దేశంలో చాలా కంపెనీలు వర్క్ ఫ్రమ్ హోమ్ (work from home) విధానానికి స్వస్తి పలుకుతున్నాయి. దీంతో ఉద్యోగులు ఆఫీసుల బాట పడుతున్నారు. ఈ క్రమంలో ప్రముఖ రేటింగ్‌ ఏజెన్సీ క్రిసిల్‌ ఓ ఆసక్తికర నివేదికను విడుదల చేసింది.  ప్రభుత్వం ఓ వైపు పన్నులు పెంచకపోవడం, మరోవైపు ఉద్యోగులు ఆఫీసులకు వస్తున్న నేపథ్యంలో సిగరెట్ల అమ్మకాలు (Cigarette sales) పెరిగే అవకాశం ఉందని క్రిసిల్‌ రేటింగ్స్‌ (Crisil Ratings) అంచనా వేసింది. ఈ ఆర్థిక సంవత్సరంలో సిగరెట్ల డిమాండ్‌ 7 నుంచి 9 శాతం పెరిగే అవకాశం ఉందని వెల్లడించింది. సిగరెట్ల డిమాండ్‌ పెరిగితే అందుకు అనుగుణంగా అమ్మకాలు కూడా పెరగనున్నాయి. కోవిడ్ మహమ్మారి తర్వాత దేశంలో సిగరెట్ అమ్మకాలు అమాంతం పెరిగాయి. 2022లో సిగరెట్ అమ్మకాలు అంతకు ముందు రెండు ఆర్థిక సంవత్సారాలతో పోలిస్తే 18 శాతం పెరిగాయి. ఇక ఈ ఆర్థిక సంవత్సరం క్రిసిల్‌ రేటింగ్స్ విశ్లేషణ ప్రకారం 7 నుంచి 9 శాతం పెరుగుదలను చూడవచ్చు. ఇదే పరిస్థితి కొనసాగి ప్రభుత్వం పెద్ద ఎత్తున పన్నును పెంచకపోతే సగటున ఏడాదికి 5 శాతం సిగరెట్ విక్రయాలు పెరిగే అవకాశం ఉంది. ఆఫీసులో పనికి, సిగరెట్ల అమ్మకాలకు సంబంధమేంటి? ఆఫీసుల్లో పనిచేసే ఉద్యోగుల్లో పని ఒత్తిడి కారణంగా చాలా మందికి సిగరెట్‌ అలవాటు ఉంటుంది. ఇక ఐటీ కంపెనీల్లో పనిచేసేవారి గురించి ప్రత్యేకంగా చెప్పాల్సిన అవసరం లేదు. ఆఫీసులో ఉద్యోగులు సిగరెట్ కోసం బ్రేక్ తీసుకోవడం మామూలే. అలా బయటకు వచ్చి రోడ్డు పక్కనున్న టీ స్టాల్స్‌, బడ్డీ కొట్ల వద్ద చాలా మంది టీలు, సిగరెట్‌లు తాగుతుంటారు. ఆఫీసులకు వచ్చి పనిచేసేవారి సంఖ్య గతేడాది 40 శాతం ఉండగా ఈ ఆర్థిక సంవత్సరం 65 నుంచి 70 వరకు ఉండవచ్చని అంచనా.

‘అన్నా.. ఏక్‌ గుడాన్‌గరమ్‌’.. ‘ప్యారిస్‌ ఉందా?’ .. వినడానికి విచిత్రంగా ఉన్న ఈ పేర్లు విదేశీ సిగరెట్లవి. పట్నం నుంచి పల్లె దాకా ఇవిప్పుడు గుప్పుమంటున్నాయి. రూ.20కే ఒక ప్యాకెట్‌ లభించడం, బీడీ కట్ట కంటే తక్కువ ధర కావడంతో పాటు ‘విదేశీ బ్రాండ్‌’ఇమేజ్‌పై మోజుతో యువత, విద్యార్థులు వీటికి బానిసలవుతున్నారు. హైదరాబాద్‌తో పాటు తెలంగాణలోని మారుమూల పల్లెల్లోనూ వీటి అమ్మకాలు జోరుగా సాగుతున్నాయి. నిజానికి పొగాకు ఉత్పత్తుల ప్యాకెట్లపై 85 శాతం హానికరమనే బొమ్మలు ఉండాలి.. భారీగా పన్నులు కూడా చెల్లించాలి. ఇలాంటివన్నీ ఎగ్గొడుతూ కొన్ని ముఠాలు నిషేధిత విదేశీ సిగరెట్లను అడ్డదారిలో తరలిస్తూ తక్కువ ధరకే అమ్మి సొమ్ము చేసుకుంటున్నాయి. – సాక్షి, హైదరాబాద్‌/సాక్షి నెట్‌వర్క్‌ తెలంగాణకు అక్రమంగా రవాణా అవుతున్న సిగరెట్లలో డజరమ్‌ బ్లాక్, గుడాన్‌ గరమ్‌ బ్రాండ్లు ప్రధానమైనవి కాగా, ప్యారిస్, బడిస్కార్‌ వంటి మరో పది వరకు బ్రాండ్లు ఉన్నాయి. సాధారణ సిగరెట్లకు భిన్నమైన ఫ్లేవర్స్‌ గల ఇవి వేర్వేరు మార్గాల్లో ఇక్కడకు చేరుతున్నాయి. ఇండోనేషియా తయారీ బ్రాండ్లు దుబాయ్‌ లేదా బంగ్లాదేశ్‌ మీదుగా హైదరాబాద్‌కు.. అక్కడి నుంచి తెలంగాణలోని వివిధ జిల్లాలకు రవాణా అవుతున్నాయి. ముఖ్యంగా ఇటు హైదరాబాద్‌ బేగంబజార్, అటు కర్ణాటకలోని బీదర్‌ ప్రాంతాలు విదేశీ సిగరెట్ల అక్రమ రవాణా స్థావరాలుగా ఉన్నాయి. ఉమ్మడి ఆదిలాబాద్, నిజామాబాద్‌ జిల్లాలకు సరిహద్దుల్లో ఉన్న మహారాష్ట్ర ప్రాంతాల నుంచీ ఇవి రవాణా అవుతున్నాయి. మెదక్, రంగారెడ్డి, నల్లగొండ, మహబూబ్‌నగర్‌ తదితర జిల్లాలకు హైదరాబాద్‌ నుంచే నేరుగా చేరుతున్నాయి. ఇంకా చైనా, మలేషియా, స్విట్జర్లాండ్, సౌత్‌ కొరియా దేశాల నుంచి కూడా వివిధ మార్గాల్లో విదేశీ సిగరెట్లు హైదరాబాద్‌కు స్మగ్లింగ్‌ చేస్తున్నారు. ఆయా ప్రాంతాలను బట్టి విదేశీ బ్రాండ్ల పేరుతో రూ.10, రూ.15, రూ.20కి ఒక్కో సిగరెట్‌ విక్రయిస్తుండగా, కొన్ని బ్రాండ్ల సిగరెట్‌ ప్యాకెట్‌ రూ.20కే అమ్ముతున్నారు. మొదట్లో డైపర్ల పేరుతో సముద్ర మార్గంలో కంటైనర్ల ద్వారా చేరిన ఇవి.. ఆ తరువాత ఇంజనీరింగ్‌ వస్తువులు, కంప్యూటర్‌ స్పేర్‌ పార్ట్స్‌ పేరుతో వాయు మార్గాల్లో బంగ్లాదేశ్‌కు, అక్కడి నుంచి రోడ్డు మార్గంలో పశ్చిమ బెంగాల్‌ ద్వారా  హైదరాబాద్‌కు చేరుతున్నాయి.  పన్నులు ఎగ్గొట్టి.. విదేశీ సిగరెట్ల దిగుమతిపై ప్రభుత్వం దిగుమతి సుంకం (కస్టమ్స్‌ డ్యూటీ) భారీగా విధిస్తోంది. 69 నుంచి 90 మిల్లీమీటర్ల పొడవుండే సిగరెట్లలో ఒక్కో దానికీ ఒక్కో రకమైన డ్యూటీ ఉంటుంది. మొత్తమ్మీద ఒకటికి ఒకటిన్నర శాతం పన్ను విధిస్తారు. అంటే రూ.10 ఖరీదైన సిగరెట్‌ను దిగుమతి చేసుకుంటే దానిపై డ్యూటీనే రూ.15 ఉంటుంది. ఈ రకంగా దాని ఖరీదు రూ.25కు చేరుతుంది. ఇదంతా ఎగ్గొట్టడానికే ముఠాలు అక్రమ రవాణాకు పాల్పడుతున్నాయి. రాష్ట్రంలోని వివిధ ప్రాంతాల్లో ఉన్న హోల్‌సేలర్ల ద్వారా వీటిని మార్కెట్లోకి వదులుతున్నాయి. విదేశాల నుంచి దిగుమతయ్యే వస్తువులను ఇన్‌ల్యాండ్‌ కంటైనర్‌ డిపో, ఎయిర్‌కార్గో కార్యాలయాల నుంచి  తీసుకోవడానికి అనేక క్లియరెన్స్‌లు అవసరం. దీంతో సిగరెట్ల అక్రమ రవాణా ముఠాలు కస్టమ్స్‌ తరఫున పని చేసే ఏజెంట్లు సహా అనేక మందితో మిలాఖత్‌ అవుతూ అవసరమైన క్లియరెన్స్‌ పత్రాలను బోగస్‌వి సృష్టిస్తున్నాయి. ఆరోగ్యానికి హాని చేస్తాయి.. విదేశీ సిగరెట్లు ఎక్కువసేపు కాలుతున్నాయని, టేస్ట్‌ భిన్నంగా ఉంటోందని అంటున్నారు. వీటిలో ఏ తరహా పొగాకు వాడుతున్నారనేది నిర్ధారణ కాలేదు. ఆ పొగాకు ఇక్కడి పరిస్థితులకు అనుకూలమో కాదో చెప్పలేమని వైద్యులు చెబుతున్నారు. నిబంధనల ప్రకారం దిగుమతి అయ్యే సిగరెట్లను ఆయా పోర్టులు, విమానాశ్రయాల్లో ఉండే కస్టమ్స్‌ హెల్త్‌ ఆఫీసర్లు పరీక్షించి సర్టిఫై చేస్తారని, అక్రమ రవాణాలో ఆ అవకాశం లేకపోడంతో విపణిలోకి వెళ్లిపోతున్నాయని అంటున్నారు. నగరంతో పాటు జిల్లాల్లోని పల్లెల్లో విద్యార్థులు, యువత, కూలీలు విదేశీ సిగరెట్లు ఎక్కువగా వినియోగిస్తున్నారు. పట్టణాల్లోని కళాశాలలు ఎక్కువగా ఉన్నచోట్ల వీటి అమ్మకాలు జోరుగా సాగుతున్నాయి. కొన్ని పాన్‌షాపుల్లో తెలిసిన వారికే వీటిని గుట్టుగా విక్రయిస్తుండగా, చాలాచోట్ల బహిరంగంగానే అమ్మకాలు జరుగుతున్నాయి. కాగా, మెదక్‌ మరికొన్ని జిల్లాల్లో విదేశీ బ్రాండ్‌ పేరుతో లోకల్‌ మాల్‌ను కొందరు అమ్మి సొమ్ముచేసుకుంటున్నారు.


 సిగరెట్ వాడకాన్ని పూర్తిగా నియంత్రించాలని రష్యా నిర్ణయించింది. పూర్తిగా రద్దు చేసే నేపథ్యంలో 2015 తర్వాత పుట్టిన వారికి సిగరెట్లు విక్రయాలు చేపట్టకుంటా రద్దు చేస్తున్నట్టు రష్యా ఆరోగ్య మంత్రిత్వ శాఖ ప్రకటించింది. రష్యా ఆరోగ్య మంత్రిత్వ శాఖ తీసుకున్న ఈ ప్రతిపాదనకు ఆ దేశ అధ్యక్షుడు వ్లాదిమిర్ పుతిన్ సైతం జై కొట్టారు. పొగాకును పూర్తిగా రద్దు చేస్తున్న మొదటి దేశంగా రష్యా చరిత్రలోకి ఎక్కనుంది. రష్యా తీసుకున్న ఈ రద్దు నిర్ణయాన్ని ఆ దేశానికి చెందిన ఓ న్యూస్ పేపర్ రిపోర్ట్ చేసింది.
  
 2033 నుంచి ఇది అమల్లోకి రానుంది. 2015లో జన్మించిన రష్యన్ సిటిజన్లు ఆ యేటికి 18 సంవత్సరాల వయసులోకి రానున్నారు. ఆరోగ్య మంత్రిత్వ శాఖ నిర్ణయించిన లక్ష్యం సిద్ధాంతపరంగా కచ్చితంగా సరియైనదని రష్యా పార్లమెంట్ హెల్త్ కమిటీ సభ్యుడు నికోలాయ్ గెరాసిమెన్కో పేర్కొన్నారు.  రద్దుకు సంబంధించిన అన్ని డాక్యుమెంట్లను వివిధ పెడరల్ ఏజెన్సీలకు పంపామని, ఆర్థిక, ఎకనామిక్ డెవలప్మెంట్ వంటి మంత్రిత్వశాఖలకు పంపిపట్టు ఆరోగ్యమంత్రిత్వ శాఖ తెలిపింది. 2016లో రష్యాలో స్మోకర్లు 10 శాతం తగ్గారు.