జాతీయ ప్రధాన కార్యదర్శిగా ‘రేవూరి’
 పొలిట్‌బ్యూరో సభ్యునిగా ‘ఎర్రబెల్లి’
 రాష్ట్ర పార్టీ ప్రధాన కార్యదర్శిగా సీతక్క
 త్వరలో పూర్తి స్థాయిలో జిల్లా కమిటీ
  
 వరంగల్ :  తెలుగుదేశం పార్టీ జిల్లా అధ్యక్షుడిగా గండ్ర సత్యనారాయణరావు(సత్తన్న) నియమితులయ్యారు. నాలుగు నెలలుగా పెండింగ్‌లో ఉన్న టీడీపీ జిల్లా అధ్యక్ష పదవిలో  గండ్ర సత్యనారాయణరావు నియమించినట్లు పార్టీ జాతీయ అధ్యక్షుడు నారా చంద్రబాబునాయుడు ప్రకటించారు. బుధవారం ఆంధ్రప్రదేశ్‌లోని విజయవాడ క్యాంపు కార్యాలయంలో టీడీపీ పొలిట్‌బ్యూరో, జాతీయ, తెలంగాణ రాష్ట్రాల పార్టీ కమిటీల నియామక వివరాలు చంద్రబాబు వెల్లడించారు. మన జిల్లాకు చెందిన 14 మంది నాయకులకు టీడీపీ జాతీయ, రాష్ట్ర కమిటీల్లో చోటు దక్కింది. పాలకుర్తి ఎమ్మెల్యే ఎర్రబెల్లి దయాకర్‌రావు ఇన్నాళ్లు తెలంగాణలో పార్టీ రాష్ట్ర కార్యనిర్వాహక అధ్యక్షుడిగా ఉండగా తాజాగా ఈ పదవి దక్కలేదు. కొత్త కమిటీలో పార్టీ జాతీయ పొలిట్‌బ్యూరో సభ్యుడిగా నియమితులయ్యారు. రాజ్యసభ సభ్యుడు గరికపాటి మోహన్‌రావు రాష్ట్ర ఉపాధ్యక్షుడిగా, మాజీ ఎమ్మెల్యే రేవూరి ప్రకాశ్‌రెడ్డి పార్టీ జాతీయ ప్రధాన కార్యదర్శిగా నియమితులయ్యారు. మాజీ ఎమ్మెల్యే ధనసరి అనసూయ(సీతక్క) పార్టీ రాష్ట్ర ప్రధాన కార్యదర్శిగా, చాడ సురేష్‌రెడ్డి ఉపాధ్యక్షుడిగా, వేం నరేందర్‌రెడ్డి అధికార ప్రతినిధిగా నియమితులయ్యారు. కార్యనిర్వాహక కార్యదర్శులుగా ఎంపీ గుండు సుధారాణి, గట్టు ప్రసాద్‌బా బు, బానోత్ మోహన్‌లాల్, జాటోత్ నెహ్రూ, దొమ్మాటి సాంబయ్యలకు చోటు కల్పించా రు. లింగాల వెంకటనారాయణగౌడ్, ఈగ మల్లేషం, నెమురుగొమ్ముల ప్రవీణ్‌కుమార్ కార్యదర్శులుగా నియమితులయ్యారు.
 
 సత్తన్న ప్రస్థానం
 గండ్ర సత్యనారాయణరావుది గణపురం మండలం బుద్దారం గ్రామం. టీడీపీ ఆవి ర్భావంతో పార్టీలో చేరి పలు పదవులు నిర్వహించారు. 1982-85వరకు గ్రామపార్టీ అధ్యక్షునిగా.. 1985-96 వరకు మండల పార్టీ అధ్యక్షుడి గా.. 1997-2001 వరకు జిల్లా పార్టీ ప్రచార కార్యదర్శిగా.. 2001-03 వరకు జిల్లా పార్టీ కార్యాలయ కార్యదర్శిగా.. 2003-05 గా జిల్లా పార్టీ కార్యదర్శిగా.. 2005-09 వరకు జిల్లా ఉపాధ్యక్షులుగా.. 2009 నుంచి నేటి వరకు భూపాలపల్లి నియోజకవర్గ ఇన్‌చార్జీగా కొనసాగుతున్నారు. 1988-95 వరకు బుద్దారం సర్పంచ్‌గా, 1995-2000 వరకు గణపురం జెడ్పీటీసీ సభ్యుడిగా పదవులు నిర్వహించారు. గత ఎన్నికల్లో భూపాలపల్లి ఎమ్మెల్యేగా బీజేపీ నుంచి పోటీ చేసి ఓడిపోయారు.
  


 టీడీపీ జిల్లా అధ్యక్షుడి ఎన్నిక నేటికి వాయిదా
 మంత్రి పదవిపై ఆశతో అధ్యక్ష పదవిపై మొదట విముఖత చూపిన బీకే
 జిల్లా పగ్గాలు చేజిక్కించుకునేందుకు ప్రభాకర్ చౌదరి తీవ్ర యత్నం
 చౌదరిని వ్యతిరేకించిన పలువురు కీలక నేతలు
 చంద్రబాబు ఆదేశంతో బీకేను సారథిగా నియమించేందుకు పయ్యావుల మంత్రాంగం
 అధ్యక్షుడిగా బీకే, ప్రధాన కార్యదర్శిగా సూరి దాదాపు ఖరారు
 నేడు అధికారిక ప్రకటన
  
  (సాక్షి ప్రతినిధి, అనంతపురం) : తెలుగుదేశం పార్టీ జిల్లా అధ్యక్షుడి ఎన్నిక వాయిదా పడింది. మూడోసారి జిల్లా అధ్యక్షుడిగా బీకే పార్థసారథిని నియమించాలని అధిష్టానం భావించడం.. అయితే బాధ్యతలు తీసుకునేందుకు ఆయన విముఖత చూపడం.. ప్రభాకర్ చౌదరి రేసులోకి రావడం.. ఆయనపై పార్టీలో వ్యతిరేకత వెల్లువెత్తడంతో శనివారం జిల్లా కమిటీ ఎన్నికకు బ్రేక్ పడింది. దీంతో ఆదివారానికి వాయిదా వేస్తున్నట్లు ఎన్నికల పరిశీలన కమిటీ సభ్యులు ప్రకటించారు. ఇటు ఆంధ్రప్రదేశ్‌తో పాటు అటు తెలంగాణలో శనివారం టీడీపీ జిల్లా కమిటీల ఎన్నిక నిర్వహించారు.
 
 ఇందులో భాగంగా అనంతపురం జిల్లా కమిటీని ఎన్నిక చేసేందుకు పార్టీ అధిష్టానం మంత్రి బొజ్జల గోపాలకృష్ణారెడ్డి, ఎంపీ సీఎం రమేశ్‌లను పరిశీలకులుగా పంపింది. బీకే పార్థసారథిని మూడోసారి అధ్యక్షుణ్ని చేయాలని చంద్రబాబు భావించారు. ఇదే విషయాన్ని ఎన్నికల పరిశీలకులకు చెప్పి ప్రక్రియను సజావుగా పూర్తి చేయాలని సూచించారు. ఈ మేరకు శనివారం నగరంలోని ఆర్‌కే ఫంక్షన్ హాలులో సమావేశం నిర్వహించారు.
 
 పార్టీ పగ్గాలు చేపట్టేందుకు బీకే పార్థసారథి అనాసక్తి ప్రదర్శించారు. టీడీపీ అధికారంలోకి వచ్చినతర్వాత బీకే మంత్రి పదవి ఆశించారు. బీసీ కోటాలో మంత్రి పదవి ఖాయమని భావించారు. చంద్రబాబు మాత్రం జిల్లాలో రెండు మంత్రి పదవులనూ ఓసీ సామాజిక వర్గానికే కట్టబెట్టారు. ఈ క్రమంలో మంత్రివర్గ విస్తరణలోనైనా పదవి దక్కించుకోవాలని మొదట్నుంచీ బీకే తీవ్ర ప్రయత్నాలు సాగిస్తున్నారు. ఈ కారణంతోనే  జిల్లా అధ్యక్ష పదవిని తిరస్కరించినట్లు తెలుస్తోంది.
 
  రేసులోకి చౌదరి
  జిల్లా అధ్యక్ష పదవికి తానూ పోటీలో ఉన్నట్లు అనంతపురం ఎమ్మెల్యే ప్రభాకర్ చౌదరి కొద్దిరోజుల కిందట పార్టీ నేతల వద్ద మనసులో మాటను బయటపెట్టినట్లు తెలుస్తోంది. బీకే పార్థసారథితో పాటు చౌదరి, ఏడీసీసీబీ మాజీ చైర్మన్ సరిపూటి సూర్యనారాయణ అధ్యక్ష పదవి రేసులో ఉన్నట్లు, వాయిస్ మెసేజ్ ద్వారా కార్యకర్తల అభిప్రాయాలు సేకరించనున్నట్లు పార్టీ ప్రకటించింది. ఇదిలా ఉండగా... బీకే పార్థసారథినే అధ్యక్షుడిగా నియమించాలని ముందే నిర్ణయించుకున్నట్లు తెలుస్తోంది.
 
 ఇందుకు ఆయన విముఖత చూపడంతో తనకు మార్గం సుగమమైందని చౌదరి భావించారు. అయితే.. ఆయన్ను మంత్రి పరిటాల సునీత, మేయర్ స్వరూపతో పాటు పలువురు కీలక నేతలు వ్యతిరేకించినట్లు తెలుస్తోంది. ఈ విషయాన్ని పరిశీలకులు సీఎం చంద్రబాబు దృష్టికి తీసుకెళ్లారు. దీంతో చంద్రబాబు బీకేను ఒప్పించే బాధ్యతను పయ్యావుల కేశవ్‌కు అప్పగించినట్లు పార్టీ వర్గాలు చెబుతున్నాయి. బీకేతో కేశవ్ శనివారం ప్రత్యేకంగా సమావేశమై చర్చించినట్లు తెలుస్తోంది. దీంతో ఎట్టకేలకు ఆయన ఒప్పుకున్నట్లు సమాచారం.
 
  నేడు అధికారిక ప్రకటన
  జిల్లా కమిటీ ఎన్నిక కొలిక్కి రావడంతో జిల్లా అధ్యక్షుడిగా బీకే పార్థసారథి, ప్రధాన కార్యదర్శిగా ధర్మవరం ఎమ్మెల్యే వరదాపురం సూరిని నియమించేందుకు అధిష్టానం నిర్ణయం తీసుకున్నట్లు తెలిసింది. వీరి పేర్లను ఆదివారం అధికారికంగా వెల్లడించనున్నారు.
  
  ఊరించి.. ఉసూరుమనిపించారు
  అనంతపురం సిటీ : టీడీపీ జిల్లా అధ్యక్షుణ్ని ఎన్నుకుంటామని ఊరించారు. ఉక్కపోతలో అందర్నీ ఉడికించారు. చివరకు ఆదివారం ప్రకటిస్తామంటూ ఉసూరుమనిపించారు. శనివారం అనంతపురంలోని ఆర్‌కె ఫంక్షన్ హాల్లో  ఉదయం 11.30 గంటలకు పార్టీ జిల్లా అధ్యక్షుడు బీకే పార్థసారథి అధ్యక్షతన జిల్లా కార్యవర్గం, అనుబంధ సంఘాల కమిటీల ఎంపిక ప్రక్రియ ప్రారంభమైంది. పరిశీలకులుగా రాష్ట్ర అటవీ శాఖా మంత్రి బొజ్జల గోపాలకృష్ణారెడ్డి, రాజ్యసభ సభ్యుడు సీఎం రమేష్, టీడీపీ రాష్ట్ర ప్రధాన కార్యదర్శి షరీఫ్ హాజరయ్యారు.
 
 మంత్రి పరిటాల సునీత, ఎంపీ నిమ్మల కిష్టప్ప, ఎమ్మెల్సీ శమంతకమణి, చీఫ్‌విప్ కాలవ శ్రీనివాసులు, విప్ యామినీబాల, మాజీ ఎమ్మెల్యే పయ్యావులకేశవ్, జడ్పీ చైర్మన్ చమన్, నగర మేయర్ స్వరూపతో పాటు జిల్లా నలుమూలల నుంచి కార్యకర్తలు హాజరయ్యారు. మధ్యాహ్న భోజన సమయం వరకు నాయకుల ప్రసంగాలకే సరిపోయింది. భోజనానంతరం దాదాపు రెండు గంటల పాటు ఒక గదిలో చర్చలు జరిపారు. ఎంతకూ కొలిక్కి రాలేదు. తుదకు సాయంత్రం 4.30 గంటలకు పరిస్థితిని ముఖ్యమంత్రికి వివరించామని, ఆదివారం మీడియా ద్వారా జిల్లా అధ్యక్షుడిని ప్రకటిస్తామని సీఎం రమేష్ ప్రకటించారు.