్ కుమారుడు దస్తగిర్(22)గా గుర్తించారు. పోలీసులు తన కొరకు గాలిస్తున్నట్లు తెలుసుకున్న దస్తగిర్ కర్ణాటక కు పారిపోయాడు. పోలీసులు అక్కడికి వెళ్లగా అతను నగరానికి తిరిగి రావడంతో శుక్రవారం అతడిని అరెస్ట్ చేసి రిమాండ్‌కు తరలించారు. నిందితుడితో పాటు మద్యం కొనుగోలు చేసిన యువకుడిపై కూడా పోలీసులు అనుమానంతో దర్యాప్తు చేస్తున్నారు.
 
  కోరిక తీర్చనందుకే..
  హుదాబేగం ఇంటి సమీపంలో నివసిస్తున్న దస్తగిర్ ఆమెపై ఎప్పటి నుంచో కన్నేశాడు. ఈ క్రమంలో 11వ తేదీ మాంసం తీసుకొని ఇంటికి వస్తుండగా ఆమెను వెంబడించి నిర్మాణంలో ఉన్న ఇంట్లోకి లాక్కెళ్లాడు. బాలికపై అత్యాచారానికి ప్రయత్నించగా, ఆమె ప్రతిఘటిస్తూ కేకలు వేయడంతో ఎవరైనా చూస్తారన్న భయంతో చున్నీతో మెడకు బిగించి హత్య చేశాడు. అనంతరం మృతదేహాన్ని  సంప్‌లో పడేసినట్లు కమిషనర్ వివరించారు.  సమావేశంలో డీసీపీ సత్యనారాయణతో పాటు అదనపు డీసీపీ కె.బాబురావు, టాస్క్‌ఫోర్స్ అదనపు డీసీపీ ఎన్.కోటిరెడ్డి, సంతోష్‌నగర్ ఏసీపీ శ్రీనివాసులు, ఇన్‌స్పెక్టర్ శ్రీనివాసారావు తదితరులు పాల్గొన్నారు.
  
 సీసీ కెమెరాలు ఏర్పాటు చేసుకోవాలి: కమిషనర్.
  ప్రతి 50 మీటర్లకు ఒకటి చొప్ను సీసీ కెమెరాలు ఏర్పాటు చేసుకోవాలని నగర పోలీస్ కమిషనర్ ఎం.మహేందర్ రెడ్డి సూచించారు. వ్యాపార సముదాయాలతో పాటు ప్రతి ఇంటి పరిసరాల్లో కెమెరాలు ఏర్పాటు చేసుకోవాల్సిన అవసరం ఉందన్నారు. భవానీనగర్ ఘటన దురదృష్టకరమని, భవిష్యత్తులో ఇలాంటి ఘటనలు పునరావృతం కాకుండా నిఘా ఏర్పాటు చేస్తామన్నారు.
  


 
  వారంలో ఇద్దరుబాలికలతో అరబ్‌షేక్ పెళ్లి
 
  షేక్ సహా 12 మంది నిందితుల అరెస్టు
 
 హైదరాబాద్, న్యూస్‌లైన్: పేదరికాన్ని ఆసరాగా చేసుకొని వారం వ్యవధిలో ఇద్దరు బాలికలను పెళ్లి చేసుకున్నాడో అరబ్‌షేక్. ఈ కేసులో ప్రధాన నిందితుడు షేక్‌తో పాటు ఇతనికి సహకరించిన 11మందిని భవానీనగర్ పోలీసులు అరెస్టు చేశారు. దక్షిణ మండలం డీసీపీ సర్వశ్రేష్ట త్రిపాఠీ కథనం ప్రకారం.. ఒమన్‌కి చెందిన అల్ మదసరీ రాషేద్ మసూద్ రషీద్ (61) టూరిస్ట్ వీసాపై ఈ నెల 5వ తేదీన నగరానికి వచ్చాడు. బంజారాహిల్స్ రోడ్డు నెం.11లోని పటేల్ అవెన్యూలో గది అద్దెకు తీసుకున్నాడు. పాతబస్తీకి చెందిన బ్రోకర్ల ద్వారా తలాబ్‌కట్టకు చెందిన బాలిక (14)ను పెళ్లి చేసుకునేందుకు ఒప్పందం చేసుకున్నాడు.
  
 బ్రోకర్లు మహ్మద్ జాఫర్ అలీ, కరీమున్నీసా బేగం, అమీనా బేగం, మహ్మద్ ఉస్మాన్‌లు బాలిక తల్లి రబియా బేగం, పెంపుడు తండ్రి ఖాజా పాషాలను ఒప్పించి వారికి రూ.60వేలు అందించారు. ఈ నెల 9వ తేదీన ఖాజీ మహ్మద్ గౌస్ మోయియుద్దీన్ సమక్షంలో బాలికకు అరబ్ షేక్‌తో వివాహం జరిపించారు. అయితే, సదరు బాలిక అదేరోజు తప్పించుకొని తన మామకు సమాచారం ఇచ్చింది. ఆయన భవానీనగర్ పోలీస్‌స్టేషన్‌లో ఫిర్యాదు చేశారు. కేసు నమోదు చేసిన పోలీసులు.. షేక్ అద్దెకుంటున్న గదిపై దాడి చేశారు. సదరు షేక్ చెరలో మరో బాలిక ఉండటాన్ని పోలీసులు కనుగొన్నారు.
  
 నిందితుడిని అదుపులోకి తీసుకొని విచారించగా.. శివరాంపల్లికి చెందిన బాలిక (15)ను ఈనెల 15న పెళ్లి చేసుకున్నానని వెల్లడించాడు. హసీనాబేగం, షాకీరా బేగంలు బ్రోకర్లుగా వ్యవహరించారని చెప్పాడు. ఖాజీ జాహెద్ అలీ హైదర్ సమక్షంలో పెళ్లి చేసుకొని బాలిక తల్లి షైనాజ్ బేగంకు రూ. 80వేలు చెల్లించానని తెలిపాడు. పోలీసులు రెండో బాధితురాలైన బాలికను చికిత్స నిమిత్తం ఆసుపత్రికి తరలించారు. అరబ్ షేక్ నుంచి పాసుపోర్టుతో పాటు రూ.5వేల నగదు, 2,725 డాలర్లు, 120 రియాల్స్, మూడు సెల్‌ఫోన్ల స్వాధీనం చేసుకున్నారు.