మీరు పరమ బద్దకిస్టులా.. పళ్లు తోముకోవడానికి కూడా ఆలోచించే టైపా.. లేదా మీరు బాగా బిజీనా.. అయితే.. ఇది మీలాంటోళ్ల కోసమే.. దీని పేరు యూనికో.. ఇదో స్మార్ట్‌ బ్రష్‌. కేవలం 3 క్షణాల్లో మన 32 పళ్లనూ శుభ్రం చేసేస్తుందట. ఇందులో చిన్నచిన్న సైజుల్లో చాలా బ్రష్షులుంటాయి. మైక్రో పంప్‌ సిస్టం ద్వారా టూత్‌ పేస్టు ఆయా బ్రష్షులకు చేరుతుంది. దీనికి తగిలించి ఉండే పవర్‌ యూనిట్‌ ద్వారా ఆ బ్రష్షులు పనిచేస్తాయి. మన నోటికి సరిపోయేటట్టు 4 రకాల సైజుల్లో దొరుకుతుంది. దీంతోపాటు ఓ బాక్సు ఇస్తారు. బ్రష్షును వాడిన తర్వాత దాన్ని బాక్సులో పెట్టేస్తే.. అందులో ఉండే యూవీ కిరణాల ద్వారా అది క్లీన్‌ అయిపోతుంది. దాంతోపాటు చార్జింగ్‌ కూడా అయిపోతుంది. మొబైల్‌లో వాడుకోవడానికి వీలుగా ఓ యాప్‌ కూడా ఉంది. దాన్ని ఫోన్‌లో ఇన్‌స్టాల్‌ చేసుకుంటే.. బ్రష్షు పనిచేసే స్పీడు.. సమయాన్ని మనం మార్చుకోవచ్చు. దీని ధర రూ.8,065.