బీజింగ్‌: తైవాన్‌ జలసంధిపై క్షిపణులతో విరుచుకుపడింది చైనా. ఈ చర్య అంతర్జాతీయ సమాజంలో కలకలం సృష్టించింది. చైనా సైన్యంపై తైవాన్ సమీపంలో బాంబులు కురిపించిన వీడియోనూ ఆ దేశ అధికారిక మీడియా సీసీటీవీ విడుదల చేసింది. ఈ దృశ్యాలు ప్రపంచదేశాలను విస్మయానికి గురిచేశాయి.  డాంగ్‌ఫెండ్‌ క్షిపణులను కురిపించి తమ సేనలు అనుకున్న ఫలితాలు సాధించాయని చైనా సైన్యం ప్రకటించింది. సైనిక క్రీడల్లో భాగంగా చైనా తన అధునాతన యుద్ధవిమాన వాహక నౌక, అణ్వస్త్ర సామర్థ్య జలాంతర్గామిలను తైవాన్‌ జలసంధిలోకి ప్రవేశపెట్టింది. తైవాన్‌లోని జపాన్‌కు చెందిన ఎక్స్‌క్లూజివ్‌ ఎకనమిక్‌ జోన్‌ సమీపంలోనూ క్షిపణులు పడ్డాయి. ‘మేం ఏం చెప్తామో అదే చేస్తాం’ అని చైనా రక్షణశాఖ అధికార ప్రతినిధి టాన్‌ కెఫీ వ్యాఖ్యానించారు. క్షిపణి పరీక్షలంటూ చైనా రాకెట్లను ప్రయోగించడం వారంలో ఇది రెండోసారి కావడం గమనార్హం.  విమాన సర్వీసులు రద్దు  చైనా సైన్యం క్షిపణి ప్రయోగాల నేపథ్యంలో అప్రమత్తమై తైవాన్‌ తన పౌర విమానాల రాకపోకలను వెనువెంటనే ఆపేసింది. రాజధాని తైపేలోని ఎయిర్‌పోర్ట్‌ నుంచి దాదాపు 50 విమాన సర్వీస్‌లు రద్దయ్యాయి. ప్రపంచవిపణిలో అత్యంత కీలకమైన ప్రాసెస్‌ చిప్స్‌ల సముద్రమార్గ రవాణా కొనసాగుతోందా లేదా అనే దానిపై సందిగ్ధత నెలకొంది. చైనా సైనిక డ్రిల్స్‌ చేస్తున్న అదే ప్రాంతానికి సమీపంలోకి అమెరికా పీ–8ఏ పోసిడాన్‌ గస్తీ విమానం, ఎంహెచ్‌–60ఆర్‌ జలాంతర్గామి విధ్వంసక హెలికాప్టర్‌లు వచ్చి ఉద్రిక్తతలను మరింత పెంచాయని సౌత్‌ చైనా మార్నింగ్‌ పోస్ట్‌ ఒక కథనంలో పేర్కొంది. తైవాన్‌ సైతం మిరాజ్, ఎఫ్‌–5 యుద్ధ విమానాలతో చైనా దళాలున్న చోటుపై పర్యవేక్షణకు వెళ్లి వచ్చాయని స్థానిక మీడియా వెల్లడించింది. చైనా చర్యను చట్టవిరుద్ధ, బాధ్యతారాహిత్య చర్యగా తైవాన్‌ అభివర్ణించింది.  తైవాన్‌పై నోరు మెదపని పెలోసీ  తైవాన్‌ పర్యటనతో ఉద్రిక్త పరిస్థితులు నెలకొనేలా చేసిన పెలోసీ.. దక్షిణ కొరియా పర్యటనలో ఆ విషయాన్ని ప్రస్తావించలేదు. ద.కొరియా పార్లమెంట్‌ స్పీకర్‌ కిమ్‌ జిన్‌ ప్యోను పెలోసీ కలిసినా తైవాన్‌ అంశాన్ని బహిరంగంగా ప్రస్తావించలేదు. ఉ.కొరియా ‘అణు’ ప్రమాదంపై చర్చించామని జిన్‌ చెప్పారు. చదవండి: పంజా విసిరిన చైనా.. అదే జరిగితే ప్రపంచానికే ముప్పు!

సాక్షి, న్యూఢిల్లీ : భారత్‌, రష్యాలు ప్రతిష్టాత్మకంగా రూపొందించిన బ్రహ్మోస్‌ క్షిపణిని ఎదుర్కొనే సామర్థ్యం చైనా తయారు చేసిన హెచ్‌డీ‌-1 క్రూయిజ్‌ క్షిపణికి ఉందని ఆ దేశానికి చెందిన మైనింగ్‌ కంపెనీ ‘గ్వాంగ్‌డాంగ్‌ హోంగ్డా బ్లాస్టింగ్‌’ వెల్లడించింది. ఎయిర్‌ షో చైనా-2018 కార్యక్రమంలో సదరు కంపెనీ ఈ కీలక వ్యాఖ్యలు చేసింది. గ్లోబల్‌ టైమ్స్‌ కథనం ప్రకారం.. అక్టోబర్‌లో టెస్టింగ్‌ పూర్తి చేసుకున్న హెచ్‌డీ-1 క్షిపణి 2.2 నుంచి 3.5 మాక్‌ నెంబర్‌ వేగంతో దూసుకెళ్లి 290 కిలోమీటర్ల దూరంలోని లక్ష్యాలను ఛేదిస్తుంది. 2,200 కిలోల బరువుతో.. సముద్ర మట్టానికి అత్యల్పంగా 5-10 మీటర్ల ఎత్తులో, అత్యధికంగా 15 కిలోమీటర్ల ఎత్తులో ప్రయాణించగలుగుతుంది.  అయిదు నిముషాల్లోనే సిద్ధం.. అయిదు నిముషాల్లో హెచ్‌డీ-1ను సిద్ధం చేయొచ్చని గ్లోబల్‌ టైమ్స్‌ ప్రచురించింది. ఒకే ఒక బటన్‌ను నొక్కడం వల్ల దీనిని ఆపరేట్‌ చేయవచ్చని తెలిపింది. భూ ఉపరితలం, సముద్ర తలం నుంచి దీనిని ప్రయోగించవచ్చు. భూమిపై, సముద్రంలోని లక్ష్యాలను ఛేదిస్తుంది. ఒక లాంచ్‌ వెహికల్‌పై 6 హెచ్‌డీ-1 మిస్సైల్స్‌ లోడ్‌ చేయవచ్చు. ఒక చోటు నుంచి మరో చోటుకు వీటిని తరలించడం చాలా సులభం. ఇక.. హెచ్‌డీ-1 క్షిపణికి వేరియంట్‌గా హెచ్‌డీ-1ఏ ను కూడా చైనా ఆవిష్కరించింది. హెచ్‌డీ-1ఏను ఫైటర్‌ జెట్లు, బాంబర్ల ద్వారా గాల్లో నుంచి కూడా లాంచ్‌ చేయొచ్చు. మన బ్రహ్మోస్‌.. బ్రహ్మోస్‌ మధ్య స్థాయి సూపర్‌సోనిక్‌ క్రూయిజ్‌ క్షిపణి. ఇది గాలి కన్నా దాదాపు మూడు రెట్ల వేగంతో ప్రయాణించి లక్ష్యాల్ని ఛేదిస్తుంది. గాలి, నీరు, భూ ఉపరితలం నుంచి ప్రయోగించచ్చు. మాక్‌ నెంబర్‌ 2.8 నుంచి 3 వేగంతో ప్రయాణించి 290 కిలోమీటర్ల దూరంలోని లక్ష్యాలను ఛేదిస్తుంది. 400 కిలో మీటర్ల దూరంలో ఉన్న లక్ష్యాలను సైతం బ్రహ్మోస్‌ ఛేదించగలుగుతుంది. ఇటీవల దీనిలో వేగాన్ని పెంచారు. మాక్‌ నెంబర్‌ 5 వరకు బ్రహ్మోస్‌ ప్రయాణించగలదు. దాదాపు 2,500 నుంచి 3000 కిలోల బరువు మోయగలవు. వీటికి 8.4 మీటర్ల పొడవుతో 200 నుంచి 300 కిలోల వార్‌హెడ్‌ ఉంటుంది. సముద్ర లక్ష్యాల్ని ఛేదించి యుద్ధ నౌకల్ని చీల్చి చెండాడే క్షిపణుల్లో మనబ్రహ్మోసే ఇప్పటివరకు శక్తిమంతమైనది కావడం విశేషం. 2006లో బ్రహ్మోస్‌ భారత రక్షణ రంగంలోకి అడుగు పెట్టింది. భారత ఆర్మీ, వైమానిక రంగాలకు సేవలందిస్తోంది. ఓ విశ్లేషకుడి అభిప్రాయం.. బీజింగ్‌కు చెందిన మిలటరీ విశ్లేషకుడు వీ డాంగ్జూ.. హెచ్‌డీ-1పై తన అభిప్రాయాలు వెల్లడించారు. హెచ్‌డీ-1 క్షిపణి బ్రహ్మోస్‌ వెర్షన్లను అధిగమించిందని అన్నారు. ఇది యుద్ధ రంగంలోకి దిగితే శత్రువుల యుద్ధ విమానాలు నేలకూలక తప్పదని అన్నారు.


 బీజింగ్: నేల నుంచి గాలిలోకి ప్రయోగించే మూడో తరం క్షిపణి వ్యవస్థను చైనా సిద్ధం చేస్తోంది. తమకు ముప్పుగా భావించే దక్షిణ కొరియాలో మోహరించిన అమెరికా అధునాతన క్షిపణి వ్యతిరేక వ్యవస్థను ఎదుర్కొనేందుకు చైనా ఆర్మీ ఈ క్షిపణులకు తుది మెరుగులు దిద్దుతోంది. ఈ కొత్తతరం క్షిపణులు తమ దాడిచేసే సామర్థ్యాన్ని పెంచుతాయని చైనా వైమానిక అధికారి షెన్ జింకే తెలిపారు. ఇవి సుదూర, ఎత్తయిన లక్ష్యాలను ఛేదించగలవని  చెప్పారు. వ్యూహాత్మక హెచ్చరికలు, గాల్లో దాడులు, విమాన, క్షిపణి వ్యతిరేక తదితర విభాగాలను ఉన్నతీకరిస్తామని ఆయన అన్నారు.
 
 చైనా సైన్యం స్వదేశీ, నేలపై నుంచి పనిచేసే రక్షణ, క్షిపణి వ్యతిరేక వ్యవస్థలను వాడుతుందని చైనా మార్నింగ్ పత్రిక వెల్లడించింది. ఉత్తర కొరియా అణు ఆయుధాల నుంచి రక్షణ కొరకే అమెరికా అభివృద్ధి చేసిన క్షిపణి వ్యతిరేక వ్యవస్థను మోహరించామని దక్షిణ కొరియా ప్రకటించింది. ఈ వాదనలను చైనా రక్షణ శాఖ కొట్టిపారేసింది. మూడో దేశాన్ని లక్ష్యంగా చేసుకోకుండా అణు ఆయుధాలను ఎదుర్కోవడానికి దక్షిణ కొరియా చెబుతున్నవి కుంటి సాకులని ఆరోపించింది.