కదిరి అర్బన్‌ : మండల పరిధిలోని కుమ్మరవాండ్లపల్లిలో గురువారం తెల్లవారుజామున  లక్ష్మమ్మ (65) అనే వృద్ధురాలిని గుర్తుతెలియని వ్యక్తులు బండరాతిని తలపై మోది దారుణంగా హత్య చేశారు. మృతురాలు యాచకవృత్తి చేసుకుని జీవించేంది. రాత్రి పూట రోడ్డుపక్కనున్న షాపుల వద్ద వరండాలో నిద్రిస్తుండేది. ఇంత దారుణంగా వృధ్దురాలిని హత్య చేశారంటే అది ఆమె దగ్గర ఉన్న డబ్బును లాక్కునేందుకా..లేక వేరే కారణాలు ఏమైనా ఉన్నాయా అన్న విషయం పోలీసుల దర్యాప్తులో తేలాల్సి ఉంది.
 
 దుండగుల ఆచూకీ తెలుసుకునేందుకు పట్టణ సీఐ శ్రీనివాసులు డాగ్‌స్క్వాడ్‌, క్లూస్‌ టీంలను రంగంలో దించారు.  మృతదేహాన్ని పోస్టుమార్టం నిమిత్తం కదిరి ప్రభుత్వాసుపత్రికి తరలించారు. తన తల్లి మృతి చెందడంతో కుమార్తె  రమణమ్మ కన్నీరు మున్నీరైంది. రూరల్‌ మండల ఎస్సై వెంకటప్రసాద్‌ కేసు నమోదు చేసుకుని దర్యాప్తు చేస్తున్నారు.


 కదిరి అర్బన్‌ : కుమ్మరవాండ్లపల్లిలో ఒకటో తరగతి చదివే శివసాయి అనే ఆరేళ్ల బాలుడు తప్పిపోయినట్లు తండ్రి నాగరాజు రూరల్‌ పోలీసులకు ఫిర్యాదు చేశాడు. గురువారం మధ్యాహ్నం ఇంటి నుంచి గ్రామంలోని కాకతీయ ప్రైవేటు పాఠశాలకు వెళ్లిన విద్యార్థి తిరిగి రాలేదని పేర్కొన్నాడు. ఇద్దరు వ్యక్తులు స్కూటీలో వచ్చి శివసాయి వెంట ఉన్న బాలుడిని చాక్లెట్‌ కొనుక్కో అని పంపించారని, ఆ తర్వాత శివసాయిని ఎక్కించుకుని వెళ్లారని బంధువులు ఆరోపిస్తున్నారు. ఎవరైనా కిడ్నాప్‌ చేశారా.. లేక బాలుడు తప్పిపోయాడా అనేది పోలీసుల దర్యాప్తులో తేలాల్సి ఉంది. బాలుడి ఆచూకీ లభిస్తే డీఎస్పీ సెల్‌ నంబర్‌ 9440796850, సీఐ నంబర్ 94407 96851, ఎస్‌ఐ నంబర్‌ 9014440424కు ఫోన్‌ చేయాలని పోలీసులు తెలిపారు.