సంగీత దర్శకునిగా తెలుగు, తమిళ భాషల్లో దాదాపు ముప్ఫయ్ చిత్రాలకు పాటలు స్వరపరచిన విజయ్ ఆంటోనీ హీరోగా నటించి, నిర్మించిన తొలి చిత్రం ‘నకిలీ’. ఈ చిత్రానికి కొనసాగింపుగా విజయ్ ఆంటోనీ చేసిన ‘డా. సలీమ్’ని అదే పేరుతో నాగప్రసాద్ సన్నితి సమర్పణలో  సురేశ్ కొండేటి, తమటం కుమార్‌రెడ్డి తెలుగులోకి అనువదించారు. శుక్రవారం విడుదలైన ఈ చిత్రం తమిళంలో ఘనవిజయం సాధించినట్లుగానే తెలుగులోనూ మంచి ఫలితాన్నిస్తుందనే నమ్మకం ఉందని విజయ్ ఆంటోనీ అన్నారు.
 
 ఈ చిత్రకథానాయిక అక్ష, విజయ్ ఆంటోనీ శుక్రవారం ప్రత్యేకంగా పాత్రికేయులతో మాట్లాడారు.  విజయ్ ఆంటోనీ మాట్లాడుతూ -‘‘సమాజంలో చాలామంది సలీమ్‌లు ఉంటారు. కానీ, సంఘ విద్రోహ శక్తులపై తిరగబడితే ఏమవుతుందో? అనే భయం వాళ్లను ఆ పని చేయనివ్వదు. సినిమాలు చూసి, ఉత్తేజితులవుతారనే లక్ష్యంతోనే నేను మంచి కథాంశాలు ఎన్నుకుంటున్నా’’ అన్నారు. ‘సలీమ్’కి కొనసాగింపుగా మూడో భాగం ఉంటుందని ఆయన వెల్లడించారు.
 
 సినిమాలో సలీమ్ సమాజ సేవ చేస్తాడనీ, నిజజీవితంలో ఓ సంగీతదర్శకునిగా ఇప్పటివరకూ 60మంది గాయనీ గాయకులను పరిచయం చేశాననీ, నిర్మాతగా ఎంతోమంది నూతన సాంకేతిక నిపుణులకు, నటీనటులకు అవకాశం ఇస్తున్నాననీ, ఆర్థికంగా స్థిరపడితే సమాజ సేవ చేస్తాననీ విజయ్ ఆంటోనీ తెలిపారు. ఈ చిత్రంలో నటించడం పట్ల అక్ష ఆనందం వ్యక్తం చేశారు.


  ‘‘ ‘ఠాగూర్’ చిత్రంలో లాగే ఆస్పత్రుల్లో జరిగే అన్యాయాలను ప్రశ్నిస్తుందీ చిత్రం. నా గత చిత్రాల్లోలాగే ఇందులోనూ సందేశం ఉంటుంది’’ అని నిర్మాత సురేశ్ కొండేటి తెలిపారు. విజయ్ ఆంటోని, అక్ష జంటగా ఎన్.వి. నిర్మల్‌కుమార్ దర్శకత్వంలో రూపొందిన చిత్రం ‘డా. సలీమ్’. సురేశ్ కొండేటి, తమటం కుమార్‌రెడ్డి సంయుక్తంగా ఈ చిత్రాన్ని అందిస్తున్నారు. పాటల సీడీని ఇటీవల తెలంగాణ  రాష్ట్ర సినిమాటోగ్రఫీ శాఖ మంత్రి తలసాని శ్రీనివాస యాదవ్ ఆవిష్కరించి, ఈ చిత్రం విజయం సాధించాలని ఆకాంక్షించారు.