ప్రేమ దేశం యువరాణి  పూతప్రాయం విరబోణి   ఏరికోరి మెచ్చావే  ఈ తోట రాముణ్ణి   అని అంటూ సినిమాల్లోనే కోటలో రాజకుమారి తోటలో సామాన్యుడిని పెళ్లి చేసుకోవడం చూశాం. కానీ ఇక్కడ నిజజీవితంలో జపాన్‌ యువరాణి మాకో తాను ప్రేమించినవాడితో జీవితాన్ని పంచుకోవడం కోసం అన్నీ వదులుకొని సామాన్యురాలిగా మారిపోయింది. డబ్బుని, విలాసవంతమైన జీవితాన్ని, రాచరిక హోదాని వదులుకొని అత్యంత నిరాడంబరంగా ప్రేమికుడు కీశాన్‌ కొమురొని పెళ్లాడింది. వారిద్దరి వివాహ ధ్రువీకరణ పత్రాన్ని రాజభవనం అధికారులు మంగళవారం అధికారికంగా విడుదల చేశారు.  రాజభరణాన్ని తిరస్కరించి..   జపాన్‌ రాచరిక చట్టాల ప్రకారం అమ్మాయిలు సామాన్యుల్ని పెళ్లి చేసుకుంటే రాణీవాసాన్ని, రాజభోగాల్ని వదులుకోవాలి. అందు కోసం రాజభరణం కింద 14 కోట్ల యెన్‌లు (దాదాపుగా రూ 9.30 కోట్లు) చెల్లిస్తారు. కానీ మాకో తమ ప్రేమ ముందు అన్నీ తృణప్రాయంగా భావించింది. రాజభరణాన్ని తిరస్కరించి కట్టుబట్టలతో రాజప్రసాదాన్ని వీడింది. రెండో ప్రపంచయుద్ధం తర్వాత రాజభరణాన్ని వద్దనుకొని సామాన్యుడి వెంట అడుగులు వేసిన యువరాణి మాకో ఒక్కరే. కొమురొ, మాకో జంట అమెరికాలోని న్యూయార్క్‌లో తమ భావి జీవితాన్ని గడపనున్నారు. న్యూయార్క్‌లో కొమురొ లాయర్‌ వృత్తిలో ఉన్నారు. వీరిద్దరినీ ఇప్పుడు బ్రిటన్‌ రాచరిక జంట ప్రిన్స్‌ హ్యారీ, మేఘాన్‌ మార్కెల్‌లతో పోలుస్తున్నారు.   అతనో పెన్నిధి   దేశం విడిచి వెళ్లే ముందు కొత్త జంట మీడియాతో మాట్లాడారు. కొమురొ వెలకట్టలేని ఒక పెన్నిధి అని, తమ మనసులు మరింతగా పెనవేసుకొని జీవితాంతం ఆనందంగా గడపడానికే ఈ పెళ్లిచేసుకున్నామని మాకో చెప్పారు. మరోవైపు కొమురొ కూడా మాకోపై అంతే ప్రేమను కురిపించారు. ‘‘మాకోని నేను ఎంతగానో ప్రేమిస్తున్నాను. ఈ జీవితం ఒక్కటే. ఇది ఆమె ప్రేమలోనే గడిపేస్తాను’’అని భావోద్వేగంతో చెప్పారు. కష్టమైనా, సుఖమైనా కలిసి పంచుకుంటూ, ఒకరికొకరు తోడు నీడగా ఉంటామన్నారు.       – టోక్యో  ఆది నుంచి వివాదాలే   కోటలో యువరాణి మనసిచ్చిన సామాన్యుడ్ని మనువాడడం అంత సులభం కాదు. వీరి జీవితంలోనూ సినిమాల్లో చూపించే మలుపులు, వివాదాలు ఎన్నో ముసురుకున్నాయి. జపాన్‌ చక్రవర్తి నరుహితోకు మేనకోడలైన మాకో , టోక్యోలోని ఇంటర్నేషనల్‌ క్రిస్టియన్‌ యూనివర్సిటీలో చదువుతున్నప్పుడు కొమురొ క్లాస్‌మేట్‌. అలా వారిద్దరి పరిచయం ప్రేమగా మారింది. 2017 సెప్టెంబర్‌లోనే వారిద్దరూ తాము ప్రేమలో ఉన్నామని ప్రకటించారు. ఎంగేజ్‌మెంట్‌ కూడా అయిపోయింది. అయితే కొమురొ తల్లితో వచ్చిన ఒక ఆర్థికపరమైన వివాదం కారణంగా అప్పట్లో వారి వివాహం ఆగిపోయింది. కొమురొ తల్లి ఆమె మాజీ ప్రియుడి నుంచి డబ్బులు తీసుకొని ఎగవేశారన్న ఆరోపణలున్నాయి. కొమురొ, మాకో పెళ్లికి ఆ ఆరోపణలతో సంబంధం లేదని రాజకుటుంబం అప్పట్లోనే ప్రకటించింది. అప్పట్నుంచి మీడియాలో వారిద్దరి ప్రేమపై లెక్కలేనన్ని కథనాలు వచ్చాయి. కొమురొ యువరాణికి తగిన జోడీ కాదని మీడియాలో హోరెత్తిపోయింది. ప్రజలు కూడా యువరాణి ప్రేమని మెచ్చలేదు. ఆ స్థాయిలో వ్యతిరేకతను తట్టుకోలేక మాకో మానసికంగా కుంగిపోయింది. ఆ డిప్రెషన్‌ నుంచి కోలుకోవడానికి ఆమెకు మూడేళ్లు పట్టింది. ఎన్నో వివాదాలు, వ్యతిరేకతల్ని ఎదుర్కొని సంపదని, రాజభోగాల్ని వదులుకొన్న యువరాణి మాకో రియల్‌ హీరోయిన్‌ అనిపించుకుంది. 


 సాక్షి, టోక్యో: 'అతని నవ్వు సూర్య కాంతి వలె వెలుగునిస్తుంది' దాన్ని చూసే తాను కొమెరోను ప్రేమించానని జపాన్‌ రాకుమారి మకో మీడియా ప్రతినిధులతో మురిపెంగా చెప్పిన మాట. జపాన్‌ రాకుమారి మకో, లీగల్‌ అసిస్టెంట్‌గా పని చేస్తున్న కొమెరోలకు ఆదివారం ఘనంగా నిశ్చితార్థం జరిగింది. వచ్చే ఏడాది శరదృతువులో ఇరువురికి రాజ సంప్రదాయాల ప్రకారం వివాహం జరగనుంది.
 
 ఈ మధ్య సమయంలో జపాన్‌ రాజ వివాహాల పద్దతుల ప్రకారం జరగాల్సిన కొన్ని కార్యక్రమాలను జరిపిస్తారు. ఓ సాధారణ యువకుడిని ప్రేమించి పెళ్లి చేసుకోవాలని  రాకుమారి మకో నిర్ణయించుకున్న విషయం తెలిసిందే. ఈ విషయం బయట ప్రపంచానికి తెలియడంతో ఒక్కసారిగా అందరూ ఆశ్చర్యానికి గురయ్యారు. రాకుమారి మనసు దోచిందెవరా? అని అతని వైపు ఓ లుక్కేశారు కూడా. ఈ ఏడాది మేలో మకో, కొమెరోను వివాహం చేసుకోవాలని భావిస్తున్నట్లు ఆమె తన తల్లిదండ్రులు అకిషినో, కికోలకు చెప్పారు.
 
 
 
 జపాన్‌ రాజప్రాసాద చట్టం ప్రకారం.. రాజ వంశానికి చెందిన యువతి సాధారణ వ్యక్తిని పెళ్లి చేసుకుంటే రాజ గుర్తింపును వదులుకోవాలి. అంతేకాదు రాజ ప్రసాదం వదలి వెళ్లిపోవాలి. వీటి అన్నింటికి తాను సిద్ధమని కొమెరోతో తన వివాహం జరిపించాలని తల్లిదండ్రులను కోరింది. రాకుమారి కొమెరోను ఆమె తల్లిదండ్రులకు పరిచయం చేసినప్పుడు ఏమీ చేయడం లేదు. కేవలం రాకుమారిని ప్రేమిస్తున్నారంతే!
 
 టోక్యో ఇంటర్నేషనల్‌ క్రిస్టియన్‌ విశ్వవిద్యాలయం నుంచి డిగ్రీ పట్టా పొందిన కొమెరో.. నిశ్చితార్థ సమయానికి మాత్రం లీగల్‌ అసిస్టెంట్‌గా ఉద్యోగం సాధించారు. స్కీయింగ్‌ చేయడం, వయెలిన్‌ ప్లే చేయడం కొమెరోకు బాగా వచ్చు. వంట కూడా అద్భుతః అనిపిస్తారట కొమెరో. పెళ్లి కోసం ఒక రాకుమారి సింహాసనాన్ని వదిలేసిన సందర్భం జపాన్‌ రాజవంశంలో ఇదే మొదటిది కాదు. మకో ఆంటీ సయాకో కూడా ఇలాగే ఒక సామాన్యుడిని చేసుకుని బయటికి వెళ్లిపోయారు. ‘అయ్యో! ఇలా ఒకరొకరు అంతఃపుర ఆడపడుచులు వెళ్లిపోతుంటే రాజకుటుంబం చిన్నబోదా.. చిన్నదైపోదా’ అని జపాన్‌ పౌరులు బెంగ పెట్టుకుంటున్నారట.
 
 ప్రస్తుతం జపాన్‌ రాజకుటుంబానికి నలుగురే వారసులున్నారు. చక్రవర్తి అకిహిటో(83), ఆయనకు కొడుకులు ఇద్దరు, చక్రవర్తి తమ్ముడు, చక్రవర్తి గారి చిన్న కొడుకు గారి కొడుకు హిసాహిటో(10). చక్రవర్తికి మొత్తం నలుగురు గ్రాండ్‌ చిల్డ్రన్‌ ఉంటే.. వారిలో ముగ్గురు అమ్మాయిలే. ఆ అమ్మాయిల్లో మన లేటెస్ట్‌ హీరోయిన్‌ మకో(25) ఒకరు. ఇంకొకరు ఆమె చెల్లి కకో. మూడో మనవరాలు పెద్ద కొడుకు నరుహిటో కూతురు ఎయికో. అకిహిటో తర్వాత నరుహిటోనే చక్రవర్తి అవుతాడు. వచ్చే ఏడాది మేలో చక్రవర్తిగా నరుహిటో బాధ్యతలు స్వీకరిస్తారు.
 
 నిశ్చితార్థం అనంతరం మీడియాతో మాట్లాడిన కాబోయే దంపతులు మకో, కెమెరోలు భవిష్యత్తులో తమ జీవితం ఆనందంగా ఉంటుందని భావిస్తున్నామని చెప్పారు. ఇద్దరం క్లాస్‌మేట్స్‌ అయినా తమ మధ్య బంధం బలపడింది మాత్రం విదేశాల్లో చదువు కోసం వెళ్లినప్పుడేనని వివరించారు. 2013 డిసెంబర్‌లో కెమెరోకు తాను ప్రపోజ్‌ చేసినట్లు మకో వెల్లడించారు.