ముంబై: దేశ వ్యాప్తంగా సంచలనం సృష్టించిన షీనా బోరా హత్య కేసు మరో అనూహ్యమైన మలుపు తిరిగింది. ఇంద్రాణి భర్త పీటర్ ముఖర్జియాను గురువారం సీబీఐ పోలీసులు అరెస్టు చేశారు. ఈ కేసులో ప్రధాన నిందితులైన షీనా బోరా తల్లి ఇంద్రాణి ముఖర్జియా, ఇంద్రాణి మాజీ భర్త సంజీవ్ ఖన్నా, కారు డ్రైవర్ శ్యామ్వర్ సింగ్ లపై 1000 పేజీలతో కూడిన ఛార్జిషీట్ను సీబీఐ దాఖలు చేసిన విషయం తెలిసిందే.
 ఈ ముగ్గురికి ఆగస్టులో కోర్టు నవంబర్ 20 వరకు జ్యుడీషియల్ కస్టడీ  విధించింది. అయితే ఇంద్రాణి ముఖర్జియా ప్రస్తుత భర్త పీటర్ ముఖర్జియాను అరెస్టు చేయడంతో ఈ కేసులో ఆయన ప్రమేయంపై అనుమానాలు రేకెత్తుతున్నాయి. పీటర్ అరెస్టుకు సంబంధించి పోలీసులు ఎలాంటి వివరాలను వెల్లడించలేదు. అయితే ఈ కేసుకు సంబంధించిన నిజాలను వెలుగులోకి తేవాల్సి ఉందని సీబీఐ అధికారి వెల్లడించారు.