కుక్క మనిషి పట్ల చాలా విశ్వాసంగా ఉంటుంది. మరి మనిషి దానికి కృతజ్ఞత ప్రకటించే పండుగ చేసుకోవాలి గదా. నేపాలీలకు శునకాలంటే చాలా ప్రీతి. వారు దీపావళి మరుసటి రోజును ‘కుకుర్‌ తిహార్‌’ పేరుతో శునకాల పండుగ నిర్వహిస్తారు. ఆ రోజు పెంపుడు శునకాలకు, వీధి కుక్కలకు పూజలు చేసి వాటికి ఇష్టమైన ఆహారం పెడతారు. మూగ జీవులకు మనిషి ఆశ్రయం ఇచ్చి వాటిని పెంచాలనే సందేశం ఈ పండుగలో ఉంది.నేపాల్‌లో శునకాల మీద ప్రేమ బాల్యం నుంచి నేర్పిస్తారు. అక్కడ దీపావళి పండుగ ఐదు రోజుల పాటు చేస్తారు. మొదటి రోజు దీపావళి అయితే రెండోరోజు ‘కుకుర్‌ తిహార్‌’. అంటే శునకాల పండుగ. ఆ రోజున శునకాలకు పూజ ఎలా చేయాలో ఇళ్లల్లో ఉన్న నానమ్మలు, అమ్మమ్మలు పిల్లలకు నేర్పిస్తారు. ‘పిల్లలూ... మనిషిని ఏ స్వార్థం లేకుండా ప్రేమించే జీవి కుక్క ఒక్కటే. అది మనతోపాటే ఉంటుంది. మనల్ని కనిపెట్టుకుని ఉంటుంది. అంతేకాదు... మనం చనిపోయాక స్వర్గం వరకూ దారి చూపించేది అదే. అందుకే దానికి ఆశ్రయం ఇచ్చి అన్నం పెట్టాలి. కుకుర్‌ తిహార్‌ రోజు దానికి పూజ చేసి నమస్కరించుకోవాలి’ అని చెబుతారు.నేపాలీలు తరతరాలుగా ఇలా ఈ సంప్రదాయాన్ని అందిపుచ్చుకుని ‘కుకుర్‌ తిహార్‌’ నిర్వహిస్తారు.కుంకుమ బొట్టు... బంతి పూల మాల‘కుకుర్‌ తిహార్‌’ రోజు పెంపుడు కుక్కలకు గాని, ఇంటి కుక్కలకు గాని ప్రతి ఇంటి వారు తప్పక పూజ చేస్తారు. పూజలో మొదట కాళ్లు కడుగుతారు. ఆ తర్వాత దానికి పసుపు, కుంకుమ బొట్లు పెడతారు. ఆ తర్వాత నేత దారంతో చేసిన దండ తొడుగుతారు. ఆపైన బంతి పూల మాల వేస్తారు. ఆ పైన హారతి ఇచ్చి నమస్కరించుకుంటారు. ఇక అప్పుడు దానికి కొత్త బంతి, కొత్త బొమ్మలు ఇచ్చి ఉడికిన గుడ్లు, బిస్కెట్లు లాంటివి తినిపిస్తారు. కుక్కలు కూడా బుద్ధిగా కూచుని ఇవన్నీ చేయించుకుంటాయి. తమ యజమానులను మరింతగా ప్రేమిస్తాయి.విశ్వాసానికి కృతజ్ఞతకుక్కలా విశ్వాసంగా ఉండే జీవి మరొకటి లేదు. చరిత్రలు దాదాపు 14 వేల సంవత్సరాల క్రితం నుంచే మనిషికి, కుక్కకు స్నేహం కుదిరిందని ఆధారాలు చెబుతున్నాయి. మనిషి మచ్చిక చేసుకున్న మొదటి జంతువు కుక్క. నేపాలీలు మరో అడుగు వేసి కుక్క యముడికి తోడుగా వస్తుందని భావిస్తారు. మృత్యు సమయంలో అది సహాయంగా ఉండి దారి చూపుతుందని నమ్ముతారు. అందుకే కుకుర్‌ తిహార్‌ ఎంతో శ్రద్ధగా జరుపుతారు. మరో విషయం ఏమిటంటే కుక్కలకే కాదు మూగ జీవులకు ఆశ్రయం ఇవ్వడం మనిషి బాధ్యత అని, వాటిని పోషించే ఓర్పు మనిషికి ఉండాలని చెప్పడానికి కూడా ఈ పండుగ జరుపుకుంటారు.


  ఖాట్మండ్: ప్రతి కుక్కకూ ఒక రోజు వస్తుందని ఇంగ్లీషు సామెత. నిజమే కానీ.. కుక్కల కోసం ఒక రోజును డెడికేట్ చేసిన దేశం ఉంది తెలుసా.. అంతే కాదు.. ఆరోజు తమ పెంపుడు కుక్కలకు పూజలు కూడా చేస్తారు. ఈ వింత ఆచారం మన పొరుగున ఉన్న నేపాల్ లో ఉంది.
 
 ప్రతి ఏటా నేపాల్ లో జరిగే.. తిహర్ పండగ సందర్భంగా నేపాల్ వాసులు తమ పెంపుడు కుక్కలను పూజిస్తారు. నేపాలీల ముఖ్య మైన పండుగల్లో తిహర్ ఒకటి. మన దేశంలో దీపావళిని పోలి ఉండే ఈ పండుగను నాలుగు రోజుల పాటు నిర్వహిస్తారు. ఈ ఉత్సవాల్లో రెండో రోజును కుక్కల కోసం కేటాయించారు. దీన్నే 'కుకుర్ తిహర్' గా వ్యవహరిస్తారు. మనుషులకు అత్యంత విశ్వాస పాత్రమైన ఈ నాలుగు కాళ్ల జీవిని ఈ సందర్భంగా గౌరవించుకుంటారు.
 
 రుగ్వేదంలో ఇంద్రుడు తన గోవులను కనుగొనటంలో సమర అనే కుక్క సహాయ పడిందని.. అప్పటి నుంచి శునకాన్ని పూజించటం మొదలైందని నేపాలీలు భావిస్తారు. అంతేకాకుండా.. కుక్క యముడి దూత అని ఇక్కడి వారి నమ్మకం. అందువల్ల కుక్కను గౌరవించాలని అంటారు నేపాల్ వాసులు.  అంతే కాదు.. పశువులను పూజించడం తిహర్ ఉత్సవాల ప్రత్యేకత.. నాలుగు రోజుల్లో ప్రతి రోజు ఒక జంతువును పూజిస్తారు.
 
 కుకుర్ రోజు తమ పెంపుడు కుక్కు నుదుటన తిలకం దిద్ది, దాని మెడలో పూల మాల వేసి.. సత్కరిస్తారు. మానవుడికి అత్యంత విశ్వాస పాత్రంగా ఉన్నందుకు ధన్యవాదాలు తెలుపుతూ పూజిస్తారు. అయితే కుక్కలను ప్రత్యేకంగా గౌరవించే ఈ రోజుపట్ల ప్రపంచ వ్యాప్తంగా కుక్కల ప్రేమికులు హర్షం వ్యక్తం చేస్తున్నారు.