ముంబై:ద్విసభ్య కమిషన్ ఏర్పాటు అనైతికం, చట్ట వ్యతిరేకమని పేర్కొన్న బాంబే హైకోర్టు తీర్పుపై బీసీసీఐ సుప్రీం కోర్టుకు వెళ్లింది. స్పెషల్ లీవ్ పిటిషన్ (ఎస్‌ఎల్‌పీ) రూపంలో తమ అప్పీల్‌ను దాఖలు చేసింది. బోర్డు అధ్యక్షుడు ఎన్.శ్రీనివాసన్ అల్లుడు గురునాథ్ మెయ్యప్పన్, రాజస్థాన్ రాయల్స్ సహ యజమాని రాజ్ కుంద్రాల బెట్టింగ్ వ్యవహారంపై ఈ కమిషన్ ఏర్పాటైంది. దీన్ని వ్యతిరేకిస్తూ బీహార్ క్రికెట్ అసోసియేషన్ (బీసీఏ) కోర్టులో పిల్ దాఖలు చేయగా బీసీసీఐకి వ్యతిరేకంగా తీర్పు వచ్చింది. ఈనెల2న ఢిల్లీలో జరిగిన ఐపీఎల్ పాలక మండలి సమావేశంలో ఈ తీర్పుపై సుప్రీంకు వెళ్లాలని తీర్మానించారు.