గత రెండేళ్లలో ఫామ్‌ కోల్పోయి ఒకదశలో ఆటకు గుడ్‌బై చెప్పాలనుకున్న సెర్బియా టెన్నిస్‌ స్టార్‌ నొవాక్‌ జొకోవిచ్‌ పూర్వ వైభవం దిశగా సాగుతున్నాడు. ఈ ఏడాది వింబుల్డన్‌ టైటిల్‌ గెలిచి గాడిలో పడ్డ అతను తాజాగా సీజన్‌ చివరి గ్రాండ్‌స్లామ్‌ టోర్నీ యూఎస్‌ ఓపెన్‌లోనూ చాంపియన్‌గా నిలిచాడు. తనలో ఆట ఇంకా చాలా మిగిలి ఉందని చాటి చెప్పాడు. మండే ఎండలు, తీవ్రమైన ఉక్కపోత కారణంగా ఈ ఏడాది యూఎస్‌ ఓపెన్‌లో పలువురు మ్యాచ్‌ మధ్యలోనే వైదొలగగా... ప్రతికూల వాతావరణాన్ని తట్టుకొని, పటిష్టమైన ప్రత్యర్థులను బోల్తా కొట్టించి జొకోవిచ్‌ ఈ టోర్నీలో ఎదురులేని విజేతగా నిలిచాడు.    న్యూయార్క్‌: తొలి రౌండ్‌లో మొదలైన జోరును ఫైనల్లోనూ కొనసాగించిన సెర్బియా టెన్నిస్‌ స్టార్‌ నొవాక్‌ జొకోవిచ్‌ మూడోసారి యూఎస్‌ ఓపెన్‌ గ్రాండ్‌స్లామ్‌ టైటిల్‌ను సొంతం చేసుకున్నాడు. భారత కాలమానం ప్రకారం ఆదివారం అర్ధరాత్రి దాటాక జరిగిన పురుషుల సింగిల్స్‌ ఫైనల్లో ఆరో సీడ్‌ జొకోవిచ్‌ 6–3, 7–6 (7/4), 6–3తో మూడో సీడ్‌ యువాన్‌ మార్టిన్‌ డెల్‌పొట్రో (అర్జెంటీనా)పై గెలుపొందాడు. విజేత జొకోవిచ్‌కు 38 లక్షల డాలర్లు (రూ. 27 కోట్ల 40 లక్షలు); రన్నరప్‌ డెల్‌పొట్రోకు 18 లక్షల 50 వేల డాలర్లు (రూ. 13 కోట్ల 34 లక్షలు) ప్రైజ్‌మనీగా లభించాయి.   రికార్డుస్థాయిలో ఎనిమిదోసారి యూఎస్‌ ఓపెన్‌ ఫైనల్‌ ఆడిన 31 ఏళ్ల జొకోవిచ్‌కు తుదిపోరులో తన ప్రత్యర్థి నుంచి అంతగా ప్రతిఘటన ఎదురుకాలేదు. 3 గంటల 15 నిమిషాలపాటు జరిగిన ఫైనల్లో జొకోవిచ్‌తొలి సెట్‌లోని ఏడో గేమ్‌లో డెల్‌పొట్రో సర్వీస్‌ను బ్రేక్‌ చేశాడు. ఆ తర్వాత తన సర్వీస్‌ను నిలబెట్టుకొని తొలి సెట్‌ను 6–3తో దక్కించుకున్నాడు. రెండో సెట్‌లో ఇద్దరూ ఒక్కోసారి తమ సర్వీస్‌లను చేజార్చుకున్నారు. చివరకు టైబ్రేక్‌లో జొకోవిచ్‌ ఈ సెట్‌ను గెల్చుకున్నాడు. మూడో సెట్‌లోని నాలుగో గేమ్‌లో, ఎనిమిదో గేమ్‌లో డెల్‌పొట్రో సర్వీస్‌ను బ్రేక్‌ చేసిన జొకోవిచ్‌ తొమ్మిదో గేమ్‌లో తన సర్వీస్‌ను నిలబెట్టుకొని విజయాన్ని ఖాయం చేసుకున్నాడు.   ►అత్యధిక గ్రాండ్‌స్లామ్‌ సింగిల్స్‌ టైటిల్స్‌ నెగ్గిన క్రీడాకారుల జాబితాలో జొకోవిచ్‌ మూడో స్థానానికి చేరుకున్నాడు. 14 టైటిల్స్‌తో అతను పీట్‌ సంప్రాస్‌ (అమెరికా)తో సంయుక్తంగా మూడో స్థానంలో ఉన్నాడు. ఫెడరర్‌ (20), రాఫెల్‌ నాదల్‌ (17) వరుసగా తొలి రెండు స్థానాల్లో ఉన్నారు.  ►ఒకే ఏడాది వరుసగా వింబుల్డన్, యూఎస్‌ ఓపెన్‌ టైటిల్స్‌ గెలవడం జొకోవిచ్‌కిది మూడోసారి. 2011, 2015లలో కూడా అతను ‘డబుల్‌’ సాధించాడు. ఫెడరర్‌ అత్యధికంగా నాలుగుసార్లు (2004, 05, 06, 07లలో) ఈ ఫీట్‌ సాధించాడు.   ►ఓపెన్‌ శకంలో (1968 తర్వాత) యూఎస్‌ ఓపెన్‌ టైటిల్‌ను మూడు లేదా అంతకంటే ఎక్కువసార్లు గెలిచిన ఏడో ప్లేయర్‌ జొకోవిచ్‌. ఈ జాబితాలో ఫెడరర్, జిమ్మీ కానర్స్, పీట్‌ సంప్రాస్‌ (5 సార్లు చొప్పున), జాన్‌ మెకన్రో (4 సార్లు), ఇవాన్‌ లెండిల్, రాఫెల్‌ నాదల్‌ (3 సార్లు చొప్పున) ఉన్నారు.   తాజా గ్రాండ్‌స్లామ్‌   టైటిల్‌తో పీట్‌ సంప్రాస్‌ సరసన చేరినందుకు ఆనందంగా ఉంది. అతను నా చిన్ననాటి ఆరాధ్య క్రీడాకారుడు. టీవీలో సంప్రాస్‌ వింబుల్డన్‌లో ఆడుతున్నపుడు చూసి నేను ఈ క్రీడవైపు మళ్లాను. ఈ ఏడాది ఫిబ్రవరిలో మోచేతికి శస్త్రచికిత్స జరిగాక వింబుల్డన్, సిన్సినాటి మాస్టర్స్‌ సిరీస్, యూఎస్‌ ఓపెన్‌ టైటిల్స్‌ సాధించానంటే నాకే నమ్మశక్యంగా లేదు. –జొకోవిచ్‌  


 ⇒ ఫెడరర్‌ ఆట ముగించిన డెల్‌పొట్రో
 ⇒ క్వార్టర్స్‌లో స్విస్‌ స్టార్‌పై అద్భుత విజయం
 ⇒ సెమీస్‌లో నాదల్‌తో ఢీ
 ⇒ యూఎస్‌ ఓపెన్‌ టెన్నిస్‌ టోర్నీ  
 
 యూఎస్‌ ఓపెన్‌లో వరుసగా 5 సార్లు టైటిల్‌ గెలిచి ఊపు మీదున్న  ఫెడరర్‌ను 2009 ఫైనల్లో డెల్‌పొట్రో అడ్డుకున్నాడు. డెల్‌పొట్రో కెరీర్‌లో అది ఏకైక గ్రాండ్‌స్లామ్‌ టైటిల్‌ కాగా... ఆ తర్వాత ఫెడరర్‌ మళ్లీ యూఎస్‌ ఓపెన్‌ గెలవలేకపోయాడు. ఈ ఏడాది అద్భుత ఫామ్‌తో మూడో గ్రాండ్‌ స్లామ్‌ టైటిల్‌పై కన్నేసిన ఫెడెక్స్‌ ఎనిమిదేళ్ల తర్వాత కూడా అదే అర్జెంటీనా స్టార్‌ చేతిలో చావుదెబ్బ తిన్నాడు. ప్రత్యర్థి జోరు ముందు నిలవలేక, నాటి ఓటమికి ప్రతీకారం తీర్చుకోలేక  క్వార్టర్‌ ఫైనల్లోనే నిష్క్రమించాడు.
 
 తొలి రెండు రౌండ్‌లలో ఫెడరర్‌ ఐదు సెట్ల పాటు శ్రమించి నెగ్గడంతోనే అతని ఆట, ఫిట్‌నెస్‌పై సందేహాలు కనిపించాయి. తర్వాతి రెండు మ్యాచ్‌లలో మెరుగ్గా ఆడినా... డెల్‌పొట్రో ముందు నిలవడం కష్టమని అనిపించింది. చివరకు అదే జరిగింది. ప్రత్యర్థి జోరుతో పాటు స్వీయ తప్పిదాలు టెన్నిస్‌ ఆల్‌టైమ్‌ గ్రేట్‌కు మరో గ్రాండ్‌స్లామ్‌ టైటిల్‌ అవకాశాన్ని చేజార్చాయి. ఫలితంగా యూఎస్‌ ఓపెన్‌లో ప్రత్యర్థులుగా తొలిసారి ఫెడరర్, రాఫెల్‌ నాదల్‌ ఆట చూడవచ్చని భావించిన అభిమానులకు నిరాశ తప్పలేదు.   
 
 న్యూయార్క్‌: యూఎస్‌ ఓపెన్‌ టెన్నిస్‌ టోర్నమెంట్‌లో మాజీ చాంపియన్, 19 గ్రాండ్‌స్లామ్‌ టైటిల్స్‌ విజేత రోజర్‌ ఫెడరర్‌ (స్విట్జర్లాండ్‌) కథ ముగిసింది. 2017లో మూడో గ్రాండ్‌స్లామ్‌ టైటిల్‌ సాధించాలనే లక్ష్యంతో బరిలోకి దిగిన ఫెడరర్‌కు మరో మాజీ విజేత  డెల్‌పొట్రో (అర్జెంటీనా) క్వార్టర్‌ ఫైనల్లో షాక్‌ ఇచ్చాడు. 2 గంటల 50 నిమిషాల పాటు సాగిన ఈ పోరులో 2009 యూఎస్‌ ఓపెన్‌ చాంపియన్, 28 ఏళ్ల డెల్‌పొట్రో 7–5, 3–6, 7–6 (10/8), 6–4తో ఫెడరర్‌ను చిత్తు చేశాడు. సెమీఫైనల్లో నంబర్‌వన్‌ నాదల్‌ (స్పెయిన్‌)తో డెల్‌పొట్రో తలపడతాడు. క్వార్టర్స్‌లో నాదల్‌ 6–1, 6–2, 6–2తో రుబ్లేవ్‌ (రష్యా)పై అలవోకగా నెగ్గాడు. 28 ఏళ్ల డెల్‌పొట్రో గ్రాండ్‌స్లామ్‌ టోర్నీలలో సెమీస్‌కు చేరడం ఇది నాలుగోసారి మాత్రమే. 2009 యూఎస్‌ ఓపెన్‌ సెమీస్‌లోనూ అతను నాదల్‌ను ఓడించడం విశేషం.  
 
 స్వయంకృతం...
 వరుస గాయాలతో పాటు మణికట్టుకు నాలుగు సర్జరీలతో దాదాపుగా ఆటకు దూరమైన డెల్‌పొట్రో ఈసారి తన సత్తా చాటాడు. ఈ క్వార్టర్‌ ఫైనల్‌ మ్యాచ్‌కు ముందు ఫెడరర్‌కు 16–5తో డెల్‌పొట్రోపై మెరుగైన రికార్డు ఉంది. అయితే ఇప్పుడు మాత్రం పొట్రో ఎక్కడా తగ్గలేదు. భారీ సర్వీస్‌లు, పదునైన ఫోర్‌హ్యాండ్‌లతో అతను విరుచుకు పడ్డాడు. పోటాపోటీగా సాగిన తొలి సెట్‌లో ఫెడరర్‌ ఓడినా రెండో సెట్‌లో అతడికి ఎలాంటి ఇబ్బందీ ఎదురు కాలేదు. అయితే మూడో సెట్‌ మ్యాచ్‌ను మలుపు తిప్పింది. ఈ సెట్‌ టైబ్రేక్‌లో ఫెడరర్‌కు నాలుగుసార్లు సెట్‌ పాయింట్లు లభించినా ఫలితం లేకపోయింది. నాలుగో సెట్‌లో ఒక దశలో స్కోరు 2–2తో సమంగా నిలిచినా... ఈ దశలో ఫెడరర్‌ పేలవమైన ఆటతీరు కనబర్చడంతో మ్యాచ్‌ చేజారిపోయింది. ఈ మ్యాచ్‌లో ఫెడరర్‌ ఏకంగా 41 అనవసర తప్పిదాలు చేయగా... అందులో 22 తప్పిదాలు ఫోర్‌హ్యాండ్‌ ద్వారానే జరిగాయి.    
 
 ఆల్‌ అమెరికా...
 మహిళల సింగిల్స్‌ విభాగంలో 1981 తర్వాత మొదటిసారి నలుగురు అమెరికా క్రీడాకారిణులే సెమీఫైనల్లో తలపడనున్నారు. వీనస్‌ విలియమ్స్, స్లోన్‌ స్టీఫెన్స్, కోకో వాండవె ఇప్పటికే సెమీస్‌ చేరగా... మాడిసన్‌ కీస్‌ వారితో జత కలిసింది. క్వార్టర్‌ ఫైనల్లో మాడిసన్‌ కీస్‌ 6–3, 6–3 స్కోరుతో కయీ కనెపి (ఎస్తోనియా)పై విజయం సాధించింది. 36 ఏళ్ల క్రితం యూఎస్‌ ఓపెన్‌ మహిళల సెమీస్‌లో అమెరికాకే చెందిన మార్టినా నవ్రతిలోవా, క్రిస్‌ ఎవర్ట్, ట్రేసీ అస్టిన్, బార్బా పొటర్‌ తలపడ్డారు. మహిళల డబుల్స్‌ క్వార్టర్‌ ఫైనల్లో నాలుగో సీడ్‌ సానియా మీర్జా (భారత్‌)–షుయె పెంగ్‌ (చైనా) ద్వయం 7–6 (7/5), 6–4తో ఐదో సీడ్‌ తిమియా బాబోస్‌ (హంగేరి)–ఆండ్రియా హలవకోవా (చెక్‌ రిపబ్లిక్‌) జంటను ఓడించి సెమీఫైనల్లోకి ప్రవేశించింది.   
 
 ప్రస్తుతం నేను ఆడిన లేదా ఆడుతున్న తీరు ఈ టోర్నీ గెలిచేందుకు సరిపోదు. నేను నిష్క్రమించడమే మంచిదైంది. నాకన్నా మెరుగైన వ్యక్తి టైటిల్‌ సాధిస్తాడు. నాకు సెమీస్‌ చేరే అర్హత లేదు. బయటకు కనిపిస్తున్న దానికంటే కూడా నా ఆట బలహీనంగా ఉంది. టోర్నీ ఆరంభం నుంచీ ఇబ్బంది పడ్డాను. గట్టి ప్రత్యర్థి ఎదురైతే కష్టమని అనిపించింది కూడా. ఓటమి నుంచి కోలుకునేందుకు కొంత సమయం పట్టవచ్చు. అయితే ఈ ఏడాది సంతృప్తిగా గడిచిందనే చెప్పగలను. ఇక సెమీఫైనల్‌ గురించి నిజాయతీగా మాట్లాడాలంటే నాదల్‌ను ఓడించే అవకాశం డెల్‌పొట్రోకు ఉంది.      
 – ఫెడరర్‌
 
 టోర్నమెంట్‌లో నేను నా అత్యుత్తమ మ్యాచ్‌ ఆడాను. సర్వీస్‌ బాగా చేశాను. నా ఫోర్‌హ్యాండ్‌ కూడా పని చేసింది. కచ్చితంగా గెలిచే అర్హత నాకు మాత్రమే ఉంది. గాయాలు, శస్త్ర చికిత్సల తర్వాత నాకెంతో ఇష్టమైన టోర్నీలో మళ్లీ సెమీస్‌ ఆడగలనని ఏమాత్రం ఊహించలేదు. ఇది నా సొంత కోర్టులాంటిదే. మరోసారి నాదల్‌ను ఓడించగలనని నమ్ముతున్నా. అతను ప్రస్తుతం నంబర్‌వన్‌ అయినా టెన్నిస్‌లో ఏదైనా సాధ్యమే.                               
 – డెల్‌పొట్రో