న్యూయార్క్/ ముంబై: సెకండ్ వేవ్ లో భాగంగా అమెరికా, యూరోపియన్ దేశాలలో కరోనా కేసులు వేగంగా విస్తరిస్తుండటంతో బంగారం, వెండి వంటి విలువైన లోహాలకు డిమాండ్ పెరిగింది. ఓవైపు డాలరు ఇండెక్సుతోపాటు, 10 ఏళ్ల ట్రెజరీ ఈల్డ్స్ బలపడినప్పటికీ పసిడికి డిమాండ్ కనిపించింది. దీంతో గత నాలుగు రోజులుగా క్షీణ పథంలో పయనిస్తున్న బంగారం, వెండి ధరలు శుక్రవారం యూ టర్న్ తీసుకున్నాయి. స్వల్ప ఆటుపోట్లను చవిచూసినప్పటికీ దేశ, విదేశీ మార్కెట్లో చివరికి లాభాలతో ముగిశాయి. సాధారణంగా సంక్షోభ పరిస్థితులు నెలకొన్నప్పుడు కేంద్ర బ్యాంకులు, ఇన్వెస్టర్లు బంగారంలో పెట్టుబడులకు ఆసక్తి చూపుతుంటాయని, దీంతో ట్రేడర్లు తిరిగి బంగారం, వెండి ఫ్యూచర్స్ లో కొనుగోళ్లకు దిగారని విశ్లేషకులు పేర్కొన్నారు. నష్టాలకు చెక్.. దేశీయంగా నాలుగు రోజుల నష్టాలకు చెక్ పెడుతూ శుక్రవారం బంగారం, వెండి ధరలు పుంజుకున్నాయి. ఎంసీఎక్స్‌లో 10 గ్రాముల బంగారం రూ. 268 లాభపడి రూ. 50,260 వద్ద ముగిసింది. ఇది డిసెంబర్‌ ఫ్యూచర్స్‌ ధర కాగా.. ఇంట్రాడేలో రూ. 50,435 వద్ద గరిష్టాన్ని తాకింది. రూ. 49,857 వద్ద కనిష్టానికీ చేరింది. ఇక వెండి కేజీ డిసెంబర్‌ ఫ్యూచర్స్‌ సైతం రూ. 750 ఎగసి రూ. 62,260 వద్ద స్థిరపడింది. తొలుత రూ. 62,750 వద్ద గరిష్టానికి చేరిన వెండి తదుపరి రూ. 61,560 వరకూ వెనకడుగు వేసింది. లాభాలతో న్యూయార్క్‌ కామెక్స్‌లో శుక్రవారం బంగారం, వెండి ధరలు సానుకూలంగా ముగిశాయి. పసిడి ఔన్స్‌(31.1 గ్రాములు) 0.6 శాతం బలపడి 1,872 డాలర్ల ఎగునవ నిలిచింది. స్పాట్‌ మార్కెట్లోనూ 0.25 శాతం లాభంతో 1,871 డాలర్లకు చేరింది. వెండి 1.4 శాతం జంప్ చేసి ఔన్స్ 24.49 డాలర్ల వద్ద స్థిరపడింది. 


 - ముంబై బులియన్ మార్కెట్లో రూ. 29,720
 
 ముంబై: అంతర్జాతీయంగా సానుకూల సెంటిమెంటు నేపథ్యంలో ఇటు దేశీయంగా కూడా పసిడి పరుగులు తీస్తోంది. ఆభరణాల స్టాకిస్టులు, ట్రేడర్ల కొనుగోళ్ల మద్దతుతో పసిడి పరుగులు తీస్తోంది మళ్లీ రూ. 30,000కు చేరువయ్యింది. ముంబై బులియన్ మార్కెట్లో మంగళవారం మేలిమి బంగారం పది గ్రాముల ధర రూ. 270 పెరిగి రూ. 29,720 వద్ద, ఆభరణాల బంగారం రేటు కూడా అంతే పెరుగుదలతో రూ. 29,580 వద్ద ముగిసింది. 2014 మే 12 తర్వాత పసిడి ధరలు ఈ స్థాయికి ఎగియడం దాదాపు 22 నెలల తర్వాత ఇదే ప్రథమం.
 మరోవైపు, మల్టీ కమోడిటీ ఎక్స్చేంజీలో (ఎంసీఎక్స్) ఫ్యూచర్స్ ట్రేడింగ్‌లో పసిడి రేటు ఒక దశలో రూ. 30,161 స్థాయిని తాకింది. కానీ కడపటి వార్తలందే సరికి మళ్లీ తగ్గి.. రూ. 29,846 వద్ద ట్రేడవుతోంది. ఇక, స్పెక్యులేషన్ ఊతంతో ముంబై బులియన్ మార్కెట్లో వెండి రేటు సైతం కేజీకి రూ. 700 పెరిగి రూ. 38,350 వద్ద క్లోజయ్యింది. అంతర్జాతీయంగా చూస్తే చైనా వాణిజ్య గణాంకాలు అంచనాలను అందుకోలేకపోవడంతో పసిడిపై సెంటిమెంటు మరింతగా మెరుగుపడింది. దీంతో 13 నెలల గరిష్టానికి ధర ఎగిసింది. న్యూయార్క్ ట్రేడింగ్‌లో ఔన్సు (31.1 గ్రాములు) పసిడి రేటు 1,279 డాలర్ల పైకి ఎగిసింది. కానీ తర్వాత 1,262 డాలర్ల స్థాయికి క్షీణించి.. కడపటి వార్తలందే సరికి 1,265.70 వద్ద ట్రేడవుతోంది.