అది హైదరాబాద్‌లో సంపన్నులు ఉండే ప్రాంతం. అర్ధరాత్రి దాటినా రోజులాగే వాహనాలతో రద్దీగా ఉంది ఆ ప్రాంతం. అంతేకాదు.. వారాంతం కావటంతో మందుబాబుల హంగామా కూడా అంతా ఇంతా కాదు. డ్రంక్‌ అండ్‌ డ్రైవ్‌కు ఫుల్‌స్టాప్‌ పెట్టాలన్న ఉద్దేశ్యంతో హైదరాబాద్‌ ఖాకీలు.... జూబ్లీహిల్స్ చెక్పోస్ట్ వద్ద ఎదురు చూస్తున్నారు. ఇంతలో ఒక్కసారిగా అలజడి. అంతే అక్కడ వున్న పోలీసులు.... మీడియా ప్రతినిధులు ఒక్కసారిగా అప్రమత్తం అయ్యారు. తీరా విషయం తెలుసుకుని షాక్‌ తిన్నారు. ఇంత హడావుడికి కారణం ముంబైకి చెందిన సీమా అనే ఓ హిజ్రా. లిప్ట్ అంటూ ఓ కారు ఎక్కింది.
 
 కొద్దిదూరం వెళ్లాక... కారు నడుపుతున్న వ్యక్తి మెడలోని బంగారు గొలుసు తీసుకుని పారిపోబోయింది. అంతే... పుణ్యానికి పోతే పాపం ఎదురైనట్లు... ఇదేమిటిరా అని తేరుకున్న కారు డ్రైవర్‌ అరవటం   మొదలుపెట్టాడు. దీంతో అక్కడి చేరుకున్న పోలీసులు, మీడియా ప్రతినిధులు హిజ్రాను పట్టుకునే యత్నం చేశారు. అది చూసి... మీడియాపై రాళ్లు రువ్వే యత్నం  చేసింది. అంతేకాకుండా తాను దొంగను కాదు... కారు డ్రైవర్‌ బంగారు గొలుసు... బండిలోనే ఉందంటూ... దబాయించింది. చివరికి... పారిపోతున్న హిజ్రాను పట్టుకుని పోలీసులు తమ వాహనంలో లిప్ట్ ఇచ్చి స్టేషన్‌ను తీసుకెళ్లారు.