ఇంట్లో అవసరాల కోసం ఓ కంప్యూటర్.. ఆఫీసులో మరోటి.. చేతిలో ఇంకోటి. ఈ రోజుల్లో ఇదంతా మామూలే అంటారా? నిజమేకానీ... ఇదంతా లెనవూ ఐడియాస్టిక్ అందుబాటులోకి రానంత వరకే. ఎందుకంటే.. పూర్తిస్థాయి పీసీ మొత్తాన్ని ఇది అరచేతిలో ఇమిడిపోయే సైజుకు తగ్గించేసింది మరి. హెచ్‌డీఎంఐ సామర్థ్యమున్న ఏ టెలివిజన్ స్క్రీన్‌కు దీన్ని తగిలించినా.. అది కాస్తా కంప్యూటర్‌గా మారిపోతుంది. ఇలాటివి చాలానే వచ్చాయిగానీ.. దీని ప్రత్యేకత ఏమిటంటారా?
 
 ఇంటెల్ ఆటమ్ ప్రాసెసర్‌తో పనిచేయడం ఒకటైతే... రెండు గిగాబైట్ల ర్యామ్, 32 గిగాబైట్ల ఇంటర్నల్ మెమరీ రెండోది. విండోస్ 8.1 ఆపరేటింగ్ సిస్టమ్‌తో పనిచేయగలగడం మరోటి. కేవలం 15 మిల్లీమీటర్ల మందం మాత్రమే ఉండే ఈ బుల్లి పీసీ ఖరీదు దాదాపు ఎనిమిది వేలు మాత్రమే!


  న్యూఢిల్లీ: ప్రైవేటు స్కూళ్ల కోసం పలు ఆధునిక ఫీచర్లతో కూడిన ప్రత్యేక ట్యాబ్లెట్‌ను సాఫ్ట్‌వేర్ దిగ్గజం మైక్రోసాఫ్ట్ గురువారం ఆవిష్కరించింది. ఏసర్, ఎంబీడీ గ్రూప్, టాటా టెలిసర్వీసెస్‌లతో కలసి రూపొందించిన దీని ధర రూ. 24,999. దేశంలోని అన్ని ప్రైవేటు స్కూళ్లకూ దీన్ని అందుబాటులో ఉంచారు.
 
 అత్యాధునిక క్వాడ్‌కోర్ ఇంటెల్ ఆటమ్ ప్రాసెసర్‌తో పనిచేసే ఈ విండోస్ 8.1 ట్యాబ్లెట్లో హెచ్‌డీ ఐపీఎస్ డిస్‌ప్లే ఉంటుందని మైక్రోసాఫ్ట్ ఇండియా గురువారం ఓ ప్రకటనలో తెలిపింది. ఎండలో సైతం చదవడానికి హెచ్‌డీ ఐపీఎస్ డిస్‌ప్లే దోహదపడుతుంది. ఆఫీస్ 365 ఎడ్యుకేషన్ ఏ2, మైక్రోసాఫ్ట్ ఆఫీస్ స్పెషలిస్ట్ (ఎంఓఎస్) సర్టిఫికేషన్లను  ఇందులో చేర్చారు. వివిధ రాష్ట్రాల బోర్డులు, సీబీఎస్‌ఈ, ఐసీఎస్‌ఈల కోసం ఎంబీడీ పబ్లిషింగ్ హౌస్ రూపొందించిన డిజిటల్ లెర్నింగ్ కరిక్యులమ్‌ను కూడా ఈ టాబ్లెట్‌లో పొందుపర్చారు.