అన్నవరం: వేలాదిగా వచ్చిన భక్తులతో రత్నగిరి శనివారం కిటకిటలాడింది. ఉదయం నుంచీ భక్తులు సత్యదేవుని దర్శనానికి తరలిరావడంతో ఆలయ ప్రాంగణం, వ్రత, విశ్రాంతి మండపాలు కిక్కిరిసిపోయాయి. సుమారు 30 వేల మంది స్వామివారిని దర్శించుకున్నారు. వ్రతాలు 1,200 జరిగాయి. అన్ని విభాగాల ద్వారా దేవస్థానానికి రూ.30 లక్షల ఆదా యం సమకూరింది. సత్యదేవుని నిత్యాన్నదాన పథకంలో 4 వేల మంది భోజనం చేశారు. ఈ నెల రెండో తేదీన ప్రారంభించిన డిజిటల్‌ పేమెంట్స్‌ కౌంటర్‌కు భక్తుల ఆదరణ రోజురోజుకూ పెరుగుతోంది. గూగుల్‌ పే, ఫోన్‌ పే, పేటీఎం, డెబిట్‌, క్రెడిట్‌ కార్డుల ద్వారా భక్తులు శనివారం 175 వ్రతాల టిక్కెట్లు, రెండు కల్యా ణం టికెట్లు కొనుగోలు చేశారు. దీని ద్వారా రూ. 1,80,080 ఆదాయం సమకూరిందని అధికారులు తెలిపారు. స్వామివారి ప్రత్యేక దర్శనం టికెట్టు రూ. 200 విక్రయాలతో రూ.5,800 ఆదాయం వచ్చిందన్నారు. ఘనంగా ప్రాకార సేవ ఆలయ ప్రాంగణంలో సత్యదేవుని ప్రాకార సేవ ఘనంగా నిర్వహించారు. ఉదయం 10 గంటలకు తిరుచ్చి వాహనంపై సత్యదేవుడు, అనంతలక్ష్మీ సత్యవతీదేవి అమ్మవార్ల ఉత్సవమూర్తులను అర్చకులు వేంచేయించి, పూజలు చేశారు. అనంతరం కొబ్బరి కాయ కొట్టి ప్రాకార సేవ ప్రారంభించారు. ఆలయ ప్రాకారంలో నాలుగు దిక్కులా కొబ్బరి కాయలు కొట్టి సేవను కొనసాగించారు. తదనంతరం స్వామి, అమ్మవార్లకు నీరాజన మంత్రపుష్పాలు సమర్పించి, తిరిగి ఆలయానికి ఊరేగింపుగా తీసుకువెళ్లారు. ఆలయ ప్రాకారంలో సత్యదేవుని రథ సేవను ఆదివారం ఉదయం 10 గంటలకు నిర్వహించనున్నట్లు అధికారులు తెలిపారు.

కాకినాడ క్రైం: ఏళ్లకు ఏళ్లు కాంట్రాక్టు విధానంలో కొనసాగుతూ చాలీచాలని జీతాలు, ఉద్యోగ భద్రత లేకుండా విధులు నిర్వర్తిస్తున్న తమ ఉద్యోగాలను రెగ్యులరైజ్‌ చేయాలని కోరుతూ ఆంధ్రప్రదేశ్‌ నర్సెస్‌ స్ట్రగుల్‌ కమిటీ తరఫున నాయకులు కాకినాడ అర్బన్‌, రూరల్‌ ఎంఎల్‌ఏలు వనమాడి కొండబాబు, పంతం నానాజీలను కలసి శనివారం వినతిపత్రం సమర్పించారు. సంఘ రాష్ట్ర అధ్యక్షురాలు మామిడి చిన్నారి మాట్లాడుతూ నూరు శాతం గ్రాస్‌ శాలరీ కాంట్రాక్టు స్టాఫ్‌ నర్సులకు అమలయ్యేలా చూడాలన్నారు. పీహెచ్‌సీల్లో ఐదుగురు స్టాఫ్‌ నర్సులను నియమించి రాత్రి సమయంలో భద్రతను పటిష్టం చేయాలన్నారు. రూ.50 లక్షల బీమా, మెడికల్‌ లీవ్‌లు అమలు చేయాలని కోరారు. కాంట్రాక్ట్‌ నర్సుల బదిలీలకు అవకాశం కల్పించాలన్నారు. తమ సమస్యలను ప్రభుత్వం దృష్టికి తీసుకెళ్లి సమస్యల పరిష్కారానికి కృషి చేయాలని కోరారు. ఎంఎల్‌ఏలను కలసిన వారిలో నర్సులు సత్యసుధ, సుధ, సుమ తదితరులు ఉన్నారు.

● ఐదేళ్ల కిందటే అర కోటి ఇచ్చారు.. ● ఇప్పుడూ అంతేనా! ● మద్యం వ్యాపారులకు కూటమి నేతల డిమాండ్‌ ● ‘కిక్‌’ కావాలంటే అడిగినంతా ఇవ్వాల్సిందేనని పట్టు ● కొలిక్కి రాని బేరసారాలుసాక్షి ప్రతినిధి, కాకినాడ: ‘మీరు ఏం చేస్తారో తెలీదు. కచ్చితంగా కోటి రూపాయలు కట్టాల్సిందే. ఎప్పుడో ఐదేళ్ల క్రితమే అర కోటి ఇచ్చారు. ఇప్పుడు కూడా అలానే అంటే ఎలా?’ అని కూటమి నేతలు డిమాండ్‌ చేస్తూంటే.. ‘అప్పటి మాదిరిగా ఇప్పుడు వ్యాపారాలు సాగడం లేదు. అంతయితే ఇవ్వలేం. అందులో సగం అయితే మాకు ఓకే. ఆ అర కోటి అయినా ఇవ్వాలంటే బాటిల్‌పై రూ.10 పెంచుకుంటాం. పక్కనున్న మండపేట, రామచంద్రపురం నియోజకవర్గాల్లో బాటిల్‌పై అదనంగా రూ.10 పెంచేందుకు ఒప్పందం కుదిరింది కదా! అలానే ఇక్కడ కూడా అనుమతించి అన్నీ చూసుకోవాలి. అలా మీకు సమ్మతమైతే అగ్రిమెంట్‌ చేసుకుందాం’ అని మద్యం వ్యాపారులు బేరసారాలు చేసుకుంటున్నారు. జిల్లా కేంద్రమైన కాకినాడలో మద్యం వ్యాపారులకు, కూటమి ప్రజాప్రతినిధుల మధ్యవర్తులకు మధ్య పక్షం రోజులుగా ఈ తరహా సంప్రదింపులు ఇప్పుడు హాట్‌ టాపిక్‌గా మారాయి. కాకినాడ నగరం, రూరల్‌ నియోజకవర్గాల్లో కేటాయించిన మద్యం దుకాణదారులను ఒక సిండికేట్‌గా చేసేందుకు గతంలో జరిగిన ప్రయత్నాలు ఫలించ లేదు. చివరకు ఎవరి వ్యాపారం వారు చేసుకుంటున్నారు. అలా ఎవరికి వారు వ్యాపారం వారు చేసుకుంటూ పోతే తామేమైపోవాలని నియోజకవర్గ ముఖ్య నేతలకు ఆలోచన వచ్చింది. అంతే.. మద్యం వ్యాపారుల వద్దకు తమ అనుచరులను రాయబారానికి పంపించారు. సిటీ, రూరల్‌ నియోజకవర్గాల నుంచి ముగ్గురు ద్వితీయ శ్రేణి నేతలు.. మద్యం వ్యాపారులతో ఈ చర్చలు జరిపారు. వ్యాపారుల తరఫున ముగ్గురు, ముఖ్య నేతల ప్రధాన అనుచరులు ఈ సంప్రదింపుల్లో పాల్గొన్నారు. గుట్టుచప్పుడు కాకుండా సాగుతున్న ఈ వ్యవహారానికి కాకినాడ కుళాయి చెరువు సమీపాన ఉన్న ఒక ప్రముఖ హోటల్‌ వేదికై ంది. ఇరు పక్షాల మధ్య ఇప్పటికే రెండు పర్యాయాలు చర్చలు జరిగాయి. ఇంతవరకూ బేరం మాత్రం కుదరలేదు. రూ.కోటి ఇస్తామంటేనే చర్చలు కాకినాడ సిటీలో 36 మద్యం షాపులు, 8 బార్‌లు, కాకినాడ రూరల్‌లో 12 మద్యం దుకాణాలు, 3 బార్‌లు నడుస్తున్నాయి. మొత్తం రెండు నియోజకవర్గాలు కలిపి మొత్తం 48 మద్యం దుకాణాలు, 11 బార్‌లు ఉన్నాయి. వీటిని పర్యవేక్షించే ఎకై ్సజ్‌ శాఖకు ప్రతి నెలా రూ.10 లక్షలు సమీకరించాలనే నిర్ణయానికి వచ్చారు. ఈ విషయం అలా ఉండగా.. సిటీ, రూరల్‌ నియోజకవర్గాల ముఖ్య నేతల విషయంపై ఇరు పక్షాల చర్చల్లో పలు ప్రతిపాదనలు వచ్చాయి. మద్యం షాపులు, బార్లకు లైసెన్స్‌ పొందిన కాలానికి సంబంధించి సిటీలో ముఖ్య నేతకు రూ.కోటి ఇవ్వాలని పట్టుబట్టినట్టు విశ్వసనీయ సమాచారం. అలాగైతేనే చర్చలకు రావాలని, లేదంటే వద్దని ఆయన ప్రతినిధులు కరాఖండీగా చెప్పారని తెలియవచ్చింది. గతంలో అధికారంలో ఉన్నప్పుడే తమ నేతకు రూ.50 లక్షలు ఇచ్చారని, దీనికి రెట్టింపు ఇస్తేనే చర్చలు ముందుకు వెళతాయని ఒకింత గట్టిగానే చెప్పారని అంటున్నారు. దీనికి సై అంటేనే భవిష్యత్‌లో ఏ సమస్య వచ్చినా భుజాన వేసుకుంటామని, అలా కాకుంటే మీ ఇష్టమని చెప్పేశారని సమాచారం. రూరల్‌ నియోజకవర్గ ప్రతిపాదనలను ఇందులో చొప్పించవద్దని, ఇది పూర్తిగా సిటీకి సంబంధించినదని, తమ నేత సీనియర్‌ అని స్పష్టం చేయడంతో వ్యాపారుల ప్రతినిధులు కంగు తిన్నారు. అంత ఇచ్చుకోలేం.. ప్రస్తుతం వ్యాపారాలు అంతంత మాత్రంగానే నడుస్తున్నాయని, అందువలన అంత పెద్ద మొత్తంలో ఇవ్వడం తమ వల్ల కాదని వ్యాపారుల ప్రతినిధులు స్పష్టంగా చెప్పారని తెలిసింది. రూ.3 లక్షలు ఆపైన వ్యాపారం జరిగే దుకాణాలు రెండు నియోజకవర్గాల్లో కలిపి 10కి మించి లేవని, మిగిలిన వాటిలో లావాదేవీలు రూ.2 లక్షలకు మించి జరగడం లేదని వ్యాపారులు చెబుతున్నారు. అటువంటప్పుడు అంతంత భారీ నజరానాలు ఎలా ఇచ్చుకోగలమని వారి ప్రతినిధులు చెప్పడంతో తొలి విడత చర్చలు అర్ధాంతరంగా ముగిశాయి. అ‘ధనం’ వసూలుకు అంగీకరించండి ముఖ్య నేతలకు డిమాండ్‌ మేరకు ఇవ్వాలంటే ఒక్కో మద్యం బాటిల్‌పై అదనంగా రూ.10 వసూలు చేసుకునే ప్రతిపాదనను వ్యాపారుల ప్రతినిధులు రెండో దఫా భేటీలో తెర మీదకు తీసుకువచ్చారు. మండపేట, కొత్తపేట, రామచంద్రపురం నియోజకవర్గాల్లో అదనంగా వసూలు చేసి, అమ్ముకునేందుకు అనుమతించారని, అదేవిధంగా ఇక్కడ కూడా అనుమతిస్తే రూ.కోటి డిమాండుపై ఆలోచిస్తామని స్పష్టం చేశారని విశ్వసనీయ వర్గాల సమాచారం. దీనిపై ఏ విషయమూ తేలకపోవడంతో మరోసారి భేటీ కావాలనే నిర్ణయానికి వచ్చి, చర్చలకు ముగింపు పలికారు. ఏమవుతుందో వేచి చూడాల్సిందే.

● చదువుకోవడానికే కళాశాలకు రావాలి ● సామర్లకోట కళాశాల విద్యార్థులకు కలెక్టర్‌ హెచ్చరికసామర్లకోట: స్థానిక ప్రభుత్వ జూనియర్‌ కళాశాలలో గంజాయి విచ్చలవిడిగా ఉన్నట్లు ఆరోపణలు రావడం సిగ్గుచేటని జిల్లా కలెక్టర్‌ షణ్మోహన్‌ సగిలి ఆగ్రహం వ్యక్తం చేశారు. స్థానిక ప్రభుత్వ జూనియర్‌ కళాశాలలో డొక్కా సీతమ్మ మధ్యాహ్న భోజన పథకాన్ని ఆయన శనివారం ప్రారంభించారు. ఈ సందర్భంగా ఏర్పాటు చేసిన సభలో మాట్లాడుతూ, విద్యార్థులు డ్రగ్స్‌కు అలవాటు పడినట్లు తెలిస్తే వారిపై కేసులు పెట్టడానికి కూడా వెనుకాడేది లేదని హెచ్చరించారు. విద్యార్థులు చదువుకోవడానికి మాత్రమే కళాశాలకు రావాలని చెప్పారు. ఇక నుంచి ప్రతి నెలా ఇంటర్‌ విద్యార్థుల పరిస్థితిపై సమీక్షిస్తామని, ఏ విద్యార్థిపై ఫిర్యాదు వచ్చినా చర్యలు తీవ్రంగా ఉంటాయని హెచ్చరించారు. ఇటీవల ఇంటర్‌ విద్యార్థుల క్వార్టర్లీ పరీక్ష పేపర్లు పరిశీలించామని, అనేక మంది వెనుకబడి ఉన్నారని అన్నారు. ఉతీర్ణత శాతం పెంచడానికి ఇంటర్‌ విద్యార్థులకు ఉదయం 9 నుంచి సాయంత్రం 5 గంటల వరకూ తరగతులు నిర్వహిస్తామని చెప్పారు. ఎమ్మెల్యే నిమ్మకాయల చినరాజప్ప కూడా ప్రసంగించారు. కార్యక్రమంలో ప్రిన్సిపాల్‌ లీలా శ్రీదేవి, కాకినాడ నగరాభివృద్ధి సంస్థ చైర్మన్‌ తుమ్మల బాబు, మున్సిపల్‌ చైర్‌పర్సన్‌ గంగిరెడ్డి అరుణ, వైస్‌ చైర్మన్‌ గోకిన సునేత్రాదేవి, ఎంఈఓలు వై.శివరామకృష్ణయ్య, పి.పుల్లయ్య తదితరులు పాల్గొన్నారు.

పెద్దాపురం: తొలి తిరుపతి గ్రామంలో వెలసిన స్వయంభూ శృంగార వల్లభస్వామి ఆలయానికి శనివారం భక్తులు పెద్ద సంఖ్యలో తరలివచ్చారు. దీంతో ఆలయంలో రద్దీ ఏర్పడింది. వివిధ ప్రాంతాల నుంచి వచ్చిన సుమారు 7 వేల మంది భక్తులు స్వామివారిని దర్శించుకున్నారు. వివిధ సేవల టికెట్లు, కేశఖండన, అన్నదాన విరాళాల రూపంలో దేవస్థానానికి రూ.1,28,743 ఆదాయం సమకూరిందని ఆలయ ఈఓ వడ్డి శ్రీనివాస్‌ తెలిపారు. ఐదు వేల మంది భక్తులకు ప్రసాద వితరణ, అన్నదానం ఏర్పాటు చేశామన్నారు. కొనసాగిన వలంటీర్ల దీక్షలు కాకినాడ సిటీ: ఏపీ గ్రామ, వార్డు వలంటీర్ల సంఘం ఆధ్వర్యాన వలంటీర్లు కలెక్టరేట్‌ వద్ద చేపట్టిన రిలే నిరాహార దీక్షలు రెండో రోజైన శనివారం కూడా కొనసాగాయి. ఈ శిబిరాన్ని సీఐటీయూ జిల్లా అధ్యక్షుడు దువ్వా శేషుబాబ్జీ ప్రారంభించారు. ఈ సందర్భంగా ఆయన మాట్లాడుతూ, కూటమి ప్రభుత్వం ఇచ్చిన హామీ అమలు చేయాలనే డిమాండు నెరవేర్చుకునేందుకు అంగన్‌వాడీ కార్యకర్తల ఉద్యమ స్ఫూర్తితో పోరాడాలని పిలుపునిచ్చారు. వలంటీర్ల భుజంపై తుపాకీ పెట్టి వైఎస్‌ జగన్‌మోహన్‌రెడ్డిని టార్గెట్‌ చేసే ఎత్తుగడను టీడీపీ నాయకులు మానుకోవాలని డిమాండ్‌ చేశారు. ఎన్నికల ముందు చెప్పినట్లుగా వలంటీర్లందరికీ రూ.10 వేల వేతనం చెల్లించాలని, అందరినీ కొనసాగించాలని విజ్ఞప్తి చేశారు. పండగ రోజుల్లో కూడా వలంటీర్లను పస్తులతో గడిపేలా చేసిన చంద్రబాబుకు బుద్ధి చెప్పేందుకు సిద్ధం కావాలని శేషుబాబ్జీ పిలుపునిచ్చారు. కార్యక్రమంలో సీఐటీయూ జిల్లా కార్యదర్శి చెక్కల రాజ్‌కుమార్‌, కోశాధికారి మలకా రమణ, వలంటీర్ల సంఘం జిల్లా వర్కింగ్‌ కమిటీ సభ్యులు ప్రకాష్‌, వరుణ్‌కుమార్‌, సతీష్‌, వరలక్ష్మి, కె.దుర్గా తదితరులు పాల్గొన్నారు. వ్రత పురోహితుడి సస్పెన్షన్‌ అన్నవరం: సత్యదేవుని వ్రతాలాచరిస్తున్న భక్తులను దానాలు ఇవ్వాలని ఇబ్బంది పెట్టాడనే ఆరోపణలపై రెండో తరగతి వ్రత పురోహితుడు అల్లంరాజు అచ్యుత్‌ భగవాన్‌ను సస్పెండ్‌ చేస్తూ అన్నవరం దేవస్థానం ఈఓ వీర్ల సుబ్బారావు ఆదివారం ఆదేశాలు జారీ చేశారు. ఈ నెల రెండో తేదీన వ్రతం ఆచరించిన తనను ఆ వ్రత పురోహితుడు కానుకలు అడిగినట్టు ఓ భక్తుడు ఫిర్యాదు చేయడంతో ఈఓ ఈ నిర్ణయం తీసుకున్నారు. భక్తులను ఇబ్బంది పెడితే తీవ్ర చర్యలుంటాయని ఆయన పురోహితులను హెచ్చరించారు. నైపుణ్యాభివృద్ధిలో ఉచిత శిక్షణ కాకినాడ సిటీ: జిల్లాలోని ముస్లిం, క్రిస్టియన్‌, సిక్కు, బౌద్ధ, పార్సీ, జైన వర్గాలకు చెందిన నిరుద్యోగ యువత నైపుణ్యాభివృద్ధికి వివిధ రంగాల్లో ఉచిత శిక్షణ ఇవ్వనున్నారు. జిల్లా మైనారిటీ సంక్షేమ అధికారి ఎం.సునీల్‌ కుమార్‌ శనివారం ఒక ప్రకటనలో ఈ విషయం తెలిపారు. శిక్షణ కాలంలో అభ్యర్థులకు ఉచిత వసతి, యూనిఫాం, భోజనం, స్టడీ మెటీరియల్‌ ఇవ్వనున్నామన్నారు. అర్హులైన వారు ‘మైనారిటీస్‌ ఫైనాన్స్‌ కార్పొరేషన్‌ కార్యాలయం, డోర్‌ నంబర్‌ 11–1–29, శ్రీ పద్మా టవర్స్‌, రామారావుపేట, కాకినాడ’ చిరునామాలో దరఖాస్తులు అందజేయాలని సునీల్‌ కుమార్‌ కోరారు. దేహదారుఢ్య పరీక్షల్లో పాల్గొన్న అభ్యర్థినులు కాకినాడ క్రైం: కాకినాడలోని పోలీస్‌పరేడ్‌ మైదానంలో శనివారం కానిస్టేబుల్‌ ఉద్యోగ నియామక ప్రక్రియ జరిగింది. 320 మంది మహిళా అభ్యర్థినులు ఈ పరీక్షల్లో పాల్గొన్నారు. వీరిలో 203 మంది అభ్యర్థినులు తదుపరి పరీక్షలకు అర్హులయ్యారు. ఎస్పీ విక్రాంత్‌ పాటిల్‌ ఈ పరీక్షలను నేరుగా పర్యవేక్షించారు.

● కాకినాడ జీజీహెచ్‌లో క్యాన్సర్‌ ఐసీయూ, పాలియేటివ్‌ కేర్‌ సేవలు ప్రారంభం ● డాక్టర్‌ పేర్రాజు దినవహి జ్ఞాపకార్థం బ్యాచ్‌మేట్లు, కుటుంబీకుల వితరణ ● డయాలసిస్‌ యూనిట్‌లో ఆర్‌ఓ ప్లాంటు ఏర్పాటు కాకినాడ క్రైం: జీజీహెచ్‌లో క్యాన్సర్‌ ఐసీయూతో పాటు పాలియేటివ్‌ కేర్‌ (ఉపశమన సంరక్షణ) సేవలు శనివారం ప్రారంభమయ్యాయి. రంగరాయ వైద్య కళాశాలలో 2001 బ్యాచ్‌ (థండర్స్‌)కు చెందిన డాక్టర్‌ పేర్రాజు దినవహి అత్యుత్తమ వైద్య సేవలతో భారత కీర్తిని అమెరికాలో విస్తరించారు. 2021లో క్యాన్సర్‌ బారిన పడి గతేడాది ఆగస్టు 24న మరణించిన ఆయన జ్ఞాపకార్థం.. కుటుంబీకులు, బ్యాచ్‌మేట్లు జీజీహెచ్‌లో రూ.9 లక్షలతో ప్రత్యేక క్యాన్సర్‌ ఐసీయూ ఏర్పాటు చేశారు. 6 పడకలతో పాటు 6 మల్టీ పారా మానిటర్లు, రెండు ఏసీలు, ఎనిమిది ఆక్సిజన్‌ పాయింట్లు, ఏర్పాటు చేసి క్యాన్సర్‌ బాధితుల ప్రాణాలకు భరోసా కల్పించారు. ఐసీయూ ఏర్పాటు ప్రక్రియలో 2001 బ్యాచ్‌కు చెందిన డాక్టర్‌ తేజోకృష్ణ, డాక్టర్‌ ఫణి కీలకంగా వ్యవహరించారు. ఆంకాలజీ హెచ్‌ఓడీ డాక్టర్‌ పద్మనాభన్‌ శ్రీనివాసన్‌ చొరవ చూపారు. కీమో థెరపీ తీసుకుంటున్న వారికి వరం కీమోథెరపీ ఆధారిత క్యాన్సర్‌ బాధితులకు క్యాన్సర్‌ ఐసీయూ వరంగా మారనుంది. క్యాన్సర్‌ చికిత్సలో భాగమైన కీమోథెరపీ రోగి స్థితిని మరింత దుస్థితిలోకి నెడుతుంది. హైఎండ్‌ కీమోథెరపీ తీసుకుంటున్న బాధితులకు తెల్లరక్తకణాల సంఖ్య క్షీణిస్తుంది. జ్వరం, వాంతులు, విరేచనాలతో పాటు ఇతర ఆరోగ్య సమస్యలకు దారి తీస్తుంది. ఈ స్థితిని వైద్య పరిభాషలో ఫెబ్రాయిల్‌ న్యూట్రోపీనియా అంటారు. ఈ స్థితిలో క్యాన్సర్‌ బాధితుడికి ప్రాణాపాయం వాటిల్లే అవకాశం ఉంది. అటువంటి వారికి ఈ ఐసీయూలో అందించే వైద్య సేవ అపర సంజీవనిగా నిలుస్తుంది. త్వరలో ఈ వార్డు మొత్తాన్ని పూర్తి స్థాయి ఐసీయూగా మార్చే ప్రణాళిక సిద్ధం చేసినట్టు హెచ్‌ఓడీ శ్రీనివాస్‌ తెలిపారు. ఇప్పటివరకూ రోగికి ఐసీయూ అవసరమైతే మరో డిపార్ట్‌మెంట్‌ ఐసీయూకి తరలించాల్సి వచ్చేది. ఆ డిపార్ట్‌మెంట్‌లో క్యాన్సర్‌ నిపుణులు ఉండేవారు కాదు. ప్రత్యేక ఐసీయూ ఏర్పాటుతో ఆ కష్టాలకు అడ్డుకట్ట పడింది. రోగి ఆరోగ్య పరిస్థితికి అనుగుణంగా నాలుగైదు రోజుల పాటు ఐసీయూ వైద్య సేవలు అందిస్తారు. జీజీహెచ్‌ ఆంకాలజీ ఓపీ భవంతిలో పాలియేటివ్‌ కేర్‌ ఓపీ కూడా ఏర్పాటు చేశారు. క్యాన్సర్‌తో ఆరోగ్యపరంగా, మానసికంగా వేదన అనుభవిస్తున్న రోగులకు ఇక్కడ ఉపశమన చికిత్స లభిస్తుంది. ఇందుకు ఓ ప్రత్యేక వైద్యుడుని, రోగులకు ఓ సహాయకురాలిని నియమించారు. కనీసం రోజుకు 5 నుంచి 10 మంది ఈ సేవలు వినియోగించుకునే అవకాశం ఉంది. అలాగే మెడికల్‌ వార్డులోని గౌండ్‌ ఫ్లోర్‌లో ఉన్న డయాలసిస్‌ యూనిట్‌ ద్వారా కిడ్నీ బాధితులకు విశేష సేవలు అందుతున్నాయి. రక్షిత జలాలతో డయాలసిస్‌ చేస్తే మరింత ఉత్తమ ఫలితాలు వచ్చే అవకాశం ఉంది. ఈ మేరకు యూనిట్‌ పై అంతస్తులో ప్రత్యేకించి డయాలసిస్‌ కోసం ఓ ఆర్‌వో ప్లాంట్‌ కూడా ఏర్పాటు చేశారు. ఈ సేవలను కాకినాడ సిటీ ఎమ్మెల్యే వనమాడి వెంకటేశ్వరరావు, రూరల్‌ ఎమ్మెల్యే పంతం నానాజీ ప్రారంభించారు. ఈ సందర్భంగా క్యాన్సర్‌ ఓపీ ఆవరణలో జీజీహెచ్‌ సూపరింటెండెంట్‌ డాక్టర్‌ లావణ్యకుమారి అధ్యక్షతన జరిగిన సమావేశంలో హెచ్‌ఓడీలు డాక్టర్‌ యశోదమ్మ, డాక్టర్‌ అనురాధ, డిప్యూటీ కలెక్టర్‌, ఆసుపత్రి అడ్మినిస్ట్రేటర్‌ శ్రీధర్‌, హెచ్‌డీఎస్‌ సభ్యుడు డాక్టర్‌ కొండమూరి సత్యనారాయణ, ఆంకాలజీ నిపుణులు కర్రా ప్రదీప్‌, నరసింహులు, రామ్మోహన్‌, రామ్‌కోశా నుంచి డాక్టర్‌ ఆనంద్‌, డాక్టర్‌ గౌతమ్‌ ప్రవీణ్‌, డాక్టర్‌ ఆదిత్య సత్యప్రసన్న తదితరులు పాల్గొన్నారు. ఐసీయూ ఏర్పాటుతో క్యాన్సర్‌ రోగులకు మరింత నాణ్యమైన సేవలు అందనున్నాయని రేడియేషన్‌ ఆంకాలజీ హెచ్‌ఓడీ డాక్టర్‌ పద్మనాభన్‌ శ్రీనివాసన్‌ చెప్పారు. దాతలు మరింతగా సహకరించాలని కోరారు.

బోట్‌క్లబ్‌ (కాకినాడ సిటీ): జిల్లా పరిషత్‌ పరిధిలోని వివిధ పాఠశాలల్లో పని చేస్తూ మరణించిన ఉద్యోగుల వారసులకు జిల్లా పరిషత్‌ చైర్మన్‌ విప్పర్తి వేణుగోపాలరావు, సీఈఓ వీవీఎస్‌ లక్ష్మణరావు శుక్రవారం కారుణ్య నియామక ఉత్తర్వులు అందజేశారు. ఇటీవల ఏడుగురు మరణించగా వారి వారసులను జూనియర్‌ అసిస్టెంట్లుగా నియమించారు. ఇద్దరు రికార్డ్‌ అసిస్టెంట్లకు జూనియర్‌ అసిస్టెంట్లుగా పదోన్నతి కల్పించారు. ఖాళీలు ఏర్పడగానే ఎప్పటికప్పుడు నిబంధనల మేరకు కారుణ్య నియామకాలు చేపడుతున్నామని చైర్మన్‌ విప్పర్తి చెప్పారు. ఉద్యోగుల పదోన్నతులకు చర్యలు తీసుకుంటున్నామన్నారు. కొత్తగా నియమితులైన ఉద్యోగులు కష్టపడి పని చేసి, మంచి పేరు తెచ్చుకోవాలని కోరారు. 6న జాబ్‌ మేళా బోట్‌క్లబ్‌ (కాకినాడ సిటీ): కలెక్టరేట్‌లోని వికాస కార్యాలయంలో ఈ నెల 6న జాబ్‌మేళా నిర్వహిస్తున్నట్లు వికాస ప్రాజెక్ట్‌ డైరెక్టర్‌ కె.లచ్చారావు శుక్రవారం ఒక ప్రకటనలో తెలిపారు. హాల్‌ మార్క్‌ గ్లోబల్‌ టెక్నాలజీ కంపెనీలో జూనియర్‌ అకౌంటెంట్‌, అకౌంటెంట్‌ ఎగ్జిక్యూటివ్‌ ఉద్యోగా లకు బీకాం, ఎంకాం, ఎంబీఏ, సీఏ, ఇంటర్‌ ఉత్తీర్ణులైన ఫ్రెషర్స్‌ అర్హులన్నారు. టాలీ, అకౌంటింగ్‌ సాఫ్ట్‌వేర్‌ కోర్సులలో అవగాహన ఉన్న పురుష అభ్యర్థులు హాజరు కావాలని సూచించారు. వరుణ్‌ మోటార్స్‌లో రిలేషన్‌షిప్‌ మేనేజర్లు, ఇన్సూరెన్స్‌ ఎగ్జిక్యూటివ్‌ పోస్టులకు, హోండా కంపెనీలో ఉద్యోగాలకు ఇంటర్వ్యూలు నిర్వహిస్తామన్నారు. ఈ ఉద్యోగాలకు పదో తరగతి, ఇంటర్‌, ఐటీఐ డిప్లొమా, డిగ్రీ, బీటెక్‌ ఉత్తీర్ణులైన 35 సంవత్సరాల్లోపు అభ్యర్థులు అర్హులని తెలిపారు. వీరికి నెలకు రూ.12,800 నుంచి రూ.18 వేల వరకూ జీతం, ఆయా ఉద్యోగాలను బట్టి ఇన్సెంటివ్‌, భోజన, వసతి, రవాణా సౌకర్యాలు ఉంటాయని వివరించారు. ఆ రోజు ఉదయం 9 గంటలకు తమ కార్యాలయానికి విద్యార్హత సర్టిఫికెట్ల జిరాక్స్‌ కాపీలతో ఇంటర్వ్యూలకు హాజరు కావాలని లచ్చారావు సూచించారు. వివరాలకు 77993 76111 నంబర్‌లో సంప్రదించాలన్నారు. 295 మందికి దేహదారుఢ్య పరీక్షలుకాకినాడ క్రైం: కానిస్టేబుళ్ల ఎంపిక ప్రక్రియలో భాగంగా శుక్రవారం మహిళా అభ్యర్థిలనులకు దేహదారుఢ్య పరీక్షలు నిర్వహించారు. స్థానిక పోలీస్‌ పరేడ్‌ మైదానంలో జరిగిన ఈ పరీక్షలకు ఉమ్మడి జిల్లా వ్యాప్తంగా 295 మంది హాజరయ్యారు. పరీక్షల నిర్వహణను ఎస్పీ విక్రాంత్‌ పాటిల్‌ నేరుగా పర్యవేక్షించారు. 180 మంది అభ్యర్థినులు తదుపరి పరీక్షలకు ఎంపికయ్యారు.

బోట్‌క్లబ్‌ (కాకినాడ సిటీ): ఈ నెల 5న విజయవాడలో జరిగే హైందవ శంఖారావానికి లక్షలాదిగా హిందువులు తరలి రావాలని విశ్వహిందూ పరిషత్‌ (వీహెచ్‌పీ) జిల్లా అధ్యక్షుడు, శంఖారావం జిల్లా కన్వీనర్‌ ఆర్‌.రవిశంకర్‌ పట్నాయక్‌ కోరారు. గాంధీనగర్‌లో శుక్రవారం జరిగిన విలేకర్ల సమావేశంలో ఆయన మాట్లాడారు. స్వాతంత్య్రం వచ్చి 77 సంవత్సరాలైనా హిందూ దేవాలయాలకు స్వయం ప్రతిపత్తి దక్కలేదన్నారు. హిందూ దేవాలయాలను ప్రభుత్వ నియంత్రణ నుంచి విముక్తం చేసి, స్వయం ప్రతిపత్తి కలిగిన ఉత్తమ ధార్మిక వ్యవస్థకు అప్పగిస్తూ వెంటనే చట్ట సవరణ చేయాలనే డిమాండుతో వీహెచ్‌పీ జాతీయ ఉద్యమానికి శ్రీకారం చుట్టిందన్నారు. జిల్లా నుంచి సుమారు 300 బస్సులు చలో విజయవాడకు బయలుదేరుతున్నాయని తెలిపారు. 92400 1533 నంబర్‌కు మిస్డ్‌ కాల్‌ ఇచ్చి, వచ్చిన లింక్‌ ద్వారా పేరు రిజిస్టర్‌ చేసుకొని మద్దతు తెలపాలని కోరారు. వీహెచ్‌పీ కాకినాడ విభాగ్‌ సంఘటనా కార్యదర్శి గంధం గోవిందు, జిల్లా ఉపాధ్యక్షురాలు చల్లా శ్రీకృష్ణవాణి కూడా మాట్లాడారు. ఈ సందర్భంగా హైందవ శంఖారావం జెండాలు, బ్యానర్లు ఆవిష్కరించారు. కార్యక్రమంలో వీహెచ్‌పీ సీనియర్‌ నేతలు మద్దూరి శ్రీరామచంద్రమూర్తి, గరిమెళ్ళ అన్నపూర్ణయ్యశర్మ, జిల్లా సహ కార్యదర్శి జి.ఉదయ భానోజీరావు, నగర అధ్యక్షుడు రెడ్నం రాజా పాల్గొన్నారు. రేపటి నుంచి యూటీఎఫ్‌ స్వర్ణోత్సవ మహాసభలు బోట్‌క్లబ్‌ (కాకినాడ సిటీ): ఈ నెల 5 నుంచి 8వ తేదీ వరకూ ఆంధ్రప్రదేశ్‌ ఐక్య ఉపాధ్యాయ ఫెడరేషన్‌ (ఏపీ యూటీఎఫ్‌) స్వర్ణోత్సవ మహాసభలు కాకినాడ పీఆర్‌ డిగ్రీ కళాశాల ప్రాంగణంలో జరగనున్నాయని ఆ సంఘం రాష్ట్ర అధ్యక్షుడు ఎన్‌.వెంకటేశ్వర్లు తెలిపారు. యూటీఎఫ్‌ జిల్లా కార్యాలయంలో శుక్రవారం ఏర్పాటు చేసిన విలేకర్ల సమావేశంలో ఆయన మాట్లాడారు. సమాజంలో సమానత్వ భావనను ప్రోది చేసే ప్రభుత్వ విద్యారంగ అభివృద్ధికి, పరిరక్షణకు, ఉపాధ్యాయుల సంక్షేమానికి గత 50 ఏళ్లుగా యూటీఎఫ్‌ ఎంతో కృషి చేసిందని చెప్పారు. మా ధర్మం గొప్పదంటే మా ధర్మం గొప్పదనే చర్చలు నడుస్తున్న ప్రస్తుత కాలంలో ఏ ధర్మాన్ని పాటించాలో ఉపాధ్యాయులు తేల్చుకోవాలన్నారు. రాజ్యాంగ ధర్మాన్ని పాటించాలని, సమానత్వాన్ని, లౌకికత్వాన్ని విద్యార్థులకు నేర్పాలని కోరారు. ప్రభుత్వ విద్యారంగాన్ని, భారత రాజ్యాంగాన్ని పరిరక్షించుకోవడం నినాదంగా ఈ మహాసభలు జరుగుతున్నాయని వెంకటేశ్వర్లు తెలిపారు. యూటీఎఫ్‌ రాష్ట్ర గౌరవాధ్యక్షుడు కొమ్మోజు శ్రీనివాసరావు, రాష్ట్ర కార్యదర్శులు రెడ్డి మోహనరావు, ఎన్‌.అరుణకుమారి, ఎస్‌.కిషోర్‌ కుమార్‌, టి.అన్నారాం మాట్లాడుతూ, నూతన ప్రభుత్వం ఏర్పడి ఆరు నెలలు పూర్తవుతోందని, 12వ పీఆర్‌సీని ఇంతవరకూ నియమించలేదని తెలిపారు. యూటీఎఫ్‌ స్వర్ణోత్సవ సభల్లో వివిధ రాజకీయ పార్టీల ప్రముఖ నాయకులు హాజరై, విద్యారంగంపై వారి అభిప్రాయాలు తెలియజేస్తారని చెప్పారు. సాంస్కృతిక సదస్సు, మహిళా సదస్సు, ఉద్యమ సదస్సుల్ని రెండు రోజుల పాటు నిర్వహిస్తున్నామని తెలిపారు. అనంతరం స్వర్ణోత్సవాల పోస్టర్లను ఆవిష్కరించారు. సమావేశంలో యూటీఎఫ్‌ జిల్లా అధ్యక్ష ప్రధాన కార్యదర్శులు కేవీవీ నాగేశ్వరరావు, టి.రవి చక్రవర్తి పాల్గొన్నారు.

ప్రాజెక్టు: సోలార్‌ ఎనర్జీ ఉద్దేశం: నేటి కాలంలో ఎక్కువవుతున్న విద్యుత్‌ వినియోగాన్ని అధిగమించేందుకు సోలార్‌ పవర్‌ వినియోగించడం. ఇళ్లు, కార్యాలయాల్లో సోలార్‌ పవర్‌ వినియోగించి, విద్యుత్‌ను ఆదా చేయడం. వాడిన పరికరాలు: సోలార్‌ ప్యానల్స్‌, 2.5 బ్యాటరీ ఓల్ట్‌, థర్మకోల్‌ షీట్‌, ప్లేవుడ్‌ షీట్‌ విద్యార్థులు: జీహెచ్‌ఎన్‌ఎస్‌ అఖిల్‌, కార్తీక్‌. టీచర్‌: ఎస్‌.పుష్పవేణి, విక్టరీ స్కూల్‌ ప్రాజెక్టు: రెయిన్‌ డిటెక్టర్‌ ఉద్దేశం: వర్షం వచ్చే ముందు హెచ్చరిక చేయడం. వరి పంట కోసినప్పుడు లేదా ధాన్యం ఆరబెట్టినప్పుడు అకస్మాత్తుగా వర్షం వచ్చి, పంట పాడవుకుండా సైరన్‌ మోగడం. వాడిన పరికరాలు: 5 ఓల్ట్స్‌ బ్యాటరీ, బజర్‌, బ్లేడులు, వైరు, ప్యాడ్‌ విద్యార్థి: పి.గాయత్రి టీచర్‌: వి.సుజన, జి.మామిడాడ జిల్లా పరిషత్‌ పాఠశాల ప్రాజెక్టు: స్కూల్‌ అటెండెన్స్‌ స్కానర్‌ ఉద్దేశం: విద్యాలయాల్లో ఐడీ కార్డు స్కానింగ్‌ ద్వారా హాజరు నమోదు. స్కూళ్లలో మాన్యువల్‌ అటెండెన్స్‌ విధానానికి చెక్‌ చెప్పడం. వాడిన పరికరాలు: కేబుల్‌, స్క్రీన్‌, రీడర్‌ మాడ్యులర్‌ విద్యార్థులు: వి.చిన్ని, ఎస్‌.కృష్ణతేజ, రౌతులపూడి మండలం బలభద్రపురం ఉన్నత పాఠశాల ప్రాజెక్టు: మల్టీపర్పస్‌ ఫర్‌ హోమ్‌ ఉద్దేశం: ఇంట్లో క్లీనింగ్‌, డ్రయ్యర్‌, వాషింగ్‌, థెఫ్ట్‌ అలర్ట్‌, ఫైర్‌ అలర్ట్‌, మెసేజ్‌ పార్వార్డ్‌, ఎంటర్‌టైన్‌మెంట్‌, మొబైల్‌ చార్జర్‌ వంటి పనులన్నింటికీ ఉపయోగపడేలా ఒకే పరికరం రూపొందించడం. వాడిన పరికరాలు: చార్జింగ్‌ మాడ్యూల్‌, బ్లూటూత్‌, హయ్యర్‌ సెన్సార్‌, గేర్‌ మోటార్‌, ఆర్‌సీ ట్రాన్స్‌లేటర్‌, రిసీవర్‌, బ్యాటరీ, పైప్‌ విద్యార్థి: ఎం.సాయిబాబు, ధర్మవరం జిల్లా పరిషత్‌ ఉన్నత పాఠశాల ప్రాజెక్టు: నీటి వనరులను శుద్ధి చేయడం ఉద్దేశం: చెరువులు, కాలువలు, నదుల్లో ఉన్న గుర్రపుడెక్క, పూడికలు తొలగించడం. వర్షాకాలం వచ్చే ముందు ఈ యంత్రంతో నీటి వనరులను శుద్ధి చేయడం ద్వారా పంటలకు సక్రమంగా సాగునీరు అందించేలా చూడటం. వాడిన పరికరాలు: 5 డీసీ మోటార్‌, మోటార్‌ డ్రైవర్‌, ఫోర్‌ వీల్‌, పీవీసీ ప్లేట్లు, కన్వర్జబుల్‌ బెల్ట్‌, థర్మకోల్‌ షీటు. విద్యార్థులు: ఎం.మోహన్‌ కుమార్‌, జీవీవీ దుర్గాప్రసాద్‌ గైడ్‌: ఆర్‌.వినయ్‌, పెదపూడి జిల్లా పరిషత్‌ పాఠశాల ప్రాజెక్టు: మల్టీపర్పస్‌ అగ్రికల్చరల్‌ మెషీన్‌ ఉద్దేశం: చిన్నకారు రైతులకు ఉపయోగపడేలా మల్టీపర్పస్‌ మెషీన్‌తో పొలం దున్నడం, విత్తనాలు వేయడం, నేల చదును చేయడం, నీరు పెట్టడం వంటి పనులు ఒక్కరితో చేయడం. వాడిన పరికరాలు: 12 ఓల్ట్స్‌ మోటార్‌ గేర్‌, పీవీసీ పైపు, ఐరన్‌, ప్లాస్టిక్‌ పైపు తయారు చేసిన వారు: ఎంఎస్‌ఆర్‌ మూర్తి, బయాలజీ టీచర్‌, పి.చిన్నాయిపాలెం జిల్లా పరిషత్‌ పాఠశాల● సైన్స్‌ ప్రదర్శనలో సత్తా చాటిన బాలలు ● 109 ప్రాజెక్టుల ప్రదర్శనబాలాజీచెరువు (కాకినాడ సిటీ): తమ ఆలోచనలకు సాంకేతికతను జోడిస్తూ జిల్లాలోని ప్రభుత్వ పాఠశాలల విద్యార్థులు సమాజానికి ఉపయోగపడేలా నమూ నా సైన్స్‌ ప్రాజెక్టులకు రూపకల్పన చేశారు. పాఠశాల విద్యాశాఖ, విశ్వేశ్వరయ్య ఇండస్ట్రీ అండ్‌ టెక్నాలజికల్‌ మ్యూజియం (బెంగళూరు) ఆధ్వర్యాన జిల్లా స్థాయి దక్షిణ భారత విద్యా వైజ్ఞానిక ప్రదర్శనను కాకినాడ సాలిపేట బాలికల హైస్కూలులో శుక్రవారం నిర్వహించారు. మండల స్థాయిలో ప్రతిభ చూసిన 8, 9, 10 తరగతుల విద్యార్థులు మొత్తం 109 ప్రాజెక్టులు ప్రదర్శించారు. ఈ ప్రదర్శనను ఎమ్మెల్సీలు ఐవీ రావు, కర్రి పద్మశ్రీ, కాకినాడ నగరాభివృద్ధి సంస్థ (కౌడా) చైర్మన్‌ తుమ్మల రామస్వామి ప్రారంభించారు. జిల్లా విద్యాశాఖాధికారి పిల్లి రమేష్‌, సైన్స్‌ అధికారి వినిల్‌, కేసరి శ్రీనివాసరావు పాల్గొన్నారు. రాష్ట్ర స్థాయికి ఎంపికై న ప్రాజెక్టులు వ్యక్తిగత విభాగం: మల్టీపర్పస్‌ మెషీన్‌ (ఎం.సాయిబాబు, ధర్మవరం జెడ్పీ హైస్కూల్‌), సోలార్‌ ప్యానల్‌ (కె.బలరామశివ, బెండపూడి). గ్రూప్‌ విభాగం: ప్రొడక్ట్‌ ఎనర్జీ ఫుట్‌స్టెప్స్‌ (ఎం.వందన, ఎండీ తమన్న, సామర్లకోట), అబ్‌స్ట్రాకిల్‌ ఎవాయిడింగ్‌ కార్‌ (డి.హర్షిత్‌, పి.తేజవర్ధన్‌, బెండపూడి) టీచర్‌ విభాగం: మల్టీపర్పస్‌ ఎగ్జిబిట్‌ ఆఫ్‌ నోకాస్ట్‌ (వి.తీర్థరామ్‌, వాకలపూడి), ఆల్‌రౌండర్‌ 90డిగ్రీ (పి.రవిశంకర్‌, యు.కొత్తపల్లి).

● నమో.. వేంకటేశా..తుని రూరల్‌: కలియుగ ప్రత్యక్ష దైవమైన శ్రీ వేంకటేశ్వర స్వామివారు తుని మండలం ఎస్‌.అన్నవరం గ్రామంలో చిత్రాన్నం(పులిహోర)తో.. విచిత్రాకృతిలో భక్తులకు కనువిందు చేశారు. గ్రామంలో కొలువు తీరిన శ్రీదేవి, భూదేవి సమేత ప్రసన్న వేంకటేశ్వరస్వామి దేవస్థానంలో నిర్వహిస్తున్న ధనుర్మాసోత్సవాల్లో భాగంగా స్వామివారికి అర్చకులు, ధర్మకర్తలు శుక్రవారం తిరుప్పావడ సేవ, గోదాదేవి అమ్మవారికి సహస్ర దీపాలంకార సేవలు నిర్వహించారు. తిరుప్పావడ సేవలో భాగంగా ఒకటిన్నర టన్నుల పులిహోరతో అర్చకులు స్వామివారి ప్రతిరూపాన్ని రూపొందించారు. బూరెలు, వివిధ రకాల పండ్లు, డ్రై ఫ్రూట్స్‌తో విశేషంగా అలంకరించారు. వేలాదిగా తరలివచ్చిన భక్తులు క్యూలైన్లలో వేచి ఉండి మరీ స్వామి ‘చిత్రాన్న’ రూపాన్ని దర్శించుకుని ఆనందపరవశులయ్యారు. ఆలయంలో స్వామి, అమ్మవార్లను దర్శించి, పూజలు చేశారు. ఈ సందర్భంగా నిర్వహించిన అన్న సమారాధనలో వేలాదిగా భక్తులు అన్న ప్రసాదం స్వీకరించారు. రాత్రి ఏడు గంటలకు నిర్వహించిన గోదాదేవి అమ్మవారి సహస్ర దీపాలంకార సేవలో పెద్ద సంఖ్యలో మహిళా భక్తులు పాల్గొన్నారు. ధర్మకర్తలు కంకిపాటి జమీలు, దాడిశెట్టి విష్ణుచక్రం, పోతుల వెంకట రమేష్‌, మేగాదుల సత్యనారాయణ, పన్నీరు బాబ్జీ, దండెం రామకృష్ణ, కాశపు వెంకట రమణ, పెదపూడి విష్ణు ఈశ్వరరావు, తూము రమణ, భక్తులు పాల్గొన్నారు. 10న ఉత్తర ద్వార దర్శనం ఈ నెల పదో తేదీన వైకుంఠ ఏకాదశి పర్వదినాన్ని పురస్కరించుకుని ఆలయంలో ప్రత్యేక ఏర్పాట్లు చేస్తున్నట్టు ధర్మకర్తలు తెలిపారు. ఆ రోజు ఉదయం 5 గంటల నుంచి స్వామి, అమ్మవార్లను ఉత్తర ద్వారం నుంచి భక్తులు దర్శించుకోవచ్చన్నారు. 13వ తేదీ రాత్రి ఏడు గంటలకు గోదా రంగనాథుల దివ్య కల్యాణ మహోత్సవం విశేషంగా నిర్వహిస్తున్నామని, భక్తులు తరలిరావాలని కోరారు.

● రూ.47 కోట్లు పైగా బకాయిలు చెల్లించని స్థానిక సంస్థలు ● నగరపాలక సంస్థలు, పంచాయతీలదే అధిక వాటా ● ఉమ్మడి జిల్లాలో 102 గ్రంథాలయాలు ● అభివృద్ధికి శాపంలా మారిన బకాయిలు ● వెంటనే చెల్లించాలని విన్నపాలుసాక్షి ప్రతినిధి, కాకినాడ: విజయవాడలో ప్రభుత్వం 35వ పుస్తక మహోత్సవాన్ని ఆర్భాటంగా నిర్వహిస్తున్న వేళ.. రాష్ట్రవ్యాప్తంగానే గ్రామీణ గ్రంథాలయాలకు ఊపిరి పోయాలని.. వీటికి పూర్వ వైభవం తీసుకు వచ్చే దిశగా అడుగులు వేయాలని పాఠకులు డిమాండ్‌ చేస్తున్నారు. ఒకవైపు డిజిటలైజేషన్‌ కొత్త పుంతలు తొక్కుతున్న ప్రస్తుత తరుణంలో సైతం గ్రంథాలయాలకు మాత్రం ఎక్కడా ఆదరణ తగ్గడం లేదు. వీటికి వస్తున్న పాఠకుల సంఖ్య కూడా క్రమంగా పెరుగుతూనే ఉంది. ఈ పరిస్థితుల్లో గ్రంథాలయాల్లో వసతులు మెరుగు పరచాలని పాఠకులు కోరుతూనే ఉన్నారు. స్థానిక సంస్థలు సెస్‌ బకాయిలు చెల్లిస్తేనే ఇది సాధ్యమవుతుంది. ఉమ్మడి తూర్పు గోదావరి జిల్లావ్యాపంగా ఉన్న వివిధ స్థాయిల్లోని 102 గ్రంథాలయాలకు ప్రతి రోజూ 25 వేల నుంచి 30 వేల మంది పాఠకులు వస్తూంటారని అంచనా. గతంలో కంటే గ్రంథాలయాలకు వస్తున్న వారి సంఖ్యలో ఏడెనిమిది శాతం పెరుగుదల కనిపిస్తోంది. ఏళ్ల తరబడి బకాయిలు గ్రంథాలయాల నిర్వహణకు ప్రధాన వనరు స్థానిక సంస్థలు చెల్లించాల్సిన సెస్‌. ప్రజల నుంచి ముక్కుపిండి మరీ స్థానిక సంస్థలు పన్నులు వసూలు చేస్తున్నా.. అందులోని వాటా మాత్రం ఏళ్ల తరబడి గ్రంథాలయాల ఖాతాలకు చేరడం లేదు. గ్రంథాలయాల సెస్‌ను స్థానిక సంస్థలే దర్జాగా వాడేసుకుంటున్నాయి. ఈవిధంగా ఉమ్మడి తూర్పు గోదావరి జిల్లా వ్యాప్తంగా స్థానిక సంస్థల నుంచి వసూలైన గ్రంథాలయ సెస్‌ రూ.47,13,87,848 కోట్ల మేర ఆయా స్థానిక సంస్థల వద్ద పెండింగ్‌లో ఉండిపోయింది. దీనిపై జిల్లా అధికారులను అడుగుతూంటే స్థానిక సంస్థల అధికారులతో నిర్వహిస్తున్న సమీక్షా సమావేశాల్లో పదేపదే చెబుతున్నామంటున్నారే తప్ప.. ఆయా సంస్థలు చిల్లిగవ్వ కూడా బదలాయించిన దాఖలాలు కనిపించడం లేదు. 2007–08 నుంచి పెండింగ్‌లో ఉన్న కోట్లాది రూపాయల సెస్‌ బకాయిలు రాబట్టేందుకు చర్యలు తీసుకుంటున్న దాఖలాలు కనుచూపు మేరలో కూడా కనిపించడం లేదు. ఈ పరిస్థితి గ్రంథాలయాల పూర్వ వైభవానికి పెద్ద ప్రతిబంధకంగా పరిణమించింది. ఒకప్పుడు 51.. నేడు 5 ఒకప్పుడు ఉమ్మడి జిల్లా వ్యాప్తంగా గ్రామీణ ప్రాంతాల్లో 51 గ్రామీణ గ్రంథాలయాలు ఉండేవి. వీటి నిర్వాహకులకు ప్రతి నెలా అప్పట్లో రూ.15 వేల నుంచి రూ.18 వేల వరకూ వేతనం చెల్లించేవారు. వీటిల్లో పని చేసిన ఉద్యోగులు ఉద్యోగ విరమణ చేయడంతో ఆ పోస్టులను తిరిగి భర్తీ చేయలేదు. ఫలితంగా 46 గ్రామీణ గ్రంథాలయాలు మూతపడ్డాయి. ప్రస్తుతం ఎ.మల్లవరం కట్టమూరు, ఉప్పలగుప్తం, తాటిపర్తి, సాకుర్రుల్లో మాత్రమే నడుస్తున్నాయి. ఈ పరిస్థితుల్లో గ్రామీణ గ్రంథాలయాల స్థానంలో గౌరవ వేతనంపై నిర్వహించే బుక్‌ డిపాజిటి సెంటర్లు (బీడీసీ – పుస్తక నిక్షిప్త కేంద్రం) ఏర్పాటు చేశారు. ప్రస్తుతం అవే కొనసాగుతున్నాయి. అలానే రాజమహేంద్రవరం, కాకినాడ నగరాలతో పాటు పలు పట్టణాల్లో రిక్షాలపై పుస్తకాలు పెట్టి చదివించే మొబైల్‌ లైబ్రరీలు ఉండేవి. కాలక్రమేణా అవి కూడా కనుమరుగయ్యాయి. గ్రంథాలయాలకు కొత్త పుస్తకాలు అవసరమని గత టీడీపీ ప్రభుత్వ హయాంలో ప్రతిపాదనలు పంపినా నిధులు లేవనే సాకుతో గాలికొదిలేశారు. ఈ పరిస్థితుల్లో గత వైఎస్సార్‌ సీపీ ప్రభుత్వం ముందుకు వచ్చి 2022లో రూ.1.20 కోట్ల వ్యయంతో పాఠకులు ఎంతో కాలంగా అభ్యర్థిస్తున్న సుమారు 80 వేల పుస్తకాలు కొనుగోలు చేసి, ఉమ్మడి తూర్పు గోదావరి జిల్లాలోని గ్రంథాలయాలకు సమకూర్చింది. కాకినాడలోని జిల్లా కేంద్ర గ్రంథాలయంఉమ్మడి తూర్పు గోదావరి జిల్లాలో గ్రంథాలయాల వివరాలు జిల్లా కేంద్ర గ్రంథాలయం కాకినాడ గ్రేడ్‌–1 శాఖా గ్రంథాలయాలు 5 గ్రేడ్‌–2 శాఖా గ్రంథాలయాలు 10 గ్రేడ్‌–3 శాఖా గ్రంథాలయాలు 86 మొత్తం 102 గ్రంథాలయాల్లో సభ్యులు 38,500 ఉమ్మడి తూర్పు గోదావరి జిల్లాలో 2007–08 నుంచి 2023–24 వరకూ స్థానిక సంస్థలు చెల్లించాల్సిన సెస్‌ బకాయిలు (రూ.) రాజమహేంద్రవరం నగర పాలక సంస్థ 19,03,03,000.00 కాకినాడ నగర పాలక సంస్థ 9,66,35,752.00 మున్సిపాలిటీలు 2,38,47,626.00 గ్రామ పంచాయతీలు 16,06,01,470.00 సెస్‌ చెల్లించి చేయూతనివ్వాలి స్థానిక సంస్థలు వెంటనే సెస్‌ బకాయిలు చెల్లించి గ్రంథాలయాల అభివృద్ధికి చేయూతనివ్వాలి. ఇటీవల పాఠకుల సంఖ్య పెరగడంతో అభివృద్ధికి నిధుల అవసరం ఉంది. ముఖ్యంగా కార్పొరేషన్ల నుంచి ఎక్కువగా బకాయిలు పేరుకుపోయాయి. జిల్లా యంత్రాంగాలు చొరవ తీసుకుని బకాయిలు జమ అయ్యేలా చూడాలి. – వీఎల్‌ఎన్‌ఎస్‌వీ ప్రసాద్‌, కార్యదర్శి, జిల్లా గ్రంథాలయ సంస్థ, కాకినాడ పాఠకులకు అందుబాటులో ఉండాలి ప్రజల విజ్ఞానాన్ని పెంచడానికి ఏర్పాటు చేసిన గ్రంథాలయాలు ప్రజలకు అందుబాటులో ఉండాలి. సామర్లకోటలోని గ్రంథాలయం అద్దె భవనంలో రెండో అంతస్తులో ఉండటంతో 40 మెట్లు ఎక్కి వెళ్లాల్సి వస్తోంది. దీంతో, వృద్ధులు, దివ్యాంగులు, గ్రంథాలయానికి దూరమవుతున్నారు. విజ్ఞానాన్ని మరింతగా పెంచేలా గ్రంథాలయంలో పుస్తకాల సంఖ్య పెరగాలి. – జి.రాజు, గ్రంథాలయ పాఠకుడు, సామర్లకోట

బాలాజీచెరువు (కాకినాడ సిటీ): విద్యార్థుల్లో దాగి ఉన్న సృజనాత్మకతను గుర్తించే లక్ష్యంతో ఏటా నిర్వహిస్తున్న సైన్స్‌ సంబరాలు శుక్రవారం కాకినాడలో జరగనున్నాయి. పాఠశాల విద్యా శాఖ, విశ్వేశ్వరయ్య ఇండస్ట్రీ అండ్‌ టెక్నలాజికల్‌ మ్యూజియం (బెంగళూరు) ఆధ్వర్యాన నిర్వహిస్తున్న దక్షిణ భారత విద్యా వైజ్ఞానిక ప్రదర్శన–2025కు స్థానిక సాలిపేట బాలికోన్నత పాఠశాల వేదికగా నిలవనుంది. మండల స్థాయిలో గత నెల 30, 31 తేదీల్లో ఈ పోటీలు నిర్వహించగా.. వ్యక్తిగత విభాగం నుంచి 42, ప్రాజెక్టుల గ్రూపు నుంచి 42, ఉపాధ్యాయుల విభాగం నుంచి 42 కలిపి మొత్తం 126 ప్రాజెక్టులను జిల్లా స్థాయికి ఎంపిక చేశారు. జిల్లా స్థాయిలో ప్రతి గ్రూపు నుంచి రెండు ప్రాజెక్టులను ఎంపిక చేసి, రాష్ట్ర స్థాయి ప్రదర్శనకు పంపిస్తారు. అన్ని ప్రభుత్వ, ప్రైవేటు పాఠశాలల్లో 8, 9, 10 తరగతులకు చెందిన విద్యార్థులు ఈ ప్రాజెక్టులు ప్రదర్శించనున్నారు. మూడు కేటగిరీల్లో.. ఈ విద్యా వైజ్ఞానిక ప్రదర్శన పోటీలు మూడు కేటగిరీల్లో ఎనిమిది అంశాలపై నిర్వహిస్తున్నారు. ఉపాధ్యాయుల ప్రదర్శన (ఒక్క ఉపాధ్యాయుడు మాత్రమే), విద్యార్థుల వ్యక్తిగత ప్రదర్శన (ఒక విద్యార్థి, ఒక ఉపాధ్యాయుడు), విద్యార్థుల గ్రూప్‌ (ఇద్దరు విద్యార్థులు, ఒక ఉపాధ్యాయుడు) విభాగాల్లో పోటీలు ఉంటాయి. భౌతిక శాస్త్రం, రసాయన శాస్త్రం, గణితం, భూమి, అంతరిక్ష శాస్త్రం, పర్యావరణ శాస్త్రం, ఇంజినీరింగ్‌, జీవ రసాయన శాస్త్రం, కంప్యూటర్‌ శాస్త్రం, జీవశాస్త్రం అంశాలపై ప్రాజెక్టులు ఉంటాయి. నేడు జిల్లా స్థాయి సైన్స్‌ పోటీలు సాలిపేట బాలికోన్నత పాఠశాలలో 126 ప్రాజెక్టుల ప్రదర్శన మేధోసంపత్తికి పదును.. విద్యార్థుల్లో సృజనాత్మకతను వెలికి తీయడానికి విద్యా వైజ్ఞానిక ప్రదర్శనలు దోహదపడతాయి. మండల స్థాయిలో ఎంపికై న ఉత్తమ ప్రాజెక్టులతో ఆయా విద్యార్థులు, ఉపాధ్యాయులు జిల్లా స్థాయి ప్రదర్శనలో పాల్గొంటారు. విద్యార్థుల్లో మేధోసంపత్తికి పదును పెట్టేందుకు ఉపకరించే ఈ ప్రదర్శనల్లో విద్యార్థులు పాల్గొనేలా ఉపాధ్యాయులు చైతన్యపరచాలి. విద్యార్థులు ఈ ఎగ్జిబిషన్‌ను సందర్శించి, కొత్త ఆలోచనలకు రూపకల్పన చేయాలి. – పిల్లి రమేష్‌, జిల్లా విద్యాశాఖాధికారి, కాకినాడ

విచ్చలవిడిగా ఇసుక, మట్టి తవ్వేస్తూండటంతో కృష్ణవరం వద్ద ఏలేరు కాలువ లోతుగా తయారైంది. దీంతో రెండో పంట సాగు నీటికి కటకటలాడాల్సి వస్తుందని ఆయకట్టు రైతులు లబోదిబోమంటున్నారు. కాలువకు ఒక పక్కన వేలంక, గెద్దనాపల్లి, పెద్దనాపల్లి, మరోవైపు కృష్ణవరం, పాత కృష్ణవరం, సోమరాయణంపేట, తామరాడ, గోనేడ, రామచంద్రపురం తదితర ప్రాంతాల్లోని 6 వేల ఎకరాల్లో రెండో పంటకు సాగునీరు అందడం గగనమైపోతోంది. పరిస్థితి ఇలాగే కొనసాగితే.. వరదల సమయంలో ఏలేరు ఊళ్లకు ఊళ్లను ముంచెత్తి, ఏడెనిమిది వేల మంది ముంపునకు గురయ్యే ప్రమాదం ఉందనే భయం స్థానికులను వెంటాడుతోంది. వాస్తవానికి డిసెంబర్‌లో వచ్చే సుబ్రహ్మణ్య షష్ఠి నాటికే ఏలేరు ఆయకట్టు రైతులు దమ్ములు చేసుకునే పరిస్థితి ఉండేది. కృష్ణవరం వద్ద సాగుతున్న అక్రమ తవ్వకాలతో నీరు అందక.. ఆయకట్టు ప్రాంతాల్లో ఇప్పటి వరకూ దమ్ములు పూర్తి కాలేదు. సొంతంగా బోర్లు ఉన్న రైతులు అక్కడక్కడ వ్యవసాయ పనులు చేస్తున్నారు. అధికారులు, ప్రజాప్రతినిధులు సమన్వయంతో ఏలేరు కాలువలో తవ్వకాలను కట్టడి చేయాలని రైతులు కోరుతున్నారు.

సాక్షి ప్రతినిధి, కాకినాడ: వివిధ రంగాల్లో నైపుణ్యం చూపుతూ, ప్రజాసేవలో నిమగ్నమైన వారికి మానవతా స్వచ్ఛంద సేవా సమితి జాతీయ, అంతర్జాతీయ స్థాయిల్లో అవార్డులను ప్రకటించింది. ఇందులో కాకినాడకు చెందిన ప్రముఖ సాంక్రమిక వ్యాధుల నిపుణుడు డాక్టర్‌ యనమదల మురళీకృష్ణను జాతీయ స్థాయి ఉత్తమ వైద్యుల కేటగిరీలో అవార్డుకు ఎంపిక చేశారు. ఈ సమాచారాన్ని సేవా సమితి వ్యవస్థాపక అధ్యక్షుడు ముసిని రామకృష్ణారావు గురువారం మురళీకృష్ణకు తెలియజేశారు. సేవా సమితి ఏర్పడి 50 సంవత్సరాలు పూర్తయిన సందర్భంగా ఆదివారం అర్ధ శతాబ్ది కళా ఉత్సవాల సంబరాలు నిర్వహిస్తోంది. అమలాపురం జిల్లా పరిషత్‌ ఉన్నత పాఠశాలలో జరిగే ఈ కళా ఉత్సవాలు, అవార్డుల ప్రదానోత్సవంలో డాక్టర్‌ మురళీకృష్ణకు ఈ పురస్కారం అందజేయనున్నారు. దీర్ఘకాలిక వ్యాధులపై అఖిల భారత స్థాయిలో పలు గ్రంథాల ద్వారా ప్రజలకు అవగాహన కల్పించడం, అంతర్జాతీయ స్థాయిలో అందరికంటే ముందుగా హెచ్‌ఐవీ నియంత్రణకు రెండు మందుల విధానాన్ని అమలు చేసిన తొలి వైద్యుడిగా గుర్తింపు పొందడం, దీర్ఘకాలిక వ్యాధులపై హెల్త్‌ జర్నల్స్‌లో రాసిన పరిశోధనాత్మక గ్రంథాలకు గాను ఆయనకు ఈ అవార్డు ప్రకటించారు. 9న జాబ్‌మేళా బాలాజీచెరువు (కాకినాడ సిటీ): స్థానిక ప్రభుత్వ ఐటీఐలో ఈ నెల 9న అమర్‌రాజా గ్రూప్‌ కంపెనీ ఆధ్వర్యాన జాబ్‌మేళా నిర్వహిస్తున్నట్లు ప్రిన్సిపాల్‌ వేణుగోపాలవర్మ గురువారం ఒక ప్రకటనలో తెలిపారు. ఐటీఐలో వివిధ ట్రేడ్‌లలో ఉత్తీర్ణులై, ఎన్‌టీసీ సర్టిఫికెట్‌ కలిగిన వారు ఈ మేళాకు హాజరు కావచ్చన్నారు. ఎంపికై న వారికి నెలకు రూ.21 వేల వేతనం చెల్లిస్తారని తెలిపారు. ఆసక్తి ఉన్న అభ్యర్థులు తమ విద్యార్హతల సర్టిఫికెట్లతో ఆ రోజు ఉదయం 9 గంటలకు కళాశాలకు హాజరు కావాలని, వివరాలకు 86392 30775 నంబరులో సంప్రదించాలని సూచించారు. ఎస్‌ఎంసీల సహకారం అవసరం కాకినాడ రూరల్‌: పాఠశాల నిర్వహణ, అభివృద్ధికి యాజమాన్య కమిటీల (ఎస్‌ఎంసీ) సహకారం ఎంతో అవసరమని, వీటి పాత్ర కూడా కీలకమైనదని సర్వశిక్షా అభియాన్‌ కాకినాడ సీఎంఓ చామంతి నాగేశ్వరరావు అన్నారు. ఎస్‌ఎంసీల శిక్షణ కార్యక్రమాన్ని ఏపీఎస్‌పీ క్వార్టర్స్‌ జెడ్పీ హైస్కూలులో గురువారం నిర్వహిచారు. ఎంఈఓ–1, 2లు వేణుగోపాల్‌, ఏసుదాసుల అధ్యక్షతన నిర్వహించిన ఈ కార్యక్రమంలో ముఖ్య అతిథిగా పాల్గొన్న నాగేశ్వరరావు మాట్లాడుతూ, ఎస్‌ఎంసీల విధులు బాధ్యతలు, సమావేశాల నిర్వహణ, పాఠశాల అభివృద్ధి ప్రణాళిక తయారీ, సామాజిక తనిఖీ, పాఠశాల అభివృద్ధిలో ప్రజల భాగస్వామ్యం, ప్రధానోపాధ్యాయులకు ఎదురయ్యే సమకాలీన సమస్యల పరిష్కారం తదితర అంశాలపై జిల్లా స్థాయిలో శిక్షణ పొందిన రీసోర్స్‌ పర్సన్లు వివరిస్తారని అన్నారు. ప్రతి పాఠశాలకు ఒక కరదీపికను కూడా అందజేస్తామని చెప్పారు. ఎంఈఓలు మాట్లాడుతూ, కమిటీల భాగస్వామ్యం, ప్రాధాన్యాన్ని వివరించారు. కార్యక్రమంలో ప్రధానోపాధ్యాయిని గాయత్రి, మండలంలోని ఉన్నత, ప్రాథమికోన్నత, ప్రాథమిక పాఠశాలల ప్రధానోపాధ్యాయులు, ఎస్‌ఎంసీల చైర్మన్లు తదితరులు పాల్గొన్నారు. రైల్వే శాఖకు భూములు అప్పగించాలి అమలాపురం రూరల్‌: కోటిపల్లి నరసాపురం రైల్వే లైన్‌ అలైన్‌మెంట్‌ ప్రతిపాదనల ప్రకారం ఇప్పటికే సేకరించిన భూములను స్వాధీన పరుచుకుని రైల్వే శాఖకు అప్పగించాలని రెవెన్యూ అధికారులను కలెక్టర్‌ మహేష్‌కుమార్‌ ఆదేశించారు. గురువారం రెవెన్యూ అధికారులతో రైల్వే లైన్‌ అలైన్‌మెంట్‌ భూముల స్వాధీనం, అవార్డులు పాస్‌, భూ నష్టపరిహారాలు చెల్లింపు తదితర పెండింగ్‌ అంశాలపై సమీక్షించారు. కలెక్టర్‌ మాట్లాడుతూ పెండింగ్‌ సమస్యలను అధిగమించే ప్రయత్నంతో పాటుగా భూముల సేకరణకు చర్యలు వేగవంతం చేయాలన్నారు. జిల్లా జాయింట్‌ కలెక్టర్‌ టి.నిషాంతి, ఇన్‌చార్జి డీఆర్‌ఓ కె.మాధవి, రెవెన్యూ డివిజనల్‌ అధికారులు డి.అఖిల పి.శ్రీకర్‌, ఆర్‌డబ్ల్యూ ఎస్‌ఈ సీహెచ్‌ఎన్వీ కృష్ణారెడ్డి, అయినవిల్లి తహసీల్దార్‌ నాగలక్ష్మి, డీటీ ఏసుబాబు పాల్గొన్నారు.

సఖినేటిపల్లి: అంతర్వేది పుణ్యక్షేత్రంలో ఫిబ్రవరి 4 నుంచి 13వ తేదీ వరకూ నిర్వహించనున్న శ్రీలక్ష్మీనరసింహస్వామివారి వార్షిక దివ్య తిరు కల్యాణ మహోత్సవాల షెడ్యూల్‌ను ఆలయ అసిస్టెంట్‌ కమిషనర్‌ వి.సత్యనారాయణ గురువారం విడుదల చేశారు. 4వ తేదీ రథసప్తమి. సూర్య, చంద్రప్రభ వాహనాలపై స్వామివారి గ్రామోత్సవం. అదే రోజు స్వామివారిని పెండ్లికుమారుడిని, అమ్మవారిని పెండ్లికుమార్తెను చేయడం (ముద్రికాలంకరణ). 5వ తేదీ గరుడ పుష్పక, పుష్పక వాహనాలపై.. 6న హంస, శేష వాహనాలపై గ్రామోత్సవాలు. సాయంత్రం ధ్వజారోహణ. 7వ తేదీ పంచముఖాంజనేయస్వామి, కంచుగరుడ వాహనాలపై గ్రామోత్సవాలు, రాత్రి 12.55 గంటలకు స్వామివారి తిరు కల్యాణం. 8వ తేదీ మధ్యాహ్నం రథోత్సవం. 9న గజ, పొన్న వాహనాలపై గ్రామోత్సవాలు, రాత్రి అన్నపర్వత మహానివేదన. 10న హనుమద్‌, సింహ వాహనాలపై గ్రామోత్సవాలు. సాయంత్రం సదస్యం. 11న రాజాధిరాజా, అశ్వ వాహనాలపై గ్రామోత్సవాలు. 16 స్తంభాల మండపం వద్ద చోరసంవాద ఘట్టం. 12న చక్రవారీ స్నానం.. 13 రాత్రి తెప్పోత్సవం, శ్రీపుష్పోత్సవం.

కాకినాడ క్రైం: కాకినాడ జీజీహెచ్‌లో ఓ జూనియర్‌ అసిస్టెంట్‌ (గుమస్తా) వీరంగం సృష్టించడం కలకలం రేపింది. వివరాలివీ.. జీజీహెచ్‌ జనరల్‌ సెక్షన్‌–1లో మెడికల్‌ రీ యింబర్స్‌మెంట్‌ సీటు గుమస్తాగా డీఎస్‌ఎల్‌ఎన్‌ మూర్తి అలియాస్‌ సాయి పదేళ్లుగా కొనసాగుతున్నాడు. అవినీతి ఆరోపణల నేపథ్యంలో అతడి సీటును మారుస్తూ జీజీహెచ్‌ సూపరింటెండెంట్‌ డాక్టర్‌ లావణ్యకుమారి సుమారు రెండు నెలల క్రితం నిర్ణయం తీసుకున్నారు. దీనికి ఎంత మాత్రం అంగీకరించేది లేదని డిప్యూటీ కలెక్టర్‌, ఆసుపత్రి అడ్మినిస్ట్రేటర్‌ శ్రీధర్‌ వద్దకు వెళ్లి అప్పట్లోనే సాయి గొడవ పడ్డాడు. దీనిపై ఆయన సూపరింటెండెంట్‌కు ఫిర్యాదు చేశారు. ఆ సీటు వదిలేది లేదని సాయి రెండు నెలలుగా భీష్మించుకు కూర్చున్నాడు. పాలనా పరమైన మార్పుల్లో భాగంగా సాయితో కలిపి మరో నలుగురికి సూపరింటెండెంట్‌ గత నెల 31న ఉత్తర్వులు జారీ చేశారు. సాయి తప్ప మిగిలిన నలుగురూ బదిలీ అయిన సీట్లకు వెళ్లారు. సాయి రెండోసారి కూడా సీటు మార్చడానికి ఒప్పుకోలేదు. ఇదిలా ఉండగా.. కొద్ది రోజుల్లో జరగనున్న ఆస్పత్రి అభివృద్ధి సొసైటీ (హెచ్‌డీఎస్‌) సమావేశానికి సంబంధించి తన చాంబర్‌లో సూపరింటెండెంట్‌ డాక్టర్‌ లావణ్య కుమారి.. అడ్మినిస్ట్రేటర్‌ శ్రీధర్‌, ఏడీ అనురాధ, ఏఓ శఽర్మ సహా మరికొందరితో గురువారం సన్నాహక సమావేశం ఏర్పాటు చేశారు. ఆ సమయంలో సాయి ఒక్క ఉదుటన తలుపు నెట్టుకొని సూపరింటెండెంట్‌ చాంబర్‌లోకి ప్రవేశించాడు. తన సీటు మార్పు ఉత్తర్వులను అధికారులందరి ముందు సూపరింటెండెంట్‌ ముఖాన విసిరి కొట్టాడు. దుర్భాషలాడుతూ ‘నా సీటు మార్చారో.. మీ అందు చూస్తా’నంటూ డిప్యూటీ కలెక్టర్‌, సూపరింటెండెంట్‌లను హెచ్చరించాడు. దీనిపై కలెక్టర్‌ షణ్మోహన్‌కు డాక్టర్‌ లావణ్య కుమారి ఫిర్యాదు చేశారు. పలువురు ఉద్యోగ సంఘ నేతలు ఆమెకు సంఘీభావం తెలిపారు. సాయి ప్రవర్తనను తప్పుబట్టారు. అయితే, ఈ ఘటనపై కలెక్టర్‌ సీరియస్‌ అయ్యారు. ఆయన ఆదేశాల మేరకు శ్రీధర్‌ వన్‌ టౌన్‌ పోలీసులకు ఫిర్యాదు చేశారు. వెంటనే పోలీసులు జీజీహెచ్‌కు వచ్చి సాయిని విచారించారు. సాయి పదేళ్లుగా ఇదే సీటులో కొనసాగుతున్నాడని ఆసుపత్రి అధికారులు తెలిపారు. ఈ సీటు పరిధిలో మెడికల్‌ రీయింబార్స్‌మెంట్‌, సదరం సర్టిఫికెట్లు, మెడికల్‌ ఇన్వాలిడేషన్‌ సహా కీలక కార్యకలాపాలన్నీ జరుగుతాయన్నారు. వీటిలో భారీ అవినీతి, లంచాల నేపథ్యంలో ఫిర్యాదులు అందడంతో పాటు పాలనాపరమైన మార్పుల్లో భాగంగా సీటు మార్పునకు సూపరింటెండెంట్‌ ఆదేశాలిచ్చారని తెలిపారు. ఆ ఆదేశాలను మిగిలిన వారు పాటించినా.. సాయి అభ్యంతరకరంగా వ్యవహరించాడని తెలిపారు. ఇదిలా ఉండగా.. ఏపీఎన్‌జీఓ సంఘం జిల్లా అధ్యక్షుడు గుద్దటి రామ్మోహన్‌ ఆధ్వర్యాన పలువురు నాయకులు పోలీస్‌ స్టేషన్‌కు చేరుకుని, సాయికి స్టేషన్‌ బెయిల్‌ ఇప్పించారు. జీజీహెచ్‌లో జూనియర్‌ అసిస్టెంట్‌ వీరంగం సూపరింటెండెంట్‌, డిప్యూటీ కలెక్టర్లకు బెదిరింపు సూపరింటెండెంట్‌ ముఖం పైకి పత్రాలు విసిరికొట్టిన వైనం కలెక్టర్‌ సీరియస్‌.. పోలీసులకు ఫిర్యాదు

అన్నవరం: సత్యదేవుని సన్నిధిలో డిజిటల్‌ పేమెంట్ల కౌంటర్‌ను గురువారం లాంఛనంగా ప్రారంభించారు. రత్నగిరిపై పశ్చిమ రాజగోపురం వద్ద ఉన్న వ్రతాలు, ప్రత్యేక దర్శనం టిక్కెట్ల కౌంటర్‌కు ఎదురుగా ఏర్పాటు చేసిన ఈ కౌంటర్‌ ను దేవస్థానం చైర్మన్‌ ఐవీ రోహిత్‌, ఈఓ వి.సుబ్బారావు ప్రారంభించారు. మొదటిగా భక్తుడు, స్థానిక వ్యాపారి వీర్ల రాంబాబు రూ.2 వేల వ్రతం టికెట్టును డిజిటల్‌ పేమెంట్‌ ద్వారా కొనుగోలు చేశారు. అనంతరం పెద్ద సంఖ్యలో భక్తులు ఈ కౌంటర్‌లో ఫోన్‌పే, పేటీఎం, గూగుల్‌ పే, క్రెడిట్‌, డెబిట్‌ కార్డులతో సత్యదేవుని వ్రతం, దర్శనం, లక్ష్మీ ప్రయుక్త ఆయుష్య హోమం, ప్రత్యంగిర హోమం (అడ్వాన్స్‌) టికెట్లు కొనుగోలు చేశారు. ఉదయం 10 గంటలకు ఈ కౌంటర్‌ను ప్రారంభించగా.. చాలా మంది భక్తులు నగదు కన్నా డిజిటిల్‌ పద్ధతిలో టికెట్లు కొనుగోలు చేయడానికి ఉత్సాహం చూపించారని అధికారులు తెలిపారు. మూడు రోజుల క్రితం నుంచే పీఆర్‌ఓ కార్యాలయంలోని కౌంటర్‌లో డిజిటల్‌ పేమెంట్ల ద్వారా ప్రయోగాత్మకంగా టికెట్లు విక్రయిస్తున్నారు. అయితే అధికారికంగా ఈ రోజు నుంచే డిజిటల్‌ పేమెంట్ల ద్వారా టికెట్ల విక్రయాలు అమలులోకి వస్తాయని అధికారులు తెలిపారు. తొలి రోజు రూ.97,708 ఆదాయం డిజిటల్‌ పేమెంట్ల కౌంటర్‌ ద్వారా దేవస్థానానికి తొలి రోజు రూ.97,708 ఆదాయం వచ్చింది. సత్యదేవుని వ్రతం రూ.300 టిక్కెట్లు 34, రూ.1,000 టికెట్లు 12, రూ.1,500 టికెట్లు 16, లక్ష్మీ ప్రయుక్త ఆయుష్య హోమం ఆన్‌లైన్‌లో రూ.1,116 చొప్పున రెండు, స్వయంగా ఆచరించేందుకు రూ.1,000 చొప్పున మూడు టిక్కెట్ల భక్తులు కొనుగోలు చేశారు. అలాగే, ఆన్‌లైన్‌ వ్రతానికి రూ.1,116 చొప్పున ఎనిమిది టికెట్లు, రూ.2 వేల వ్రతం టికెట్లు రూ.17, వనదుర్గ అమ్మవారికి ప్రత్యంగిర హోమం (అడ్వాన్స్‌) టికెట్లు రూ.1,116 చొప్పున మూడు టికెట్లను భక్తులు కొనుగోలు చేశారు. డిజిటల్‌ పేమెంట్ల ద్వారా టిక్కెట్ల కొనుగోలుకు భక్తులు ఎక్కువగా మొగ్గు చూపుతున్నారని అధికారులు తెలిపారు. ప్రతి రోజూ ఉదయం 5 నుంచి మధ్యాహ్నం 2 గంటల వరకూ పశ్చిమ రాజగోపురం వద్ద డిజిటల్‌ కౌంటర్‌ పని చేస్తుందన్నారు. రామాలయం ఎదురుగా పీఆర్‌ఓ కార్యాలయం వద్ద ఉన్న కౌంటర్‌ రాత్రి 9 గంటల వరకూ పని చేస్తుందని తెలిపారు. సత్యదేవుని సన్నిధిలో పశ్చిమ రాజగోపురం వద్ద ప్రారంభం ఇప్పటికే ప్రయోగాత్మకంగా పీఆర్‌ఓ ఆఫీసులో విక్రయాలు ఫోన్‌పే, పేటీఎం, గూగుల్‌ పే, క్రెడిట్‌, డెబిట్‌ కార్డులతో సేవా టిక్కెట్ల విక్రయాలు ‘సాక్షి’ కథనాలతో కదలిక దేవస్థానంలో డిజిటల్‌ పేమెంట్లు లేక భక్తులు ఇబ్బంది పడుతున్న అంశాన్ని గతంలో ‘సాక్షి’ దినపత్రిక అనేకసార్లు తన కథనాల ద్వారా వెలుగులోకి తీసుకువచ్చింది. గత నెల 26న ‘రొక్కమే దిక్కు’, గత ఏడాది జనవరి 21న ‘నోటుపాట్లు’ శీర్షికన కథనాలు ప్రచురించింది. వీటి ద్వారా డిజిటల్‌ పేమెంట్లు లేక సత్యదేవుని సన్నిధిలో భక్తులు పడుతున్న ఇబ్బందులను వెలుగులోకి తెచ్చింది. దీంతో అధికారుల్లో కదలిక వచ్చింది. ఎట్టకేలకు రత్నగిరిపై డిజిటల్‌ పేమెంట్‌ కౌంటర్లు ఏర్పాటు చేశారు. దీనిపై భక్తులు ఆనందం వ్యక్తం చేస్తున్నారు. త్వరలో ప్రసాద విక్రయాలు కూడా.. త్వరలో ప్రసాదం ప్యాకెట్ల విక్రయాలను కూడా డిజిటల్‌ పేమెంట్ల ద్వారా జరపనున్నారు. ఈ మేరకు రెండు మూడు రోజుల్లో సాఫ్ట్‌వేర్‌ రూపొందించనున్నామని అధికారులు తెలిపారు.

సాక్షి ప్రతినిధి, కాకినాడ: ఏలేరు కాలువలో దొంగలు పడ్డారు. ఒక రోజూ రెండు రోజులూ కాదు.. ఏకంగా రెండు మూడు నెలలుగా అధికార పార్టీ నేతల దన్నుతో బరితెగించేసి మరీ ఏలేరుకు తూట్లు పొడిచేస్తున్నారు. కాలువను 20 నుంచి 30 అడుగుల లోతున నిట్టనిలువునా తవ్వేసి, ఇసుక, మట్టి తెగనమ్ముకుంటూ లక్షల రూపాయలు దిగమింగేస్తున్నారు. సీనియర్‌ శాసన సభ్యుడు జ్యోతుల నెహ్రూ ప్రాతినిధ్యం వహిస్తున్న జగ్గంపేట నియోజకవర్గం కిర్లంపూడి మండలం కృష్ణవరం కేంద్రంగా ఈ వ్యవహారం నిరాటంకంగా సాగిపోతోంది. కృష్ణవరం శివాలయం సమీపాన మట్టి, పాత కృష్ణవరం శ్మశానవాటిక ప్రాంతంలో ఇసుక అడ్డగోలుగా తవ్వేస్తున్నారు. కృష్ణవరం వద్ద ఇసుక, మట్టి తవ్వకానికి రెండు ప్రాంతాల్లో 200 హార్స్‌పవర్‌ మెషీన్లు రెండేసి చొప్పున ఏర్పాటు చేశారు. రాజమహేంద్రవరం నుండి తవ్వోడ (డ్రెడ్జింగ్‌ బోటు) రప్పించి మరీ పగలు, రాత్రి అనే తేడా లేకుండా ఇసుక, మట్టి కొల్లగొట్టేస్తున్నారు. మధ్యాహ్నం ఒంటి గంటకు మొదలవుతున్న తవ్వకాలు మర్నాడు ఉదయం 8 గంటల వరకూ విరామం లేకుండా సాగుతున్నాయి. పగలు, రాత్రి అనే తేడా లేకుండా ఏలేరుకు ఇంతలా తూట్లు పొడిచేస్తున్నా.. కట్టడి చేయాల్సిన మూడు శాఖలు గాఢ నిద్రలో జోగుతూండటంపై విమర్శలు వెల్తువెత్తుతున్నాయి. రూ.కోట్లలో లూటీ ఏలేరు కాలువలో తవ్వుతున్న ఇసుక, మట్టిని ఉమ్మడి తూర్పు గోదావరి జిల్లాలోని వివిధ ప్రాంతాలకు ప్రతి నిత్యం 40 నుంచి 50 లారీల్లో తరలించేసి, సొమ్ము చేసుకుంటున్నారు. ప్రధానంగా తుని, అన్నవరం, కత్తిపూడి, ప్రత్తిపాడు, జగ్గంపేట, రాజానగరం, పెద్దాపురం, పిఠాపురం, కాకినాడ నగరాలకు ఇసుక తరలిస్తున్నారు. రాజమహేంద్రవరం, వేమగిరి, కడియం తదితర ప్రాంతాల్లో గోదావరి ఇసుక దొరకనప్పుడు ఏలేరు ఇసుకను లారీ కిరాయితో కలిపి రూ.1,3000 నుంచి రూ.14,000 వరకూ అమ్ముకుని సొమ్ము చేసుకునేవారు. ఇసుక దొరకడం మొదలయ్యాక ప్రస్తుతం రూ.10,000 నుంచి రూ.11,000 వరకూ వసూలు చేస్తున్నారు. ఒక్కో లారీ తక్కువలో తక్కువ మూడు ట్రిప్పులు వేస్తున్నాయి. ఇలా రోజుకు 120 నుంచి 150 ట్రిప్పుల ఇసుక, మట్టి తెగనమ్మేసి రూ.లక్షలు దిగమింగేస్తున్నారు. రోజుకు రూ.13.50 లక్షల చొప్పున నెలకు సుమారు రూ.4 కోట్ల వరకూ ఈ విధంగా మింగేస్తున్నారని అంచనా. ఇందులో పోలీసు, రెవెన్యూ, ఏలేరు ఇరిగేషన్‌ శాఖల పరిధిలోని వివిధ స్థాయిల్లో అందరికీ కలిపి రూ.20 లక్షల చొప్పున ముట్టజెబుతున్నారనే ఆరోపణలు వినిపిస్తున్నాయి. కృష్ణవరంలో టీడీపీకి చెందిన ద్వితీయ శ్రేణి నేత కనుసన్నల్లో ఈ వ్యవహారం నడుస్తోంది. దీనిపై ఎవరైనా ప్రశ్నిస్తే.. తన వెనుక ముఖ్య నేత ఉన్నారని, ఎవరికి చెప్పుకున్నా తమకు పోయేదేమీ లేదని ఆ ద్వితీయ శ్రేణి నేత బెదిరింపులకు దిగుతున్నారు. ఏలేరు జలాలతో కిర్లంపూడి, ఏలేశ్వరం, పిఠాపురం, గొల్లప్రోలు, ఉప్పాడ కొత్తపల్లి తదితర మండలాల పరిధిలో సుమారు 60 వేల ఎకరాల ఆయకట్టు సాగవుతోంది. వైఎస్సార్‌ సీపీ ప్రభుత్వ హయాంలో నాలుగున్నరేళ్ల పాటు ఖరీఫ్‌, రబీ సీజన్లలో రెండు పంటలకూ పుష్కలంగా సాగు నీరందించేవారు. కూటమి ప్రభుత్వం అధికారంలోకి వచ్చిన తరువాత ఆ పరిస్థితి తలకిందులైంది. అధికార పార్టీ నేతల అండదండలతో బరితెగించిన ఇసుక మాఫియా.. ఏలేరు పరీవాహక ప్రాంతాలకు గుండె కోతను మిగులుస్తోంది. రబీ సాగును ప్రశ్నార్థకంగా మార్చేస్తోంది. ‘పచ్చ’ మాఫియా విచ్చలవిడిగా సాగిస్తున్న తవ్వకాలతో ఉన్న నీరు కూడా ఆయకట్టుకు సక్రమంగా అందని దుస్థితి ఏర్పడింది. కృష్ణవరంలో ‘పచ్చ’ మాఫియా ఏలేరుకు నిట్టనిలువునా తూట్లు 20 నుంచి 30 అడుగుల లోతుకు తవ్వకాలు ప్రతి నెలా రూ.4 కోట్ల పైనే అక్రమార్జన రెండో పంటకు నీరు ప్రశ్నార్థకం చర్యలు తీసుకుంటాం ఏలేరు కాలువలో అక్రమంగా ఇసుక తరలిస్తున్నట్టు నా దృష్టికి వచ్చింది. సిబ్బంది క్షేత్ర స్థాయి కి వెళ్లి, ఎక్కడెక్కడ ఇసుక తవ్వుతున్నారో పరిశీలించేలా చర్యలు తీసుకుంటాం. స్థానికంగా వీఆర్‌ఓ లేకపోవడంతో కొంత ఇబ్బంది ఉంది. ఈ తవ్వకాలపై విచారణ చేపట్టి బాధితులపై చర్యలు తీసుకుంటాం. – జె.చిరంజీవి, తహసీల్దార్‌, కిర్లంపూడి గండ్లు పడే ప్రమాదం ఏలేరు కాలువ నుంచి అక్రమంగా ఇసుకను తరలించడంతో వరదలు వచ్చినప్పుడు గట్లకు గండ్లు పడే ప్రమాదముంది. వరద నీటితో పంట పొలాలు మునిగిపోతాయి. కాలువలో పెద్ద పెద్ద గోతులు తవ్వడంతో దిగువ పంట పొలాలకు తరచూ సాగునీటి ఎద్దటి ఏర్పడి, రబీ సాగు ప్రశ్నార్థకంగా మారుతుంది. దీనిపై ఇరిగేషన్‌ అధికారులు, తహసీల్దార్‌, సిబ్బంది దృష్టి సారించాలి. అక్రమ ఇసుక తవ్వకాలను అడ్డుకోవాలి. – అల్లు శివరామకృష్ణ, ఎంపీటీసీ సభ్యుడు, గోనేడ, కిర్లంపూడి మండలం ఇసుక భారీగా తరలిపోతోంది శృంగరాయునిపాలెం బెడ్‌ రెగ్యులేటర్‌ సమీపంలో అక్రమంగా ఇసుక తవ్వి పెద్దపెద్ద లారీలు, ట్రాక్టర్లపై తరలించుకుపోతున్నారు. ముఖ్యంగా పడవలపై తీసుకుని వచ్చిన ఇసుక వెలికితీత యంత్రాలతో పెద్దపెద్ద గోతులు పెడుతున్నారు. దీంతో పంటల సాగుకు నీటి ఎద్దడి ఎదుర్కొంటున్నాం. పగలు, రాత్రి అనే తేడా లేకుండా గ్రామంలో నుంచి ట్రాక్టర్లు అతివేగంగా వెళ్తున్నాయి. దీంతో ఎక్కడ ఏ ప్రమాదం జరుగుతుందోననే భయాందోళనకు గురవుతున్నాం. – గరగా పెద్దకాపు, మాజీ మార్కెట్‌ డైరెక్టర్‌, శృంగరాయునిపాలెం, కిర్లంపూడి మండలం

కొత్తపల్లి: మండల పరిధిలో ఉన్న తీరప్రాంతంలో సముద్ర తాబేళ్లు తరచూ మృత్యువాత పడుతూ ఒడ్డుకు చేరుకుంటున్నాయి. సముద్రంలో రోజురోజుకు కాలుష్యం పెరగడం వలనే తాబేళ్లు మృతి చెందుతున్నట్టు స్థానిక మత్స్యకారులు చెబుతున్నారు. సముద్రం సమీపంలో ఉన్న హేచరీలు, పరిశ్రమలు విడుదల చేసే విషపూరితమైన రసాయనాలు కలిసిన నీటిని, వ్యర్థాలను సముద్రంలో విచ్చలవిడిగా విడిచిపెడుతున్నారు. ఈ కలుషిత నీరు కారణంగా సముద్రంలో జీవించే వందలాది తాబేళ్లు మృత్యువాత పడుతున్నాయి. అధికారులు చూసీ చూడనట్లుగా వ్యవహరించడం వల్ల పరిశ్రమలు విష రసాయనాలు సముద్రంలోకి యథేచ్ఛగా విడుదల చేస్తున్నాయని తీర ప్రాంత ప్రజలు ఆరోపిస్తున్నారు. కాలుష్యమే కారణమంటున్న మత్స్యకారులు

కాకినాడ సిటీ: కాకినాడ డివిజన్‌ పరిధిలోని 10 మండలాల్లో వివిధ కారణాలతో ఖాళీలు ఏర్పడిన 96 చౌకధరల దుకాణాలకు శాశ్వత ప్రాతిపదికన డీలర్లను నియమించేందుకు బుధవారం నోటిఫికేషన్‌ జారీ చేసినట్లు కాకినాడ ఆర్డీవో ఎస్‌.మల్లిబాబు ఒక ప్రకటనలో తెలిపారు. డీలర్ల ఎంపిక రాత పరీక్ష, ఇంటర్వ్యూ ద్వారా జరుగుతుందన్నారు. దరఖాస్తు నమూనాను సంబంధిత మండల తహసీల్దార్‌ కార్యాలయం లేదా ఆర్డీవో కార్యాలయాల్లో ఆఫీసు పని వేళ్లల్లో పొందవచ్చన్నారు. ఆసక్తిగల అభ్యర్థులు నోటిఫికేషన్‌లో పొందుపరిచిన నిబంధనలకు లోబడి ఈ నెల 8వ తేదీ సాయంత్రం 5 గంటల లోపు సంబంధిత తహసీల్దార్‌ కార్యాలయంలోగాని, రెవెన్యూ డివిజనల్‌ అధికారి కార్యాలయంలో గాని నేరుగాను, లేదా రిజిస్టర్‌ పోస్టు ద్వారా తమ దరఖాస్తులను సమర్పించవచ్చన్నారు.

సఖినేటిపల్లి: అంతర్వేది లక్ష్మీనరసింహ స్వామివారి దేవస్థానంలో వచ్చే నెల 4వ తేదీ నుంచి 13వ తేదీ వరకూ స్వామివారి వార్షిక కల్యాణ మహోత్సవాలు జరగనున్నాయి. దీనిపై గురువారం అంతర్వేదిలో దేవదాయ శాఖ ఆధ్వర్యంలో అమలాపురం ఆర్డీఓ కె.మాధవి సమక్షంలో సమీక్ష జరగనుంది. ఉత్సవాల నిర్వహణపై ఆయా శాఖల అధికారులకు ఆమె దిశానిర్దేశం చేయనున్నారు. ఇప్పటికే ఉత్సవాలకు సంబంధించిన ముహూర్త పత్రికను ఆలయ అర్చకులు, వేదపండితులు దేవస్థానం అసిస్టెంట్‌ కమిషనర్‌ వి.సత్యనారాయణకు అందజేశారు. ఈ మేరకు దేవస్థానం ఆలయ ప్రాంగణంలో జరిగే సమావేశానికి తగిన ఏర్పాట్లు బుధవారం పూర్తి చేశారు. పండితులు నిర్ణయించిన ముహూర్తం ప్రకారం ఫిబ్రవరి 7వ తేదీ రాత్రి 12–55 గంటలకు స్వామివారి కల్యాణం, 8వ తేదీ మధ్యాహ్నం స్వామివారి రథోత్సవం, 12వ తేదీ పౌర్ణమి స్నానాలు, 13వ తేదీ సాయంత్రం తెప్పోత్సవం ఉంటుందని అసిస్టెంట్‌ కమిషనర్‌ సత్యనారాయణ తెలిపారు.

అన్నవరం: నూతన ఆంగ్ల సంవత్సరాది సందర్భంగా రత్నగిరి వాసుడు సత్యదేవుని ఆలయానికి బుధవారం వేలసంఖ్యలో భక్తులు పోటెత్తారు. ఉదయం నుంచి స్వామివారి ఆలయానికి భక్తుల రాక మొదలైంది. సాయంత్రం వరకు ఇది కొనసాగింది. దీంతో ఆలయ ప్రాంగణం, వ్రత మండపాలు, విశ్రాంత మండపాలు భక్తులతో నిండిపోయాయి. సుమారు 40 వేల మంది స్వామివారిని దర్శించారు. స్వామివారి వ్రతాలు 1,800 జరిగాయి. అన్ని విభాగాల ద్వారా దేవస్థానానికి రూ.40 లక్షల ఆదాయం సమకూరింది. సత్యదేవుని నిత్యాన్నదాన పథకంలో ఐదు వేల మంది భక్తులకు భోజనం పెట్టారు. ఎస్పీకి పదోన్నతి కాకినాడ క్రైం: జిల్లా ఎస్పీ విక్రాంత్‌ పాటిల్‌కు పదోన్నతి లభించింది. సీనియర్‌ సూపరింటెండెంట్‌ ఆఫ్‌ పోలీస్‌(ఎస్‌ఎస్‌పీ)గా పదోన్నతి కల్పిస్తూ బుధవారం ప్రభుత్వం ఉత్తర్వులిచ్చింది. 2012 బ్యాచ్‌కు చెందిన విక్రాంత్‌ పాటిల్‌ విజయనగరం జిల్లాలో ఆపరేషన్స్‌ అదనపు ఎస్‌పీగా, చిత్తూరు ఎస్‌పీగా, గుంతకల్‌ రైల్వేస్‌ ఎస్‌పీగా, విజయవాడ డీసీగా, విజయనగరం ఐదవ బెటాలియన్‌ ఏపీఎస్‌పీ కమాండెంట్‌గా, పార్వతీపురం మన్యం జిల్లా ఎస్‌పీగా పనిచేశారు. అక్కడి నుంచి గత ఏడాది జూలై 17వ తేదీన కాకినాడ జిల్లా ఎస్‌పీగా బాధ్యతలు చేపట్టి కొనసాగుతున్నారు. కిక్కిరిసిన అయినవిల్లి అయినవిల్లి: ప్రసిద్ధి చెందిన అయినవిల్లి విఘ్నేశ్వర స్వామివారి ఆలయం బుధవారం భక్తులతో కిక్కిరిసింది. స్వామివారికి ఆలయ ప్రధానార్చకుడు అయినవిల్లి సూర్యనారాయణ మూర్తి ఆధ్వర్యంలో ప్రత్యేక పూజలు జరిపారు. స్వామివారి పంచామృత అభిషేకాల్లో నలుగురు, లఘున్యాస అభిషేకాల్లో 145 మంది, పరోక్ష అభిషేకాల్లో ఇద్దరు, స్వామివారి గరిక పూజలో ముగ్గురు, ఉండ్రాళ్ల పూజలో ఒకరు, శ్రీలక్ష్మీ గణపతి హోమంలో 27 మంది పాల్గొన్నారు. ఒక చిన్నారికి అక్షరాభ్యాసం, ఐదుగురు చిన్నారులకు అన్నప్రాసన, ఆరుగురికి తులాభారం చేశారు. 74 మంది భక్తులు వాహన పూజ చేయించుకోగా, స్వామివారి అన్నప్రసాదం 6,598 మంది భక్తులు స్వీకరించారు. ఈ ఒక్కరోజే రూ.4,49,861 ఆదాయం సమకూరిందని ఆలయ ఈఓ, ఏసీ ముదునూరి సత్యనారాయణరాజు తెలిపారు. వీరేశ్వరుని సన్నిధిలో శుభలేఖలకు పూజలు ఐ.పోలవరం: మురమళ్లలో కొలువైన శ్రీభద్రకాళీ సమేత వీరేశ్వరస్వామివారి ఆలయానికి భక్తులు పంపిన శుభలేఖలను స్వామి, అమ్మవార్ల పాదాల చెంత ఉంచి ప్రత్యేక పూజలు నిర్వహిస్తున్నట్లు ఆలయ సహాయ కమిషనర్‌, కార్యనిర్వహణాధికారి మాచిరాజు లక్ష్మీనారాయణ ఓ ప్రకటనలో తెలిపారు. ప్రతిరోజు ఆలయంలో స్వామివారికి కల్యాణం జరుగుతోంది. ముఖ్యంగా పెళ్లికాని యువతీ యువకులు ఇక్కడ స్వామివారికి కల్యాణం జరిపిస్తే అతి శీఘ్రంగా వివాహం జరుగుతుందని భక్తుల నమ్మకం. ఈ నేపథ్యంలో భక్తులు పోస్ట్‌ద్వారా పంపిన శుభలేఖలను స్వామి పాదాల చెంత ఉంచి పూజలు చేస్తున్నట్లు లక్ష్మీనారాయణ తెలిపారు. జోన్‌ 2 లో స్టాఫ్‌ నర్స్‌ల పోస్టుల భర్తీకి దరఖాస్తులు కంబాలచెరువు (రాజమహేంద్రవరం): వైద్య, ఆరోగ్యశాఖ జోన్‌ 2 పరిధిలో స్టాఫ్‌నర్స్‌ల పోస్టుల భర్తీకి దరఖాస్తులు ఆహ్వానిస్తున్నట్లు ఆ శాఖ ఆర్‌జేడీ పద్మశశిధర్‌ బుధవారం తెలిపారు. జోన్‌ 2 పరిధి పూర్వపు తూర్పు, పశ్చిమగోదావరి, కృష్ణా జిల్లాల పరిధిలో ఒక సంవత్సరం ఒప్పంద ప్రాతిపదికన భర్తీ చేసేందుకు అర్హులైన అభ్యర్థుల నుంచి దరఖాస్తులు కోరుతున్నామన్నారు. ఈ నెల 17వ తేదీలోగా దరఖాస్తులను రాజమహేంద్రవరంలోని వైద్య, ఆరోగ్యశాఖ కార్యాలయంలో అందజేయాలన్నారు. వివరాలకు సీడబ్ల్యూ.ఏపీ.నిక్‌.ఇన్‌ వెబ్‌సైట్‌ను చూడవచ్చన్నారు.

రైతులను ఆదుకోవాలి అధికారంలోకి వస్తే రైతులకు ఎంతో మేలు చేస్తామని ఎన్నికల సమయంలో కూటమి నేతలు ఊదరగొట్టారు. అధికారంలోకి వచ్చి ఆరు నెలలు గడిచినా అన్నదాతల సంక్షేమాన్ని పట్టించుకోవడం లేదు. ఇప్పటి వరకు రైతు భరోసా కేంద్రాల ద్వారా రైతులు సాయం పొందారు. ఇప్పుడు వాటిని నిర్వీర్యం చేసే దిశగా కూటమి ప్రభుత్వం పని చేస్తుండడంతో ఎరువుల, విత్తనాల కొరత ఏర్పడింది. రబీ మొదలైనా అన్నదాత సుఖీభవ పథకం కింద అందజేస్తామన్న రూ.20 వేలు నగదు సాయం ఊసే ఎత్తడం లేదు. గతంలో పంటల బీమా ప్రీమియాన్ని ప్రభుత్వమే చెల్లించగా, ఇప్పుడు రైతులే చెల్లిస్తున్నారు. ఇప్పటికై నా ప్రభుత్వం రైతు భరోసా కేంద్రాల ద్వారా గతంలో అందించిన సేవలను కొనసాగించాలి. పెట్టుబడి సాయం అందించి ఆదుకోవాలి. – రాయుడు శ్రీనివాస్‌, రైతు, యండమూరు, కరప మండలం దగా చేయడం తగదు ఎన్నికల సమయంలో అన్నదాత సుఖీభవ పథకం కింద రూ. 20 వేలు సాయాన్ని అందజేస్తామని హామీ ఇచ్చిన కూటమి ప్రభుత్వం ఇప్పుడు ఆ ఊసెత్తకపోవడం రైతులను దగా చేయడమే. గత వైఎస్సార్‌సీపీ ప్రభుత్వం రైతు భరోసా కేంద్రాల ద్వారా అనేక రైతు సంక్షేమ పథకాలను ప్రవేశ పెట్టి రైతులను అన్నీ విధాలా ఆదుకున్నారు. రైతు భరోసా పథకం కింద ఏటా పెట్టుబడి సాయాన్ని అందజేసింది. ఆ ఐదేళ్లు రైతులు ఎంతో సంతోషంగా సాగు చేపట్టారు. ఇప్పుడు ప్రభుత్వం సాయం అందక సన్నకారు రైతులు రబీ సాగుకు పెట్టుబడుల కోసం ఇబ్బందులు పడుతున్నారు. – వి.సీతారామరాఘవ, విజయరాయుడుపాలెం, కరప మండలం కాకినాడ సిటీ: గ్రామీణ ప్రాంతాల్లో రైతులకు సేవలు అందిస్తున్న వైఎస్సార్‌ రైతు భరోసా కేంద్రాల వ్యవస్థకు మంగళం పాడేందుకు కూటమి ప్రభుత్వం కుట్రలు చేస్తోంది. జిల్లాలో మెట్ట ప్రాంత మండలాలతో పాటు మిగతా మండలాల్లోనూ ఇకపై రైతులకు అందే సేవలు నిలిచిపోనున్నాయి. వరి ఈ–క్రాప్‌ ఆధారంగా రేషనలైజేషన్‌ పేరుతో వీఏఏ (విలేజ్‌ అగ్రికల్చరల్‌ అసిస్టెంట్‌)లను బదిలీ చేయడంతో చాలాచోట్ల ఆర్బీకేలు శాశ్వతంగా మూతపడనున్నాయి. గత ముఖ్యమంత్రి వైఎస్‌ జగన్‌మోహన్‌రెడ్డి రైతుల అవసరాలను దృష్టిలో పెట్టుకుని గ్రామస్థాయిలోనే ఆర్బీకే వ్యవస్థను రూపొందించారు. ఊరు దాటకుండానే వ్యవసాయశాఖ సేవలను రైతులు పొందారు. ఇప్పుడు ఆ వ్యవస్థను దశల వారీగా నిర్వీర్యం చేసేందుకు కూటమి సర్కార్‌ ప్రయత్నాలు చేస్తోంది. ఇప్పటికే ఆర్బీకేల్లో రైతులకు ఉపయోగపడే విత్తనాలు, ఎరువులు, పురుగు మందులు తదితర సేవలకు మంగళం పాడేశారు. కేవలం పేరుకే రైతు భరోసా కేంద్రాలు అన్నట్లు గ్రామాల్లో కన్పిస్తున్నాయి తప్ప రైతులకు ఉపయోగపడే ఏ సేవలూ కొనసాగడం లేదు. మాజీ ముఖ్యమంత్రి వైఎస్‌ జగన్‌మోహన్‌రెడ్డి మానస పుత్రిక, రైతుల ఆత్మబంధువైన ఆర్బీకే వ్యవస్థకు దేశవ్యాప్తంగా మంచి గుర్తింపు వచ్చింది. ఈ వ్యవస్థను ఆది నుంచీ వ్యతిరేకించిన చంద్రబాబు, అధికారంలోకి రాగానే నిర్వీర్యం చేసేందుకు కుట్ర చేస్తూ వస్తున్నారు. గ్రామీణ ప్రాంతాల్లో ఈ వ్యవస్థ ప్రాధాన్యం తగ్గించి వైఎస్‌ జగన్‌ ముద్రను చెరిపేసే కుట్ర చేస్తున్నారనే విమర్శలు కూడా ఉన్నాయి. ఆర్బీకేలను అదృశ్యం చేసే దిశగా అడుగులు వేస్తున్నారు. దీనిలో భాగంగానే వీఏఏలను రేషనలైజేషన్‌ పేరుతో బదిలీ చేశారంటున్నారు. ఇప్పటికే మెట్ట ప్రాంతాలకు తీవ్ర అన్యాయం మెట్ట మండలాల్లో ముఖ్యంగా మినుము, పెసర, మొక్కజొన్న, మిరప, జొన్న, పొద్దు తిరుగుడు, పసుపు, వేరుశనగ, పొగాకు, సజ్జ, పత్తితో పాటు మామిడి, బత్తాయి, అరటి, బొప్పాయి వంటి ఉద్యాన పంటలు కూడా సాగు చేస్తారు. ఈ రైతుల సౌకర్యార్థం జిల్లాలో 414 మంది వీఏఏలతో రైతు భరోసా కేంద్రాలను వైఎస్సార్‌ సీపీ ప్రభుత్వం ఏర్పాటు చేసింది. గ్రామ స్థాయిలో రైతులకు సేవలు అందజేసింది. ఇప్పుడు రైతు భరోసా కేంద్రాల్లో సేవలు లేకపోవడంతో ఇటు మెట్ట, అటు డెల్టా ప్రాంతాల రైతులు గగ్గోలు పెడుతున్నారు. సుఖీభవ కోసం నిరీక్షణ కూటమి ప్రభుత్వం రబీ సీజన్‌లోనైనా అన్నదాతా సుఖీభవ పథకం కింద నగదు సాయం అందజేస్తుందని రైతులు ఆశించారు. అయితే ఆ ఊసే ఎత్తకపోవడంతో చిన్న, సన్నకారు రైతులు అప్పులు చేసి మరీ వరి నాట్లు వేసుకుంటున్నారు. గత వైఎస్సార్‌ సీపీ ప్రభుత్వం రైతు భరోసా పథకం కింద ఏటా అర్హులైన రైతులకు రూ. 13,500 చొప్పున నగదు సాయం అందజేసి ఆదుకుంది. గత ఐదేళ్లలో కాకినాడ జిల్లాలో 1.75 లక్షల మంది రైతులకు రూ.1.675 కోట్ల మేర పెట్టుబడి సాయం అందింది. అయితే ఎన్నికల హామీల్లో భాగంగా కూటమి నాయకులు అన్నదాత సుఖీభవ కింద ఏడాదికి రూ.20 వేలు సాయం అందజేస్తామని రైతులకు చెప్పారు. అయితే కూటమి ప్రభుత్వం అధికారంలోకి వచ్చి ఆరు నెలలు గడిచినా ఇప్పటి వరకు అమలు చేయకపోవడంతో రైతులకు ఎదురుచూపులే మిగిలాయి. ఖరీఫ్‌ సీజన్‌లో అందజేస్తారని ఆశించిన రైతులకు నిరాశే మిగిలింది. ప్రస్తుత రబీ సీజన్‌లోనూ ప్రభుత్వం ఆ ఊసెత్తకపోవడంతో రైతులు బ్యాంకుల్లోనూ, బయట అప్పులు చేసి సాగు చేపట్టాల్సిన పరిస్థితి నెలకొంది. వ్యవసాయం దండగ అని ప్రగాఢంగా నమ్మే ముఖ్యమంత్రి చంద్రబాబునాయుడు ఆ రంగానికి అంతగా ప్రాధాన్యం ఇవ్వరనేది అందరికీ తెలిసిందే. ఎన్నికల వేళ రైతులను ప్రసన్నం చేసుకోవడానికి ఎన్నో హామీలు ఇవ్వడం.. ఆనక అటకెక్కించడం ఆయనకు పరిపాటి. ఇచ్చిన హామీలు నెరవేర్చకపోతే పోయే ఇప్పటికే పొందుతున్న సదుపాయాలను, రాయితీలను దూరం చేస్తుండడం రైతులను ఇబ్బందుల పాలు చేస్తోంది. అన్నదాతా సుఖీభవ ఊసెత్త కుండా, ఉచిత పంటల బీమాకు మంగళం పాడిన ఆయన తాజాగా ఆర్బీకేలను మూతవేసే దిశగా వేస్తున్న అడుగులు సాగును సంక్షోభంలోకి నెడుతున్నాయి. ఆర్బీకే వ్యవస్థకు మంగళం పాడనున్న కూటమి సర్కారు ఇప్పటికే గ్రామాల్లో సేవలు బంద్‌ చేసిన వైనం జిల్లాలో 414 రైతు భరోసా కేంద్రాలను నిర్వీర్యం చేసేందుకు కుట్ర విత్తనాలు, ఎరువులు, పురుగు మందులు అందక రైతులకు ఇక్కట్లు గత వైఎస్సార్‌ సీపీ ప్రభుత్వం రైతులకు అన్ని రకాల సేవలను ఇంటి ముంగిటే అందించే లక్ష్యతో రైతు భరోసా కేంద్రాలను తీసుకొచ్చింది. అందులో భాగంగా కాకినాడ జిల్లాలో 414 ఆర్బీకేలను ఏర్పాటు చేసింది. అందులో దాదాపుగా 278కి పైగా ఆర్‌బీకేలకు సొంతభవనాలుండగా మరికొన్ని కేంద్రాలను అద్దె భవనాల్లో ఏర్పాటు చేసింది. ఇంకొన్ని భవనాలు పలు దశల్లో నిర్మాణంలో ఉన్నాయి. ఒక్కొక్క ఆర్బీకే నిర్మాణానికి రూ.23.94 లక్షల వంతున ఖర్చు చేసింది. రైతులకు సేవలు అందించేందుకు ఆర్బీకేల్లో ప్రత్యేక వ్యవసాయ అసిస్టెంట్‌లను ఏర్పాటు చేశారు. ఆర్బీకేల ద్వారా ఏటా రబీ సీజన్‌లో 6 వేలు, ఖరీఫ్‌ సీజన్‌లో4 వేల క్వింటాళ్లకు పైగా నాణ్యమైన విత్తనాలను రైతులకు ప్రభుత్వం రాయితీపై అందజేసింది. అకాల వర్షాలతో నారుమళ్లు దెబ్బతిన్న రైతులకు 80 శాతం సబ్సిడీపై మళ్లీ విత్తనాలను సైతం పంపిణీ చేసింది. ఏటా సుమారు రెండు వేల టన్నులకు పైగా ఎరువులను ఇంటి ముంగిటకే అందజేసింది. పంట నూర్పిళ్ల సమయంలో ఏటా 2.75 లక్షల టన్నుల ధాన్యాన్ని కొనుగోలు చేసి రైతులకు కనీస మద్దతు ధర అందించింది. ధాన్యం విక్రయించుకునేందుకు రైతులు ఇబ్బందులు పడకుండా ఆర్బీకే సిబ్బంది ముందస్తుగా ఈ–క్రాప్‌ ద్వారా వివరాలు నమోదు చేసేవారు. ఏటా సుమారు 30 వేల మంది రైతుల వివరాలను ఈ–క్రాప్‌లో నమోదు చేయడం ద్వారా మెరుగైన సేవలు అందించింది. ఆర్బీకేల ద్వారా రైతు భరోసా, పీఎం కిసాన్‌, పొలంబడి, రాయితీపై వ్యవసాయ యంత్ర పరికరాల పంపిణీ, పంటల బీమా, తదితర సుమారు 20 రకాల సేవలు అందేవి. భూసార పరీక్షలు సైతం నిర్వహించి శాసీ్త్రయ పద్ధతిలో నేల స్వభావాన్ని, సూక్ష్మ, స్థూల పోషకాలను అంచనా వేసి రైతులకు.. ఏ మేర ఎరువులు వేయాలి. ఏఏ పంటలు సాగు చేయాలి వంటి సూచనలు, సలహాలను సైతం అందజేసింది. తద్వారా రైతుల పెట్టుబడులు గణనీయంగా ఆదా అయ్యాయి. ఆర్బీకేల ద్వారా పంటల బీమా కూడా రైతులకు సులభంగా అందుబాటులోకి వచ్చింది. ఆర్బీకేల్లో ఉన్న రైతుల వివరాల ఆధారంగా సిబ్బంది ఉచిత పంటల బీమా చేయించడంతో పాటు ప్రకృతి విపత్తుల కారణంగా నష్టపోయిన రైతులకు వెంటనే పరిహారం సైతం అందేది. జిల్లాలో మెట్ట ప్రాంతాల్లో చెరువులు, బోర్లు కింద వరి సాగు చేస్తారు. మొత్తం మీద ఏదో ఒక పంట అయితే రైతులు సాగు చేస్తారు. పంట సాగును పర్యవేక్షించేందుకు వీఏఏలు క్షేత్ర స్థాయిలో పర్యటించి చీడపీడలు, తెగుళ్ల నివారణకు రైతులకు తగు సూచనలు, సలహాలు ఇవ్వాల్సి ఉంది. అయితే ఆర్బీకేలను రైతు సేవా కేంద్రాలుగా మార్చిన కూటమి ప్రభుత్వం ఎరువుల పంపిణీని నిలిపివేసింది. విత్తనాలను అరకొరగా పంపిణీ చేస్తోంది. ఉచిత పంటల బీమాను సైతం నిలిపివేసింది. దీంతో రైతు భరోసా కేంద్రాలు నిర్వీర్యం అవుతున్నాయి.

అన్నవరం: రత్నగిరి పై కొలువైన సత్యదేవుని ఆలయానికి వివిధ వాహనాలలో వచ్చే భక్తులు సత్యగిరి పక్కన కొండను చదును చేసి ఏర్పాటు చేసిన పార్కింగ్‌ స్థలంలో తమ వాహనాలను నిలుపుతున్నారు. అయితే అక్కడ ఒక వైపు లోయ ఉంది. లోయ వైపు బారికేడ్స్‌ లేకపోవడంతో వాహనాలను పార్క్‌ చేయడానికి వాహనదారులు భయపడుతున్నారు. కోవిడ్‌ తరువాత వాహనాలలో సత్యదేవుని ఆలయానికి విచ్చేసే భక్తులు పెరిగారు. సాధారణ రోజుల్లో సుమారు వేయికి పైగా వాహనాలలో వస్తుంటే పర్వదినాలలో ఐదు వేలకు పైగా వాహనాలలో విచ్చేస్తున్నారు. గతంలో ఈ వాహనాలకు పార్కింగ్‌ స్థలం తక్కువగా ఉండేది. దాంతో రెండు ఘాట్‌రోడ్డులకు ఇరువైపులా వాహనాలను నిలిపివేయడంతో తరచూ ట్రాఫిక్‌ జామ్‌ అయ్యేది. దీంతో వాహనదారులతో బాటు సామాన్య భక్తులు కూడా ఇబ్బంది పడేవారు. 2023లో ఈఓ గా పనిచేసిన ఎస్‌ఎస్‌ చంద్రశేఖర్‌ అజాద్‌ భక్తుల వాహనాలను నిలిపివేసేందుకు సత్యగిరి పక్కన కొండను చదును చేయించి మల్టీపర్పస్‌ పార్కింగ్‌ ప్లేస్‌ అభివృద్ధి చేశారు. ఇక్కడ సుమారు రెండు వేల వాహనాలను పార్క్‌ చేసే సదుపాయం కల్పించారు. ఈ పార్కింగ్‌ ప్లేస్‌లో ఒకవైపు కొండ మరో వైపు లోయ ఉన్నాయి. పార్కింగ్‌ చేసిన వాహనాలు పడిపోకుండా లోయ వైపు చిన్న గోడ లేదా బారికేడ్స్‌ నిర్మించాలని ఆయన ఇంజినీరింగ్‌ సిబ్బందిని ఆదేశించారు. అయితే ఆయన 2023 నవంబర్‌లో బదిలీ అయ్యారు. అప్పటి నుంచి ఆ పార్కింగ్‌ ప్లేస్‌లో లోయవైపు ఎటువంటి గోడ లేదా బారికేడ్స్‌ నిర్మాణం జరగలేదు. సాధారణ రోజులలో ఇక్కడ కొండ వైపు వాహనాలను నిలుపుదల చేస్తున్నారు. శని, ఆదివారాలు, దశమి, ఏకాదశి, పౌర్ణిమ వంటి పర్వదినాలలో మాత్రం వాహనాలు ఎక్కువగా వస్తుండడంతో లోయ వైపు కూడా వాహనాలను నిలుపుదల చేస్తున్నారు. అయితే ఆ వాహనాలు నిలుపుదల చేయడంలో ఏమాత్రం అజాగ్రత్తగా ఉన్నా లోయలో పడిపోయే అవకాశం ఉంది. ఆ పార్కింగ్‌ స్థలంలో లోయ వైపు రక్షణ గోడ నిర్మించడం లేదా ఇనుప స్తంభాలతో బారికేడ్స్‌ ఏర్పాటు చేయాలని వాహనదారులు కోరుతున్నారు. ఒక వైపు లోయ..ఇంకో వైపు కొండ లోయ వైపు బారికేడ్స్‌ లేక వాహనదారులకు ఇబ్బంది

ప్రత్తిపాడు: టీడీపీలో రెండు వర్గాల మధ్య జరిగిన ఫ్లెక్సీ వివాదంలో ఒకరు గాయపడిన ఘటన ఇది. మండలంలోని లంపకలోవ గ్రామంలో నూతన సంవత్సరం సందర్భంగా మంగళవారం సాయంత్రం ఫ్లెక్సీ కట్టే విషయమై ఈ వివాదం చోటు చేసుకుంది. టీడీపీలోని రెండు వర్గాల మధ్య రేగిన ఈ రగడ ఒకరిని కత్తి పోటుకు గురిచేసింది. టీడీపీలో ముందు నుంచి ఉన్న వర్గీయులకు, వైఎస్సార్‌ సీపీ నుంచి టీడీపీ తీర్ధం పుచ్చుకున్న సొసైటీ మాజీ అధ్యక్షుడు గొంతిన సురేష్‌ వర్గానికి పొసగడం లేదు. ఒక వర్గం ప్లెక్సీ ఏర్పాటు చేస్తుంటే గొంతిన సురేష్‌ వర్గీయులు అభ్యంతరం చెప్పడంతో వివాదం ముదిరింది. వివాదం ముదిరి పాకాన పడడంతో గొంతిన సురేష్‌ వర్గీయులు మరో వర్గం కార్యకర్త అవిడి అంజిబాబుపై కత్తితో దాడి చేశారు. ఈ దాడిలో గాయపడిన అంజిబాబును చికిత్స కోసం ప్రత్తిపాడు కమ్యూనిటీ హెల్త్‌ సెంటర్‌కు తరలించారు. ఈ విషయమై ప్రత్తిపాడు ఎస్సై ఎస్‌ లక్ష్మీకాంతంను వివరణ కోరగా ఇరువర్గాలను విచారించి, కేసు నమోదు చేస్తామని చెప్పారు. ఈ సంఘటనతో టీడీపీలో అంతర్గతంగా ఉన్న విభేదాలు గుప్పుమన్నాయి. కాగా గొంతిన సురేష్‌ వర్గానికి ఎమ్మెల్యే వరుపుల సత్యప్రభ మద్దతు ఇస్తున్నారని ఓ వర్గం కార్యకర్తలు ఆరోపిస్తున్నారు. టీడీపీ కార్యకర్తపై దాడి జరిగితే ఎమ్మెల్యే స్పందించలేదని వారు అంటున్నారు. బాధితుడికి న్యాయం చేయాలని వారు డిమాండ్‌ చేస్తున్నారు. ఒకరికి గాయాలు టీడీపీలో భగ్గుమన్న విభేదాలు