మలయాళ నటుడు జయరామ్ గురించి పెద్దగా పరిచయ వాక్యాలు అవసరంలేదు. కమల్‌హాసన్ నటించిన ‘తెనాలి’, ‘పంచతంత్రం’ చిత్రాలతో తెలుగు ప్రేక్షకులకు కూడా ఆయన సుపరిచితుడయ్యారు. ఆ చిత్రాల్లో జయరామ్ చేసిన కామెడీని అంత సులువుగా మరచిపోలేరు. అప్పుడు నవ్వించిన జయరామ్ ఇప్పుడు అనుష్కకు విలన్‌గా మారారు? అదేంటీ అనుకుంటున్నారా?. అనుష్క టైటిల్ రోల్‌లో తెరకెక్కుతోన్న ‘భాగమతి’ చిత్రంలో జయరామ్ విలన్‌గా ఎంపికయ్యారు.
 
 ‘పిల్ల జమీందార్’ ఫేం అశోక్ దర్శకత్వంలో యూవీ క్రియేషన్స్ పతాకంపై వి. వంశీ కృష్ణారెడ్డి, ప్రమోద్ ఉప్పలపాటి ఈ చిత్రం నిర్మిస్తున్నారు. ఈ చిత్రంలో తాను విలన్‌గా చేస్తున్న విషయాన్ని జయరామ్ స్వయంగా చెబుతూ..  ‘నేను నటించబోయే తెలుగు సినిమా ‘భాగమతి’లో నా విలన్ గెటప్ ఇదే’ అంటూ ఫేస్‌బుక్‌లో తన గెటప్ తాలూకు ఫొటో పోస్ట్ చేశారు. ఈ ఫొటో చూస్తుంటే.. ఇప్పటివరకూ కనిపించినదానికి  పూర్తి భిన్నంగా జయరామ్  కనిపిస్తారనిపిస్తోంది కదూ!